!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Бибер: Владата во Македонија може да го разбие циклусот на цинизам за проширувањето на ЕУ


Трст, 21 јули, 2017 - 16:51 (META) 

Новата влада во Македонија може да биде импулс за разбивање на циклусот на цинизам што владее во Европската Унија и во земјите од Западен Балкан, во однос на проширувањето на Унијата, вели Флоријан Бибер, професор на Универзитетот во Грац и член на советодавната група за политиките за внесување на Балканот во Европа, во интервју за „Јуропиан Вестерн Балканс“.

Бибер го дефинира ваквиот став одговарајќи на прашањето за тоа која, според него, е најважната причина за забавувањето на процесот на европската интеграција на земјите од Западен Балкан, односно дали е тоа „заморот од проширување“ кај ЕУ или, пак, недостигот од волја за реформи во регионот.

Според него, станува збор за ситуација што наликува на прашањето за јајцето и за кокошката, односно дека двете работи не може да се раздвојат.

– Недостигот од волја за реформи се темели на фактот дека земјите од Западен Балкан не ги гледаат наградите во однос на членството во ЕУ. Дури и заморот е одвраќање, а политичките лидери на ЕУ чувствуваат дека не можат да го промовираат проширувањето бидејќи нивните граѓани не го сакаат тоа, што не е сосема искрено. Да, повеќето граѓани на ЕУ се скептични за проширувањето, но, од друга страна, проширувањето не е прашање со висок приоритет. Проширувањето не им се допаѓа многу, но истовремено не се ниту особено против. Ако владите на ЕУ направеа повеќе во ситуацијата, можеа да го протуркаат проширувањето. Но, владите се дефокусирани од сите други кризи и не сакаат да вложат енергија во тоа. Недостигот од реформи во регионот и недостигот од посветеност во ЕУ се во симбиоза. Мора да се скрши циклусот – вели Бибер.

Во тој контекст, тој нагласува дека одговорот можеби е во нова влада и како пример ја наведува Македонија.

– Новата влада е очигледно многу посветена на реформите и на желбата за враќање на патот кон ЕУ и тоа може да помогне во ставање крај на статус кво шемата. Во моментов, државите од Западен Балкан се цинични околу тоа дека ЕУ навистина не ги сака, а ЕУ е цинична дека регионот не е подготвен да ѝ се приклучи. Граѓаните се цинични во однос на нивните влади и во однос на ЕУ. Тие мора да го разбијат овој циклус на цинизам и да кажат: „Ако имаме заедничка цел и сме посветени на пристапувањето во ЕУ, можеме да направиме нешто“. Можеби новата влада во Македонија ќе биде импулс за промена на овој вид на динамика – заклучува Бибер.

Интервјуто со Бибер е направено за време на Форумот за граѓанско општество што се одржа во Трст на 11 и 12 јуни оваа година.


Коѕиас: Новата влада ја потсмири реториката, но ништо суштински не е сменето


Брисел, 17 јули, 2017 - 14:35 (META) 

Новата влада ја потсмирила реториката и има покоректна комуникација, но сепак ништо суштински не е сменето, изјави шефот на грчката дипломатија Никос Коѕиас во интервју за „Еуроактив“, за новата македонска влада.

Тој истакна дека за време на својата посета на Скопје во август, ќе разговара со македонскиот министер за надворешни работи, Никола Димитров, за прашањата што не биле отворени на средбата во Атина, меѓу кои најверојатно и спорот за името.

– Проблемот со Скопје не е тоа што има еден или друг став. Проблемот е нешто што самата Европа мора да го разбере. Европа мора на добар начин да ги едуцира лидерите во Скопје за концептот на политички компромис и за културата на политички консензус. Кога станав министер за надворешни работи, им кажав на сите страни дека на некој начин „ги разгаливме“, бидејќи несоодветното однесување кон нас ќе го применат и во домашната политика. Сите видовме како Груевски го примени истиот концепт во својата земја – вели Коѕиас.

Тој, исто така, додава дека им порачал на своите пријатели во ЕУ да не создаваат „втор Груевски“, затоа што Заев ги има сите услови да разбере и да се отвори кон реално решение.

– Ќе работиме за ова решение и се надевам дека ќе добиеме одговор и ќе се избегне мешањето на трети страни кои ќе го отежнат пристапот кон ова решение – вели Коѕиас.


Нимиц: Не носам нов предлог за името, доаѓам да ја тестирам подготвеноста за напредок


Скопје, 1 јули, 2017 - 18:59 (META) 

Овојпат не носам ново предлог-решение во Скопје, доаѓам да разговараме за напредокот во преговорите со Атина околу спорот за името, вели специјалниот пратеник на Обединетите нации во разговорите меѓу Македонија и Грција во интервју за емисијата „360 степени“ на телевизијата „Алсат М“.

Нимиц, кој од денеска до 4 јули ќе престојува во Скопје, на покана на македонската Влада, вели дека е добро што новиот државен врв покажува волја разговорите да продолжат.

– Во Скопје има нова влада со нови идеи околу ова прашање. Во изминативе неколку години од различни причини времето не беше соодветно за интензивни и сериозни преговори за прашањето за името. Се надевам дека вниманието се враќа кон ова многу важно прашање, одам за да се сретнам со страните и да ја тестирам подготвеноста за сериозен напредок. Овојпат не носам нов предлог – вели Нимиц.

Тој посочува дека во изјавите на новата влада се чувствува клима за подобрување на односите со соседите.

– Ги читам изјавите на премиерот, на министерот за надворешни работи и на другите функционери во новата влада. Има аспекти што даваат надеж, во однос на тоа што тие го велат. Мислам дека отсекогаш беше важно земјата да се согласува со соседите. Соседството е тежок регион, а земјата е нова земја и како што знаете во ОН е под привременото име – Поранешна југолосвенска република Македонија, кое јас како претставник на ОН морам да го користам. Но, тоа име отсекогаш беше планирано да биде привремено, а Привремената спогодба е веќе стара, напишана е во 1995 година. Така што, време е да се решат некои проблеми и ми се допаѓа што луѓето имаат свеж пристап во однос на прашањата со соседните земји – вели специјалниот пратеник на ОН во интервјуто.

На покана на Владата на Грција, предвидено е Нимиц да замине за Атина веднаш по посетата на Скопје.

Специјалниот претставник на ОН во разговорите меѓу Македонија и Грција последен пат ги посети двете земји кон крајот на јули 2014 година.


Пломп: Постои видлив ентузијазам во државата од работата на новата Влада


Скопје, 27 јуни, 2017 - 21:00 (META) 

Премиерот Зоран Заев денеска се сретна со амбасадорот на Холандија, Ваутер Пломп, кој во име на холандскиот премиер Марк Руте, му честиташе за стапувањето на должноста.

Холандскиот амбасадор, како што соопштуваат во кабинетот на премиерот, изразил големо задоволство од изборот на новата Влада и од нејзината посветеност на реформите.

Премиерот најавил инклузивни политики во државата, со активна вклученост на граѓанското општество и на опозицијата, како и подобрување на добрососедските односи.

– Очекуваме тоа да придонесе Република Македонија наесен да добие чиста препорака за почеток на преговори со ЕУ и отворање на вратите за членство во НАТО – рече Заев.

Амбасадорот Пломп оценил дека постои видлив ентузијазам во државата од работата на новата Влада во првиот месец од формирањето и изрази уверување дека таквиот начин на работа ги отвора перспективите на Република Македонија и на нејзините граѓани.


Хан пред посетата на Скопје: И Владата и опозицијата да се фокусираат на реформите


Брисел, 23 јуни, 2017 - 17:17 (META) 

Новата Влада и опозицијата треба да се фокусираат на имплементацијата и на реформските приоритети и на Договорот од Пржино за да ја вратат Македонија на патот кон Европската Унија, се вели во денешното соопштение на еврокомесарот за проширување и за соседска политика, Јоханес Хан, во пресрет на неговата посета на земјава, закажана за понеделник.

„Земјата, со континуирана помош од Европската Унија, конечно ја надмина политичката криза преку добро спроведени избори и со формирањето ја новата Влада. Сега новата Влада, заедно со опозицијата, треба да се фокусира на имплементацијата на реформските приоритети и на Договорот од Пржино за да се врати земјата на нејзиниот пат кон ЕУ-интеграцијата. Реформите мора да бидат спроведени за да се подобри животoт на луѓето, да се работи на стабилноста, напредокот и правдата. Затоа ѝ дадов задача на групата на независни правни експерти, предводена од Рајнхард Прибе, да ѝ помогне и да ја советува новата влада за прашањата за системското владеење на правото“, напиша Хан.

Еврокомесарот в понеделник доаѓа во земјава на разговори за владините реформски планови и за да ја повтори поддршката на ЕУ во процесот на спроведување на потребните реформи за членство на земјава во Европската Унија.

Хан во Скопје, како што стои во соопштението, предвидено е да има средби со премиерот Зоран Заев, со новата влада и со политичките лидери во земјава.


Туск и Јункер му го честитаа на Заев изборот за премиер


Брисел, 8 јуни, 2017 - 18:10 (META) 

Претседателите на Европскиот совет и на Европската комисија, Доналд Туск и Жан-Клод Јункер, денеска испратиле честитка до Зоран Заев по повод неговиот избор за премиер и за формирањето на новата Влада.

„Формирањето на новата Влада нуди можност за придвижување надвор од рамките на политичката борба што ја држеше земјата назад толку долго. Наредниот период ѝ нуди на новата Влада можност за посветена работа, преку конструктивен дијалог со опозицијата, кон заедничката цел за евроатлантска интеграција“, се вели во честитката, соопштуваат од Владата.

Континуираната посветеност на новата Владата кон целосна имплементација на Договорот од Пржино и спроведување на приоритетите за итна реформа ќе биде од суштинско значење за успехот на Македонија, се додава во честитката на Туск и на Јункер до Заев.


Заев до Тимоние: Подготвени сме за брзо и ефикасно спроведување на реформите


Скопје, 7 јуни, 2017 - 15:26 (META) 

Премиерот Зоран Заев денеска со францускиот амбасадор Кристијан Тимоние разговарал за приоритетите на новата Влада, како и за отворањето на перспективите на Република Македонија кон Европската Унија и кон НАТО.

– Подготвени сме за брзо, квалитетно и ефикасно спроведување на клучните реформи што ќе обезбедат квалитетен живот за сите граѓани, а ќе ги осигураат и евроатлантските интеграции на Македонија – рече Заев.

Заев изразил очекување дека посветеноста на Владата кон реформите ќе биде охрабрување за сите граѓани, за бизнис-секторот во Македонија, за странските инвеститори да вложуваат во Македонија со своите капацитети и со своето знаење, со што ќе придонесат за развојот на економијата во Македонија.

– Стратешки определби на Република Македонија се Европската Унија и НАТО и јас, како премиер, и новата Влада сме подготвени да работиме посветено и темелно на европската агенда која ќе го отвори патот за развој Република Македонија – рече Заев.


Врхушката на ВМРО-ДПМНЕ барала амнестија, Заев тврди дека не прифатил


Скопје, 6 јуни, 2017 - 23:09 (META) 

Имаше барања од врхушката на поранешната владејачка партија, но тие барања беа отфрлени, изјави вечерва премиерот Зоран Заев во интервју за националниот сервис МРТВ, одговарајќи на прашањето дали во изминатиот период имало разговори за амнестија на функционери од ВМРО-ДПМНЕ. Тој истакна дека правдата мора да важи за сите, односно дека дури и неговите најблиски соработници и членови на семејството ќе треба да одговараат доколку го прекршат законот.

Новата Влада нема да урива и да разместува споменици, затоа што тоа значи дополнителни трошоци, рече Заев. Сепак, тој истакна дека „сака барем една фасада да соголи за да покаже колку е тоа грдо“, но дека тоа е само лична желба, а како премиер не може да дозволи такво трошење пари на граѓаните, како и дека е ставен мораториум за изградба на споменици.


ВМРО-ДПМНЕ: Владата има генерален секретар кој е против НАТО


Скопје, 6 јуни, 2017 - 16:59 (META) 

ВМРО-ДПМНЕ денеска на две прес-конференции изрече остри критики против владата на Зоран Заев, напаѓајќи ги генералниот секретар, Драги Рашковски, и министрите за привлекување странски инвестиции, Рамиз Мерко и Аднан Ќахил.

Цитирајќи повеќе делови од книга објавена од Правниот факултет, во кои се искажани ставови на Рашковски, Антонијо Милошоски порача дека тие се проблем за целата држава, оти „НАТО ги нарекува терористи и организација што бомбардирала цивили“ и во емисија порачувал дека на народот му треба добар ќотек.

– Новата Влада треба да се огради од ставовите на Рашковски како генерален секретар на владата на СДСМ. И треба да го ограничи неговото антинато-дејствување, барем да нема влијание во оние проекти и закони што ќе бидат важен дел од евро-атлантскиот интегративен процес. Господинот Рашковски нема ниту реформски, но, за жал, ниту демократски капацитет. Во последниот свој телевизиски настап новиот генерален секретар на владата, Рашковски, јавно ги навредуваше граѓаните на „Топ тема“, изјавувајќи дека „На народот му треба добар ќотек, некој да го ишамара за да се свести каде е“ – рече Милошоски.

 


Почна првата седница на новата Влада


Скопје, 5 јуни, 2017 - 15:03 (META) 

Почна првата седница на новата Влада предводена од премиерот Зоран Заев. Половина час пред почетокот на седницата, новинарите имаа можност да го разгледаат ентериерот на зградата на Владата, која првпат беше отворена за јавноста по нејзиното реновирање.

Отворени беа и трите главни влеза од оградата на владината зграда, за која Заев најави дека ќе се бара законско решение и мислења од архитектите и од инжинерите, како таа да биде отстранета или преправена.

Новинарите ја посетија свечената реновирана сала за прием на делегации и за билатерални средби, кабинетот на министерот без ресор Едмонд Адеми, како и кабинетот на новиот премиер, Зоран Заев.

Додека новинарите го фотографираа и го снимаа кабинетот на новиот премиер, Заев беше во просторијата.

Инаку, како што најави Заев, на дневен ред на денешната прва владина седница ќе бидат пакетот економски закони, распределувањето на ресорите и портфолијата на министрите без ресори, поставување на заменици на претседатели на Владата, избор на генерален секретар и шеф на кабинет и формирање на постојните и на адхок комисиите.