!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Поднесено обвинение за дедото на Тамара кој пукаше во Никола Тодоров


Скопје, 28 септември, 2017 - 17:24 (META) 

Обвинение за убиство во обид и за недозволено изработување, држење и тргување со оружје или распрскувачки материи е поднесено против Љупчо Стојановски, дедото на малата Тамара, кој пукаше во поранешниот министер за здравство Никола Тодоров на 1 јуни годинава, пред примопредавањето на министерската функција.

Како што соопшти Основното јавно обвинителство – Скопје, истрагата против Љ.С. е завршена, обвинението е поднесено, а за него е побарано продолжување на притворот.

Дедото на Тамара е речиси четири месеци во притвор. Неговата 9-годишна внука Тамара Димовска почина на 9 февруари 2015 година, додека чекаше да биде одобрено да и се изврши операција на ‘рбетот во странство. Нејзиниот дедо рече дека пукал во министерот бидејќи го смета за виновен за смртта на неговата внука.


СДСМ: Здравството тонеше поради криминалните апетити на Тодоров и на Груевски


Скопје, 9 септември, 2017 - 13:48 (META) 

„Лицемерна и лажна е загриженоста на ВМРО-ДПМНЕ за состојбата во здравството, бидејќи сите ги чувствуваат последиците од катастрофалните штети што ВМРО-ДПМНЕ ги направи во здравствениот систем. Никола Груевски, Никола Тодоров и ВМРО-ДПМНЕ оставија пустош во здравството, руинирани болници, понижени пациенти и лекари, неупотреблива опрема и огромни долгови на здравствените установи“, реагира СДСМ на денешната прес-конференција на ВМРО-ДПМНЕ.

„Поради криминалното и расипничко владеење на Тодоров и на Груевски, сите здравствени установи во Македонија тонеа во милионски долгови. Клиничкиот центар во Скопје должи 3 милиони евра, бидејќи цели 10 години не се плаќале сметки за вода, а Градската општа болница „8 Септември“ има вкупен долг од 5 милиони евра. Владата предводена од СДСМ стави крај на таквото криминално, коруптивно и расипничко работење во здравството“, се вели во реакцијата.


Груевски до Бејли: ВМРО-ДПМНЕ ќе ги поддржи сите реформи што се во интерес на граѓаните


Скопје, 27 јуни, 2017 - 18:38 (META) 

Лидерот на ВМРО-ДПМНЕ, Никола Груевски, заедно со членот на извршниот комитет на партијата, Никола Тодоров, денеска со американскиот амбасадор Џес Бејли разговараше за актуелната состојба, приоритетите и за предизвиците на државата.

Како што соопштија од партијата, на средбата била констатирана заложбата на земјава што поскоро да добие позитивна одлука за членство во НАТО, што, како што се истакнува, преставува стратешка определба на ВМРО-ДПМНЕ.

Груевски и Тодоров нагласиле дека ВМРО-ДПМНЕ ќе ги поддржи реформските агенди важни за интеграциите во Европската Унија, за кои ќе се оцени дека би биле од интерес на граѓаните. Тие, исто така, ја истакнале потребата од дебата во однос на значајните одлуки и законски решенија.


ВМРО-ДПМНЕ: МВР мора да бара одговорност од тие што го поттикнале „атентатот“ врз Тодоров


Скопје, 4 јуни, 2017 - 15:28 (META) 

Обидот за атентат врз Никола Тодоров не беше афектен чин, туку чин кој беше поттикнуван со години, велат од ВМРО-ДПМНЕ. Пратеникот на ВМРО-ДПМНЕ, Крсто Јовановски, денеска на прес-конференција во партиското седиште рече дека СДСМ и „невладините организации под контрола на Сорос измислуваа стотици лаги против Тодоров само за да ја подготват и да ја подгреат атмосферата до момент во кој некој ќе им поверува и ќе одлучи да пролее крв“.

– Нема земја во светот во која не починал пациент, но тие сметаа дека со прогласувањето на Тодоров за масовен убиец ќе успеат да манипулираат со чувствата на болните, нивните блиски или оние кои загубиле некого. Јасно е дека атентаторот не се одлучил сам да го стори убиството токму на првиот ден од доаѓањето на Зоран Заев на власт – изјави Јовановски.

Тој ги повика органите на прогонот да утврдат кој му го дал пиштолот на осомничениот за да го стори криминалниот акт и да побараат одговорност од сите што го поттикнувале и го помагале атентатот.

– Молкот е неприфатлив. Не смее да се молчи и за подметнатата бомба во семејната куќа на пратеникот Антониjо Милошоски. Не смее да се молчи ниту за демолирањето на автомобилот на Гордана Јанкулоска. Доколку Министерството за внатрешни работи наскоро не ги изведе виновниците пред лицето на правдата ќе биде повеќе од јасно кој стои зад овие крвави пресметки. Јавноста веќе гледа на каков начин антиреформската влада ќе врши дефокус наместо да се посвети на ветувањата што ги даваше. ВМРО-ДПМНЕ им порачува на сите што мислат дека со вакви подли и кукавички акти ќе нè уплашат и ќе нè замолчат дека многу се лажат – рече Јовановски.


ВМРО-ДПМНЕ: Владата на СДСМ ќе биде со краток рок бидејќи е антиреформска


Скопје, 4 јуни, 2017 - 10:54 (META) 

Атентатот што се случи врз Никола Тодоров е директна последица на хистеричната и неаргументирана хајка што СДСМ и невладините организации финансирани од Сорос ја реализираат неколку години, се вели во редовното утринско соопштение на ВМРО-ДПМНЕ.

Од опозициската партија порачуваат дека СДСМ има одговорност и дека „тоа не може да го скрие преку лажни реакции и изјави“.

„Владата на СДС и аболираниот криминалец Зоран Заев ветуваа дека ќе ги вратат младите во Македонија и дека ќе тече мед и млеко. Во текот на кампањата им ветуваа на лекарите дека ќе земаат 100.000 денари, а сега велат дека тоа им е цел која би се остварила до крајот на мандатот. Додека народот ги очекува ветуваните поголеми плати, пензии, просечната плата од 30.000 денари, СДС се обидува да дефокусира со скапо платена, деструктивна и лажна црна пропаганда против ВМРО-ДПМНЕ. Антиреформската влада на СДС наместо да се насочи кон зголемување на платите, пензиите и порастот на економијата, мандатот го почна со укинување проекти и со најава за блокирање на сè што е во тек“, стои во соопштението на ВМРО-ДПМНЕ.

Оттаму нагласуваат дека мерките на СДСМ не водат кон подобар живот бидејќи се популистички, а не проекти кои даваат резултати на долг рок.

„Поради тоа рокот на оваа влада нема да е долг. Оваа влада не е реформска туку антиреформска“, заклучуваат од ВМРО-ДПМНЕ.


СДСМ: Целата јавност слушаше како Груевски се пресметуваше со неистомислениците


Скопје, 2 јуни, 2017 - 20:00 (META) 

Несериозно е Никола Груевски, човекот кој целата јавност го слушаше како нарачува насилство и одмазнички се пресметува со неистомислениците, сега да зборува за поттикнување насилства, реагираат од СДСМ на интервјуто на лидерот на ВМРО-ДПМНЕ, во кое тој ги обвини дека со нивното дејствување и однесување го поттикнале вчерашниот напад врз поранешниот министер за здравство, Никола Тодоров.

„СДСМ остро го осудува вооружениот напад врз Никола Тодоров и бара целосно расветлување на случајот и соодветно казнување на извршителот на нападот. Правдата мора да се спроведува единствено низ судските органи и никако поинаку. Создавање на независно, неселективно и непартиско судство е врвен реформски приоритет на новата влада предводена од СДСМ. Секој за кого ќе се докаже дека извршил какво било незаконско дело ќе понесе одговорност пред професионало и независно судство. Тоа ќе важи за сите, вклучително и за Груевски и за неговите соработници“, стои во реакцијата.

Во соопштението се наведува дека новата влада, покрај реформите во судството, посветено и транспарентно ќе продолжи со спроведување на владината програма која ќе донесе напредок, правда, еднаквост и живот за сите во Македонија.

„Паралелно со реформите во општеството, ги повикуваме чесните пратеници, членови и активисти на ВМРО-ДПМНЕ да почнат внатрепартиски реформи и да се дистанцираат од ретроградната и антидржавничка реторика на Груевски и на неговите соработници и да се вградат во процесите што ќе донесат реформи и добро на сите, а Македонија повторно ќе ја вратат на евроатлантскиот курс“, стои во реакцијата.


Груевски бара одговорност и од тие што го нарекувале Тодоров убиец


Скопје, 2 јуни, 2017 - 18:28 (META) 

Лидерот на ВМРО-ДПМНЕ, Никола Груевски, денеска побара одговорност од тие што го нарекувале убиец Никола Тодоров, поранешниот министер за здравство, кој вчера беше нападнат со гасен пиштол пред Министерството за здравство.

– Ние вчера имавме сторител на атентатот, но има и поттикнувачи. Одоговорност мора да има за тие што го нарекуваа Тодоров убиец и министер за смрт. Јас жалам за девојчето, и јас сум родител, знам како е вашето дете да е болно, но да обвиниш некој за смрт на тоа дете, а притоа да не е така, е огромна грешка – рече Груевски во интревју за телевизија „Алфа“ и додаде дека како премиер направил сопствена истрага и оти резултатите од неа покажале дека малата Тамара Димовска починала од бронхопневмонија, а не од болеста за која требаше да биде оперирана.

Груевски вели дека сето тоа што сега се случува е гнасна пропаганда која СДСМ ја врши против ВМРО-ДПМНЕ.

– Тој центар сакаше да нè направи нелуѓе, монструми, убијци. Со години градеа атмосфера со нереални работи за да нè замрзи народот. Сите смртни случаи во здравството му ги препишуваа на Тодоров, како тој да е виновен што луѓето заболуваат и умираат. Постојат поттикнувачи кои ја создадоа оваа атмосфера – рече Груевски, додавајќи дека во времето додека Тодоров бил министер за здравство се направени најголемите реформи.


Таравари: Вчерашниот напад е последица на огромниот јаз меѓу пациентите и лекарите


Тетово, 2 јуни, 2017 - 18:17 (META) 

Новиот министер за здравство, Арбен Таравари, денеска соопшти дека ќе се укине плаќањето по учинок, економските директори на клиниките ќе бидат назначени за шефови на администарција, а ќе се работи на подобрување на прокетот „Мој термин“. Тој при посетата на тетовската клиничка болница, рече дека во зависност од финансиските можности и од законските прописи, пет до шест лекари од одредена клиника или болница ќе добиваат 10 до 20 отсто зголемување на платата и на тој начин ќе се мотивираат.

Таравари го осуди вчерашниот напад врз поранешниот министер за здравство, Никола Тодоров. Тој истакна дека причината за вчерашниот напад, но и за другите инциденти во болниците е огромниот јаз меѓу пациентите и лекарите, кој особено дошол до израз во изминатите години.

– Жално е тоа што се случи со Тодоров и лично, бидејќи се слушнав со него на телефон, му го изразив моето жалење. Меѓутоа веќе две-три години се пука по доктори и се тепаат лекари. Не би рекол дека ми е мило што почуствувал како е да се биде доктор во Македонија, но секојдневно ни се случуваат такви збиднувања по болниците со пациентите зашто направивме голем јаз во односот пацинет – лекар. Затоа барам од сите, па и од медиумите, помош да изградиме доверба меѓу пациентот и лекарот – напомена Таравари.

Тој, одговарајќи на новинарско прашање за неговото отсуство при посетата на претседтелот Ѓорге Иванов, рече дека шефот на државата има дел од вината за случувањата на 27 април, особено со гаранциите што ги барал за доделувањето на мандатот, како и со аболицијата.

– Иванов не заслужува да се нарекува претседател и тој за нас е само граѓанин – подвлече министерот.
Во однос на релациите со ВМРО-ДПМНЕ, тој истакна дека Алијансата на Албанците нема проблем со партијата, туку само со нејзиното раководство и дека нема да имаат никакви контакти сè додека не се смени раководството на ВМРО-ДПМНЕ.


Нападите не доведуваат до никаква разврска, порача Хелсиншкиот комитет


Скопје, 2 јуни, 2017 - 16:05 (META) 

Хелсиншкиот комитет за човекови права денеска го осуди вчерашниот напад над поранешниот министер за здравство, Никола Тодоров, извршен од страна на дедото на починатата Тамара Димовска.

„Сметаме дека ваквите напади не доведуваат до никаква разврска, туку напротив, можат да предизвикаат немири од поголеми размери. Оттука, се спротивставуваме на овој инцидент, но и на сите други кои како форма на реакција го имаат насилството“, се вели во соопштението.

Од Хелсиншкиот комитет наведуваат дека селективна правда која беше и уште е спроведувана од страна на јавното обвинителство и на судовите доведе до апсолутна недоверба на граѓаните во правосудниот систем.

„Сметаме дека ваквиот настан е токму последица на неефикасната истрага и отсуството на санкции за виновниците за смртта на Тамара Димовска, кои беа блиски до тогашната партија на власт, ВМРО-ДПМНЕ. Имено, Јавното обвинителство покажа целосна интертност во случајот на малолетната Тамара Димовска. И покрај тоа што во конкретниот случај осомничените лица се познати, јавното обвинителство подолго од 2 години нема доставено одговор дали ќе поднесе обвинителен акт против овие лица“, стои во соопштението, во кое се бара институциите итно да ги санкционираат сите сторители на кривични дела, вклучително и за конкретниот настан.

Хелсиншкиот комитет исто така побара итен одговор од Јавното обвинителство за исходот од постапката поведена за малолетната Тамара Димовска и најавија дека ќе поднесат жалба до Европскиот суд за човекови права за повреда на ефикасност на истрагата и правото на пристап до суд и правото на реална жалба.


Поднесена кривична пријава против напаѓачот на Тодоров


Скопје, 2 јуни, 2017 - 15:48 (META) 

Единицата за насилен криминал при СВР Скопје поднесе кривична пријава до надлежното Основно јавно обвинителство Скопје против 60-годишниот Љупчо Стојановски од велешкото село Каласлари, поради основан сомнеж дека вчера пред Министерството за здравство, со употреба на огнено оружје, пиштол, се обидел да го убие поранешниот министер за здравство, Никола Тодоров, соопшти МВР.

Во соопштението се наведува дека таткото на Тодоров ѝ сооопштил на полицијата дека Стојановски вчераутро во периодот меѓу 8.15 и 8.45 часот, се појавил на домашната адреса на поранешниот минитер, барајќи да се види со него.

На местото на настанот од страна на СВР Скопје-ЕУМНА е извршен увид и подигнатиот материјал – еден пиштол и други предмети, е доставен за понатамошна обработка, а пријавениот по укажаната лекарска помош е задржан во полициска станица. Во дадената изјава пред полициските службеници од Единицата за насилен криминал, Љ.С., во присуство на адвокат го искористил правото на молчење.