!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ЛДП бара нов закон за употреба на канабис


Скопје, 24 февруари, 2017 - 12:38 (META) 

Либерално-демократската партија денеска соопшти дека преку пратениците во Собранието на Република Македонија ќе достави предлог до новата влада за носење на ново законско решение за легализација на канабисот за медицинска употреба и за декриминализација на канабисот за лична употреба.

„Предлог-законот ќе биде усогласен со потребите на сите засегнати страни и во соработка со граѓанскиот сектор. Зголемената понуда на масло од канабис на црниот пазар е доволен факт дека актуелното законско решение се покажа како неуспешно“, стои во соопштението од партијата.

Од ЛДП наведуваат дека маслото од канабис мора да биде достапно до сите оние граѓани на кои навистина им е потребно, но и дека канабисот за рекреативна употреба мора да биде декриминализиран.


Најдовме решение во согласност со Уставот, истакнала Шекеринска на средбата со Данкан


Скопје, 23 февруари, 2017 - 19:32 (META) 

Промените што се случуваат на политички план во Македонија и економските предизвици за обезбедување квалитетен живот, биле тема на средбата помеѓу заменик-претседателката на СДСМ, Радмила Шекеринска, и државниот министер за Европа и за Америка на Велика Британија, Ален Данкан, кој е во дводневна посета на земјава.

– Се отвораат светли перспективи за Република Македонија и за граѓаните, со демократските промени што се случуваат. Очекуваме дека новата влада ќе биде набргу формирана и силно ќе се посветиме на сите предизвици. Најтешкиот период за граѓаните и за државата е зад нас – рекла Шекеринска на состанокот со Данкан, се наведува во соопштението на СДСМ за средбата.

Заменик-претседателката на СДСМ истакнала дека концептот „Македонија – едно општество за сите“, односно земја на еднакви граѓани, со еднакви права и должности пред Уставот и законите, е фактор на стабилност во државата.

– Се покажа дека сета пропаганда за некакви федерализации или редефинирања на државата била лажење и манипулација на јавноста. Најдовме решение во согласност со Уставот. Ние сега сме посветени на следните чекори, Македонија да биде правна држава, да обезбедиме непречена работа на Специјалното јавно обвинителство и независни институции што ќе работат во интерес на граѓаните – истакнала Шекеринска на средбата со британскиот државен министер за Европа и Америка, Ален Данкан.


Шекеринска: Во завршна фаза се преговорите за нова влада предводена од СДСМ


Скопје, 22 февруари, 2017 - 13:51 (META) 

„Разговорите меѓу СДСМ и партиите што се очекува да бидат дел од новото парламентарно мнозинство се во завршна фаза. Преговорите за сите прашања се водат исклучиво на основа на Уставот, за тоа постои согласност од сите страни. Очекуваме Македонија наскоро да ја добие новата влада“, рекла заменик-претседателката на СДСМ, Радмила Шекеринска, на средбата со амбасадорот на Норвешка, Арни Бјорнстад, соопшти СДСМ.

Таа нагласила дека новата влада ќе биде реформска и ќе овозможи имплементација на реформските приоритети од извештајот на Прибе и на Договорот од Пржино за да се обезбедат независни институции што ќе работат во интерес на граѓаните и евроатлантска перспектива на земјата.

На состанокот Шекеринска зборувала и за потребата од непречено функционирање на СЈО и на правдата во Македонија.


Попладнево Ахмети на состанок со централното претседателство на ДУИ


Тетово, 22 февруари, 2017 - 12:52 (META) 

Лидерот на ДУИ, Али Ахмети, го свика централното претседателство на партијата за денеска во 17.30 часот, потврдиле од ДУИ за „Телевизија 24“.

На состанокот, како што пренесува телевизијата, тројцата потпретседатели на ДУИ, Теута Арифи, Невзат Бејта и Изет Меџити, треба да реферираат за текот на разговорите со работниот тим на СДСМ.

Состанокот на централното претседателство на партијата доаѓа по синоќешната средба на лидерите на ДУИ и на СДСМ, Али Ахмети и Зоран Заев, во Мала Речица.

Заев по тричасовната средба изјави дека двете партии се блиску до договор и оти на средбата било разговарано за уставноста на предложените решенија.

– Во тек се преговори. Интензитетот се зголемува. Одредени прашања се расчистени и тие прашање ќе ги пренесеме на нашите работни групи, на СДСМ и на ДУИ. Ова се прави за да се решат одредени прашања во интерес на албанската заедница, но во рамки на Уставот – рече Заев и додаде дека Уставот нема да се менува дури и по цена да не ги добие потписите за добивање мандат.

Лидерот на ДУИ, Ахмети рече дека на средбата со Заев не било разговарано за потписите за добивање мандат и го најави свикувањето на состанокот на централното претседателство на партијата.

– Експертите од двете партии се очекува да најдат заедничко решение. Можам да кажам дека немаме големи разлики со СДСМ околу предлогот за употребата на албанскиот јазик – изјави Ахмети.


Ахмети: Немаме големи разлики со СДСМ околу предлогот за употребата на албанскиот јазик


Тетово, 21 февруари, 2017 - 22:23 (META) 

Лидерот на ДУИ, Али Ахмети, по средбата со претседателот на СДСМ, Зоран Заев, изјави дека не разговарале за потписите за добивање мандат за нова влада.

– Албанскиот јазик во Уставот на Македонија е загарантиран. Ние деновиве ќе свикаме и претседателство за да донесеме важни одлуки за Албанците. На денешната средба со лидерот на СДСМ, Зоран Заев, не се разговараше за потписите за состав на нова влада, туку за различните ставови на ДУИ и на СДСМ. И експертите од двете партии се очекува да најдат заедничко решение. Можам да кажам дека немаме големи разлики со СДСМ околу предлогот за употребата на албанскиот јазик – изјави Ахмети по тричасовната средба со Заев.

За медиумите на македонски јазик немаше обезбедно превод на изјавата на лидерот на ДУИ. Замолен да каже неколку реченици на македонски јазик за денешната средба, Ахмети побара околу тоа да помогнат албанските колеги, новинари.

На новинарско прашање, Ахмети рече дека со лидерот на СДСМ разговарале на македонски.

Претходно, лидерот на СДСМ, Зоран Заев изјави дека на средбата се разговарало за уставноста на предложените решенија, но истакна дека и по цена да не ги добие потписите за добивање мандат, нема да дозволи чепкање во Уставот.


Заев по средбата со Ахмети: Нема чепкање на Уставот и по цена да не ги добијам потписите


Тетово, 21 февруари, 2017 - 21:08 (META) 

Лидерот на СДСМ, Зоран Заев, вечерва по тричасовната средба со лидерот на ДУИ, Али Ахмети, во Мала Речица изјави дека се блиску до договор и оти на средбата било разговарано за уставноста на решенијата.

– Во тек се преговори. Интензитетот се зголемува. Одредени прашања се расчистени и тие прашање ќе ги пренесеме на нашите работни групи, на СДСМ и на ДУИ. Ова се прави за да се решат одредени прашања во интерес на албанската заедница, но во рамки на Уставот – рече Заев и додаде дека Уставот нема да се менува дури и по цена да не ги добие потписите за добивање мандат.

Претседателот на СДСМ изјави дека на неколкудневните средби и состаноци се водат разговори околу уставноста на предлозите за употребата на албанскиот јазик. Тој го сподели ставот на ДУИ, кој беше изнесен преку вчерашната изјава на портпаролот на партијата, Бујар Османи, кој рече дека се работи за тоа дали ќе се прифати или нема да се прифати предлогот на ДУИ за употребата на албанскиот јазик.

Заев рече дека нема разлики во однос на евроатланската интеграција на Македонија и за Специјалното јавно обвинителство.

На новинарско прашање, одговори дека на претходните средби се разговарало за рамномерната распределба на буџетот во општините во Македонија. Тој истакна дека сите општини ќе добијат рамномерен буџет затоа што визијата на СДСМ е да се создаде општество кое ќе биде еднакво за сите.


Заев на средба со Ахмети во Мала Речица


Тетово, 21 февруари, 2017 - 19:44 (META) 

Лидерот на СДСМ, Зоран Заев, вечерва во Мала Речица има средба со лидерот на ДУИ, Али Ахмети, на која ќе разговараат за приближување на програмите на двете партии и за можното коалицирање и формирање влада.

Без да даде каков било коментар, Заев влезе во седиштето на ДУИ, а не одговори ниту на прашањата дали по средбата ќе даде изјава и ќе открие детали од разговорот со Ахмети.

Денеска попладне во скопскиот хотел „Александар палас“ се одржа средба меѓу претставниците на СДСМ и на Алијанса на Албанците на која, како што изјави генералниот секретар на СДСМ, Оливер Спасовски, било разговарано за „иднината на Македонија, за принципите на владеење на идната влада, за остварувањето на националните интереси на Македонија, пред сè членството во НАТО и во Европската Унија и подобрувањето на животот на граѓаните на Република Македонија“.

Прашан за законот за употреба на јазициите што го бараат албанските партии, Спасовски рече дека за тоа сè уште се разговара и дека кога ќе имаат конечни ставови во однос на предлозите, ќе информираат дополнително.


Спасовски: Сè уште разговараме за употребата на јазиците


Скопје, 21 февруари, 2017 - 17:47 (META) 

Очекуваме дека наскоро ќе ги добиеме потписите од партнерите за мандатот за состав на влада, изјави генералниот секретар на СДСМ, Оливер Спасовски, по денешната средба на работниот тим на партијата со претставници на Алијансата на Албанците.

На средбата, како што изјави Спасовски, било разговарано за „иднината на Македонија, за принципите на владеење на идната влада, за остварувањето на националните интереси на Македонија, пред сè членството во НАТО и во Европската Унија и подобрувањето на животот на граѓаните на Република Македонија“.

– Рзговаравме и околу декриминализацијата и принципот на едно општество, генерално, за принципите што ги застапуваме и за кои се залагаме и секако разговаравме и околу принципите за формирање на парламентарното мнозинство во Собранието, што ќе придонесе за промена на власта – изјави генералниот секретар на СДСМ.

Прашан за законот за употреба на јазициите што го бараат албанските партии, Спасовски рече дека за тоа сè уште се разговара и дека кога ќе имаат конечни ставови во однос на предлозите, ќе информираат дополнително.


Брисел не ја коментира платформата на партиите на Албанците


Брисел, 21 февруари, 2017 - 13:47 (META) 

Европската комисија денеска не сакаше да ја коментира платформата на партиите на Албанците, но повтори дека очекува наскоро да се формира влада која ќе има широка политичка поддршка.

– Како што и претходно изјавивме, не шпекулираме за составот на владата, за програмата во Македонија, но тоа што го очекуваме, а тоа е став кој го имаме откако се одржаа изборите, е брзо формирање на влада која ќе има широка политичка поддршка и која силно ќе се посвети на европските реформи и на имплементирањето на сите точки од Договорот од Пржино и на реформските приоритети. Тоа е многу јасна позиција, тоа е тоа што го очекуваме – изјави портпаролката на Европската комисија, Маја Коцијанчиќ, одговарајќи на новинарско прашање за тоа каков е ставот на Европската комисија за платформата на партиите на Албанците и за „мешањето на странски државници во внатрешните работи во Македонија“.

Еврокомесарот за проширување и за добрососедска политика, Јоханес Хан, пред 10 дена, за време на својата последна посета на Скопје, рече дека Брисел не се меша во формирањето на владата и порача дека политичките партии треба да покажат демократска зрелост и да понудат програма која се темели на Договорот од Пржино и посветеност на европската перспектива.

Евроамбасадорот Самуел Жбогар минатата недела во Берово оцени дека ситуацијата во Македонија не е толку драматична и оти на партиите треба да им се даде простор за да се договорат за формирање влада.


Жбогар: Не треба да драматизираме, да им дадеме време на лидерите да се договорат


Берово, 16 февруари, 2017 - 16:02 (META) 

Евроамбасадорот Самуел Жбогар денеска во Берово оцени дека ситуацијата во Македонија не е толку драматична и оти на партиите треба да им се даде простор за да се договорат за формирање влада.

– Не мислам дека состојбата во земјата е толку тешка, не треба да драматизираме. Имавме избори и нормално е да се даде повеќе време за да можат политичките лидери да формираат влада. Гледам дека политичките партии се веќе ангажирани. Јас сум оптимист дека политичките лидери ќе го изнајдат вистинскиот начин да формираат влада, за да можеме ние како ЕУ да продолжиме да работиме во реализирање на реформите кои што се потребни – изјави Жбогар.

Жбогар, заедно со францускиот амбасадор Кристијан Тимоние во Берово ја промовираа кампањата „ЕУ за тебе“ во рамки на која ќе Берово ќе се инвестираат повеќе од три милиони евра за реконструкција и изградба на канализациската мрежа.