АВМУ: ТВ „Нова“ и „Алфа“ се пристрасни, а другите медиуми пласираат псевдовести


Скопје, 12 септември, 2017 - 11:04 (META) 

Радиодифузерите продолжуваат да ја следат веќе востановената уредувачка политика при известувањетo, при што особено се истакнува непочитувањето на професионалното начело за еднаков третман на различните гледишта, се вели во извештајот од надзорот на изборното медиумско известување за периодот од 27 август до 5 септември 2017 година, што го спроведува Агенцијата за аудио и аудиовизуелни медиумски услуги (АВМУ).

Агенцијата ги издвојува ТВ „Алфа“ и ТВ „Нова“ поради начинот на известување, односно непочитување на професионалното начело за еднаков третман на различните гледишта. Притоа се одбележани и уште три други прекршувања сторени од телевизијата „Нова“.

„Во емисијата „Отворено студио“, со наслов „За или против геј бракови“, емитувана на 10 август 2017 година, телевизијата постапи спротивно на начелата за еднаквост на правата и слободите на луѓето по сите основи и за објективно и непристрасно прикажување на настаните“, се вели во извештајот.

За оваа емисија вчера реагираше и Советот за етика на медиумите, велејќи дека мислења биле камфулирани како факти и било предизвикано засилување на стереотипите.

Втората работа што е одбележана од АВМУ во врска со ТВ „Нова“ е  прилогот „Обвинителен акт против гинекологот кој презентирал лажна бременост на пациентка“, емитуван на 31 август 2017 година, кој според оценката на регулаторот не го почитувал и начелото на презумција на невиност.

За телевизијата „Алфа“ се вели дека има голем обем на информации во вестите за едно политичка опција, што укажува на непочитување на професионалното начесно за еднаков третман на различните гледишта во дневно-информативните емисии. Кај ТВ „Нова“, пак, регулаторот таков пристап забележал во целокупната програма.

„Телевизијата донесе уредничка одлука директно да ги пренесува прес-конференците на претседателот на ВМРО-ДПМНЕ, Никола Груевски, на 3 и 5 септември. Ваков третман не добиваат прес-конференциите на ниту еден друг субјект“, се вели во извештајот на АВМУ.

Во однос на следењето на сите медиуми, АВМУ забележала создавање, како што се вели, „псевдовести“ и „псевдонастани“.

„Исто така, продолжува практиката при известувањето за комуникацијата на релација власт – опозиција, при која неретко се јавуваат „псевдонастани“, кои потоа се преточуваат во „псевдовести“, некои од телевизиите и радијата да држат дистанца од ваквата матрица, а некои од нив – да ја пресликуваат“, велат од АВМУ.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Совет за етика на медиумите: Дебатна емисија на телевизија „Нова“ разгорува стереотипи


Скопје, 11 септември, 2017 - 11:44 (META) 

Комисијата за жалби при Советот за етика на медиумите на Македонија ја прогласила за основана жалбата поднесена од Коалицијата „Сексуални и здравствени права на маргинализираните заедници“ против телевизија „Нова“ за дебатната емисија „Отворено студио“. Станува збор за дебатната емисија со наслов „За или против геј бракови“, која се емитуваше на 17 јули 2017 година.

Во својата одлука, Комисијата за жалби најпрво утврдува дека „водителот на емисијата неколкупати наметнува сугестивно мислење во однос на темата, кое во себе содржи елементи што можат да поттикнат дискриминација по различна основа (во случајот, сексуална)“. Со тоа, Комисијата утврдила дека се прекршени членовите 1, 10, 11 и 13 од Кодексот на новинарите. Покрај тоа, Комисијата утврдила дека водителката на дебатата, своите мислења ги камуфлирала како факти, со што водела кон дезинформирање и манипулација со публиката.

„Во емисијата за која станува збор, водителката во ниту еден момент не се обиде да реагира на исказите на говорниците. Наместо тоа, таа дополнително помага во засилувањето на стереотипите кон хомосексуалците во текот на емисијата, бидејќи ги поврзува хомосексуалните бракови со „разорувањето на македонското семејство“. Дополнително, на дебатата немаше претставници од ЛГБТИ-заедницата, кои би го кажале својот став за темата“, се вели во образложението.

Од Коалицијата „Сексуални и здравствени права на маргинализираните заедници“ додаваат дека преку оваа емисија, медиумот фаворизирал ставови кои содржат говор на омраза против лицата со хомосексуална ориентација и ги стигматизирал нехетеросексуалците преку изјави кои имаат цел да создадат ирационален страв од ЛГБТИ-лицата и да поттикнат вербално и физичко насилство кон нив.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Сирија ќе добие банкнота со ликот на Башар ал Асад


Дамаск, 4 јули, 2017 - 13:02 (META) 

Првпат во 17-годишното владеење на претседателот Башар ал Асад, Сирија в недела ќе ја добие првата банкнота со неговиот лик.

Станува збор за нова банкнота од 2.000 сириски лири (вредност на 3,9 американски долари), соопшти Централната банка на Сирија. Потегот се образложува со оштетувањето на банкнотите што се во употреба.

Досега сириските банкноти беа со слики на историски места или настани или со ликот на Хафиз ал Асад, таткото на сегашниот сириски претседател.

Потегот се случува во време кога владините сили постигнуваат победи против вооружените бунтовнички групи во земјата. Сепак, во текот на шестгодишната војна, националната валута доживеа огромна инфлација. Ако во 2011 година за 47 лири се купуваше еден долар, сега за тоа се потребни 517 лири.


Димовски: СЈО се пресметува со медиумите кои Заев ги прогласи за непријатели


Скопје, 17 март, 2017 - 16:28 (META) 

„Специјалното јавно обвинителство е целосно поставено и трансформирано како извршен орган на Социјалдемократскиот сојуз. Во моментов СЈО ја реализира финалната фаза од битката на аболираниот криминалец Зоран Заев против сите медиуми што не се под контрола на Бихаќка“, изјави на прес-конференција членот на извршниот комитет на ВМРО-ДПМНЕ, Илија Димовски.

Според Димовски, СЈО влегува во отворена пресметка со сите медиуми кои беа прогласени лично од Зоран Заев за негови најголеми непријатели.

„СЈО крајно непрофесионално и селективно врши притисок и удира врз медиумите, обидувајќи се да ги цензурира и да ги заплаши за да престанат да известуваат за политиките на СДСМ кои се спротивни на највисоките државни и национални интереси на Македонија. СЈО како партиски цензор на СДСМ настапува и спротивно на членот 10 од Eвропската конвенција за заштита на човековите права“, изјави Димовски.

Тој додаде дека прва на удар е телевизија „Нова“.

„Телевизија „Нова“ е на удар затоа што не ги премолчува и не ги релативизира протестите кои секојдневно се случуваат на улиците, секаде низ државата. Телевизија „Нова“ без цензура го пренесува гневот и револтот на народот од прифаќањето на тиранската платформа и несогласувањето со пазарењето со државните и национални интереси, што го прави СДСМ“, додаде Димовски.

Според него, ВМРО-ДПМНЕ гласала за СЈО кое професионално, непристрасно и неселективно ќе си ја врши својата работа.

„ВМРО-ДПМНЕ не гласаше за СЈО што ќе биде прв соработник и послушник на аболирани криминалци и ќе служи како општинска организација на криминогеното раководство на Социјалдемократскиот сојуз. ВМРО-ДПМНЕ не гласаше за СЈО кое ќе заплашува, цензурира и затвора медиуми. ВМРО-ДПМНЕ не гласаше за СЈО кое ќе вработува роднини и партиски членови од СДСМ и ќе ангажира функционери и поданици на аболираниот криминалец Зоран Заев како експерти“, додаде Димовски.

Тој уште еднаш кажа дека ВМРО-ДПМНЕ порачува дека секој треба да работи согласно законот и Уставот, како и дека секое прекршување на позитивните законски норми и на Уставот на Република Македонија повлекува морална, но и правна одговорност.


Ад хок телото за медиуми поведе прекршочни постапки против две телевизии


Скопје, 29 ноември, 2016 - 13:39 (META) 

Ад хок телото за медиуми поведе прекршочни постапки против телевизиите „Нова“ и „Алфа“, за прекршоци од членот 75, став 1 на Изборниот законик.

Комисијата на денешната седница отфрли предлози за поведување прекршочни постапки против телевизиите „Телма“ и „24 Вести“, за истиот член од законот, со кој се бара правично, балансирано и коректно известување во текот на предизборниот период.

Вчера, Комисијата донесе одлука за поведување прекршочна постапка и против телевизија „Сител“, а беше отфрлено барањето за постапка против телевизија „Алсат“.


Јанакиески: СЈО ме товари за нешто што не постои


Скопје, 5 март, 2016 - 18:34 (META) 

Поранешниот министер за транспорт и врски, Миле Јанакиески, за телевизијата „Нова“, во првото интервју по оставката, за акцијата „Титаник“ во која беше отворена истражна постапка и против него, рече дека „го товарат за нешто што не постои“ и дека „тоа е една политичка хајка кон луѓе што тие ги утврдиле дека се влијателни во ВМРО-ДПМНЕ“.

– На самата прес-конференција не беа приложени никакви докази, немаше никакви аргументи, ни зошто се поднесува барање за истрага, ниту, пак, барање за притвор. Во самиот конкретен акт што се однесува за мене, немаше ниту еден материјален доказ, ниту, пак, исказ. За жал, сè уште нашите адвокати, нашите бранители ги немаат добиено документите од СЈО. Се надевам дека тоа многу скоро ќе го направат, но она што го предочија е дека воопшто не е доставен ниту еден материјален доказ, а мене ме товарат како шеф на изборен штаб. Такво нешто не постои ниту правно. Значи, не постои таков документ дека јас сум бил шеф на изборен штаб, ниту, пак, во органограмот на ВМРО-ДПМНЕ постои таква функција. Значи ме товарат за нешто што не постои – вели Јанакиески.

Во однос на случајот со објектот „Космос“, Јанакиески изјави дека тој не бил урнат од политички прични туку дека „сите судски инстанци во Македонија имаат потврдено дека објектот е урнат во согласност со сите позитивни законски прописи.“

Поранешниот министер Јанакиески смета дека Специјалното јавно обвинителство работи по инструкции на СДСМ.

 


СДСМ: „Нова“ емитувала 1.545 секунди позитивни прилози за ВМРО-ДПМНЕ, а за СДСМ ниту една


Скопје, 4 март, 2016 - 11:51 (META) 

„Медиумите под палката на Никола Груевски и на ВМРО-ДПМНЕ продолжуваат да шират невистини и да ја бранат „фамилијата“ од криминалот за последните 10 години. Полека, но сигурно, приматот на прв медиумски пропагандист го зема телевизијата „Нова“ на Сеад Кочан“, се вели во соопштението на СДСМ.

Од опозициската партија додадаваат дека за само три дена, според надзорот по идентична методологија утврдена од ОБСЕ/ОДИХР, телевизија „Нова“ емитувала 1.545 секунди позитивни прилози за ВМРО-ДПМНЕ.

– Позитивни прилози за СДСМ нема. Но, затоа, телевизијата „Нова“ емитувала дури 1.014 секунди негативни прилози за СДСМ. За ВМРО-ДПМНЕ нема ниту една секунда негативен, ниту неутрален прилог – се вели во соопштението на СДСМ.

Оттаму потстетуваат дека Сеад Кочан е сопственик и на „Трансмет“ и на телевизијата „Нова“ и дека само во една година, само преку Министерството за земјоделство шумарство и водостопанство, добил тендери тешки близу пет милиони евра, пари на граѓаните.


ВМРО-ДПМНЕ: Николовски да објасни за овоштарникот на Јанева


Скопје, 1 март, 2016 - 16:53 (META) 

Љупчо Николовски сериозно му конкурира со своите лаги на некрунисаниот крал на лагите, аболираниот мултимилионер Зоран Заев, реагираат од ВМРО-ДПМНЕ на прес-конференцијата на дополнителниот заменик-министер за земјоделство, шумарство и водостопанство, Љупчо Николовски.

„Очигледно Љупчо Николовски добил партиска задача да глуми и квазиексперт за слобода на медиуми. Кога веќе решил да излегува на прес-конференции и да се бламира со куп лаги и со манипулации, Николовски требаше да излезе и на јавноста да ѝ ја каже вистината. Залудно се обидува да го сокрие работењето на медиумите како „Телма“ и „24 Вести“ или порталите финансирани од Сорос кои им отстапуваат најмногу простор на тезите и на ставовите на СДСМ“, пишува во соопштението на владејачката партија.

Од ВМРО-ДПМНЕ бараат Николовски да објасни и за „овоштарникот“ на специјалната јавна обвинителка Катица Јанева.

„Бидејќи на земјоделскиот експерт Љупчо Николовски му избегала информацијата за скандалот со овоштарникот на Катица Јанева, очекуваме дека медиумскиот експерт Љупчо Николовски ќе може да го објасни овој еклатантен пример на медиумска неизбалансираност“, стои во партиското соопштение.


Николовски: Наместо кај вистинските земјоделци, парите завршуваат кај сопственици на медиуми


Скопје, 1 март, 2016 - 15:48 (META) 

Изјавите на министерот Михаил Цветков откриваат нови сомнежи дека сè уште се прават злоупотреби во Министерството за земјоделство и дека наместо кај вистинските земјоделци, парите завршуваат кај сопственици на медиуми, блиски до власта, изјави дополнителниот заменик-министер за земјоделство шумарство и водостопанство, Љупчо Николовски.

Според него, „со парите на граѓаните, со парите на вистинските земјоделци, се финансираат медиумите на Никола Груевски задолжени да шират лаги и да ја кријат вистината за криминалното владеење на фамилијата“.

– Според парите што ги имаат добиено „Трансмет“ и „Силекс неметали“, фирми семејно поврзани со телевизиите „Нова“ и „Сител“, Министерството за земјоделство како да е специјализирано за субвенционирање на медиумите што одработуваат за Груевски. Веќе објавивме дека сопственикот на телевизијата „Нова“, Сеад Кочан, којшто е сопственик и на фирмата „Трансмет“, за 17 месеци преку Министерството за земјоделство добива тендери во висина од 5 милиони евра. Но, министерот Цветков неодамна во интервју изјави дека „Трансмет“ има добиено тендер во висина од 8,5 милиони евра за изградба на системот за наводнување Равен – Речица, а најави и можност фирмата на Сеад Кочан да добие нов тендер за браната Речани, којшто е во тек – изјави Николовски.


„Џентерм“ од САД планира идната година да отвори фабрика за автокомпоненти во Прилеп


Скопје, 17 декември, 2014 - 12:14 (META) 

Компанијата „Џентерм“ со седиште во местото Нортвил, сојузна држава Мичиген, САД, извести дека има намера во четвртиот квартал од 2015 година да отвори нова фабрика во близина на Прилеп. Ова предмалку на својот фејсбук-профил го најави и премиерот Никола Груевски.

Во првата фаза, фабриката ќе биде на површина од околу 6.000 квадратни метри и ќе произведува комплетна линија на уреди за затоплување на автомобилски седишта и други индустриски производи. Во период од три години, фабриката се очекува да достигне полна вработеност и да обезбеди 1.000 работни места, се вели во соопштението објавено на веб-страницата на компанијата.

Претседателот и извршен директор на „Џентерм“, Даниел Р. Кукер, истакна дека новата фабрика е доволно голема за дополнителна експанзија за да ги задоволи потребите од очекуваниот пораст на зголемувањето на европските операции на компанијата.

– Наши клиенти се сите големи производители на автомобилска опрема во светот и како нашата палета на производи продолжува да расте, за нас е сè поважно да имаме глобална мрежа на производствени капацитети – истакнува Кукер, додавајќи дека „Џентерм“ има фабрики во Украина, Мексико, во Лангфанг – Кина, а од неодамна отворена е и фабрика за електронски компоненти во Шенжен, Кина.

– Ние, исто така, имаме и силен специјализиран бизнис за кабли во Европа, кој продолжува да се зголемува. Веруваме дека Македонија ќе ни обезбеди компетитивна средина за да можеме да ги спроведеме нашите амбициозни планови за пораст во Европа и на други места во светот – додава Кукер.
„Џентерм“ произведува и продава автоуреди за управување со температури за широк дијапазон, чија намена е греење или ладење. Производите во автомобилската индустрија на компанијата вклучуваат активно затоплени или разладени внатрешни системи (вклучувајќи затоплени седишта, волани, компоненти за потпирање и слично), кабловски системи и други електронски уреди. Компанијата развива поефикасни материјали за термоелектрични и системи за употреба на искористената топлина, како и за генерирање електрична енергија за автомобилскиот пазар, кои можат да имаат бројни апликации во уредите за домаќинствата, како и на индустриските и технолошките пазари.

В.П.