НЛБ – Скопје наплатила повеќе од два милиони евра за кражбата


Скопје, 10 февруари, 2018 - 14:00 (META) 

НЛБ – Скопје од осигурителна компанија наплатила 80 отсто од штетата направена со кражбата во април 2017 година, се дознава од билансот на успех за 2017 година, што банката го објави.

Преостанатиот дел од штетата, во износ од 35,241 милиони денари, банката го евидентирала како трошок во билансот на успех заклучно со 31 декември 2017 година на позицијата останати расходи од дејноста.

Лани во април вработен во банката и уште неколку вработени украдоа околу три милиони евра од банкарскиот трезор. Тие беа обвинети и осудени на вкупна казна од 20 години затвор, но парите не беа вратени ниту осудените кажаа каде се наоѓат.

Во билансот се вели дека во текот на целата 2017 година, НЛБ Банка АД Скопје работела согласно усвоената Деловна политика на Банката за 2017-та година, прилагодувајќи го тековното работење на економските и пазарните услови во земјата.

И покрај големата кражба, билансот на банката се зголемил за  5,7% во однос на 2016 година, што главно се должи на порастот на депозитите од небанкарскиот сектор.

Во декември 2017 година, Банката потпиша договор за продажба на уделот во НЛБ Нов Пензиски Фонд којшто преставува 49 отсто од вкупниот капитал на НЛБ Нов Пензиски Фонд.

Нето добивката на банката во текот на 2017 година е повисока за 34,6% во однос на 2016 година.


Девет години и два месеци казна затвор за Бобан Смилевски за грабежот во НЛБ


Скопје, 3 ноември, 2017 - 12:29 (META) 

Бобан Смилевски доби девет години и два месеци затвор за милионскиот грабеж што го изврши во НЛБ. Неговиот брат Горан Смилевски, второобвинет во случајот, е осуден на шест години и шест месеци затвор.

Третообвинетиот Борис Минчевски доби пет години и два месеца, а Мирослав Каевски беше условно осуден на две години и судот му изрече забрана за отуѓување и за давање под закуп на недвижен имот. Со одлуката, судот го одзеде и возилото „голф“ кое се споменува во обвинението.

Според обвинителниот акт, тие се товарат дека од НЛБ украле првин 400.000 швајцарски франци и 375.000 евра, а потоа уште 2 милиони швајцарски франци и 270.000 евра.

Четворицата обвинети за грабежот ја признаа вина, но не открија што сториле и каде се украдените пари.

Судијата Дарко Тодоровски висината на казните ја образложи со фактот дека обвинетите не откриле каде се украдените пари.

Со пресудата тројцата првообвинети се задолжени и во рок од една година по правосилноста на пресудата, солидарно да ја надоместат штетата на банката.

Смилевски во завршните зборови ја призна вината и рече дека парите ги украл бидејќи имал долгови, а тој и семејство живееле под закани.

– Делото не е од лукративна причина и не е за да се оствари имот за себе или за кој било друг. Бев во долгови и во последните два месеци бев под закани, јас и семејството. Губењето самоконтрола ме доведе до ова. За себе можам да кажам дека сум бил пример во приватниот живот, општеството, а до кражбата за себе можам да кажам дека не сум бил криминалец, ниту имам криминален ум – рекол Смилевски во својот завршен збор.


Првообвинетиот за грабежот во НЛБ тврди дека парите ги украл поради долгови


Скопје, 27 октомври, 2017 - 13:37 (META) 

Бобан Смилевски, првообвинетиот за грабежот во НЛБ, во завршните зборови ја призна вината и рече дека парите ги украл бидејќи имал долгови, а тој и семејство живееле под закани, пренесува „Фокус“.

– Делото не е од лукративна причина и не е за да се оствари имот за себе или за кој било друг. Бев во долгови и во последните два месеци бев под закани, јас и семејството. Губењето самоконтрола ме доведе до ова. За себе можам да кажам дека сум бил пример во приватниот живот, општеството, а до кражбата за себе можам да кажам дека не сум бил криминалец, ниту имам криминален ум – рекол Смилевски во својот завршен збор.

Тој додал дека другите обвинети ненамерно ги вмешал, па затоа побара тој да биде казнет наместо нив.

– Колку е поблага казната и колку побргу се вратам во општество, ќе почнам побргу да придонесувам – рекол Смилевски.

Тој им се извини на своите родители за нанесениот стрес и срам, како и на својата сопруга која ја оставил со две малолетни близначиња.

Објавата на пресудата за овој случај е закажана за 3 ноември.

Претходно, Обвинителството побара највисоки казни за четворицата обвинети во случајот – Бобан Смилевски, неговиот брат Горан Смилевски, Борис Минчевски и Мирослав Каевски.

Според обвинителниот акт, тие се товарат дека од НЛБ украле првин 400.000 швајцарски франци и 375.000 евра, а потоа уште 2 милиони швајцарски франци и 270.000 евра.


Обвинителство бара 10 години затвор за обвинетите за грабежот во НЛБ


Скопје, 27 октомври, 2017 - 12:41 (META) 

Основното јавно обвинителство Скопје, во завршните зборови за милионскиот грабеж во НЛБ, денеска побара од судот на обвинетите да им одреди највисока казна, која според Кривичниот законик изнесува 10 години затвор.

Четворицата обвинети, Бобан Смилевски, неговиот брат Горан Смилевски, Борис Минчевски и Мирослав Каевски, на претходното рочиште ја признаа вината, но не открија каде се парите и што сториле со нив. Денеска и тие треба да дадат завршни зборови.

Обвинителството бара највисока казна за првообвинетиот Бобан Смилевски бидејќи ја искористил довербата во банката и ги убедил другите да ги уништат доказите по кражбата, додека за неговиот брат, Горан Смилевски, се бара идентична казна бидејќи откако ги примил парите, го фрлил телефонот и не открива каде се парите.

Единствена олеснителна околност, која може да влијае на намалување на казната, според Обвинителството, би било тоа што обвинетите претходно немале сторено кривични дела.

Адвокатите на обвинетите, пак, бараат поблаги казни бидејќи нивните клиенти ја признале вината и биле угледни луѓе во општеството, односно Горан Смилевски е претседател на Синдикатот на вработените во Народна банка, поради што, според неговиот адвокат, уживал висок општествен углед и добивал признанија и високи оценки за неговата работа.

Според обвинителниот акт, обвинетите, искористувајќи ја својата работна позиција и познавањето на процесите на работа во банката, првин украле 400.000 швајцарски франци и 375.000 евра, а потоа украле уште 2 милиони швајцарски франци и 270.000 евра.

Надлежниот обвинител, кој го води предметот, поднесе обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума пари. Тие се товарат за несовесно работење во службата. Постапката против овие четири лица продолжува одвоено.


Четворицата обвинети го признаа грабежот во НЛБ, но не открија каде се парите


Скопје, 19 октомври, 2017 - 16:08 (META) 

Четворицата обвинети за милионскиот грабеж во НЛБ, на денешното рочиште во Основниот суд Скопје 1 го признале кривичното дело, но не откриле што сториле со украдените пари, соопшти Јавното обвинителство.

„Тие се изјаснија за виновни, односно дека со умисла и во повеќе временски поврзани дејства, искористувајќи ја својата работна позиција и познавање на процесите на работата во банката, противправно присвоиле парични средства во значителен износ од 400.000 швајцарски франци и 375.000 евра. На 10 април 2017 извршиле кражба и на 2 милиони швајцарски франци и 270.000 евра. Иако ги признале во целост наводите од обвинителниот акт, обвинетите не откриле што сториле со украдените парични средства“, стои во соопштението.

По признавањето на вината, судијата закажал рочиште на 27 октомври, на кое ќе бидат изнесени завршните зборови.

За кривичните дела, тешка кражба и затајување, за кое се товарат обвинетите, предвидена е затворска казна од три до 10 години, односно од една до 10 години.

Надлежниот обвинител, кој го води предметот, до судот доставил и обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума на пари. Тие се товарат за несовесно работење во службата.

Постапката против овие четири лица продолжува одвоено.


За милионскиот грабеж во НЛБ, поднесени обвиненија против осум лица


Скопје, 7 јули, 2017 - 14:11 (META) 

Основното јавно обвинителство – Скопје до Основен суд Скопје 1 поднело обвиненија против осум лица, вработени во НЛБ, за кражбата на околу три милиони евра од трезорот на банката. Со обвиненијата се побарани и мерки за обезбедување присуство, односно за првите тројца обвинети е побарано продолжување на притворот, а за едно лице е определена мерка за претпазливост.

Обвинителството утврдило дека во периодот од 31 март до 8 април годинава првите четворица обвинети, искористувајќи ја својата работна позиција, украле 400.000 швајцарски франци и 375.000 евра. На 10 април се украдени два милиона  швајцарски франци и 270.000 евра, за што беше уапсен вработениот Бобан С.

Првообвинетиот се гони за затајување сторено повеќепати, како и за тешка кражба. Исто е обвинението и за второто лице, но со квалификација помагање. Третиот обвинет се товари за тешка кражба со помагање, а четвртиот за соизвршителство во затајување. Пропишаните казни за тешка кражба се од три месеци до десет години затвор, додека за затајување од една до десет години.

Другите четворица обвинетите се товарат за несовесно вршење на должностите со што ја овозможиле кражбата. Двајца се товарат за несовесно работење во подолг период, а другите двајца за еднократно сторено кривично дело. Во согласност со Кривичниот законик, предвидена казна за ова кривично дело е затвор од шест месеци до три години, како и задолжителна парична казна за сторителите.


Парите од НЛБ отишле во Србија, тројца му помагале на Бобан С. во грабежот


Скопје, 19 април, 2017 - 15:24 (META) 

Единицата за економски и за компјутерски криминал на МВР до надлежното Основно јавно обвинителство поднела кривична пријава против уште три лица осомничени дека биле вмешани и му помагале на Бобан С. во грабежот на 3 милиони евра од трезорот на НЛБ, соопшти денеска МВР.

Како што информираат оттаму, станува збор за братот на Бобан С., 44-годишниот Г.С., потоа 24-годишната Е.П., вработена како банкарски комерцијалист во НЛБ, и за 38-годишниот Б.М., пријател на првоосомничениот.

Според полицијата, за нив постојат основани сомнежи дека директно му помогнале на Бобан С. во грабежот на банката.

Осомничената Е.П., како што информираат од полицијата, помогнала во прикривањето на кусокот од 100.000 швајцарски франци, односно првиот затаен износ од авионската пратка од вкупно 1.000.000 швајцарски франци што го украл Бобан С. Потоа, по негово упатство, додека двајцата биле на смена, тој во трезорот, таа на шалтер во банката, примила пари од трезорот во апоени од 500 и од 100 евра, вкупно 375.000 евра, и без да подготви документ за исплаќање на парите од трезорот, му ги дала на рака на Бобан С., кој ги изнел од банката.

На 10 април, кога осомничениот трезорист ја изнел најголмата сума од 2.000.000 швајцарски франци и 270.000 евра од девизниот трезор, сокриени во украсна ќеса, според полицијата, тој парите му ги предал на својот брат, кој, пак, му ги дал на Б.М., кој наредниот ден по 14 часот, преку граничниот премин Табановце со возило „фолксваген голф“ ја напуштил земјава.

Од МВР наведуваат дека вчера тој бил уапсен и бил изведен пред судија на претходна постапка, но не посочуваат каде е извршено апсењето.

„Од страна на СВР Скопје – Единица за економски и за компјутерски криминал, во координација со Основното јавно обвинителство во Скопје, и понатаму се преземаат мерки за целосно расветлување на кривично-правниот настан, за утврдување на кој начин Б.С. изнел од банката дополнително и уште 300.000 швајцарски франци“, стои во соопштението на МВР.

Сепак, и понатаму останува мистеријата што се случило со украдените пари, кои сè уште не се пронајдени.


Сите контроверзии и отворени прашања по грабежот на векот во НЛБ во Скопје


Скопје, 13 април, 2017 - 11:12 (META) 

По најголемиот грабеж во историјата на независна Македонија, на повеќе од 3 милиони евра од трезорот на НЛБ во Скопје, соопштенијата за медиумите испратени од МВР и од Основното јавно обвинителство – Скопје (ОЈО Скопје) вчера малку помогнаа, но повеќе им одмогнаа на новинарите во обидот да ја информираат јавноста за деталите на овој, по многу нешта специфичен грабеж: Трезорист на банката пет дена по ред изнесувал пари во украсна кеса (што е единствениот „сочен“ детаљ што го откри МВР) и никој не го забележал?

И по три дена, мистеријата останува, парите, според досегашните информации, ги нема, сторителот е во притвор, а секој ден се зголемува бројот на отворените прашања.

  • Каде се парите?;
  • Дали трезористот дејствувал сам?;
  • Како е можно цели пет дена никој да не забележи дека лицето изнесува врзопи пари од трезорот?;
  • Дали во банката (во трезорот) имало безбедносни камери кои нонстоп снимале и дали имало лице кое следи што тие прикажуваат?;
  • Од каде е разликата во сумите што се наведени во соопштенија на МВР (2,4 милиони швајцарски франци и 645.000 евра) и на Јавното обвинителство (2 милиони швајцарски франци и 270.000 евра)?

Но, од МВР и од ОЈО – Скопје не добивме јасни одговори. Во МВР велат дека засега не може да се каже нешто повеќе од тоа што е вчера испратено до медиумите, оти сега работата е во рацете на јавниот обвинител.

Од ОЈО Скопје, пак, за разликата во сумите споменати во двете соопштенија, за „Мета“ велат дека нивното соопштение, сепак, не е исцрпно, објавени се одредени детали, но целосната фактографија ќе се види дури во обвинителниот акт.

На прашањето дали осомничениот трезорист Б.С. кажал каде се украдените пари, ни рекоа дека во интерес на истражната постапка, многу детали нема да бидат соопштени на јавноста сè до вистинскиот момент.


Бродњак, првиот човек на групацијата НЛБ: Остануваме во Македонија


Скопје, 12 април, 2017 - 14:05 (META) 

„НЛБ АД Скопје е најдобрата банка во групацијата НЛБ. Ќе останеме на овој пазар оти веруваме во него“, порача денеска во Скопје Блаж Бродњак, првиот човек на групацијата НЛБ.

Претседателот на управата на НЛБ д.д. Љубљана, на денешниот настан со кој НЛБ АД Скопје ја одбележа 15-годишнината од првото електронското банкарство во Македонија, им додели признанија на компаниите најголеми корисници на нејзините услуги за електронско банкарство и рече дека банката има системска улога во Македонија.

– НЛБ е и ќе остане во Македонија. Имаме системска улога и веруваме во овој пазар. Сме и понатаму ќе бидеме пионер на подобрување на искуствата и ќе работиме на иновирање – рече Бродњак.

Со тоа тој сакаше да стивне некои шпекулации што се многу присутни во јавноста во последните години дека групацијата НЛБ размислува да се повлече од Македонија.

Бродњак рече дека е дојден во Македонија поради средбите на словенечки и на македонски бизнисмени во организација на Амбасадата на Словенија во Македонија.


Аргир: Не откриваме детали за грабежот во НЛБ во интерес на истрагата


Скопје, 12 април, 2017 - 13:46 (META) 

Не можеме да откриеме детали за грабежот за да не попречуваме во истрагата, рече Антонио Аргир, претседател на управниот одбор на НЛБ АД Скопје, на новинарско прашање за грабежот во кој вработен на банката украл повеќе од 3 милиони евра од трезорот, а парите не се пронајдени.

Тој и на почетокот на денешниот настан, со кој банката одбележа 15 години од почетокот со работа со електронско банкарство, нагласи дека нема да зборува за настанот и само го повтори тоа што го имаше во неговата пишана изјава за медиумите вчера – дека сите средства на клиентите се апсолутно безбедни, дека настанот нема влијание на секојдневното тековно работење на банката.

НЛБ на денешниот настан ја промовираше и апликацијата „НЛБмПроклик“, за која вели дека е прва комплетна мобилна апликација за правни лица и додели признанија на 15 компании кои се најголемите корисници на електронското банкарство за правни лица.