Теодоракис: Следната недела е клучна дали ќе се реши или нема проблемот со името


Атина, 3 април, 2018 - 9:56 (META) 

Лидерот на грчката партија Река, Ставрос Теодоракис, кој е еден од политичарите со кои Никос Коѕиас имаше средби за да ги информира за текот на преговорите во Виена, по средбата изјави дека „следната недела ќе биде клучна дали ќе се реши или нема да се реши проблемот со името“.

Шефот на грчката дипломатија Коѕиас по разговорите во Виена со македонскиот колега Никола Димитров и со медијаторот Метју Нимиц, одржува серија средби со лидерите на грчките политички партии.

– Коѕиас ме информираше детално, а се надевам и искрено. Си ги кажавме нашите познати ставови. Мислам дека следната недела ќе биде клучна дали прашањето за името ќе се реши или нема да се реши – изјави кусо по средбата Теодоракис.

Денес Коѕиас треба да има уште две средби со лидерката на ПАСОК и на Движењето за промени, Фофи Јенимата и со претседателот на Унијата на центристите, Василис Левендис, додека лидерот на конзервативната Нова Демократија, Кирјакос Мицитакис, одби да се сретне со него и бара за текот на преговорите да биде информиран лично од премиерот Алексис Ципрас.


Нимиц му пишал на Коѕиас, Нуланд утре во Атина


Атина, 16 март, 2015 - 13:50 (META) 

Посредникот во спорот за името, Метју Нимиц, воспоставил контакт со новиот грчки шеф на дипломатија, Никос Коѕиас. Според весникот „Етнос“, Нимиц испратил писмо до Коѕиас за да му честита на преземањето на функцијата, изразувајќи подготвеност да ја посети Атина за да оствари контакт и да се запознае со новата грчка влада. Весникот забележува дека грчката страна одговорила формално на писмото до посредникот, без да упати некаква покана за Нимиц да ја посети грчката престолнина наскоро.

Коѕиас утре попладне ќе има средба со Викторија Нуланд, американската помошничка на државниот секретар за европски работи, на која ќе се разговара за европски и прашања кои ги засегаат двете држави.

Од грчка страна, она што се слуша се размислувањата за пакет мерки за градење доверба кои грчката страна би ги упатила кон македонската како гест на добра волја. Според весникот „Катимерини“, во целата работа веќе е вмешана и заинтересирана и меѓународната заедница како и Европската комисија. Весникот забележува дека сè уште е нејасно какви би биле конкретно мерките, дали македонската страна би ги прифатила и, ако ги прифати, во каква рамка би се одвивале разговорите за овие мерки, односно дали би се одвивале во рамки на Обединетите нации, на билатерално ниво или под капата на ЕУ. Меѓутоа, според весникот, она што е загрижувачко е што нема никакви реакции од ОН и по толку време отакако Коѕиас првпат ги спомена мерките.

Во анализата на „Катимерини“, за мерките се забележува дека до идејата за нив е дојдено по бројните притисоци од САД, Германија и од ЕУ, кои бараат по секоја цена да се интензивираат преговорите меѓу Македонија и Грција за конечно да се затвори вратата на 20-годишниот спор за името. Како што се забележува во текстот, грчки дипломатски оцени биле дека во моментов нема поволни услови за решавање на спорот за името поради што е дојдено до идејата за мерки за градење доверба, кои би биле начин Грција на меѓународната заедница да ѝ го посочи проблемот со иредентизмот на македонската влада.

Грција, според весникот, пред да се одлучи за мерките, во рамки на претходната влада, реагирала остро до САД против индиректните притисоци што се вршат врз Грција. „Катимерини“ потсетува на состанокот на министри за надворешни работи на НАТО и другите држави кои учествуваа во декември 2014 година, чија главна тема беше ИСИЛ, каде грчкиот министер за надворешни работи, Евангелос Венизелос, одлучи да го напушти состанокот бидејќи Македонија во заедничката декларација беше потпишана под уставното име и покрај грчките реакции за тоа дека треба да бидеме запишани под привремената референца. Дипломатски извори за „Катимерини“ тврдат дека целата работа не била масло на американскиот државен секретар Џон Кери, туку на Нуланд, со која утре Коѕиас ќе има средба.

Весникот тврди дека Венизелос по целиот настан реагирал со писмо до Кери, објаснувајќи го проблемот и причините за заминувањето и индиректно реагирајќи против притисоците што се вршат врз Атина. Венизелос во писмото, кое „Катимерини“ вели дека го има во свои раце, објаснува дека за Грција американската одлука Македонија да биде именувана со нејзиното уставно име претставува големо разочарување за грчката страна.

– Оваа одлука ја отежнува мисијата од генералниот секретар на ОН преку посредникот Нимиц да се најде заеднички решение за проблемот – истакнал Венизелос до Кери, објаснувајќи дека решавањето на спорот за името е од стратегиска важност и за Грција и за целата стабилност и безбедност на балканскиот регион.

Поранешниот шеф на грчката дипломатија забележал дека почитувањето на привремената референца за името на нашата држава не е некаков грчки каприц или опседнатост туку почитување на одлуките на Советот за безбедност и меѓународното право.

Грција, според „Катимерини“, се одлучила на олку остра реакција на високо ниво, толкувајќи го американскиот чекор како одлука да се вршат притисоци само врз Атина, а не и врз Скопје. Дополнителна грижа создал и Самитот ЕУ – Западен Балкан во Берлин во август минатата година, каде Грција не беше ни поканета да учествува.
И покрај грчките реакции, притисоците од Вашингон, Берлин и од Брисел продолжиле со предлози да се разговара за мерки за градење довербата, поради што Грција и одлучува да почне разговори и размислувања за мерките.

„Катимерини“ тврди дека средбата на Коѕиас со Никола Попоски во Рига на почетокот на март се смета за официјален почеток на разговорите за овие мерки за градење доверба.

Сепак, во анализата на весникот се истакнува дека грчката влада треба да биде внимателна и добро да размисли за мерките, вмешаноста на меѓународниот фактор во нив, влијанието на актуелната политичка криза во Македонија и за ред други фактори и појаснувања за да не се најде во ситуација да плати прескапа цена за ова прашање.


Нимиц вчера на одделни, а денеска на заедничка средба со Наумовски и со Василакис


Њујорк, 12 ноември, 2014 - 11:20 (META) 

Одделни средби со претставниците на Македонија и на Грција, амбасадорите Васко Наумовски и Адамантиос Василакис, имал синоќа во Њујорк посредникот во спорот за името Метју Нимиц.

Денеска, пак, во 16 часот по македонско време, тој ќе има заедничка средба со двајцата дипломати.

 


Хојт Брајан Ји: Името може да се реши ако Нимиц помогне


Вашингтон, 12 ноември, 2014 - 9:17 (META) 

Решение за спорот за името е можно со асистенцијата на посредникот Метју Нимиц, изјави заменик помошник на државниот секретар на Стејт департментот задолжен за Европа и за Евроазија, Хојт Брајан Ји.

Во пресрет на новата рунда разговори закажани за денеска во Њујорк, тој вели дека за Македонија е значајно да се најде решение за проблемот за името, по што земјата ќе може да се приклучи на Европска Унија и на НАТО.

– Но, не е сè во рацете на едната или на другата страна. На двете страни останува да ја најдат потребната флексибилност и политичка волја за да се постигне компромис – вели Ји за „Дојче веле“.

Тој изјави дека САД ги поддржуваат аспирациите на Македонија да се приклучи на НАТО и на Европска Унија.

– Верувам дека ако има добра волја на обете страни, можно е да се најде решение за сите предизвици и да се надминат сите пречки. На ова Македонија мора да работи со добри преговарачи, заедно со Нимиц. Ние правиме сè што можеме да ги охрабриме и двете страни да го поддржат амбасадорот Нимиц да дојде до решение – заклучи американскиот дипломат Хојт Брајан Ји.


Нимиц на Македонија ѝ предложил „Горна Република Македонија“


Скопје, 11 ноември, 2014 - 10:35 (META) 

Последниот официјален предлог за името што посредникот на Обединетите нации, Метју Нимиц, минатата година, го понудил до Македонија и на Грција, го објави денеска БИРН.

На документот до кој дојде БИРН, стои датумот 9 април 2013 година, што се совпаѓа со датумот на заедничката средба на посредникот со претставниците на Македонија и на Грција во седиштето на ОН, по која беше соопштено дека Нимиц претставил нов предлог, пишува БИРН.

„Во основата на документот е името „Горна Република Македонија“ (Upper Republic of Macedonia), што се совпаѓа со информациите објавени во тој период во македонските и во грчките медиуми, како и со изјавата на лидерот на ДУИ, Али Ахмети, дека предлогот на Нимиц е базиран на тоа име“, коментираат оттаму.

Утре во Њујорк треба да се одржи новата рунда од преговорите за името, на која посредникот Нимиц ќе се сретне со Васко Наумовски и со Адамантиос Василакис.


Нова рунда преговори за името на 12 ноември


Њујорк, 6 ноември, 2014 - 9:52 (META) 

Посредувачот за спорот околу името, Метју Нимиц, ги повикал преговарачите на Македонија и на Грција, Васко Наумовски и Адамантиос Василакис, на нова рунда преговори идната среда, 12 ноември, во седиштето на Обединетите нации во Њујорк.

Како што исвести Ери Канено, портпарол на ОН, двете страни ја прифатиле поканата.