Димитров: Со Коѕиас станавме вистински пријатели и постигнавме историски договор


Скопје, 18 октомври, 2018 - 10:23 (META) 

Министерот за надворешни работи Никола Димитров по повод оставката на шефот на грчката дипломатија, Никос Коѕиас вели дека двајцата со Договорот од Преспа постигнале нешто што претходните 27 години се сметало за невозможно.

-Предводени од премиерите Алексис Ципрас и Зоран Заев, со министерот за надворешни работи Коѕиас имавме интензивни месеци на комуникација, станавме вистински пријатели и во период од една година успеавме да направиме нешто кое во претходните 27 години се сметаше за невозможно – ги приближивме нашите две земји и го склучивме историскиот договор од Преспа, градејќи мост на пријателство и докажувајќи дека и нашиот регион може да решава спорови и да создава иднина – вели Димитров.

Тој на Коѕиас му посака добро здравје и успех во сите идни предизвици.

– Од наша страна, ние ќе продолжиме со силна посветеност кон заокружување на ова историско решение, заедно со останатите прогресивни и демократски сили во Скопје и Атина – додаде Димитров.


Димитров: Суштината на компромисот се гледа во критиките на нашата и грчката опозиција


Скопје, 17 октомври, 2018 - 14:13 (META) 

Министерот за надворешни работи, Никола Димитров одговарајќи на неколку прашања од пратениците во Собранието рече дека Договорот од Преспа ги врзува чекорите на Македонија кон ЕУ и НАТО со тоа што е интерес на Грција од Договорот.

– Затоа НАТО членството е врзано со влегувањето на сила на Договорот. Затоа стои дека на иста сесија грчкиот парламент кога ќе ја ратификува спогодбата, ќе ги потпише и протоколите за членство со НАТО на Македонија. Клучната критика на нивната опозиција се идентитеските елементи, а клучната критика на нашата опозиција е опфатот на употреба. И тука е суштината на компромисот. За идентитескиот амандман јас имав охрабрувачка реакција затоа што се што е врзано со идентитетот на македонскиот народ не може да е спротивно со текстот на Договорот кој дава апсолутно право на самоидентификација – рече Димиторов.

Тој потенцираше дека поранешниот премиер Никола Груевски бил свесен за овие услови од Грција и дека бил во тек со процесот.

– Во декември 2009 година на телевизиско интервју рече дека Грција бара и внатрешна употреба и јазикот да биде сменет односно да гласи или ново македонски или северно македонски. На 16 ноември 2017 во интервју вели дека Грција не прифаќа нашиот јазик и идентитет да се преведува на англиски. Со Договорот, географската одредница не не прави ништо поинаку од тоа што сме денеска. Додека ние чекаме нова шанса ниту светот ниту Европа не чекаат, ниту во Балканот можеме да си дозволиме да испуштаме шанси – додаде Димитров.

Пратениците во Собранието се на пауза, а расправата за уставните измени продолжува во 15.30 часот.


Димитров: Собранието треба да реши дали ќе ја следи волјата на народот


Скопје, 8 октомври, 2018 - 14:12 (META) 

Собранието треба да реши дали ќе ја следи волјата на народот, изјави министерот за надворешни работи Никола Димитров на денешната дебата „Билатералното на Балканот: Регионалните импликации на билатералните спорови“, организирано во рамки на Форумот за граѓанско општество Скопје 2018.

– Излезноста на референдумот беше близу 37 проценти и иако имаме Изборен законик кој предвидува цензус, сепак 609 илјади граѓани кажаа „да“. Тоа е мнозинството и тие сакаат Македонија да оди напред. Следат разговори во Парламентот. Ни претстои историска одлука. Нашата реалност е дека не може да го заобиколиме спорот за името на патот кон НАТО и ЕУ. Парламентот треба да реши дали ќе ја следи волјата на народот. Ова е клучот. Ако сакаме напред, треба да го искористиме овој клуч – рече Димитров.

Според него, единствен пат кога повеќе граѓани се изјасниле „за“ на некои избори биле оние во 1994 година кога Киро Глигоров беше избран за претседател на државата.

Димитров меѓу другото истакна дека предвремени парламентарни избори се последна опција.


Заев, Димитров, Забрчанeц и Маричиќ на форумот за поддршка на Берлинскиот процес


Скопје, 8 октомври, 2018 - 10:14 (META) 

Четири дебати ќе се одржат денеска и утре во Скопје во рамки на Форумот за граѓанското општество Скопје 2018, а како продолжение на успешната серија на форуми одржани како поддршка на Берлинскиот процес и Самитот што се одржува секоја година почнувајќи од 2015 година во една од земјите-членки ЕУ.

Ко-организатори на Форумот се Фондацијата „Фридрих Еберт“ – канцеларија Скопје (ФЕС Скопје), „Еуротинк“ и Младинскиот образовен форум (МОФ).

Дебата „Еден-на-еден“: „Билатералното на Балканот: Регионалните импликации на билатералните спорови“ ќе се одржи денеска во кино „Култура“, а панелисти ќе бидат шефот на дипломатијата Никола Димитров и основачот на „Коха Диторе“, Ветон Сурои.

На истата локација подоцна ќе се одржи дебата: „Стратешкото размислување за проширувањето“, а панелисти ќе бидат Лукас Холуб, од Делегацијата на ЕУ во Македонија, Бојан Маричиќ, специјален советник на премиерот и технички преговарач со ЕУ и Тоби Вогел, ЦЕПС.

„Ноќна сесија“: „Активизам вс. Консултанство: Која е улогата на граѓанскиот сектор?“ ќе се одржи вечерва во ресторанот „МКЦ“, а панелисти ќе бидат Филип Радуновиќ, ГИЗ, Марјан Забрчанец, специјален советник на премиерот, Венера Хајрулаху, консултантка, Мелиха Бајрамовиќ, ТАНГО.

За утре е предвидена дебата „Еден-на-еден“: „Мостови или ѕидови? Македонија и Западниот Балкан во Европа“ на која како панелисти се најавени премиерот Зоран Заев и Јанис Армаколас, од грчката фондација за европска и надворешна политика (ЕЛИАМЕП).


Уште од 2008 година за ВМРО-ДПМНЕ успешен референдум е мнозинство од излезените граѓани


Скопје, 5 октомври, 2018 - 14:14 (META) 

Шефот на македонската дипломатија, Никола Димитров на „Фејсбук“ објави неколку конкретни ставови околу референдумското изјаснување кои ги оценуваме како вистинити, пишува „Вистиномер“.

Димитров на својот „Фејсбук“ статус посочува дека во програмата на ВМРО- ДПМНЕ на страница 295 е запишано дека: „референдумот ќе биде успешен доколку го поддржат мнозинство од граѓаните кои ќе ИЗЛЕЗАТ да гласаат, а не мнозинство од запишаните на избирачкиот список“ .

Вистина е, како што вели Димитров, дека прашањето за референдумско консултирање на граѓаните за името беше промовирано од сегашната опозиција. ВМРО-ДПМНЕ првпат го стави референдумот уште во 2008 година во изборната програма Перодба во 100 чекори надградена и проширена, во делот „Приоритети на надворешната политика за 2008 – 2012 година“ (стр.146) е наведено дека за можното решение треба да се согласат „мнозинството од граѓаните кои ќе излезат на тој референдум“.

Целата статија прочитајте ја на „Вистиномер.мк“.


Мас: Со референдумот на дофат ви е историска шанса


Скопје, 18 септември, 2018 - 16:39 (META) 

Се надевам дека сите Македонци на 30 септември ќе го искористат своето право и ќе гласаат на референдумот. На дофат е историска шанса да се реши спорот за името и да се отвори европската перспектива на Македонија. Одлуката е во рацете на граѓаните, истакна на заедничката прес-конференција министерот за надворешни работи на Германија Хајко Мас со неговиот домаќин шефот на дипломатијата Никола Димитров.

Според него, решавањето на спорот за името е важен чекор во правец кон Европа.

– Македонија идната година може да почне преговори со ЕУ. Јас сум сигурен дека кај одговорните лица во Скопје ќе се отвори тој пат. Ние сме за европската перспектива на земјите од Западен Балкан. Тоа е важно за стабилноста на регионот и затоа тоа не е само ваш туку и наш европски интерес. Истовремено, пристапувањето во ЕУ подразбира и други критериуми – правна држава, борба со корупција и организиран криминал -кажа Мас.

Димитров рече дека со посетата на Мас, по на онаа на канцеларката Меркел на Денот на независноста и утрешната на германската министерка за одбрана, не може да има појасен сигнал за германската поддршка која се темели на една основна причини дека Берлин препознава решителниот кај Република Македонија да си ги реши проблемите, да застане на нозе и тргне напред.

– Не само од себични или наши причини сум почестен со оваа посета на Мас. Живееме во Европа која е многу зафатена самата со себе Германија и министерот е пример, столб за сегашната Европа и каде сакаме да одиме, убава комбинација на европски вредности принципи – рече Димитров.

Шефот на германската дипломатија, Хајко Мас турнејата во регионот ја завршува со посета и средби во Атина во четврток.

Хајко Мас во грчката престолнина ќе одржи средби со претседателот на Грција, Прокопис Павлопулос, со неговиот грчки колега, Никос Коѕијас и со лидерот на опозициската Нова демократија, Кирјакос Мицотакис.

Тоа е прва посета на Мас на Атина, како министер за надворешни работи на Германија. На средбите ќе се разговара за билатерални прашања и теми поврзани со европската политика.


Шефот на германската дипломатија Мас во посета на Скопје


Скопје, 18 септември, 2018 - 9:43 (META) 

Министерот за надворешни работи на Сојузна Република Германија, Хајко Мас, денеска и утре ќе престојува во официјална посета на Република Македонија на покана на министерот за надворешни работи, Никола Димитров.

Како што соопшти МНР, Мас доаѓа во возвратна посета на Македонија по јунската средба со министерот Димитров во Берлин и на само 10 дена по историската посета на канцеларката Ангела Меркел на 8 Септември годинава. Посетата, додаваат од МНР, преставува дополнителна потврда на активната и недвосмислена поддршка од СР Германија во насока на остварување на нашите стратешки цели – полноправно членство во ЕУ и НАТО.

На средбата, министрите Димитров и Мас ќе разменат мислења за најновиот развој на внатрешно-политичките состојби во Република Македонија, реформската ЕУ и НАТО агенда, регионалната соработка, како и за подготвителните активности поврзани за успешна реализација на референдумот на 30 септември.


Бушати ги повика Албанците кои живеат во Македонија да го поддржат референдумот


Скопје, 13 септември, 2018 - 15:06 (META) 

Апелирам на сите граѓани на вашата земја, особено на Албанците кои живеат тука да дадат поддршка на историскиот Преспански договор, затоа што тој има исклучително значење за демократската стабилност на регионот, изјави денеска шефот на албанската дипломатија Дитмир Бушати на прес-конференцијата со неговиот македонски колега Никола Димитров.

– Сите се согласуваме дека Албанците кои живеат во Македонија ќе бидат огромни поддржувачи на процесите кои течат и уште еднаш сакам да апелирам да излезат масовно да учествуваат во изградбата на иднината и на подобар живот тука. Во оваа насока ќе продолжиме блиско да соработуваме со цел да создадеме што подобра и поинклузивна средина – рече Бушати.

Во однос на македонското малцинство во Албанија, Бушати рече дека се направени чекори напред со новиот Закон за малцинствата, со што, истакна тој, македонското малцинство е признаено како едно од малцинствата што составуваат поширок мозаик на малцинства во Албанија.

Во однос на положбата на Албанците во Македонија, Бушати рече оти тука има подобрена реалност, подобрена клима на соработка и на разбирање и подобра претставеност на Албанците, пред се, како што рече, преку позицијата претседател на Собранието и вицепремиер за европски прашања. Додаде оти очекува Законот за јазици што побрзо да стапи во сила.

Ја повтори поддршката што Албанија како членка на НАТО и ја дава на Македонија, и оти 2019 е многу значајна година за Македонија и ЕУ.


Мичел на средбата со Димитров ја повторил поддршката од САД за членство во НАТО и ЕУ


Скопје, 13 септември, 2018 - 11:51 (META) 

Министерот за надворешни работи Никола Димитров, денеска имаше средба со помошникот државен секретар на САД за европски и евроазиски прашања, Вес Мичел со кого разговарал за евроатлантските перспективи на Република Македонија, како и за актуелните политички состојби во земјата и во регионот, информираат од МНР.

Димитров ја потенцирал важноста од натамошна поддршка на САД во евроатлантските интеграции на Република Македонија и соработката заснована на стратешкото партнерство.

-Нашето заслужено членство во Алијансата, значително ќе придонесе кон градење на просперитетна и побезбедна Република Македонија, што ќе биде од значење и за целиот регион – му рекол Димитров на Мичел.

Помошник државниот секретар Мичел, повторно ја реафирмирал силната поддршка на САД за полноправно членство на Република Македонија во НАТО и ЕУ.

„Тој ги поздрави напорите на Република Македонија на тој пат, особено со конструктивната политика со соседите, како и постигнувањето на решение за спорот околу името со Грција. Во тој контекст, тој ги повтори очекувањата за успешен референдум и имплементација на Договорот со Грција, со цел заокружување на процесот на зачленување во НАТО и Европската Унија“, стои во соопштението од кабинетот на Димитров.


Блок: Политиката на Холандија кон Македонија е строга, но фер


Скопје, 12 септември, 2018 - 16:50 (META) 

Референдумот е дел од демократскиот процес и останува на вашите граѓани да го донесат единственото решението за земјата, изјави шефот на холандската дипломатија, Штеф Блок, по средбата со неговиот македонски колега Никола Димитров.

Тој истакна дека е охрабрен од исклучителниот напредок што Македонија го постигна во кус период, и оти сега претстои да се види напредокот во спроведувањето на законодавните пакети, реформите во правосудството, разузнавачките служби и јавната администрација.

– Преку една длабока и тешка политичка криза ѝ честитаме на Македонија за напредокот што го постигна во еден таков кус период и што ја врати земјата на реформскиот пат – рече Блок.

Според него, Договорот со Грција за прашањето со името е огромен историски чекор, со кој политичките лидери на Македонија и Грција покажале храброст и лидерство да го затворат долгогодишниот спор.

Тоа, посочи тој, доведе до покана за членство во НАТО, што покажува дека добра волја и храброст можат да решат долгорочни прашања, да го зајакнат мирот и стабилноста и да го започнат реформскиот процес заснован на вредности.

– Холандија ја поддржува и перспективата за членство во ЕУ на Македонија. Нашата политика е строга, но фер, кога земјата ќе ги исполни предусловите ќе го поддржиме пристапниот процес за ЕУ во јуни 2019 година – рече Блок.

Димитров се заблагодари за постојаната поддршка што Холандија ја пружа на Македонија, посочувајќи дека оваа година се одбележуваат 25 години од дипломатските односи со Холандија, со која земјава има традиционално пријателство.

– Холандија има политика на стриктно и фер во однос на процесот на пристапување во ЕУ, ние ја поддржуваме оваа политика, бидејќи наша цел е не само да станеме членка, туку и да ја направиме нашата држава европска – рече Димитров.

Тоа, рече тој, ќе го постигнеме преку реформите во правосудството, борбата против корупцијата и начинот на кој ќе го направиме тоа е поважно од тоа кога ќе станеме членка на ЕУ.