!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Спасовски: Македонија има потреба од слободни и неокупирани синдикати


Скопје, 26 мај, 2017 - 17:37 (META) 

Македонија има потреба од вистински, слободни и неокупирани синдикати и тоа е задача и цел Владата да придонесе да имаме слободни синдикати со кои ќе можеме да разговараме за заштита за работничките права, рече генералниот секретар на СДСМ, Оливер Спасовски, на средбата која ја побарале неколку синдикати.

– Денеска е значаен ден заради тоа што на повик на неколку синдикати сме тука за да поразговараме околу идните ставови на новата Влада предводена од Социјалдемократскиот сојуз и во тој дух ние се залагаме да го вратиме дијалогот помеѓу работниците, работодавачите и Владата на Република Македонија, нешто што беше уништено во последниот период. Нам, како СДСМ ни стои во програмата да направиме се за да ги заштитиме работничките права, а тоа може да се оствари само преку отворен дијалог помеѓу работодавачите, работниците и Владата и тоа е нешто што мора веднаш да го започнеме и да разговараме за сите оние отворени прашања кои пред се ќе значат зголемување на минималната и просечна плата во Македонија и заштита на работниците, нешто што мора да стане пракса во Македонија и само преку таков еден дијалог да ги носиме сите решенија – рече Спасовски.

Одговарајќи на новинарско прашање, генералниот секретар на СДСМ, рече дека ќе се разговара и за можноста покрај вицепремиерот предложен од стопанските комори, новата влада да има и вицепремиер предложен од синдикатите, но појасни дека сепак конечната одлука ќе биде на мандатарот.


Заев: Тешко дека денеска ќе го поднесам составот на владата во Собранието


Скопје, 26 мај, 2017 - 17:03 (META) 

Претседателот на СДСМ и мандатар за состав на новата влада, Зоран Заев денеска пред средбата со претседателот на Движењето Беса, Биљал Касами во Собранието на Република Македонија, изјави дека речиси нема никакви шанси денеска да го достави составот на новата влада до Собранието, а малку е веројатно тоа да се случи и пред утрешниот конгрес.

– Не, не верувам дека денеска ќе стигнеме. Правиме напори, тоа зависи од сите политички партии, доколку со другите две политички партии или коалiции одржавме средба, еве денеска исто и со БЕСА. До вечерва касно продолжуваме посветени максимално, но како и да ја гледам работата, денеска тешко дека ќе стигнеме – рече Заев.

Тој потоа кажа и дека дефинитивно нема да има состав на владата пред утрешниот редовен 22 конгрес на СДСМ.


Манчевски: Може грешам, ама го очекувам најлошото од ВМРО-ДПМНЕ


Брисел, 26 мај, 2017 - 13:39 (META) 

Приоритетите на новата влада се поврзани со итните реформи, кои неколку години наназад се нотирани во европските извештаи, но и во извештаите за реформските приоритети за Македонија, изјави потпретседателот на СДСМ, Дамјан Манчевски во интервју за „Јуропиан Вестерн Балкан“, додавајќи дека тие се поврзани со владеењето на правото, човековите права и подобрување на животниот стандард на жителите на Македонија.

Манчевски вели дека ќе биде потребно време за да се нормализира ситуацијата во Македонија, бидејќи општеството е екстремно поделено, не толку многу по етничка колку што е по интраетничка основа. Сепак тој оценува дека евроинтеграциите мора да се забрзаат, особено и поради позитивните сигнали кои доаѓаат од Брисел.

Во поглед на односите со соседните земји, тој вели дека со Албанија немаа големи политички проблеми кои би можеле да бидат пречка за идните билатерални односи, но дека се Србија е потребно да се подобрат имајќи предвид дека политичката елита во предизборниот период во Србија ја користеше фразата „Македонско сценарио“.

– Тоа не создава добра атмосфера на почетокот на нашите односи. Можеби затоа што владата во Србија не ја очекуваше нашата победа тука, дека ќе можеме да формираме влада, што е нивна политичка грешка – вели Манчевски, додавајќи дека планираат да разговараат со српските власти за овие проблеми, за кои веруваат дека биле користени за изборни цели.

Потпретседателот на СДСМ не верува дека ВМРО-ДПМНЕ ќе биде конструктивна опозиција.

– Да бидам искрен, го очекувам најлошото од нив. Се надевам дека ќе ми докажат дека грешам, но генерално гледано, додека не спроведат внатрешни реформи, или барем да во сменат нивниот лидер Никола Груевски, не верувам дека постои основа ВМРО-ДПМНЕ да биде конструктивна партија за било кое прашање, па дури и кога станува збор за меѓународни прашања. Тие ќе се обидат да ги влошат нашите односи не само со Србија, туку и со Грција, Албанија, Бугарија, со сите – вели Манчевски.

Во однос на безбедносните предизвици, Манчевски вели дека одредени луѓе се обидуваат да ја поврзан својата политичка агенда со безбедносни прашања со цел да создадат атмосфера на страв и да го искористат тоа за сопствени цели.

– Во однос на „Голема Албанија“ сите имаме доволно искуство за да знаеме дека тоа се приказни за краткорочна политичка употреба. Иднината на регионот е во ЕУ и НАТО, особено на Македонија, можеби на не Србија, тоа е нивна одлука. Но, влезот во ЕУ и НАТО е од стратешки интерес на сите земји. Ако сме навистина посветени на тој пат, кој Македонија го запостави во последните неколку години, тогаш нема да има потреба за голема држава, затоа што сите ќе ја добиеме нашата најголема територија – ЕУ. Тоа е морковот кој сите држави во регионот мора да го имаат пред себе, да ги тера нивните влади да побрзаат на патот кон ЕУ – вели Манчевски, додавајќи дека не верува во заканата за менување на границите, но оти заканата од порастот на национализмот постои не само во регионот, туку и пошироко.


Заев задутре на конгресот на СДСМ ќе биде единствен кандидат за претседател


Скопје, 25 мај, 2017 - 10:48 (META) 

Претседателот на СДСМ, Зоран Заев по вчерашната вечера во Брисел со Федерика Могерини и со премиерите од земјите од Западен Балкан задутре на конгресот на партијата го очекува реизбор за претседател на СДСМ. Заев е единствениот кандидат за претседател на партијата што ќе се избира на задутрешниот, 22. редовен конгрес, кој ќе се одржи во хотелот „Александар Палас“, известија од СДСМ за „Мета“.

Со оглед на тоа дека конгресот треба да се одржи еден ден откако Заев најверојатно ќе го достави предлогот за новата влада во Собрание, очекувано е за предлогот да се изјасни Централниот одбор на партијата пред тој да биде доставен во Собрание на разгледување. Според изворот од СДСМ можно е седница на Централниот одбор да се одржи и деновиве пред конграсот.

На конгресот ќе се избира и нов состав на ЦО на партијата, оти мандатот на сегашниот истекува во јуни.

Конкурсите за нов претседател и за членови на Централниот одбор беше распишан на почетокот на месецов и во нив се бараше тоа да се направи по принципот на „самокандидирање“.


Заев утре на вечера со Могерини и со премиерите од Западен Балкан


Скопје, 23 мај, 2017 - 14:26 (META) 

Лидерот на СДСМ Зоран Заев утре во Брисел ќе присуствува неформалната вечера на премиерите од Западен Балкан со високата претставничка за надворешна и безбедносна политика на Европската Унија, Федерика Могерини, потврдија од СДСМ.

Како што соопшти портпаролот на СДСМ, Петре Шилегов Заев пред неформалната вечера ќе има и билатерална средба со високата претставничка на ЕУ за надворешна политика и безбедност.

Могерини минатата недела испрати покана до шесте премиери од Западен Балкан за вечера во Брисел, но до денеска официјално не се знаеше кој од Македонија ќе вечера со високата претставничка на ЕУ, техничкиот премиер Емил Димитриев или лидерот на СДСМ.

Заев во моментов е мандатар за состав на нова влада и се уште не е премиер, но како што соопштија од кабинетот на Могерини, тој е поканет во својство на „определен за премиер“.

На утрешната неформална вечера, покрај Заев, поканети се и премиерите на Србија, Александар Вучиќ, на Црна Гора Душко Марковиќ, на Албанија, Еди Рама, на Косово Иса Мустафа и на Босна и Херцеговина Дениз Звиздиќ.

Главна тема на средбата ќе биде состојбата во регионот по последните случувања и „како сите заедно може да се движат напред“.

По средбата не се предвидени прес-конфереција и изјави, но од канцеларијата на Могерини најавија дека ќе испратат соопштение со детали од разговорите.


Јас барам/Ние бараме: Земјата да се врати на правиот пат!


Скопје, 21 мај, 2017 - 14:41 (META) 

Иницијативата „Јас барам / Ние бараме“, која е поддржана од 111 граѓани, денеска изрази загриженост ситуацијата во која што се наоѓа Македонија и воедно даде поддршка за изборот на новиот претседател на Собранието, Талат Џафери.

Тие на прес-конференција ги презентираа своите барања кои, според како што рекоа, „ќе осигураат одговорност и ќе значат заземање на нашиот граѓански глас со намера да се врати нашата земја на правиот пат“.

Иницијативата бара формирање на нова влада во најкус можен рок, департизација и враќање на функционалноста на институциите во државата како сервис на граѓаните, итно расчистување на настаните во Собранието од 27 април и одговорност за сите инволвирани согласно нивните дела и акции, продолжување на мандатот на Специјалното јавно обвинителство, институциите и партиските лидери да изразат цврсти уверувања дека во Македонија говорот на омраза и криминалот од омраза нема да се толерираат и сите еднакво ќе одговараат пред законот, запирање на политичкиот прогон од страна на институциите на граѓанските организации, да се овозможи на медиумите да ги информираат граѓаните објективно без да се соочуваат со притисоци и насилство.


Спасовски: Новата влада треба да биде заснована на принципи, а не на условувања


Скопје, 20 мај, 2017 - 18:42 (META) 

Завршија разговорите на работните групи на СДСМ и Беса, но без некој конкретен договор. Како што соопштија генералниот секретар на СДСМ, Оливер Спасовски во следните денови се очекува да продолжат преговорите.

– Денеска завршивме со разговор со работната група на БЕСА. Преговорите продолжуваат и во наредните денови. Начелно, разговаравме за принципите на кои треба да биде формирана идната реформска Влада. Принципите во однос на тоа кои луѓе, какви кадри се потребни за да имаме реформи, меѓутоа, тоа е на принципиелни основи и очекуваме дека во наредниот период ќе отвориме малку повеќе детали околу составот на идната влада, се со цел да постигнеме договор и со БЕСА и со другите политички субјекти кои се дел, односно треба да бидат дел од новото парламентарно мнозинство – рече Спасовски.

Тој истакна дека засега нема поделба на ресори, ниту пак се знаат кадровските решенија и додаде дека информациите ќе бидат соопштени кога ќе бидат договорени.

На новинарско прашање дали Беса поставува одредени услови и дали бара министерска позиција во новата влада, Спасовски истакна дека тоа не било тема на денешните разговори.

– Сега разговаравме за принципите, не разговаравме воопшто ниту за поделба на ресори, ниту за други детали кои треба да ги имаме утврдено при праќање на предлогот, така што како за првична средба можам да оценам дека е позитивна, но ќе треба да продолжиме уште многу да работиме Не разговараме за условување на едните и другите, разговараме за принципи. За нас како Социјалдемократски сојуз е важно да има принципи на основа на кои ќе биде формирана идната реформска Влада, а не на основа на условување меѓу партнерите, бидејќи тоа не е добар начин на комуникација – рече Спасовски.

Генералниот секретар на СДСМ одбегна да одговори дали очекуваат Беса да биде дел од новата влада. Тој рече дека тоа ќе се знае откако ќе завршат преговорите.

По средбата со Беса, како што соопшти Спасовски се очекува да имаат внатрепартиски консултации, а од утре најверојатно ќе продолжат со преговараат и со другите партии од идната владина коалиција.


Беса преку посебна комисија ќе преговара со СДСМ


Скопје, 20 мај, 2017 - 16:32 (META) 

Централното претседателство на Движењето БЕСА одржа седница на која е дискутирано за основните начела за заедничкото владеење со СДСМ, соопштија денеска од партијата.

На средбата е донесена одлука за формирање посебна комисија, која ќе ги почне преговорите со новиот мандатар, а за координатор на комисијата е избран Арбен Лабеништи, потпретседател на Движење БЕСА.

„Во духот на ветувањето за транспарентност со албанските гласачи, Централното претседателство на БЕСА го информира членството, но и јавноста, дека останува посветена на својата изборна програма, со која ја освои довербата на Албанците во Македонија на изборите од 11 декември 2016 година. За другите детали и за исходот на преговорите јавноста навремено ќе биде информирана“, соопштија од партијата.

Во меѓувреме, во штабот на СДСМ пристигнаа претставниците на комисијата на Беса, Арбен Лабеништа, Африм Гаши, Фадил Зендели, Аријанит Хоџа и Кастриот Реџепи кои ќе разговараат со работната група на СДСМ, предводена од Радмила Шекеринска и Оливер Спасовски.

Ова е првична средба, на која, како што дознаваме ќе се усогласуваат партиските ставови за програмата на новата владина коалиција.


СДСМ денеска на преговори со Беса


Скопје, 20 мај, 2017 - 13:15 (META) 

Преговорите за формирање влада продолжуваат и денеска во седиштето на СДСМ, соопштија за „Мета“ од партијата.

Разговорите кои почнуваат во 15.30 часот ќе се водат со претставници на Движењето Беса. Засега не се знае дали средбата ќе биде на највисоко ниво, односно дали разговорите ќе ги водат Зоран Заев и Биљал Касами, или пак ќе бидат на ниво на работни групи.

Како што дознаваме, ова се првични средби на кои не се расправа за министерски ресори, туку станува збор за приближување и усогласување на партиските ставови за програмата на новата владина коалиција.


Ахмети разговарал со Швајцер Блум и со Жбогар за формирањето на новата влада


Скопје, 19 мај, 2017 - 18:59 (META) 

Лидерот на ДУИ, Али Ахмети денеска во амбасадата на Соединетите Американски Држави во Скопје, имал работна средба со заменик-амбасадорката на САД во земјава, Микаела Швајцер Блум и со амбасадорот на Европската Унија, Самуел Жбогар.

Како што соопштија од партијата, на средбата било разговарано за натамошните активности во однос на формирањето на новата влада. Ахмети пред Швајцер Блум и Жбогар го повторил ставот дека ДУИ целосно е посветена на спроведувањето на бараните реформи од страна на меѓународната заедница, интеграцијата во НАТО и во Европската Унија, добрите меѓуетнички односи, но и економскиот развој и отворањето на нови работни места.

„Првите чекори што ќе ги преземе новото парламентарно мнозинство се решавањето на застојот во локалната власт, како и укинувањето на екстерното тестирање, како две непосредни прашања“, истакнал Ахмети на средбата.

Тој нагласил дека во изминатите 16 години, колку што е активен во рамките на ДУИ, „никогаш немало разочарување во пријателските и добронамерните ставови на меѓународната заедница“ и во тој контекст побарал од САД и од ЕУ да помогнат за побрзо интегрирање на Македонија во НАТО и во Европската Унија.

Инаку, денеска во седиштето на СДСМ, се одржа првата средба меѓу лидерот на партијата и мандатар Зоран Заев со претседателот на ДУИ, Али Ахмети, во рамките на преговорите за состав на новата влада.