ВМРО-ДПМНЕ го врати „М“ во СДСМ


Скопје, 17 јануари, 2018 - 14:22 (META) 

По 16-от конгрес на ВМРО-ДПМНЕ во Валандово на 22 и 23 декември 2017 година и изборот на новиот претседател, во секојдневната комуникација на најголемата опозициска партија со јавноста, како и во изјавите на нејзините први луѓе, нема „ес-де-ес“ како навредливa квалификација за владејачката СДСМ.

Ословувањето на партијата „без М“ беше редовна практика во најголемиот дел на минатата година откако се појави Албанската платформа и ВМРО-ДПМНЕ порача дека „коалицијата на СДСМ со ДУИ и другите албански партии значи дека партијата се откажала од Македонија“ и работи против нејзините интереси и порача дека не заслужува „М“ во името.

Тоа, со ретки исклучоци и тоа главно во прес-конференции и соопштенија на општинските комитети, прекинува некаде на почетокот на декември, со најавата од Никола Груевски дека ќе се повлече од претседателската фотелја, за потоа партијата повторно да го врати „М“ во СДСМ.


Груевски: СЈО потврди дека „бомбите“ може да се монтираат, сечат и лепат


Скопје, 18 декември, 2017 - 13:10 (META) 

Судењата за „Траекторија“ и за насилствата пред Општина Центар од јуни 2013 се политички монтирани случаи заради остварување политичка цел, изјави денеска доскорешниот претседател на ВМРО-ДПМНЕ и поранешен премиер, Никола Груевски, откако во Основен суд Скопје 1 се одржаа кратки рочишта од двете судења.

Во врска со денешното рочиште за „Траекторија“, Груевски како „исклучително интересен и фрапантен момент“ го оцени делот од излагањето на обвинителката од Специјалното јавно обвинителство (СЈО), Лиле Стефанова, дека аудио снимките од прислушуваните разговори, односно „бомбите“ може да бидат манипулирани и контаминирани со уфрлање на делови, доколку и бидат дадени на одбраната.

Ова, како што рече Груевски, ги потврдува претходно искажаните ставови од него и од ВМРО-ДПМНЕ во врска со веродостојноста на „бомбите“.

– Обвинителството вели дека во разговорите можат да бидат уфрлани делови и на тој начин да бидат контамирани, а ова Обвинителство, како што знаеме, материјалите го доби од СДСМ и Зоран Заев, кои којзнае колку уфрлале и монтирале во нив – изјави Груевски пред судот.

Повикувајќи се на Законот за кривична постапка (ЗКП), доскорешниот претседател на ВМРО-ДПМНЕ, рече дека остануваат на ставот дека бомбите не можат да се користат како доказ во судските постапки, но судот под притисок на актуелните власти донел спротивна одлука иако, како што рече, бил свесен за одредбите од ЗКП.

Тој повторно се осврна на набиената агенда на рочишта во врска со случаите од СЈО, потенцирајќи дека тоа не е случај во постапката што се води против премиерот Заев за случајот „Поткуп“, за која рече дека се одложува до бесконечост „се додека не заврши онака како што сакаат да заврши“.

За судењето за насилствата пред Општина Центар во 2013 година, Груевски порача дека и таму имало интересен момент, односно, иако не биле исполнети условите за судење, односно нема систем за снимање, СЈО инсистирало рочиштето да се одложи, ризикувајќи целиот случај да падне во некоја од понатамошните постапки.

 


Груевски на „Фејсбук“: Немам фаворит, нема да се мешам во изборот на делегатите


Скопје, 11 декември, 2017 - 16:13 (META) 

Довчерашниот претседател на ВМРО-ДПМНЕ, Никола Груевски, денеска порача дека нема намера да се меша во одлуките на делегатите на 16-от вонреден конгрес на партијата за избор на нов претседател на партијата, ниту ќе им сугерира имиња. Во обраќањето објавено на неговата официјална Фејсбук страница, Груевски вели дека сите имиња што во јавноста се споменуваат како можни кандидати за претседател се негови долгогодишни соработници, па планира да фаворизира некого.

„Имајќи предвид дека сите тие беа и сеуште се мои блиски соработници, јас не планирам „да застанам зад еден“, да фаворизирам еден, а на сметка на другите кандидати користејќи го моето влијание како долгогодишен Претседател на ВМРО-ДПМНЕ. Изборот на Претседател на ВМРО-ДПМНЕ треба да е демократски и да произлегува од длабоката верба кон таа личност на оние кои ќе гласаат и оние кои им ја делегираат таа привилегија – членовите на ВМРО-ДПМНЕ“, се вели во обраќањето.

Груевски исто така смета дека секој од можните кандидати чии имиња се споменуваат во медиумите досега има доволно искуство, знаење, визија и капацитет, доколку биде избран „со сигурност и убедливо да го победи СДСМ и Зоран Заев на следните избори, доколку има рамноправен терен за политичка борба, доколку останат доследни до своите принципи и декларирани ветувања и доколку ја задржат сопствената независност“.

Тој повика на фер борба, порачувајќи им на кандидатите да водат фер внатрепартиски политички натпревар и да внимаваат на достоинството и угледот на противкандидатите „ бидејќи изборот ќе заврши за дванаесет дена и потоа секој и е потребен на партијата независно дали како член на раководството, пратеник или било каков соработник или поддржувач со значително искуство и авторитет“, вели Груевски.

Тој вели дека во време кога многумина би сакале да ја видат ВМРО-ДПМНЕ поделена и раскарана, кандидатите за претседател, „а потоа и избраниот претседател имаат голема одговорност во однос на задржување на единството на партијата, а со тоа и нејзината сила, моќ и влијание“.


ВМРО-ДПМНЕ го објави списокот на делегати за вонредниот конгрес


Скопје, 10 декември, 2017 - 22:23 (META) 

ВМРО-ДПМНЕ, по седницата на Централниот комитет на кој 100 членови гласале за, еден бил против, а десет воздржани да се одржи вонреден конгрес на 22 и 23 декември на кој ќе се избира нов партиски лидер, на својата веб-страница го објави списокот на делегати.


ЦК на ВМРО-ДПМНЕ денеска ќе го свика конгресот за избор на нов претседател


Скопје, 10 декември, 2017 - 11:25 (META) 

Централниот комитет (ЦК) на ВМРО-ДПМНЕ денеска попладне ќе оддржи седница на која треба да ја потврди одлуката за оддржување на вонреден партиски конгрес на 23 декември во Валандово. На овој конгрес би требало да се прифати најавената оставка на партискиот претседател Никола Груевски и да се избере негов наследник.
До вчера единствената јавно објавена кандидатура за првото место во ВМРО-ДПМНЕ беше на претходниот директор на Државниот архив, Филип Петровски.

Сепак, аналитичарите не му даваат големи шанси, туку повеќе се типува на генералниот секретар на ВМРО-ДПМНЕ Христијан Мицкоски, кој ужива голема поддршка од Никола Груевски и речиси постојано е присутен крај него на јавните настани.

Во јавноста се шпекулира и за можни кандидатури на Илија Димовски, Никола Попоски, Антонио Милошоски, Никола Тодоров и на Влатко Ѓорчев.

Кандидатот за претседател треба да биде предложен од 30 делегати на конгресот. Ќе биде избран ако за него гласаат половината од 560 делегати, кои остануваат исти како на редовниот конгрес што се одржа во 2015 година во Куманово.

Во меѓувреме, ФРОДЕМ на Јове Кекеновски се обрати до членовите на Централниот комитет на ВМРО ДПМНЕ. Според оваа група, набрзина закажаниот и „нестатутарно одреден предлог – термин за одржување на вонредниот Конгрес на ВМРО ДПМНЕ е во прилог на ретроградните сили, криминализираните структури и непријателите на партијата“.

ФРОДЕМ вели дека вонреден Конгрес замислен „според теркот на досегашното раководство во заминување, уште еднаш ќе покаже дека партијата се уште нема сили да се оттргне од прергратките на фамилијата“. Групата предлага да се прифати најавената оставка на Никола Груевски како формално прифатена, тој да биде отстранети и од Извршниот комитет на партијата и да нема право да донесува одлуки.

Исто така се бара да се свика конгрес според статусот, со избор на нови делегати, а откако тоа ќе се случи, да се формира Координативно тело, кое би било сочинето од неосомничени кандидати на ЦК и ИК. Тоа тело би требало да раководи со партијата се до одржувањето на конгресот, порачува ФРОДЕМ.


Илиоски: Со изборот на Џафери, СДСМ ги погази Уставот и волјата на народот


Скопје, 10 мај, 2017 - 15:17 (META) 

СДСМ и Горан Мисовски нелегално го избраа Талат Џафери на позицијата претседател на Собранието и покажаа дека се подготвени да ги погазат и Уставот и волјата на народот за да ги платат политичките фактури од албанските партии и да ја реализираат албанската платформа, обвини денеска на партиска прес-конференција Зоран Илиоски, пратеник и член на извршниот комитет на ВМРО-ДПМНЕ.

– На оваа незаконска одлука, како потписник стои Горан Мисовски со функција заменик-претседавач на Конститутивната седница на Собранието на Македонија. Ова е класичен фалсификат и прекршување на законот. Мисовски немал апсолутно никаква функција да претседава со срамниот собир на кој беше направен обид за избор на Талат Џафери, а уште помалку да се потпишува на нелегитимна одлука. СДС и неговите партнери во низа извршија неколку кршења на деловникот и на нормите – рече Илиоски.

Според него, првото прекршување било тоа што пратениците од СДСМ и нивните партнери продолжиле со работа „по затворање на седницата во 18 часот, од страна на единствениот легитимен претседавач, Трајко Велјаноски“.

– Потоа следуваше ново прекршување со нелегитимниот избор на Мухиќ, а потоа и Горан Мисовски за претседавачи, спротивно на нормите и на процедурите. СДС го оневозможи највисокото демократско парламентарно право, правото на дискусија на пратениците. СДС го прескокна формирањето на Комисија за избори и за именување со што спречи истата да предложи и други кандидати за претседател на Собранието. СДС го погази и правото на пратениците да соберат потписи и да предложат и други кандидати за претседател на Собранието. На крај, без никакво пребројување на гласовите и на присутните, без никаков стенограм и ангажман на стручните служби, СДС нелегално се обиде да си избере претседател на Собранието. Ова дело извршено од Мисовски, е дел од сценариото на СДС да изврши државен удар, да ги погази процедурите, законите, Уставот и деловникот на Собранието на Република Македонија – рече Илиоски.


ВМРО-ДПМНЕ: Заев се претвори во маша на Рама и на Тачи и закана по безбедноста во регионот


Скопје, 5 мај, 2017 - 9:44 (META) 

Криминалецот Зоран Заев во еден ден ги направи Македонците и Бугари и Срби, и покажа како планира „да ја витка кичмата“ на Македонецот во иднина, порачува ВМРО-ДПМНЕ во денешното редовно утринско соопштение за јавноста. Партијата вели дека Заев е поттикнувач и поддржувач на пеењето на албанската химна во Собранието и дека со кршење на Уставот, законот и на деловникот за работа на Собранието се обиде да избере „тирански претседател на Собранието“.

„Криминалецот Зоран Заев направи правен и политички преседан со што отвори можност во иднина, на незаконски начин, да се гласа двојазичноста, албанските банкноти, двојазичните униформи, геноцидот и сите елементи од тиранската платформа, без да се почитува волјата на народот“, порача ВМРО-ДПМНЕ.

Партијата обвинува дека Заев ги влошил билатералните односи на Република Македонија со Република Србија, за што уследија низа реакции на највисоките државни претставници од таа земја, и дека ја доведува во опасност репутацијата на Република Македонија.


Валстром: Новоизбраниот претседател на парламентот во Македонија мора да се почитува


Стокхолм, 1 мај, 2017 - 16:53 (META) 

Новоизбраниот претседател на Собранието во Македонија мора да се почитува, порача шведската министерка за надворешни работи, Маргот Валстром.

„Претседателот беше избран од страна на парламентарното мнозинство и јас со нетрпение очекувам да соработувам со него. Шведска силно ги осудува шокантните акти на насилство што следеа по неговиот избор во четвртокот. Ова е целосно неприфатливо за една демократија и одговорните лица треба да бидат изведени пред лицето на правдата. Следниот чекор сега е да се формира нова влада што е можно поскоро во Македонија, каде предвремени парламентарни избори се одржаа кон средината на декември. Вратата на ЕУ е отворена за сите земји од Западен Балкан, вклучувајќи ја и Македонија“, наведува  Валстром.

Потребни се итни реформи во земјата и не треба да има пречки за мнозинството во парламентот да формира нова влада, пишува во изјавата на шведската министерка за надворешни работи.


СДСМ: Иванов е должен да го почитува Уставот и да го даде мандатот за влада


Скопје, 1 мај, 2017 - 15:23 (META) 

СДСМ реагираше на денешното соопштение од претседателскиот кабинет, во кое претседателот на земјава порача дека се надминливи пречките за доделување мандат за влада, но само доколку постои вистинска определба на лидерите на парламентарните политички партии. СДСМ порача дека претседателот Иванов ќе добие известување за ново парламентарно мнозинство од новиот претседател на Собранието.

„Ѓорге Иванов мора да престане со неразумното однесување и да почне да ги почитува уставните задолженија. Наскоро Иванов ќе добие официјално известување од новиот собраниски претседател, преку кое ќе биде информиран дека има демократски формирано легитимно парламентарно мнозинство. Од тој момент, Иванов мора да постапи во согласност со Уставот и со волјата на граѓаните и да го даде мандатот на претседателот на СДСМ, Зоран Заев, да ја формира новата влада. Јавно објавената програма на новата реформска влада ја гарантира целовитоста и унитарноста на Македонија, со што се исцрпуваат сите неразумни оправдувања за недоделување на мандатот на Иванов со кои ги штитеше криминалните интереси на Никола Груевски, а Македонија ја турна во насилство кое кулминираше во четвртокот, кога криминални структури се обидоа да убијат дел од пратениците на парламентарното мнозинство“, се вели во соопштението на СДСМ.


Џафери по средбата со Хојт Ји: Од утре ќе се обидам да го ставам Собранието во функција


Скопје, 1 мај, 2017 - 14:49 (META) 

Претседателот на Собранието, Талат Џафери, по средбата со заменик-помошникот државен секретар за Европа и за Евроазија на Стејт департментот, Хојт Брајан Ји, рече дека од утре ќе се обиде да го стави Собранието во функција и дека присуството на Ји уште еднаш ја потврдило поддршката на САД за изборот на претседател на Собранието. Џафери денеска влезе во Собранието првпат по изборот и по упадот на некои луѓе од протестот на т.н. иницијатива „За заедничка Македонија“, при што беа брутално тепани пратеници и новинари.

– Првпат по трагичните настани од 27 април, во Собранието ја имам можноста во својство на претседател на Собранието да ви се обратам и да кажам дека имав можност да ја остварам првата официјална средба со високиот претставник од САД. Со него разменивме мислења за потребата за стабилноста и што побргу да ги заборавиме последиците од 27 април. Неговото присуство уште еднаш ја потврди поддршката на САД за иборот на претседател на Собранието – рече Џафери.

Тој вели дека присуството на Хојт Ји ја потврдува поддршката на САД за изборот на Џафери за претседател на Собранието.

– Присуството на американскиот дипломат ја потврдува поддршката од САД за новоизбраниот претседател на законодавниот дом. Од моја страна јас кажав дека ќе се потрудам да бидам претседател на сите пратеници на Собранието, без оглед како се изјасниле за изборот на претседателот на Собранието. Од утре ќе се обидам да го ставам Собранието во функција и посакувам повредените при инцидентот на 27 април наскоро да закрепнат и да им се вратат на секојдневните обврски – додаде Џафери.