Мицотакис: Ципрас и Каменос ја отворија вратата на НАТО за Скопје


Атина, 11 јули, 2018 - 14:50 (META) 

Алексис Ципрас и Панос Каменос, пред три седмици во Преспа признаа македонска националност и јазик за Скопје, a денес во Брисел ја отвораат вратата за интеграција во НАТО, вели претседателот на Нова демократија, Кирјакос Мицотакис.

Во изјавата посветена на самитот на НАТО, лидерот на најголемата грчка опозициска партија, упатува остри критики и обвинувања до владата на Ципрас и Каменос во однос на поканата за Македонија за членство во Северно атлантската алијанса.

– Денес во Брисел, господата Ципрас и Каменос на соседната држава Скопје и ја отвораат вратата за интеграција во НАТО. Така, го предаваат најсилното преговарачко оружје што го имаше Грција и беше национална линија во последните 27 години – вели Мицотакис и потенцира дека коалициските партнери во владата носат тешка одговорност и „народот наскоро ќе им суди“.

Мицотакис ги обвинува Ципрас и Каменос дека пред три седмици во Преспа ги признаале наводните македонска националност и јазик за Скопје и покрај апсолутната спротивставеност на граѓаните.


Мицотакис: Не можеме да прифатиме македонски јазик и етницитет


Атина, 3 јули, 2018 - 9:41 (META) 

Шефот на грчката Нова Демократија, Кирјакос Мицотакис, вели дека за Грците Договорот од Преспа е неприфатлив поради признавањето на македонскиот јазик и етницитет, но дека, доколку помине во Парламентот, Нова Демократија ќе го прифати.

– Секогаш сме велеле дека сакаме решение, но дека тоа мора да ги почитува сензибилитетите на двете страни – вели Мицотакис, кој додава признавањето на македонскиот идентитет е искрено неприфатлив за најголемиот дел од Грците.

– Не сакам да ја платам цената на дестабилизација на мојата земја за да ги стабилизирам северните соседи. Не можеме да прифатиме македонски јазик и етницитет – вели шефот на Нова Демократија.

Мицотакис во интервјуто наведува неколку причини за овој тврд став.

– Ако признаете држава Северна Македонија, но јазик, етницитет македонски, што им велите на луѓето кои се Македонци, но се Грци? Што ќе се случи со стотиците грчки компании кои го користат терминот „македонски“? Ова е големо прашање за грчките компании, за извезувачите и со тоа не се занимава овој Договор – додава тој.

За крај Мицотакис вели дека стравува од регионални немири поради македонското малцинство во Грција и смета дека овој Договор е повик за сепаратизам кон одредени сили во тој дел од Грција.


Договорот од Преспа проблематичен за 62 отсто од Грците


Атина, 29 јуни, 2018 - 9:58 (META) 

Со негативен или претежно негативен став кон Договорот од Преспа со кој владите на Грција и Македонија сакаат да го надминат спорот, се 62 отсто од Грците, покажа новата анкета што за грчката телевизија „Скај“ била спроведена од агенцијата „Pulse“.

На прашањето „Од она што го имате слушнато и го знаете, лично вие, како го оценувате Договорот што Владата го потпиша во Преспа со поранешната југословенска Република Македонија?“, 27 отсто од граѓаните одбираат еден од позитивните одговори, еден од негативните одговори одбрале 62 отсто, а 11 проценти рекле дека не знаат или одбиле да одговорат.

Поточно, 15 проценти одговориле „позитивно“, 12 отсто „веројатно позитивно“, 48 отсто одговориле „сигурно негативно“, 14 отсто „веројатно негативно“, а 11 проценти не знам/ не одговарам.

Како што јави дописничката на МИА од Атина, во однос на политичката определеност, односно за кого гласале анкетираните на последните избори во 2015, резултатите од истражувањето покажуваат дека 51 отсто од гласачите на владејачката СИРИЗА го оценуваат сигурно позитивно или веројатно позитивно договорот (34 отсто, односно 17 проценти), а 40 проценти сигурно негативно или веројатно негативно (27 проценти, односно 13 проценти).

Речиси девет од 10 (86 проценти) од гласачите на Нова демократија дале сигурно негативна (70 отсто) или веројатно негативна (16 отсто) оценка за договорот, а само 10 отсто го оцениле сигурно позитивно (5 отсто) или веројатно позитивно (5 отсто) решението меѓу Македонија и Грција.

Во однос на политичката сцена во Грција, според истражувањето, Нова демократија и понатаму е во предност пред СИРИЗА со 11,5 проценти разлика.

На прашањето доколку следната недела се одржат избори, за кого би гласале, три од 10 Грци ја одбрале најголемата опозициска партија. И понатаму голем е бројот (21%) на оние кои се неодлучни, не одговориле за кого би гласале, рекле дека нема да излезат на гласање или би го направиле ливчето неважечко.

Поконкретно, од анкетираните за Нова демократија се изјасниле 31 проценти, за СИРИЗА 19,5 отсто, Златна зора 6,5, Движење за промена 6,5, Комунистичка партија на Грција 5,5 проценти, Сојуз на централисти 2 проценти и за Независни Грци 1,5 отсто

Истражувањето на јавното мислење било спроведено во периодот од 24 до 26 јуни, а учествувале 1.323 лица со право на глас.


Нова Демократија води со 12,4 отсто пред владејачката Сириза


Атина, 27 јуни, 2018 - 16:59 (META) 

Најголемата опозициска партија во Грција, Нова Демократија на Кирјакос Мицотакис, го зголемува водството пред владејачката Сириза на Алексис Ципрас, покажала анкетата објавена од весникот „Прото Тема“, пренесува „Блумберг“.

26,4 отсто од испитаниците се определиле за Нова Демократија, а за во Сириза само 14 отсто.

Мнозинството на владејачката коалиција на Ципрас во парламентот се намали на само два пратеника предност во законодавниот дом со 300 пратеници, откако двајца пратеници на Независни Грци излегоа од коалицијата по потпишувањето на Договорот со Македонија.

Во Грција редовни парламентарни избори би требало да се одржат во септември следната години, но малото мнозинство носи ризик за предвремени избори.

Исто така, ниту еден грчки премиер по Костас Симитис, не издржал цел мандат, без да распише предвремени избори, потсетува „Блумберг“.


Мицотакис: Грција прв пат признава македонска националност и јазик


Атина, 14 јуни, 2018 - 15:00 (META) 

Грција, по прв пат признава македонска националност и јазик за нашите северни соседи. Елементи што претставуваат корен на иредентизмот, рече лидерот на опозициската Нова демократија Киријакос Мицотакис на денешната расправа во грчкиот парламент, кусо пред да достави барање за гласање недоверба на владата на премиерот Алексис Ципрас.

Како што јави дописничката на МИА од Атина, Мицотакис упати остри обвинувања до Ципрас за содржината на договорот, особено за делот со јазикот и националноста, велејќи дека „државата добива географска одредница, не народот“.

– Можете да ми кажете, зошто со вашиот договор, жителите на Северна Македонија ќе се викаат едноставно Македонци и ќе говорат македонски? – го праша Мицотакис, Ципрас и го повтори неговиот став дека „прифаќањето македонски јазик и македонска националност се неприфатлива национална отстапка“.

Лидерот на Нова демократија го обвини Ципрас дека лаже и во однос на тоа дека новото име, Северна Македонија, Грција ќе го употребува без превод на грчки јазик, односно како што се изговара на македонски, бидејќи такво нешто нема во објавениот договор.


Мицотакис: НД не прифаќа македонска националност и македонски јазик


Атина, 6 јуни, 2018 - 9:47 (META) 

Уставни измени, отстранување на иредентизмот, заемно прифатливо име ерга омнес, без македонска националност и македонски јазик, се условите за решение на прашањето за името, според лидерот на грчката партија опозициска Нова демократија (НД), Кирјакос Мицотакис.

Говорејќи пред одговорните на секторите во партијата, Мицотакис рече дека договорот што нема да ги задоволува националните интереси, нема да биде прифатен од Нова демократија.

– Ние како партија цврсто остануваме на нашата позиција. Решението треба да биде едно, комплетно и да содржи три елементи: промена на Уставот на Скопје, отстранување на секаков иредентистички елемент, вклучувајќи ги и националноста и јазикот. Македонска националност и македонски јазик не можат да бидат прифатени. Едно име за севкупна употреба во и вон границите и име заемно прифатливо што нема да ги труе односите на двете држави, веќе следниот ден – рече Мицотакис, потенцирајќи дека оваа позиција е чесна, реална и патриотска и ја гарантира и обединетоста на Грците.

Претседателот на Нова демократија упати остри критики до грчката влада, велејќи дека а шефот на грчката дипломатија дека повеќе ги бранел македонските аргументи, отколку грчките интереси.

– Ципрас и понатаму е опасен за националните интереси и неговата влада не ја поседува потребната сериозност за да управува со критични национални прашања и ова треба да го сфати, не само Ципрас туку и Коѕијас, кој често пати изгледа како повеќе да ги брани аргументите на нашите соседи отколку интересите на земјата и го прави тоа, го стори тоа и вчера во телевизиското интервју – рече Мицотакис.

Според лидерот на најголемата грчка опозициска партија, Ципрас по секоја цена се обидува да постигне договор со нашата земја.


Има одлука од Патријаршијата за црквата на северниот сосед, вели грчката влада


Атина, 31 мај, 2018 - 9:44 (META) 

Нова демократија не треба да брза. До овој момент не постои никаков договор, велат од кабинетот на грчкиот премиер во одговор на прашањата од опозициската партија, пренесува МИА.

Од таму додаваат дека единствено што за сега постои е одлуката од Вселенската патријаршија во однос на името на македонската црква.

– Единствено што постои до овој момент е одлуката на Светиот синод на Вселенската Патријаршија да се спроведе потребното за да се задоволи барањето на премиерот на ПЈРМ за бришење на терминот „Македонија“ од името на црквата на нашите северни соседи – пишува во соопштението.

Во одговорот до Нова демократија кабинетот на Ципрас ги повторува позициите на грчката Влада во преговорите за името.

– Предуслов за решение и интеграција на ПЈРМ во НАТО и ЕУ е договор за сложено име со географска или временска одредница, што ќе важи за сите, нешто за што предуслов е и уставна ревизија –  соопштуваат од кабинетот на грчкиот премиер.

Од таму, и порачале на опозициската партија дека набргу, доколку постои договор, ќе сфати дека ќе треба долго време да бара некаков аргумент за да не го поддржи договорот.

Повикувајќи се на вчерашните изјави на македонскиот премиер Зоран Заев на прес-конференцијата, Нова демократија побара од грчката Влада да одговори дали Ципрас веќе прифатил признавање на македонски јазик и македонски идентитет, дали се повлекол од националната позиција за ерга-омнес име и дали веќе се обврзал да дозволи интеграција на Македонија во НАТО, „без да бидат отстранети од Уставот сите неприфатливи иредентистички наводи“.


Нова демократија ја предупредува грчката влада да не го предаде преговарачкото оружје


Атина, 29 мај, 2018 - 14:50 (META) 

Владата да не даде однапред зелено светло за интеграција на Скопје во НАТО и ЕУ, а усогласувањето на договорот во иднина да биде на рати, ѝ порачуваат на грчката Влада од опозициската Нова демократија.

Портпаролката на партијата, Марија Спираки, коментирајќи ги последните натписи во грчките медиуми, според кои, предвидена е етапна имплементација на евентуалниот договор, вели дека „грчкиот премиер е подготвен за компромис“.

– Нова демократија ја предупредува владата да не се согласи однапред за било каков договор што ќе му дава на Скопје датум за почеток на преговорите за интеграција во Европската Унија и зелено светло за членство во НАТО. Незамисливо е Грција однапред да го предаде преговарачкото оружје што го поседува и да очекува во иднина усогласување на рати од страна на нашата соседна земја – вели Спираки.


Нова демократија не прифаќа решение за името „на рати и со одложено дејство“


Софија, 16 мај, 2018 - 11:18 (META) 

Околу можноста за решение на проблемот со името и можноста а постигнување на договор Ципрас – Заев, извори од опозиционата Нова демократија (НД) за грчка „Иефимерида“ велат дека нема да прифатат никакво решение „на рати“,  бидејќи сметаат дека со тоа не би се исполнил условот договорот да биде траен.

Лидерот на Нова демократија, Киријакос Мицотакис, денеска е во Софија на Конгрес на европските десничарски партии (ЕПП) и изјави дека нема да прифати никаков притисок од страна на ЕУ или на НАТО во врска со името на северниот сосед.

Според партијата, Грција не треба да прифати решение со „одложено дејство“ и дека само „конечно име и промена на Уставот“ би биле гаранција за поддршка за ЕУ и НАТО.

– Потребна е промена која нема само да претпостави, туку и ќе гарантира и ќе се примени во практика пред било каков конечен договор – вели одговорниот за надворешна политика во НД, Јоргос Кумуцакос.


Мицотакис: Не е можно решение без соседите да го променат Уставот


Атина, 27 април, 2018 - 15:03 (META) 

Решение не може да постои без претходно соседната земја да го промени нејзиниот Устав и комплетно и неповратно да ги отстрани сите елементи на иредентизмот, рече Кирјакос Мицотакис, лидерот на најголемата грчка опозициска партија, говорејќи пред одговорните на различните сектори во Нова демократија.

Мицотакис смета дека начинот на кој владата управува со преговорите, предизвикува загриженост и уште еднаш го повтори неговиот став дека „нема да ги поделат Грците, за да ги обединат Скопјаните“.

– Особена загриженост предизвикува ситуацијата во скопското прашање. Таму каде што тајната дипломатија, со незнаење на никој, одеднаш донесе во прв план едно прашање, кое како што се чини, не беше зрело да се реши. И уште полошо, со скопското прашање, владата на крај успеа да ги обедини и да ги зајакне нашите соседи и се обиде да ги подели Грците – вели лидерот на опозициската Нова демократија.

Како што јави дописничката на МИА од Атина, Мицотакис упатил остри критики до владата на премиерот Алексис Ципрас дека е опасна за грчката надворешна политика.