Се отвори огромна дупка на Нов Зеланд, вулканолозите среќни


Велингтон, 7 мај, 2018 - 13:37 (META) 

Огромна дупка се отвори на една фарма на Северниот Остров на Нов Зеланд, која има длабочина колку четири двокатни автобуси и површина колку две фудбалски игралишта, односно 20 метри на 200 метри површина.

Не се предизвикани огромни штети и нема загинати луѓе и животни, а еден ефект од оваа појава предизвикана од обемните врнежи, е што вулканолозите ќе може од дупката кај гратчето Роторуа да ги проучуваат 60.000 старите наслаги на карпи создадени од вулкан.

Експертите посочуваат дека дупката се создала бидејќи огромното количество дождовна вода ги подјала варовничките карпи по што горниот слој на земјата паднал долу, создавајќи понор.

Според вулканологот Бред Скот, дупката е на кратерот на одамна заспан вулкан.


Новата година пристигна во Самоа, Тонга и Кирибати


Апиа, 31 декември, 2017 - 13:07 (META) 

Жителите на јужнопацифичките острови Самоа, Тонга и Кирибати во 11 часот според средноевропско време зачекорија во 2018 година, а наскоро по нив Новата година ќе пристигне и во Нов Зеланд, каде ќе биде дочекана со огномет над Оукленд од облакодерот „Скај“ висок 200 метри.

Во 13 часот, според средноевропско време, во 2018 година ќе влезат и некои подрачја на Русија, а потоа во 14 часот и Австралија, каде многумина ќе уживаат во спектакуларниот огномет во пристаништето над зградата на операта и мостот во Сиднеј.

Повеќе од 1,6 милиони посетители ќе уживаат во 15-минутниот спектакл во Сиднеј, кој вообичаено е првата слика од дочекот на Новата година што го обиколува светот.

Во Сиднеј, како што пренесуваат светските медиуми, со препреки е оневозможен пристапот до пристаништето за да се спречи евентуални напаѓачи со возила да влетаат во масата луѓе, а на местото се распоредени специјални полициски сили.

Инаку, Новата година ширум светот се дочекува со засилени мерки за безбедност.

Ширум Европа воведени се посебни мерки за безбедност, а оние што ќе ја испратат старата и ќе ја дочекаат новата 2018 година на улиците на европските престолнини можат да очекуваат прегледи на торбите и други проверки за да се избегнат можни терористички напади.


Силен земјотрес го погоди Нов Зеланд


Велингтон, 11 јули, 2017 - 14:02 (META) 

Силен земјотрес со јачина од 6,8 степени според Рихтеровата скала го погоди јужното подрачје на новозеландскиот Јужен Остров, соопшти Американскиот геолошки завод.

Епицентарот на земјотресот бил на 196 километри северозападно од островот Окланд и бил на длабочина од 10 километри.

Засега нема податоци за евентуални жртви или за причинета материјална штета.


Нов Зеланд се подготвува за втора голема бура


Велингтон, 13 април, 2017 - 9:59 (META) 

Жителите на Нов Зеланд се подготвуваат за удар на циклонот Кук, втора силна бура неделава.

Претставниците на цивилната заштита ги советуваат жителите на пониските предели да се евакуираат во повисоките. Летовите од аеродромот „Тауранг“ се откажани, а војската распореди 500 војници во тоа подрачје.

Метеоролозите предвидуваат дека ветровите во некои делови на земјата ќе дуваат со брзина од 150 километри на час. Се брановите да достигнат височина до пет метри.

Циклонот Деби во вторникот поплави неколку града во Нов Зеланд.


Нов Зеланд: Огнена стихија му се заканува на третиот најголем град


Крајстчерч, 16 февруари, 2017 - 11:21 (META) 

Стотина пожарникари и десетина авиони се борат со огнот кој се заканува Крајстчерч, трет по големина град во Нов Зеланд. Поради пожарната стихија, евакуирани се повеќе 1.000 луѓе.

Пожарот досега уништил 11 куќи, а локалните власти прогласија состојба на опасност.

Во последните три години во овој регион е забележана голема суша што е причината поради која вегетацијата во околните ридови е лесно запалива.

Огнот брзо се проширил во областа на Порт Хилс и во текот на ноќта зафатил повеќе од 1.800 хектари.


Китовите насукани на плажа во Нов Зеланд спасени благодарение на плимата


Велингтон, 12 февруари, 2017 - 12:08 (META) 

Повеќе од 200 китови кои беа насукани на плажа во Нов Зеланд успеале да отпливаат назад во океанот, соопшти денеска новозеландското министерство за заштита на животната средина.

„Вчера попладне на плажата имаше уште 240 китови и се плашевме дека нема да преживеат. Но, тие самите се спасија бидејќи надојде плимата па можеа да отпливаат назад во водата“, изјавил портпаролот на министерството за заштита на животната средина на Нов Зеланд, Херб Кристоферс, пренесуваат агенциите.

Во петокот на плажата во Нов Зеланд се насукаа над 400 китови, а вчера беше забележано насукување на нови 200. Стотици волонтери деноноќно ги полеваа китовите со вода за да ги разладат, чекајќи ја плимата за да може животните повторно да се вратат во морето. Сепак, поголем дел од китовите не успеаја да преживеат.

На плажата Фервел спит беше забележано најголемото насукување на китови во последните неколку децении на Нов Зеланд. Научниците засега не ја знаат причината за оваа појава, но, претпоставуваат дека таа би можела да биде поврзана со конфигурацијата на подводниот релјеф.


Повеќе од 650 китови се насукаа на брегот на Нов Зеланд


Велингтон, 11 февруари, 2017 - 15:28 (META) 

На брегот на Нов Зеланд денеска се насукале уште 240 китови, само неколку часа откако група волонтери успеаја да вратат дел од китовите кои вчера се насукаа на брегот, јавуваат светските агенции.

За два дена повеќе од 650 китови се насукаа на новозеландскиот брег, на околу 5 километри од плажата Фервел спит на јужниот остров.

Околу 335 китовите угинале, 220 се и натаму насукани, а околу 100 се вратени во морето.

Ендру Ламејсон од одделението за заштита на заливот Голден беј изјавил дека се сигурни дека станува збор за нова група на китови, бидејќи оние кои се насукале вчера биле сите обележани.

Тој изјавил дека околу 20 од китовите што денеска се насукале се еутаназирани бидејќи биле во многу лоша состојба.

Вчера на брегот на Нов Зеланд беа најдени насукани 416 китови, а стотина волонтери од целата земја веднаш пристигнаа да помогнат китовите да ги вратат во вода.

Тие успеаја да спасат околу 100 китови, а потоа формираа ланец за да ги спречат да се вратат на брегот.

Секоја година на плажите на Нов Зеланд се насукуваат околу 300 делфини и китови.


Силен земјотрес од 6,3 степени го потресе Нов Зеланд


Велингтон, 22 ноември, 2016 - 12:45 (META) 

Земјотрес со јачина од 6,3 степени според Рихтеровата скала го погоди северниот остров на Нов Зеланд. Засега нема информации за причинета штета и за евентуални жртви.

Епицентарот на земјотресот бил во близина на брегот на островот, на длабочина од 37 километри.

Потресот доаѓа една недела откако силен земјотрес со јачина од 7,8 степени го погоди јужниот новозеландски остров и усмрти две лица.


Двајца загинати и опасност од цунами по силниот земјотрес во Нов Зеланд


Велингтон, 13 ноември, 2016 - 21:48 (META) 

Премиерот на Нов Зеланд, Џон Ки, соопшти дека најмалку две лица загинале при силниот земјотрес  со магнитутда од 7,8 степени според Рихтерова скала што ја погоди земјата.

Службите за цивилна одбрана им наредиле на жителите на источниот брег на земјата да се преместат во областите кои се наоѓаат на поголема надморска височина поради опасност од цунами.

„Се очекуваат нови цунами-бранови, кои би можеле да бидат поголеми и поопасни“, стои во соопштението на министерството за справување со кризни ситуации.

Сеизмологот Ана Кајсер за новозеландското радио „Џи-ен-ен сајнс“ изјави дека морското ниво е подигнато за еден метар во регионот Северен Кантербери, на Јужниот Остров.

– Тоа е значителен пораст и луѓето треба сериозно да ги сфатат предупредувањата – рече Кајзер.

Новозеландското министерство за цивилна одбрана и за справување со криза соопшти дека може да се очекуваат бранови со височина од 3,5 метри.

Потресот во Крајстчерч предизвика помала материјална штета во главниот град Велингтон, кој се наоѓа на повеќе од 200 километри оддалеченост од епицентарот.

Во истата област бил и епицентарот на земјотресот со магнитуда од 6,3 степени во февруари 2011 година при што загинаа 185 лица.


Првите цунами-бранови го погодија Нов Зеланд


Велингтон, 13 ноември, 2016 - 17:49 (META) 

Првите цунами-бранови, кои настанаа по земјотресот со јачина од 7,8 степени според Рихтеровата скала, го погодија Нов Зеланд, но засега е прерано за да се утврди колкава е штетата и дали има жртви, соопшти новозеландското министерство за справување со кризни ситуации. Како што пренесуваат светските медиуми, брановите достигнувале височина од 2,1 метар.

– Се очекуваат нови цунами-бранови, кои би можеле да бидат поголеми и поопасни – стои во првичното соопштението од министерството.

Сеизмологот Ана Кајсер за новозеландското радио „Џи-ен-ен сајнс“ изјави дека морското ниво е подигнато за еден метар во регионот Северен Кантербери, на Јужниот Остров.

– Тоа е значителен пораст и луѓето треба сериозно да ги сфатат предупредувањата – рече Кајзер.

Јужниот Остров, со површина од околу 151.000  квадратни километри, е најголемиот во Нов Зеланд, со население од околу 1,1 милион луѓе. Епицентарот на потресот е регистриран на 53 километри североисточно од градот Емберли и на околу 90 километри североисточно од градот Крајстчерч, на длабочина од 23 километри. Американските сеизмолошки институт соопшти дека на Јужниот Остров се регистрирани уште десеттина повратни потреси со јачина од 4,9 до 6,2 степени.

Властите на Нов Зеланд претходно ги повикаа лицата од целиот источен брег да се повлечат кон внатрешноста на островот или на повисоките делови, откако силен земјотрес го погоди североисточниот град Кристчерч.

Новозеландското министерство за цивилна одбрана и за справување со криза на Нов Зеланд соопшти дека може да се очекуваат бранови со височина од 3,5 метри.

Премиерот на Нов Зеланд, Џон Ки, на „Твитер“ изрази надеж дека сите се на безбедно по земјотресот и оти цивилната одбрана ја проценува штетата.

Во 2011 година, Кристчерч беше погоден од силен земјотрес со јачина од 6,3 степени, при што загинаа 185 лица, а стотици беа повредени.