Министерство за здравство преку комитет ќе се бори против смртноста на новороденчињата


Скопје, 20 април, 2018 - 8:57 (META) 

Во Министерството за здравство вчера се одржала конститутивна седница на новиот состав на Комитетот за безбедно мајчинство, информираат од институцијата. Нов претседател на комитетот е доц. д-р Ана Данева Маркова од Универзитетската клиника за гинекологија и акушерство.

Една од првите задачи на овој комитет ќе биде изготвување на анализа на актуелната ситуација во оваа област и подготовка на акционен план. Ова тело, кое го советува министерот за здравство, ќе треба да даде препораки и предлог – мерките за унапредување на здравјето на мајките и децата, со посебен фокус на намалување на новороденечка смртност.

Членови на комитетот се лица со медицинска експертиза и долгогодишно искуство во областа на гинекологијата, акушерството, неонатологијата, педијатријата и сродни дисциплини, а целта е да се обезбеди сеопфатен пристап кон решавање на проблемите и координација на предложените активности и мерки.


Министерство за здравство ќе презема итни мерки откако починаа 35 бебиња за три месеци


Скопје, 10 април, 2018 - 15:15 (META) 

Министерството за здравство соопшти дека ќе се преземаат итни мерки, откако од почетокот на годината до крајот на минатиот месец починале 35 бебиња на Универзитетската клиника за гинекологија и акушерство во Скопје.

Во тој период на клиниката биле родени 1.155 бебиња, од кои 144 предвреме родени. Починатите 35 бебиња биле од последната група, а од министерството велат дека 80 отсто од нив биле со екстремно неразвиени органи и ниска родилна тежина. Едно било родено навремено, но со проблеми со органите.

Според министерството, бројката од 35 починати бебиња во првото тромесечје на годинава е пад на смртноста, оти во истиот период во 2016 година имало 38 вакви случаи, а минатата година 41 починато бебе.

Од министерството вината ја префрлаат на претходната гарнитура, поради која, како што велат, има недостиг на стручен кадар, оти повеќе од 10 години не се создавале соодветни кадри.

„Преку заедничка соработка, Министерството за здравство, Светската здравствена организација, УНИЦЕФ и УНФПА, во периодот од 19 до 24 март, 2018 година извршија проценка на трендовите на неонатална смртност и подобрување на исходот од бременоста и здравјето на децата. Оваа анализа, како и извештаите од проценката на состојбите во родилиштата очекуваме многу скоро да бидат готови. Врз основа на нив, ќе бидат спроведени дополнителни соодветни и итни мерки за намалување на смртноста на мајките и на новороденчињата“, се вели во соопштението од Министерството за здравство.


По смртност на новороденчиња, Македонија втора во Европа


Њујорк, 20 февруари, 2018 - 10:48 (META) 

Во Македонија едно од 120 новороденчиња починува во периодот до 28 денови од раѓањето, а со тоа земјата е на 105-то место од 184 земји, соопшти УНИЦЕФ.

Македонија е втора по смртност во Европа, по Молдавија, која е на 77 место. Со тоа, земјава котира полошо и од сите соседни земји со исклучок на Косово, кое не е рангирано на новата листа на УНИЦЕФ.  Така, наспроти 1 смртен случај на 120 раѓања во Македонија, во Албанија соодносот е 1 на 161 новороденче, во Бугарија едно на 263, во Србија едно на 270, а во Грција едно на 435 новороденчиња.

Според УНИЦЕФ, иако смртноста на новороденчињата во другите земји од Западен Балкан е во опаѓање, во Македонија таа отскоро е зголемена.

Според листата на светската организација, најлоша е состојбата со смртноста на новороденчињата во Пакистан, каде умира едно на 22 новороденчиња, а најдобро пласирана е Јапонија на 184-т0 место, со само еден смртен случај од 1.111 новороденчиња.

„Стапката на смртност кај новороденчињата е одраз не само на ефикасноста на здравствениот систем, туку и на развиеноста, сиромаштијата и социјалната благосостојба, стапките на заболувања и квалитетот на животната средина во земјите“, вели УНИЦЕФ, кој денеска ја започна светската кампања „За секое дете, ЖИВОТ“.

„Во нашиов контекст, тоа значи обезбедување соодветна пренатална грижа, прегледи и посети за сите бремени жени низ целата земја – особено за руралните жени, кои честопати се најоддалечени од здравствените служби. Затоа треба да се обезбеди пристап и брз трансфер во одделенијата за неонатална интензивна нега во случај на компликации. Во земјава има одлични здравствени работници – но, лекарите и медицинските сестри се добри само колку што е добар системот во кој работат. Не само што треба да постојат меѓународно акредитирани протоколи и упатства засновани на податоци кои ги има во повеќето европски здравствени системи, туку и стручните лица треба да имаат капацитет да ги применуваат“, се вели во препораките.


ВМРО-ДПМНЕ: Хаосот во здравството е резултат на непрофесионално раководење


Скопје, 5 февруари, 2018 - 14:34 (META) 

Владата на Зоран Заев го урниса здравствениот систем. Доказ се секојдневните скандали кои се случуваат и кои, за жал, пациентите и граѓаните ги плаќаат со сопственото здравје и живот, изјави денеска на прес-конференција Драги Јовевски од ВМРО-ДПМНЕ.

– Според информации кои не се потврдени, во последните 10 дена на Гинеколошко-акушерската клиника се случиле неколку смртни случаи на новороденчиња, случаи за кои било строго забрането да се информираат медиумите. Отворено го прашуваме министерот за здравство, Венко Филипче и директорката на ГАК, колку смртни случаи на новороденчиња се случиле, а за кои не била информирана јавноста? Дали е пронајдена опасната бактерија МРСА во креветчињата на новороденчињата и конечно дали некој ќе сноси одговорност – вели Јовевски.

Хаосот за здравството, според Јовевски, е резултат на непрофесионално раководење и додава дека пациентите ризикуваат да бидат приведувани или исфрлани со обезбедување само затоа што се пожалиле на услугата.

– Секој ден слушаме за недостатоци на лекови, смртни случаи од невнимание и слични семејни и лични трагедии. Тие ветуваа унапредување, а на дело се гледа урнисување и импровизација на здравствената услуга дури и во највисоките здравствени установи како што се клиниките во клиничкиот центар во Скопје – потенцира Јовевски.


При крај е Стратегија за намалување на смртноста кај новороденчињата, рече Филипче


Охрид, 20 јануари, 2018 - 15:36 (META) 

Министерот за здравство, Венко Филипче денеска имаше работна средба со раководителите на здравствените институции во Охрид. Целта на посетата, рече тој, е да се запознае со работата на здравствените установи, преку разговор со нивните менаџерски тимови за проблемите во работењето и начините за нивно надминување.

– Во болницата „Свети Еразмо“ разговаравме за текот на реконструкцијата на објектот, како ќе продолжат градежните активности, како и за потребата на установата од соодветен кадар, едукација и доедукација, зголемување на квалитетот на услугите што се нудат и воведување нови – рече Филипче.

Најави дека градежните активности за реконструкција и изградба на објектот ќе продолжат, како и во насока на изнаоѓање најдобри можности тоа да се спроведе без да се попречува тековното работење на установата.

Филипче не кажа дали ќе се реализираат плановите што ги најави претходната раководна гарнитура во Министерството за префрлање на Заводот за кардиоваскуларни заболувања „Свети Стефан“ во рамки на комплексот „Свети Еразмо“.

Што се однесува на проблемот со високата смртност на новороденчиња регистриран минатата година, Филипче истакна дека во тек се интензиви разговори со лекарите во педијатриската служба, во службите за интензивна нега на клиниките за педијатрија и гинекологија така што, рече, во одмината фаза е изготвувањето на Стратегија за намалување на смртноста кај новороденчињата.

– Вклучени се и странски организации под капата на Обединетите нации кои нудат експертиза, а се формира и рамка за тренинг на кадарот за надминување на проблемот, како и планови за структурни промени во рамки на интензивната нега на гинеколошката клиника, во делот каде се лоцирани проблеми – рече министерот за здравство.

Најави и рамка за решавање на проблемот со набавката на инсулин, преку обезбедување поголеми количества и на тој начин елиминација на ризик од дефицит.


Гинекологија има премалку кадар и лоши услови за ризичните новороденчиња


Скопје, 10 октомври, 2017 - 13:26 (META) 

Покрив што протекува и влага сè до подрумот, валкана постелнина, недостиг од медицински кадар на сите нивоа, преголем број згрижени бебиња, зграда во која вентилацијата и системот за регулирање на температурата во просториите не функционираат или одвај функционираат уште од нејзиното пуштање во употреба, немање протечна вода, како и стари инкубатори и голема смртност од 127 новороденчиња од почетокот на 2017 година сè до крајот на септември, се горливите проблеми на Клиниката за гинекологија и акушерство при Клиничкиот центар „Мајка Тереза“ во Скопје, што пред новинарите денеска ги презентираа директорката на Државниот санитарен и здравствен инспекторат, Ирина Сотирова-Бухова, и директорката на клиниката, Викторија Јовановска.

Вонредниот надзор што инспекторатот го спровел по информацијата за смртта на четири новороденчиња во една ноќ во втората половина на септември, но и по барање на директорката Јовановска, утврдил дека на одделот за интензивна и постинтензивна нега, каде што починале четирите новороденчиња, има премалку кадар, а наместо 25 бебиња, колку што е капацитетот, во моментот кога инспекторите влегле, имало дури 49 бебиња, односно по две бебиња во еден инкубатор.

– Клиниката има недостиг од медицински сестри – акушерки, инструментарки, има недостиг на кадар во цитолошката лабораторија, има недостиг на систем за добра вентилација, не функционира системот за терморегулација на просториите, почнувајќи од неонатологија, па во сите други простории – рече Бухова, презентирајќи дел од наодите на инспекторите.

Таа рече и дека била утврдена многу лоша состојба на постелнината и на креветите, немало протечна вода во натариумот, не функционирале стерилизаторите за топлење на пелените, а стерилизаторот за шишенца, според инспекторите, бил стар и дотрајан.

Директорката на клиниката, Викторија Јовановска, ги потврди овие наводи, нагласувајќи дека тоа се проблеми со кои клиниката се соочува години наназад. Јовановска, истакнувајќи дека на Клиниката за гинекологија и акушерство работи веќе 20 години, истакна дека состојбите, освен на одделението каде се згрижуваат ризичните новороденчиња, сепак не се премногу алармантни. На тоа одделение, пак, во секоја од двете смени, за ризичните бебиња се грижат по четири медицински сестри и двајца лекари.

Посочувајќи дека поради изборниот период Клиниката за гинекологија е ограничена во средувањето на состојбите, директорката на клиниката истакна дека по изборите ќе се преземат итни мерки за средување на состојбите, од кои како битна ја и истакна мерката за солидно плаќање на трудот на вработените.

– Замислете, сега сестри за дежурство добиваат по 150 денари, а секоја од нив треба да се грижи за педесетина бебиња. Тоа мора да престане – рече Јовановска.

Како што беше истакнато на денешната прес-конференција во Министерство за здравство, од 300 вработени на клиниката, 60 се сестри, а 86 лекари.

Таа посочи дека за проблемот со системот за вентилација ќе треба да се направи многу, бидејќи зградата е згрешена уште при изградбата, а за другите технички проблеми ќе се преземаат мерки во наредниот период. Јовановска истакна и дека по изборите ќе се почне со разговори за прием на нов кадар, пред сè специјалисти, па ако треба и од странство. Сепак, истакна дека екипирањето на клиниката не е брз процес, оти и ако земат еден специјалист – педијатар, треба најмалку една година да го оспособат за работа со бебиња со висок ризик. Директорката на Клиниката рече и дека итно ќе мора да вработуваат нови медицински сестри.

Таа посочи дека има и влошени односи меѓу лекарите во одделот за интензивна поради плаќањето по учинок, односно како што рече, некои биле фаворизирани од претходните раководни гарнитури.

Според Јовановска, по веста за умирањето на четири новороденчиња во една ноќ се јавиле многу заинтересирани да донираат, но и за тоа ќе треба да се почека да завршат локалните избори, за да може да пристигнуваат донациите.


За смртта на четирите новороденчиња, Комисијата не нашла вина кај медицинскиот персонал


Скопје, 30 септември, 2017 - 12:01 (META) 

Според Комисијата за стручен надзор на работата на Клиниката за гинекологија и акушерство во Клинички центар, која ја истражува смртта на четири новороденчиња во една ноќ минатата седмица, станувало збор за проблематични случаи, а сите предвидени постапки биле извршени од медицинскиот персонал. Во извештајот на Комисијата што го достави Министерството за здравство се вели и дека станувало збор за многу ризични случаи, за кои и смртноста обично е повисока.

„Комисијата констатира дека се работи за високоризични бремености, завршени со предвремено породување во рана гестациска возраст и ниска родилна тежина на новородените, со присутност на медицински компликации во тек на бременоста“, се вели во извештајот.

Според комисијата, сите овие ризик-фактори го отежнуваат нивното преживување и ја зголемуваат стапката на морталитет и морбидитет.

„Предвреме родено машко дете во 25 гестациска недела, со екстремно мала родилна тежина ставено на палијативен третман. Починало во првите 24 часа од раѓањето. Второто е предвреме родено женско дете во 29 гестациска недела, поради ризична бременост, а мајката имла висок притисок и инфекција. Дадена е соодветна медицинска терапија, починало третиот ден од раѓањето. Третото бебе е предвреме родено машко дете во 29 гестациска недела. И тоа било од ризична бременост и веднаш е интубирано по раѓањето. Дадена соодветна терапија. Состојбата се влошила поради што повторно е реинтубирано и извршена е реанимација, но починува. Четвртото е женско бебе родено 27 гестациска недела. На одделот за интензивна нега престојувало 37 дена во исклучително тешка состојба и цело време било на апарати за дишење“, стои во извештајот на комисијата за стручен надзор, формирана од Министерство за здравство.

Потоа комисијата, врз основа на разгледаната медицинска документација и разговорите со здравствените работници од страна, констатира дека е постапено во согласност со предвидените медицински протоколи, соодветен третман пред породувањето, правила индикација за оперативно завршување на предвремено започнато породување, запазени анестезиолошки процедури, успешно спроведена примарна стабилизација на новородените како и соодветно спроведена постнатална интензивна нега и терапија.

Бебињата починале ноќта меѓу четвртокот и петокот минатата седмица, а дежурната лекарка таа вечер е суспендирана.


Четири бебиња во инкубатори починале за една ноќ на Гинекологија, докторка е суспендирана


Скопје, 29 септември, 2017 - 17:59 (META) 

Ноќта меѓу четвртокот и петокот минатата седмица, четири бебиња во инкубатори починале на Клиниката за гинекологија и акушерство во Клиничкиот центар „Мајка Тереза“, потврдија од Министерство за здравство, нагласувајќи дека дежурната докторка таа вечер е суспендирана, а била формирана и комисија за да го истражи случајот. Нејзиниот конечен заклучок се очекува денеска.

Според соопштението, четирите новороденчиња биле или предвремено родени или имале посериозни проблеми и застој во растот.

„Веднаш по добивање на информацијата, Министерството за здравство формираше комисија за стручен надзор и времено е суспендирана докторката, која била на дежурство таа вечер, се до донесување конечен заклучок на Комисијата за стручен надзор, кој се очекува да биде готов во текот на денешниот ден. Исто така, денеска инспектори од Државниот санитарен и здравствен инспекторат вршат вонреден надзор на Клиниката за гинекологија и акушерство, по што јавноста ќе биде информирана за донесените мерки за унапредување на работата во оваа јавна здравствена установа“, се вели во соопштението.

Како што појаснија, едното бебе било родено во 25-та гестациска недела, второто во 27-та недела и имало сериозни невролошки проблеми и проблеми со некои органи, додека другите две биле родени во 29-та недела, од кои едното со претходно утврден застој во растот во матката, а другото со предвремено прснат воденик и бактерија кај мајката.

Од Министерството за здравство велат дека се работи на изготвување стратегија за подобрување на состојбите на Клиникатата за гинекологија и акушерство во Скопје, како и во сите породилишта во државата.


Таравари: Ако гостиварци не ми веруваат, се враќам на лекарската професија


Скопје, 10 септември, 2017 - 10:59 (META) 

Министерот за здравство во заминување, Арбен Таравари, во неделното интервју на „Радио Слободна Европа“ зборува за проблемите во ресорот што ги затекна и со кои се справуваше, како и за својата кандидатура за градоначалник на Гостивар.

– Сега е моментот да видам колку тежам и вредам во мојот град. Ако тие ми веруваат и ми дадат гласови, ќе знам дека вредам во политиката. Ако не ми дадат гласови и мислат дека не треба да продолжам во политиката, јас си имам златен занает – вели министерот за здравство во заминување.

Арбен Таравари, кој важи за истакнат стручњак во својата професија, верува дека во Министерството за здравство ќе има континуитет по него.

– Точно е дека нема да стигнам да ги видам првите резултати од тримесечното работење на директорите, меѓутоа јас мислам дека во Министерството ќе има континуитет и за тоа гарантирам, и во здравствените политики и во идеите што јас ги почнав во првите 100 дена, така што, кој било да е мој наследник, јас се надевам дека тој ќе продолжи по истиот пат, ќе се трасираат и ќе се очекуваат истите резултати што јас ги почнав во првите 100 дена, така што граѓаните нема да почувствуваат дека има некаква промена, само личноста ќе биде друга – вели Таравари.

Запрашан за смртните случаи во текот на неговото министерување, вклучително и за мртвороденчињата, Таравари вели дека комисијата формирана уште пред неговиот мандат, а потоа преоформена во нов состав, треба да даде решенија, односно препораки.

– Пред јас да дојдам за министер, имаше комисија која требаше да ги разгледува овие случаи и да направи одреден акциски план, меѓутоа, за жал, таа комисија не се имаше сретнато речиси две години. Сега направивме нова комисија која ќе се занимава само со смртта на доенчиња. Комисијата ќе даде одреден акциски план, кој Министерството ќе треба да го спроведе, сè со цел до 2021 година да имаме како предизвик да ја намалиме смртта на доенчињата до 20 отсто. Не само Министерството, туку и повеќе невладини организации во Македонија ни стојат на располагање за ова, бидејќи еден од индикаторите кој кажува колку е добра и стабилна здравствената политика во една држава е смртноста на доенчињата. Комисијата веќе е назначена, тие што поскоро треба да дадат одредени чекори и мерки што треба да ги преземеме ние како администрација за да ја достигнеме таа цел, да ја намалиме смртта на доенчињата за 20 отсто за четири години – вели министерот за здравство во неделното интервју за „Радио Слободна Европа“.


ВМРО-ДПМНЕ: СДСМ направи цунами во здравството


Скопје, 9 септември, 2017 - 10:55 (META) 

„Ова што го прави СДС на сопствениот народ и држава е рамно на цунами. Изминативе 100 дена од доаѓањето на власт неспособната влада на СДС ветуваше разно-разни реформи и подобрување на услугите во здравството, а од сето тоа македонските граѓани не видоа ништо“, обвини денеска Дафина Стојаноска од ВМРО-ДПМНЕ на прес-конференција пред Министерство за здравство.

Таа рече дека владата на СДСМ во првите недели направила реваншистичка смена на дирекорите во јавното здравство, а не набавила ниту еден нов медицински апарат или опрема.

– Ветувањето за зголемување на платата на докторите за 100.000 денари, СДС не го реализира ниту за 1 денар. Укинат е ургентниот интернистички центар при кампусот „Мајка Тереза“. Запрени се дури и проектите за едукацијата што врвните странски стручњаци и лекари ја правеа во Македонија, а тоа беше организирано од страна на владата – рече Стојаноска.

Таа порача и дека „неспособноста на владата на СДСМ“ се гледа и во тоа што „за една недела умреа 10-тина дечиња по разни болници, а за ова одговорност од СДС немаше“.