Носачот на авиони на САД наскоро ќе пристигне во Јапонското Mоре, најави Пенс


Сиднеј, 22 април, 2017 - 13:15 (META) 

Американскиот носач на авиони „Карл Винсон“ за неколку дена ќе пристигне во Јапонското Mоре, изјавил денеска во Сиднеј, потпретседателот на САД, Мајк Пенс, пренесуваат светските агенции.

Вашингтон, на почетокот на овој месец, најави дека носачот на авиони и неговата флота ќе тргнат кон Корејскиот Полуостров, што беше протолкувано како демонстрација на сила на администрацијата на претседателот на САД, Доналд Трамп.

„Очекуваме носачот на авиони да пристигне во Јапонското Море за неколку дена, а до крајот на овој месец“, изјавил Пенс во Сиднеј.

Американскиот потпретседател истакнал дека режимот во Северна Кореја не треба да се сомнева дека САД имаат ресурси, персонал и присуство во тој дел од светот.

Тензиите помеѓу САД и Северна Кореја добија интензитет по ракетните тестови на Пјонгјанг, но и поради стравот од подготовките за нова нуклеарна проба, шеста по ред.


Руски носач на авиони се упати кон Сирија, Британија загрижена


Лондон, 15 октомври, 2016 - 16:36 (META) 

Носачот на авиони „Адмирал Кузњецов“ од руската Северна флота, исплови на пат кон Средоземјето, соопшти прес-службата на флотата.

За тоа време британските медиуми истакнуваат дека на патот кон крајбрежјето на Сирија, пловилото ќе помине низ каналот Ла Манш, што предизвикува загриженост кај британските власти.

Во соопштението на Северната флота се наведува дека во придружба на „Адмирал Кузњецов“ ќе оди и ракетниот крстосувач „Петар Велики“, големите противподморнички бродови „Северноморск“ и „Вице Адмирал Кулаков“, како и други бродови за поддршка.

Британските медиуми во меѓувреме пишуваат дека „Адмирал Кузњецов“ ќе помине низ Ла Манш, кој Британците го нарекуваат Англиски Канал, во време на затегнати односи помеѓу Лондон и Москва околу сириската криза.

Британската кралска морнарица и нејзините сојузници во НАТО се подготвуваат за тргнувањето на „Адмирал Кузњецов“, а весникот „Мирор“ наведува дека стручњаците оваа ситуација ја оценуваат како „потенцијално запалива“.


Франција го активира својот најголем воен брод во операциите против ИД


Париз, 5 ноември, 2015 - 20:33 (META) 

Франција го испараќа својот најголем воен брод, носачот на авиони „Шарл де Гол“, како засилување во операциите против Исламска држава (ИД), во Сирија и во Ирак, јавува „Би-Би-Си“.

Како што пренесува британскиот национален сервис, неговото активирање во кампањата против ИД ќе го скрати времето што им е потребно на француските борбени авиони за изведување на воздушните напади.

Франција се вклучи во операциите против ИД во Ирак во септември минатата година, како дел од коалицијата предводена од Соединетите Американски Држави (САД). Во септември годинава, француските сили почнаа со воздушни напади врз позиции на ИД и на територијата на Сирија.

Во моментов, според „Би-Би-Си“, Франција користи шест воени авиони од типот „мираж“, стационирани во Јордан и шест од типот „рафал“, во Обединетите Арапски Емирати.

Носачот на авиони „Шарл де Гол“ има капацитет за 40 борбени летала и може да опслужи 100 летови дневно.