!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Во пожар целосно изгоре училиштето во тетовско Ново Село


Тетово, 22 октомври, 2017 - 19:06 (META) 

Во пожар што избувна денеска попладне, целосно изгоре Основното училиште „11 Октомври“ во Ново Село, Тетовско, информира СВР Тетово.

Во пожарот нема повредени, а опожарено е едно возило што било паркирано во близина на училиштето.

Според полицијата, директорот на училиштето, околу 13.45 часот, во полициската станица Камењане пријавил дека гори покривната конструкција од училиштето.

Тетовската територијална противпожарна единица интервенирала со три противпожарни возила кои успеале да го локализираат пожарот, но не и да го спасат објектот, кој целосно изгорел.

Училиштето, во кое учат вкупно 217 ученици во 13 паралелки, било целосно реконструирано пред две години.


Спасовски: МВР веќе не прислушува нелегално, отворени сме за контрола


Скопје, 1 октомври, 2017 - 13:29 (META) 

„Одговорно тврдам дека веќе не се прислушува нелегално и за тоа може да имаме експертски контроли, собраниски контроли во секое време. Ние стоиме на располагање и сме отворени, врз основа на законските прописи, да се направат такви контроли“, вели вицепремиерот и министер за внатрешни работи, Оливер Спасовски, во неделното интервју на „Радио Слободна Европа“.

Тој, исто така, ги отфрла обвинувањата од ВМРО-ДПМНЕ дека МВР е вклучено и злоупотребено во кампањата на СДСМ, со тоа што се извршени полициски интервенции врз активисти на ВМРО-ДПМНЕ и врз кандидатот за градоначалник во Ново Село.

– Таквите обвинувања ги отфрлам во целост. Луѓето што МВР си го нарекуваа МВРО немаат никаков кредибилитет да зборуваат за тоа дека некој партизира институција на системот или поточно го партизира МВР. За нас врвен приоритет е да имаме фер и демократски избори, затоа се подготвуваме, правиме обука на сите полициски службеници што ќе учествуваат во спроведувањето на изборите, заедно со ОБСЕ – вели министерот за внатрешни работи.

Тој вели и дека МВР не можело да чека да поминат изборите за да се поднесат кривични пријави против градоначалници од ВМРО-ДПМНЕ, од кои дел се повторно кандидати на партијата за тие функции.

– Ако го видите извештајот на Прибе, јасно укажува дека не се преземаат доволно мерки кои би ја задоволиле правдата во Македонија. Од тој аспект, навистина временски детерминиран систем или модел, кога и на кој начин ќе реагира МВР е ирелевантно. Ние мора да ги утврдиме фактите и доказите и без разлика дали е некој на одредена позиција или е обичен граѓанин, доколку постојат аргументи и факти што треба да бидат процесуирани со закон, тоа треба да се направи. Се поставува прашањето зошто тие аргументи и факти биле чувани некаде во фиоки или не биле процесуирани досега и навистина не може и не се согласувам дека Министерството за внатрешни работи не треба да биде активно и дека не треба да ги спроведува своите овластувања кога било, кога се работи за криминал – вели Спасовски.


ВМРО-ДПМНЕ: Кривичната пријава за градоначалникот Блажо Велков е монтирана


Скопје, 26 септември, 2017 - 16:24 (META) 

Опозициската ВМРО-ДПМНЕ порача дека кривичната пријава што СВР Струмица ја поднесе за градоначалникот на општина Ново Село, Блажо Велков, е монтирана, но дека тоа нема да го спаси владејачкиот СДСМ од пораз на локалните избори на 15 октомври.

„Монтираните кривични пријави на хунтата СДС против нашите градоначалници нема да ги спасат од изборниот пораз кој ќе им го испорачаат граѓаните. Кривичната пријава против градоначалникот на Ново Село, Блажо Велков, е уште еден притисок на СДС и излезно сценарио од скандалот во кој полицијата на Спасоски малтретираше активисти на ВМРО-ДПМНЕ. Тоа што јавноста очекува се пријави за злоупотребата и за мешањето на државата и на партијата СДС и очигледото користење на службени возила на Зоран Заев на партискиот митинг во Битола. Обвинителството и партиското судство на СДС молчат“, порача ВМРО-ДПМНЕ.


МВР поднесе кривична пријава за градоначалникот на Ново Село


Струмица, 26 септември, 2017 - 14:57 (META) 

Пријава за злоупотреба на службената положба против градоначалникот на општина Ново Село, Блажо Велков, поднесе СВР Струмица. Како што соопштија од полицијата, првиот човек на Општината се товари за одобрување службеници во општината да користат службени возила без патен налог за превезување пропаганден материјал за изборите.

СВР Струмица соопшти дека пријавата се темели на член 353, став 1 од Кривичниот законик  на Република Македонија.

Според пријавата, вчера во 19 часот, на магистралниот пат Струмица – Радовиш, патрола на сообраќајната полиција сопрела „фолксваген голф“ со струмички таблички, сопственост на Општина Ново Село, управувано од А.К. од Ново Село, службеник во општинната, а со него во автомобилот биле уште двајца ввработени во општинската администрација, односно В.К. и Е.П.

Според полицијата, возачот не поседувал патен налог за управување на автомобилот, во кој имало изборен пропаганден материјал, преземен од печатница во Кочани, а бил за кандидати за градоначалник на општините Ново Село, Босилово и Василево од една политичка партија.
За настанот бил известен јавен обвинител, пред кого биле изведени пријавените службеници во Општина Ново Село, кои претходно биле приведени.


Неуспешен референдумот за рудниците во Ново Село


Струмица, 17 септември, 2017 - 20:45 (META) 

Референдумот против отворањето рудници во општина Ново Село е неуспешен, бидејќи на гласачките места не излегоа потребните 50 отсто плус еден од вкупниот број граѓани на општината со право на глас.

Причина за неисполнувањето на цензусот, како што пренесуваат медиумите, е тоа што речиси половина од жителите на општината се во странство.

Според „Телевизија 24“, речиси сите жители на Ново Село кои денеска излегле на референдумот гласале против отворањето на рудникот за злато Иловица. Тие сметаат дека со отворањето на рудникот ќе се уништи земјоделството од кое егзистираат безмалку сите жители на општината.

По Валандово и Босилово, ова е трет референдумот за рудниците кој е неуспешен поради неизлезност.


Советот за етика во медиумите и ЗНМ го осудија инцидентот во Општина Ново Село


Скопје, 26 јули, 2017 - 12:41 (META) 

Советот за етика во медиумите на Македонија (СЕММ) го осуди вчерашниот инцидент во кој екипа на струмичката телевизија „Канал Вис“ била спречена да ја следи јавната седница на Советот на Општина Ново Село од градоначалникот и од советник во општината и ѝ биле упатени навреди и недолични зборови.

Советот за етика повикува да се преземат неопходни мерки за расчистување на ваквите настани, особено кога новинарот е спречен да информира за теми од широк јавен интерес, како што било случај на вчерашната седница, на која се расправало за одлука за референдум за отворање рудници.

„Затвореноста на институциите, организациите или функционерите не може да биде метод со кој ќе се спречува известувањето за теми и за прашања од интерес на јавноста. Од друга страна, новинарите мора да бидат ослободени од какви било закани и притисоци, а државата, во согласност со член 10 од Европската конвенција за човекови права, е одговорна за преземање на сите активни мерки за да се создаде и да се одржува поволна клима за слобода на изразување“, се вели во реакцијата.

Инцидентот го осуди и Здружението на новинарите на Македонија (ЗНМ).

„Колешката Стојне Митева и снимателот Кире Пиличев биле навредувани со најгрди зборови и спречени да известуваат од седницата на Советот на Општина Ново Село одржана вчера, а на која се расправало за распишување референдум за или против работата на рудникот Иловица. За ЗНМ е недозволиво градоначалник на една општина, во случајов Блажо Велков, да спречува новинари во професионално работење, иако станува збор за јавна седница, какви што треба да бидат сите седници на еден општински совет. Уште понедолично е колегите да бидат навредувани од советници избрани од граѓаните. Тие наместо да се залагаат за отчетност и за транспарентност пред избирачите, а тоа најдобро се прави преку медиумско пренесување на нивната работа, се обидуваат да ги спречат новинарите во исполнување на своите обврски“, се вели во соопштението од ЗНМ, кое побара одговорност од градоначалникот и од советникот.

Градоначалникот на општина Ново Село, Блажо Велков, не дозволил на новинарската екипа на „Канал Вис“ да го снима неговото излагање за референдум за рудникот Иловица. На вчерашната јавна седница на Советот, тој го натерал снимателот да ја исклучи камерата, а советникот на ВМРО-ДПМНЕ, Божин Јованов, ги пцуел и ги навредувал медиумските работници на телевизијата, информираат од „Канал Вис“.


МНР реагира до Атина и Брисел за блокадата на границата на Евзони


Скопје, 16 февруари, 2017 - 16:46 (META) 

Министерството на надворешни работи (МНР) официјално реагирало до грчките власти како и до Европската комисија за блокадата на граничниот премин Евзони, потврдија од МНР за „Мета“.

Од Грција по дипломатски пат добиле објаснување дека и тие вложувале напори за решавање на проблемот и правеле се што можат, бидејќи и тие трпеле штети, а не само Македонија.

Во писмото до Европската комисија, МНР навеле дека со тековната блокада на граничниот премин која трае веќе 18 денови се крши Спогодбата за стабилизација и асоцијација со ЕУ која гарантира слободно движење на стоки и луѓе и е потпишана од Грција.

Од МНР го посочуваат пристаништето во Драч како алтернатива за дел од македонските компании, во зависност од товарот што се превезува.

Поради блокадата на грчката граница од страна на грчките земјоделци, македонските превозници ги користат граничните премини Меџитлија и Ново Село.


Камионите со нафта се пренасочуваат преку Бугарија, превозот поскапи


Скопје, 8 февруари, 2017 - 15:47 (META) 

Камионите што превезуваат нафта и нафтени деривати, од граничниот премин Евзони се пренасочуваат кон Ново Село, Бугарија, вели за „Мета“, Билјана Муратовска од Здружението на превозници „Макам-транс“.

– Поради настанатата ситуација, одобрено е преку овој граничен премин да поминува акцизна стока. Поради барањето алтернативни патишта, транспортерите ја зголемија цената за превозот за еден тон нафта, но важно е дека камионите се движат и нема поголем застој – додава Муратовска.

Во однос на другите превозници, таа вели дека поисплатливо е превозот да поскапи, отколку стоката да стои.

– Трошоците се многу поголеми ако стоката стои бидејќи се плаќа лежарина за брод и за магацин – додава Муратовска.

Грчките земјоделци веќе деветти ден го блокираат граничниот премин Евзони, а се заканија дека ќе ги радикализираат протестите.

Министерот за економија, Дритон Кучи, вчера изјави дека Министерството за економија ќе спречи да дојде до каква било нафтена криза во земјава.

– Од секторот за енергетика ми укажаа дека веќе треба да се справиме со можната нафтена криза и затоа од денеска ќе ги интензивираме состаноците за надминување на проблемот – рече Кучи.

Вчера, претседателот на Стопанската комора на Македонија, Бранко Азески, напиша писмо до претседателот на Унијата на грчките трговско-индустриски комори, Константин Михалос, како и до амбасадорот и шеф на Канцеларијата за врски на Грција во Македонија, Димитриос Јанакакис, со кое укажа дека блокадите на граничниот премин Евзони негативно се одразуваат врз економско-финансиското работење на стопанството во Македонија, а негативни ефекти чувствува и стопанството во Грција.


Падна старата куќа подарок од Жан Митрев за Општината Штип


Штип, 19 јуни, 2016 - 16:35 (META) 

Силен трескот ги разбуди жителите на штипско Ново Село изутрината околу седум часот, по уривањето на една од четирите стари куќи подарени од кардиохирургот Жан Митрев. По првиот трескот се слушнал уште еден послаб. Две третини од куќата целосно се урнаа. Старите греди, сведочат новоселци, се закануваа на минувачите, кои во тоа време се движеа кон Градски гробишта за празникот Духовден. Една од гредите завршила на лозницата на соседната куќа. За среќа, нема повредени.

Куќата почна да паѓа лани во октомври по поројните дождови. Жителите на Ново Село побара Општината да ја урне распадната куќата на која е сопственик. Општината Штип е во неколкумесечно исчекување на донатор или да помине проектот поред Европската Унија за реконструкција на четирите стари куќи. Меѓутоа, граѓаните велат дека тоа не ја попречува Општината да ги урне руинираните куќи на чии места треба да се градат нови, во истиот автентичен стил. Општината тогаш соопшти дека со месеци чека дозвола за уривање од Управата за заштита на културното наследство, поради тоа што куќите се заштитено културно богатство. Богатството, во случајот, можеше да чини човечки животи.

По уривањето на куќата, попладнето шутот беше расчистен, улицата оспособена за минување, но граѓаните на Ново Село останаа без одговор на прашањата кога Општината ќе поведе сметка за руинираните куќи пред да се случи полошо.


Обилниот дожд не донесе големи поплави во источна Македонија


Штип, 13 март, 2016 - 15:00 (META) 

Насочувањето на облаците кон јужниот дел на Македонија го спаси кочанскиот и штипскиот регион од поголеми поплави и излевање на реката Брегалница. Во Берово врне снег, додека во пониските делови ситен дожд.

Од претходните врнежи поплавени се земјоделски површини во општината Чешиново-Облешево, а во одбрана на куќите во ризичното село Уларци, превентивно се распоредени вреќи со песок покрај реката Брегалница.

Сепак, врнежливата ноќ ги оставила без сон жителите на селото Чифлик, кое беше поплавено минатата година. Жителите сведочат дека цела ноќ станувале да проверат до каде е водата.

– Стравуваме од нови поплави. Поучени од ланските поплави, цела ноќ станувавме да провериме по дворовите до каде е дојдена водата. Само Господ да не спаси! Немаме каде да одиме, дома сме, па ќе видиме – сведочат жителите на Чифлик.

Според нив од дома ја слушаат бучава од реката што дополнително им внесува паника. Жителите се жалат дека водата за пиење е заматена и не е за употреба. Од Црвениот Крст била доставена пакувана вода, што треба да му се подели на населението.

Од друга страна, институциите смируваат и велат дека состојбата се следи и дека веќе се преземени превентивни мерки.

– Има одлив на водата на повеќе места, но направени се повеќе зафати за заштита – вели Никола Гоцев, директорот на регионалналната водостопанска организација.

Според Гацов, пробиен е одоводниот канал за Чешиново, а со механизација се расчистувани каналите на Злетовска река.

Но, и натаму е отсечено селото Теранци, чии жители понекогаш го користат заобиколниот пат преку Зрновски, или со цел ризик поплавениот пат до Облешево.

Сите погледи се свртени кон браната Калиманци, која прелива веќе неколку дена. Од водостопанство велат дека нема потреба од паника, бидејќи состојбата е под контрола.

Најризично останува штипско Ново Село, каде се поставени насипи. Меѓутоа, според надлежните, доколку дојде до поголем прилив, водата ќе се испушти во нивите во кочанско со цел да се спасат куќите во Ново Село.

Во штипско засега само се следи состојбата, но поголеми излевања на водата нема. Превентивно се покриени бунарите во реката Брегалница, од каде со вода се снабдува градот.