Опаѓа бројот на барања за азил во ЕУ


Брисел, 6 август, 2018 - 13:04 (META) 

Во првата половина на 2018 година во ЕУ, Норвешка и Швајцарија биле примени 301.390 барања за азил, што е пад за 15% во однос на првата половина на 2017 година, соопшти Европската канцеларија за азилска поддршка (ЕАСО).

Во јуни годинава, пак, биле примени 1.600 барања за азил помалку отколку во мај.

Денеска објавените бројки од ЕАСО покажуваат дека генерално се задржува трендот на опаѓање на случаите на азил, чиј највпечатлив момент беше опаѓањето за 43 отсто во 2017 година.


Димитров – Бјорнстад: Норвешка двојно ќе ја зголеми финансиската помош за Македонија


Скопје, 7 февруари, 2018 - 17:42 (META) 

Министерот за надворешни работи, Никола Димитров денеска имал средба со амбасадорот на Норвешка во земјава, Арне Санес Бјорнстад, во чиј фокус била норвешката поддршка за евроатлантската интеграција на Македонија, вклучително и проектната помош за подобрување на подготвеноста на Македонија за отпочнување на пристапните преговори со Европската Унија.

Амбасадорот Бјорнстад ја повторил поддршката за евроатланската интеграција на Македонија и неопходните реформи и информирал за одлуката на Норвешка за двојно зголемување на финансиската помош за Македонија во наредниот период.

Двете земји во август 2017 година во Осло потпишаа заедничка изјава за партнерство и соработка.

„Последна потврда за истата е започнувањето на проектот за техничка помош наменет за подобрување на капацитетите за процесирање и заштита на документи и унапредување целокупниот систем за комуникации на Министерството за надворешни работи на Република Македонија, како корисник на проектот. Спроведувањето на овој проект со времетраење од 12 месеци е предвидено да заврши до крајот на 2018 година, додека проценетата вредност на средствата за неговото спроведување изнесува 1,5 милиони евра“, стои во соопштението на Министерството за надворешни работи.

Иако не е членка на ЕУ, Норвешка во континуитет го споделува своето големо искуство во преговарањето и одржувањето тесни врски со Унијата преку Европската економска област, Шенгенската зона и други форуми на соработка.


Парламентарни избори во Норвешка: Мртва трка меѓу конзервативците и лабуристите


Осло, 11 септември, 2017 - 12:03 (META) 

Во Норвешка денеска се одржуваат парламентарни избори, на кои главна тема беа идните односи со Европската Унија и односот кон мигрантите и азилантите.

Според претходно спроведените анкети, ниту една партија нема да освои доволно гласови за да обезбеди мнозинство во парламентот, поради што постизборните преговори за коалициска влада се неизбежни.

На чело на досегашната влада беше Ерна Солберг од Конервативната партија, која беше во коалиција со Партијата за напредок, со поддршка од Христијанско-демократската партија и од либералите.

Главната опозициска Лабуристичка партија и досега имаше најмногу пратеници, но по овие избори ќе ѝ биде потребна поддршка од најмалку две партии за да формира мнозинство.

И конзервативците и лабуристите за време на изминатите месеци ја изгубија поддршката од гласачите.


Димитров со норвешкиот колега потпиша изјава за партнерство и соработка


Ослов, 18 август, 2017 - 15:57 (META) 

Со денешното потпишување во Осло на заедничка изјава за партнерство и соработка меѓу Република Македонија и Кралството Норвешка се отвора ново поглавје во односите со норвешката демократија, соопшти македонското министерство за надворешни работи известувајќи за работната посета на шефот на македонската дипломатија Никола Димитров на Норвешка, со која тој ја завршува нордиската турнеја.

Димитров денеска престојуваше во возвратна посета на Осло, само два месеца откако норвешкиот министер за надворешни работи Борге Бренде беше во посета на Скопје. Престојот во Осло, Димитров го искористи и за средба со поранешниот норвешки министер за надворешни работи Кнут Волебек.

Министерството за надврешни работи на Норвешка денеска објави јавен повик за реформска помош насочена кон зајакнување на ЕУ интеграцијата на Македонија.


Самуелсен: Данска ја поддржува Македонија на нејзиниот евро-атлантски пат


Копенхаген, 15 август, 2017 - 17:38 (META) 

Македонскиот министер за надворешни работи Никола Димитров денеска во Копенхаген добил уверување од својот дански колега, Андерс Самуелсен за поддршка од Данска на реформите што новата македонска влада сака да ги спроведе, соопшти македонското Министерство за надворешни работи.

– Ја имате нашата целосна политичка поддршка за претстојната работа на вашата влада во остварувањето на овие стратешки цели – порачал шефот на данската дипломатија, Самуелсен.

На средбата, министерот Димитров се осврнал на клучните реформски приоритети, насочени кон подобрување и продлабочување на добрососедските односи со земјите од регионот, усвојувањето на планот „3-6-9“, владеењето на правото и независност и на институциите.

Во рамките на регионалната турнеја во нордиските земји што почна денеска, по Данска, Никола Димитров утре ќе биде во работна посета на Шведска, в четврток е во Финска. Скандинавската турнеја ќе ја заврши со посетата на Норвешка в петок.


Џафери ќе се залага за поинтензивна парламентарна соработка со Норвешка


Скопје, 23 јуни, 2017 - 19:31 (META) 

Претседателот на Собранието, Талат Џафери, денеска на шефот на норвешката дипломатија, Борге Бренде, му заблагодарил за помошта и за поддршката што Норвешка ѝ ја дава на Македонија во процесот на евроатланската интеграција и истакнал дека ќе се залага за поинтензивна парламентарна соработка меѓу двете држави.

Министерот, честитајќи му го изборот на функцијата на претседателот Џафери, ја нагласил подготвеноста за продолжување на блиското партнерство меѓу Република Македонија и Норвешка, за споделување искуства, и ја повторил поддршката кон реформските процеси кои треба да доведат до приближување на државата до Европската Унија и до НАТО.

На средбата биле присутни Соња Мираковска, заменик-координатор на СДСМ и на коалицијата, Ејуп Аљими, координатор на ДУИ, и Африм Гаши, координатор на Беса.


Иванов со шефот на норвешката дипломатија, Бренде, разговарал за политичките случувања


Скопје, 23 јуни, 2017 - 14:54 (META) 

Претседателот на Република Македонија, Ѓорге Иванов, денеска го примил министерот за надворешни работи на Норвешка, Борге Бренде, соопштија од претседателскиот кабинет, презентирајќи некои од темите за кои се дискутирало.

Покрај изразувањето подготвеност за унапредување на досегашната соработка, соговорниците разговарале за актуелните политички случувања, како и за безбедносните прашања и за предизвици со кои се соочуваат земјите од регионот, но и за ЕУ. Се зборувало и за продлабочување на политичкиот дијалог.

„Продолжувањето на процесот на проширување треба да биде стратешка цел на ЕУ, независно од внатрешните и од надворешните предизвици со кои се соочува Унијата, а стабилен, безбеден и економски силен Балкан ќе придонесе за стабилноста и за просперитетот на Европа“, посочил претседателот Иванов на средбата, истакнувајќи дека Република Македонија треба што поскоро да ги почне преговорите за членство во ЕУ.

На средбата, како што се вели во соопштението од претседателскиот кабинет, станало збор и за мигрантите и за безбедносните ризици.

„Не само нашата држава и регионот, туку и Европа и целиот свет се соочуваат со сериозни предизвици. Бегалската и мигрантската криза, тероризмот и безбедносните ризици, сè поголемата нетолерантност и непочитување на различностите, непочитувањето на меѓународното право, се само дел од предизвиците што бараат тесна соработка и глобални одговори“, порачал македонскиот претседател.


Шефот на норвешката дипломатија Бренде во посета на Македонија


Скопје, 23 јуни, 2017 - 10:05 (META) 

Министерот за надворешни работи на Кралството Норвешка, Борге Бренде, денеска ќе биде во посета на Македонија, каде што треба да се сретне со државниот врв.

Бренде во 11 часот ќе се сретне со македонскиот министер за надворешни работи, Никола Димитров, по што ќе следува средба помеѓу делегациите на двете земји, а потоа двајцата министри ќе даваат изјави за медиуми.

Како што соопштуваат од Mинистерството за надворешни работи, Бренде со шефот на македонската дипломатија, Никола Димитров, ќе разговара за понатамошниот развој на билатералните односи и на соработката меѓу двете земји, за поддршката и за помошта од Кралството Норвешка за што поскоро зачленување на Република Македонија во НАТО и во Европската Унија, како и за регионалната соработка.

Во рамки на официјалната посета, норвешкиот министер ќе биде примен и од претседателот на државата Ѓорге Иванов, од премиерот Зоран Заев, а ќе се сретне и со претседателот на Собранието, Талат Џафери.


Шекеринска: Во завршна фаза се преговорите за нова влада предводена од СДСМ


Скопје, 22 февруари, 2017 - 13:51 (META) 

„Разговорите меѓу СДСМ и партиите што се очекува да бидат дел од новото парламентарно мнозинство се во завршна фаза. Преговорите за сите прашања се водат исклучиво на основа на Уставот, за тоа постои согласност од сите страни. Очекуваме Македонија наскоро да ја добие новата влада“, рекла заменик-претседателката на СДСМ, Радмила Шекеринска, на средбата со амбасадорот на Норвешка, Арни Бјорнстад, соопшти СДСМ.

Таа нагласила дека новата влада ќе биде реформска и ќе овозможи имплементација на реформските приоритети од извештајот на Прибе и на Договорот од Пржино за да се обезбедат независни институции што ќе работат во интерес на граѓаните и евроатлантска перспектива на земјата.

На состанокот Шекеринска зборувала и за потребата од непречено функционирање на СЈО и на правдата во Македонија.


ВМРО-ДПМНЕ со остри одговори до амбасадорите на САД, ЕУ и на Норвешка


Скопје, 17 декември, 2016 - 10:34 (META) 

Лидерот на ВМРО-ДПМНЕ, Никола Груевски, синоќа одржа одвоени средби со американскиот амбасадор, Џес Бејли, евроамбасадорот Самеул Жбогар и со норвешкиот амбасадор во земјава, Анре Санес Бјорнстад, на кои е разговарано за резултатите од предвремените парламентарни избори, очекувањата од новите парламент и влада, за работата на Државната изборна комисија, како и за говорот на омраза и реториката на протестите пред ДИК.

Амбасадорот Бејли на средбата, на која присуствувале и партиските функционери Никола Тодоров, Владимир Ѓорчев и Александар Николовски, изразил интерес за неколку прашања, но не добил одговори.

На прашањето за плановите за понатамошно коалицирање на ВМРО-ДПМНЕ, како што соопштуваат од партијата, било одговорено дека коалициите ќе зависат не само од ВМРО-ДПМНЕ, туку и од другите политички партии, кои покрај одлуката што треба да ја донесат внатре во партиите, имаат влијание и од други надворешни фактори.

„На прашањето на амбасадорот Бејли за какви надворешни фактори станува збор, се одговори дека за тоа присутните немаат овластување да го информираат. На прашањето на амбасадорот Бејли дали во тој поглед може нешто да помогне, беше одговорено дека не може да помогне пред сè затоа што улогата на амбасадорот е да ја следи состојбата во земјата и да ја информира неговата земја за случувањата. На забелешката на амбасадорот дека досега тој многу помогнал, му беше изразена благодарност за тоа“, стои во соопштението од ВМРО-ДПМНЕ.

За време на средбата, како што се наведува, амбасадорот апелирал дека е добро да се смират страстите на луѓето кои протестираат и прашал која ќе е реакцијата на ВМРО-ДПМНЕ на одлуките на ДИК. И на ова прашање Бејли не добил одговор, со образложение дека партијата не е во можност во моментот да му одговори ниту пак, како што велат од партијата, на хипотетичкото прашањето дали ќе ги почитуваат одлуките на ДИК.

Американскиот амбасадорот истакнал дека САД се пријатели на Република Македонија, иако некои членови на партијата, според неговото мислење, не го делат тој став. Од партијата на тоа возвратиле дека ВМРО-ДПМНЕ нема дилема околу членството во НАТО и во ЕУ,како и во врска со односите со САД, а најдобар доказ за тоа е потпишаната декларација за стратешко партнерство, но дека тоа не значи дека некој поединци, партијата или државата не може да изразат некое несогласување со некои чекори на поединци што ги преставуваат САД.

На средбата со евроамбасадорот Самуел Жбогар било разговарано за оценките за изборите, работата на ДИК, како и за пораките и за очекувањата на Брисел од новиот парламент и од новата влада.

Жбогар нагласил дека Брисел изразува загриженост поради реториката што се користи од дел од говорниците во демонстрациите ДИК. Од ВМРО-ДПМНЕ, како што се наведува во соопштението, истакнале дека подржуваат мирни демонстрации и оти не подржуваат говор на омраза, но истовремено рекле дека жалат што Брисел и меѓународната заедница не изразувале ваква загриженост и во претходните две години додека се одвиваа демонстрации. Во однос на понатамошниот тек на протестите, од партијата изјавиле дека „не може да се предвиди што ќе се случи, бидејќи има голем број револтирани граѓани чии постапки не може да се предвидат и целосно контролираат доколку институциите не работат во согласност со законот“.

На средбата со норвешкиот амбасадор, Арне Санес Бјорнстад, Груевски и претставниците на партијата истакнале дека во последните две години во Република Македонија имало сериозно мешање на одредени претставници на меѓународната заедница во внатрешните работи на земјата и во внатрешно-политичките и меѓупартиски работи. Таквата практика која, како што соопштиле, била присутна и во предизборниот и за време на изборниот период, треба да запре.