!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Вангеловски најавува дека на новата влада ќе ѝ поднесе пакет барања за реформи во судството


Скопје, 24 март, 2017 - 17:42 (META) 

Врховниот суд до новата влада ќе поднесе пакет барања за измени на дел од законите што се однесуваат на судството, рекол денеска новиот претседател на највисокиот суд во земјава, Јово Вангеловски, на брифинг со новинарите, пренесува „Телма“.

Како што најавил Вангеловски, ќе бидат иницирани измени на Законот за судовите, Законот за одмерување на казните, Законот за судски совет, за парична постапка, како и на Законот за советот за утврдување на факти.

Тој навел дека се незадоволни од досегашната примена на законите и дека ваквите барања за измени произлегуваат од забелешките и од препораките од Извештајот на Прибе во делот на реформите во судството.

Новиот претседател на Врховниот суд треба да се сретне и со специјалната јавна обвинителка Катица Јанева, со која ќе дискутира за отворените прашања, проблемите на СЈО и за понатамошната соработка на Специјалното јаво обвинителство со судовите.

Сепак, Вангеловски на брифингот истакнал дека не поддржува формирање на специјално судско одделение кое би постапувало по предметите на СЈО, бидејќи тоа не било технички изводливо, односно немало доволно судии.

Новиот распоред на работа на судиите во Врховниот суд, Вангеловски рекол дека го подготвил според желбите на судиите во судот и дека токму поради ова не очекува приговори.

Тој рекол дека распоредот на Врховниот суд бил полесен за правење од распоредот во Основниот суд Скопје 1.

Јово Вангеловски беше избран од Судскиот совет за нов претседател на Врховниот на 13 март оваа година.


Атанасов: Овој јуни нема да има екстерно тестирање


Скопје, 24 март, 2017 - 14:52 (META) 

Oвој јуни нема да биде најстресниот месец во годината за учениците, наставниците и за родителите, бидејќи новата влада уште на првата владина седница ќе го укине нелогичното екстерно тестирање, кое освен притисоци врз учениците и казни за наставниците, не донесе ништо добро, велат од СДСМ.

Оттаму најавуваат крупни реформи во образованието, кои треба да обезбедат успешен модерен и европски образовен модел.

– Во основното образование, во првите пет години ќе има само описно оценување. Оценки ќе има во следните четири години. Бројот на ученици во паралелка ќе го намалиме на 25 ученици во просек. Во средното образование, покрај класичното четиригодишно гимназиско и стручно образование, ќе воведеме и можност за завршување по втора и трета година кај стручното образование. Така, оние кои сакаат побрзо да се вклучат во пазарот на трудот, нема непотребно да ги задржуваме во образовниот систем – изјави денеска на прес-конференција пратеникот во Собранието и претседател на комисијата за образование на СДСМ, Петар Атанасов.

Тој рече дека новата влада ќе ги врати и ќе ги почитува автономијата и достоинството на универзитетите.

– Ќе ги преиспитаме дисперзираните студии. Ќе помогнеме да се приспособат студиските програми кон потребите на општетството. Државата ќе им помогне на студентите во поматамошното дошколување, но и во наоѓање работа. Никогаш повеќе нема да дозволиме да се вршат експерименти врз учениците и да се носат ад хок решенија кои одат на штета на учениците, студентите, наставниците и на професорите, како што беше досега – нагласи Атанасов.


ДС: Парламентарното мнозинство мора да покаже цврстина и одлучност во Собранието


Скопје, 24 март, 2017 - 13:05 (META) 

Партиите од парламентарното мнозинство можат да се обидат во следните два дена да понудат и да постигнат компромис со раководството на ВМРО-ДПМНЕ, за в понеделник да се избере претседател на парламентот и со тоа се создадат услови за избор на реформска влада и за мирен, демократски и државнички трансфер на власта, велат од Демократскиот сојуз.

Од понеделник натаму, нагласуваат од ДС, парламентарното мнозинство на СДСМ, ДУИ, Беса и на Алијанса за Албанците, мора да покаже цврстина и одлучност и при изборот на претседател и при формирањето на владата.

„Континуираната попустливост ќе биде злоупотребена од ВМРО -ДПМНЕ и преку медиумската манипулативна кампања ќе се настојува да се продлабочи кризата и да се спречи трансфер на власта. Геостратешките и регионалните процеси наметнуваат потреба од итно формирање на нова влада и од стабилизирање на состојбите, како прв чекор за нормализирање на животот и за воспоставување вредносен систем кој почива на владеење на правото во Република Македонија“, стои во соопштението од партијата на поранешниот пратеник Павле Трајанов.


Собранието бргу ќе ја избере новата реформска влада, порачуваат од СДСМ


Скопје, 24 март, 2017 - 10:05 (META) 

Собранието бргу ќе ја избере новата реформска влада на Македонија бидејќи граѓаните избраа промени и избраа да ги водат сериозни политичари, кои се грижат за нивните и за интересите на државата, наспроти политиките на криминалците од раководството на ВМРО-ДПМНЕ, кои се обидуваат да ја втурнат земјата во длабока политичка криза и во изолација, стои во денешното соопштение на СДСМ.

Од СДСМ велат дека внимателно, како и досега, ги водат политичките процеси што водат кон реализација на мнозинската волја на граѓаните.

„Порачуваме дека никој нема право да ја спречи демократски изразената волја на мнозинството граѓани на избори. 67 пратеници застанаа зад претседателот на партијата, Заев. Има демократски формирано парламентарно мнозинство. Има програма на новата влада што ја штити унитарноста на државата и ги обезбедува потребите на сите граѓани. Нема време за губење“, стои во соопштението на СДСМ.

Оттаму го повикуваат Собранието и претседателот на државата, Ѓорге Иванов, да овозможат мирен трансфер на власта.


Хан: Нема време за губење, Иванов итно да ја преиспита својата одлука


Скопје, 21 март, 2017 - 23:45 (META) 

Уште во наредните неколку дена бараме да видиме сериозно и одговорно државништво од страна на релевантните институции што треба да овозможат брзо формирање на нова и цврста коалиција, бидејќи тоа е единствениот пат за враќање на земјата на патот кон Европската Унија, што граѓаните на земјата го сакаат и го заслужуваат.

Ова стои во заклучокот на заедничката изјава на еврокомесарот за проширување и за добрососедска политика, Јоханес Хан, и на европратениците Иво Вајгл, Едвард Кукан и Кнут Флекенштајн, по денешните средби со лидерите на парламентарните политички партии.

Тие во изјавата наведуваат дека на средбите многу јасно нагласиле дека сите лидери во земјата, вклучувајќи го и претседателот, мора да ги почитуваат резултатите од неодамнешните избори и дека „во демократија, секој мора да ги прифати парламентарните мнозинства“.

– Затоа го охрабруваме претседателот итно да ја преиспита својата одлука. Нема време за губење. Очекуваме сите политички лидери и институции да дозволат демократските процеси да течат по својот пат, во интерес на граѓаните на земјата. Одложувањата изминатите месеци веќе предизвикаа штети врз економијата на земјата. Затоа повикуваме на брзо формирање на новата влада која ќе биде посветена на имплементирање на заостанатите реформи. Од партиите и од новата влада се очекува да продолжат со имплементирање на сите делови од Договорот од Пржино – стои во изјавата.

Хан и европратениците особено повикуваат на воздржаност од какви било акции и изјави кои можат да поттикнат меѓуетнички тензии или да ги поткопаат добрите меѓусоседски односи. Тие нагласуваат дека негативната реторика против меѓународната заедница и невладините организации е контрапродуктивна и го поткопува меѓународниот углед на земјата.

– Никој не треба да биде во искушение да си игра со оган. Длабоко сме загрижени поради тензиите и говорот на омраза. Слободата на собир и слободата на говор се фундаментални права во демократските општества, но тие носат и одговорности. Негативната реторика насочена кон меѓународната заедница и граѓанските организации е целосно контрапродуктивна. Таа го поткопува меѓународниот углед на земјата и кредибилитетот на тие што ја користат – порачаа еврокомесарот и тројцата европратеници.


Груевски дојде на разговори со Хан, но не сакаше да се слика ниту за твит


Скопје, 21 март, 2017 - 21:17 (META) 

Во тек е средбата лидерот на ВМРО-ДПМНЕ, Никола Груевски, со еврокомесарот за проширување и за добрососедска политика, Јоханес Хан, и со европратениците Иво Вајгл, Едвард Кукан и Кнут Флекенштајн.

„Јоханес Хан и европратениците на разговори со Никола Груевски. Итно е потребна нова влада. Види го парламентарното мнозинство. Уставот мора да биде почитуван“, напиша на „Твитер“ Мајкл Карнитшниг, кој е дел од тимот на Хан, но без фотографоја од присутните.

За разлика од претходните твитови од средбите, на кои имаше фотографии од Хан и од неговите соговорници, во овој се фотографирани само знамињата на Македонија и на Европската Унија во салата каде се одржуваат средбите на лидерите на политичките партии со еврокомесарот.

Груевски не им дозволи ниту на медиумите да влезат во салата и да направат инсерти од средбата.

Тој по прогласот што го прочита пред ДИК на 17 декември минатата година, во кој ги искара странците, не се фотографира со претставниците на меѓународната заедница.

Претходно Хан и тројцата европратеници имаа средби со лидерите на СДСМ, ДУИ, Беса и на Алијанса за Албанците.


Заев: Пораките на Хан се јасни – процесите мора да се забрзаат


Скопје, 21 март, 2017 - 20:22 (META) 

Пораките на еврокомесарот и на европратениците се јасни како бел ден, процесите мора да се забрзаат, изјави лидерот на СДСМ, Зоран Заев, по средбата со еврокомесарот за проширување и за добрососедска политика, Јоханес Хан, и со европратениците, Иво Вајгл, Едвард Кукан и Кнут Флекенштајн.

Заев истакна дека остануваат на барањето претседателот на државата, Ѓорге Иванов, да му го додели мандатот за состав на новата влада.

– Ние ќе ги отстраниме сите пречки што Иванов ги измислува и ги поставува, ќе му доставиме преку Собранието барање повторно да го додели мандатот. Тој не смее повеќе да го сопира процесот на стаблизација на државата. Остануваме на нашето барање Иванов да го даде мандатот – рече Заев, додавајќи дека очекува од сите политички партии да покажат чувство за надминување на кризата.

Лидерот на СДСМ рече дека еврокомесарот Хан и европратениците се подготвени по формирањето на новата влада да помогнат во забрзувањето на преговорите за членство на Македонија во Европската Унија.

Заев истакна оти е убеден дека до крајот на неделата ќе се одржи конститутивната седница и Собранието ќе продолжи со работа, а дека сè друго ќе значи „банализирање и барање изговори од страна на ВМРО-ДПМНЕ“.

– Нè „дриблаа“ дека некој е на пат, па не може да дојде на координација, па беше проблем бројот на членови на комисија, па сега бараат претседател на комисија. Нека ги кажат на пленарна седница своите аргументи, ние своите, па со гласање ќе одлучиме. Потоа ќе преминеме кон избор на претседател на Собрание. Нема да дозволиме некој постојано да се вади и да измислува и да ги блокира процесите. Имаме трпение, но одлуки мора да се носат – изјави Заев по средбата со Хан.

По средбата со Заев, еврокомесарот треба да се сретне со лидерот на ВМРО-ДПМНЕ, Никола Груевски.

Претходно Хан и тројцата европратениците имаа средби со лидерите на ДУИ, на Беса и на Алијанса за Албанците, Али Ахмети, Билал Касами и Зијадин Села.


Касами: Хан даде поддршка за опцијата за формирање влада


Скопје, 21 март, 2017 - 16:22 (META) 

Еврокомесарот за проширување и за добрососедска политика, Јоханес Хан, и тројцата европратеници, Иво Вајгл, Едвард Кукан и Кнут Флекенштајн, даваат поддршка за излез од кризата и бараат да гледаме повеќе кон иднината на државата отколку за личниот интерес, изјави лидерот на Движењето Беса, Билал Касами, по средбата со бриселската четворка.

– Денеска имавме уште една посета на еврокомесарот Јоханес Хан која ѝ е неопходна на Македонија во ситуацијата во која се наоѓа. Членовите на делегацијата ја даваат поддршката за да излеземе од кризата. Во овој правец работи и Беса, не гледајќи на личниот интерес затоа што сè уште има сили во Македонија кои сакаат да нè турнат во меѓуетничка криза, што е многу лошо за земјата – рече Касами.

Тој истакна дека Хан дал поддршка на опцијата за формирање влада, за што има 67 пратеници и додаде дека не постои никаква „тиранска платформа“ туку декларација.


Хан ги почна средбите со пораки: Нема време за губење, итно е потребна нова влада


Скопје, 21 март, 2017 - 14:56 (META) 

„Нема време за губење, итно е потребна нова влада, патот на Македонија кон Европската Унија е отворен“, твитна еврокомесарот за проширување и за добрососедска политика, Јоханес Хан, соопштувајќи дека почнал со разговорите со лидерите и со претставниците на парламентарните политички партии.

„Почнаа разговорите во Скопје. Итно е потребна нова влада за реформи. Нема време за губење“, напиша Хан на „Твитер“.

Во друг твит тој нагласува дека „патот кон ЕУ е отворен за Скопје по последниот состанок на Советот на Европската Унија, но часовникот отчукува“, и додава: „Потребно е државништво наместо тактики. Економијата страда“.

Во моментов Хан е на средба со лидерот на Беса, Билал Касами.


Тимоние: Се надевам дека Хан ќе најде добро и практично решение за кризата


Скопје, 20 март, 2017 - 16:08 (META) 

Македонија треба да остане на патот кон Европската Унија и кон НАТО и за тоа е потребна одговорна влада што ќе биде способна да донесува одлуки и реформи, како и политичари со чувство за општ интерес на земјата, изјави денеска амбасадорот на Франција во Македонија, Кристијан Тимоние, по приемот по повод Денот на франкофонијата.

Тимоние рече дека се очекува да се формира влада и дека е важно „таа одлука да се донесе многу бргу, бидејќи земјата не може премногу да чека“.

– Има економски и политички предизвици и секој очекува една силна Македонија. Еврокомесарот Хан утре доаѓа во Скопје и се надеваме дека ќе најде добро и практично решение за сегашното забавување на процесот на формирање влада – изјави Тимоние.

Прашан каков е неговиот став за платформата на албанските партии, Тимоние рече дека тој не е повикан да се произнесе по тоа прашање.