Димитров: Македонија се зацврствува со Договорот, никој нема да не дели и распарчува


Скопје, 17 август, 2018 - 9:39 (META) 

Со Договорот со Грција, Македонија се зацврстува на светската мапа како држава. Никој нема да не дели и распарчува, напротив земјава станува полноправна членка на НАТО и почнува преговори со ЕУ, изјави шефот на македонската дипломатија, Никола Димитров во интервју за „Телевизија 24“.

Тој од идниот четврток еднаш неделно на „Прашајте го министерот“, ќе одговара на директни прашања од граѓаните во врска со Договорот со Грција и претстојниот референдум за името на државата. Преку жива снимка на социјалните медиуми неколку дена ќе собираат прашања и потоа еднаш неделно, во четврток, ќе одговара на нив.

Димитров рече дека се уште не знае колку ќе чини организирањето на референдумот, но поважно од тоа, според него, е на граѓаните да им се објаснат основните елементи и придобивките од потпишаниот Договор со Грција. Ги повика граѓаните да го прочитаат Договорот достапен на веб-страницата на Владата.

Објаснувањето го смета за своја должност зашто тој е потписник на Договорот, а неговото поддржување го смета за национална и генерациска обврска во зацврстување на државата и идентитетот.

– Моја должност е да направам се што можам да го објаснам и да им објаснам на граѓаните, зашто пред нас е една историска раскрсница, а одлуката е наша. Зашто влогот е огромен, пред нас е многу одговорна одлука – каде сакаме да ни биде Македонија во следниот период – истакна Димитров, нагласувајќи дека е тешко државата да опстои и да се развива напред ако не е во сојузите ЕУ и НАТО.

Повтори дека со прифаќањето на Договорот, името на државата ќе биде Република Северна Македонија, за што ќе треба да се отвори Уставот, државјанството ќе гласи: македонско/граѓанин на Северна Македонија, химната останува непроменета, јазикот останува македонски.

– Етнички, како народ – македонски народ, Македонци што зборуваат македонски јазик. Стравот кај нас од географска одредница кон името Македонија бил – дали тоа нас ќе не смени. Тоа што ние успеавме експлицитно другата страна да го прифати – нашето право за самоопределување – ќе значи дека ќе може и во ЕУ македонскиот јазик да биде македонски јазик, да бидеме Македонци. Ставаме една точка на дилемите и предизвиците дали сме прифатени и оспорувани. Мислам дека има многу заблуди и магла и треба многу објаснувања за да се расчистат – рече Димитров.

Во врска со разликите што за ова прашање ги има ВМРО-ДПМНЕ, Димитров рече дека не се работи за прашање на ниедна партија, ниту е прашање на Владата, туку е прашање за иднината на државата, нејзиното зачленување во НАТО, почеток на преговори со ЕУ ми останување на младите во државата.

– Луѓе што преку антиквизација додадоа еден куп аргументи на негативните политички сили во Атина, коишто не се заинтересирани ова прашање да се реши, и го искомплицираа многу проблемот, меѓу другото изгубивме симпатии и пријатели со таа политика. Луѓе кои толку не пикнаа во дупка, што ние немавме стартно рамна позиција во јуни 2017 година – рече шефот на македонска дипломатија, нагласувајќи дека најважно е по многуте пропуштени шанси, да се симне тегот што државата ја влече надолу и да се тргне напред заедно со другите земји.

Во врска со противењето на Договорот од страна на лидерот на ВМРО-ДПМНЕ Христијан Мицкоски, Димитров посочи дека легитимно е да се има став и да се аргументира но, рече, не може да кажете: јас сум за ЕУ и за НАТО, а да сте против Договорот и да не нудите друг пат.

– Процени ги овие работи – дали сакаш да одиме напред или да се вратиме во чекалната. Излези и гласај. Негласањето е бегање од личната и општествената одговорност. Граѓаните суверено да одлучат за ова прашање. Да се бојкотира својата иднина, својата држава, својата Македонија, е кукавичлук. Мора со визија и патриотизам да пристапиме кон ова прашање – рече Димитров.


Димитров: „Шарената револуција“ е жед за одговорност, „бојкотирам“ е повик за неодговорност


Скопје, 15 август, 2018 - 12:06 (META) 

Шефот на македонската дипломатија, Никола Димитров, на својот „Фејсбук“ профил порача дека не може да се повлекува паралела меѓу „Шарената револуција“ и движењето „бојкотирам“, бидејќи, како што вели тој, бојкотирањето на референдумот е повик за бегање од одговорноста.

„Шарената револуција е жед за одговорност во ситуација на јавно разоткриен криминал. Кога потфрлија институциите, граѓаните преземаа одговорност, барајќи правда. Бојкотирам е повик за неодговорност, за бегање од одговорност, за немање глас за сопствената и иднината на Македонија, исправена пред историска раскрсница“, пишува Димитров.

Да се размислува за некакви паралели меѓу нив, додава Димитров, е исто како да се става равенство меѓу храброста и стравот, меѓу активниот граѓанин кој се осмелил да прогледа во темница и пасивниот поданик кој се плаши да отвори очи во светлина.


Димитров: Бегањето од референдумот не е патриотизам


Скопје, 6 август, 2018 - 15:56 (META) 

Не смееме да заборавиме дека пропуштивме многу европски возови и дека патот кон нашата стратегиска цел е сe потесен и потежок. Наша должност е да направиме сe што можеме за да се качиме на овој воз, бидејќи никој не знае кога и дали ќе има друг, вели министерот за надворешни работи Никола Димитров во интервју за МКД.мк.

На тврдењата од опозицијата дека можат да постигнат подобар договор за името одговара дека досега, наместо со обид за решавање, низ антиквизацијата биле зафатени со дополнително усложнување на прашањето.

– Да се тврди дека Договорот со Грција, односно решавањето на спорот, нема врска со членството во ЕУ и во Северноатлантската алијанса е како дента да се нарекува ноќ. Не можете да бидете за членството во ЕУ и НАТО, а истовремено да бидете против договорот што ја отстранува пречката, ја отклучува вратата, го кине јажето на каменот што нe влече надолу со децении. Можете, ама треба да понудите друг пат кон целта. Пат што ќе биде кредибилен – вели Димитров.

Шефот на дипломатијата вели дека бегањето од одговорност за (не)делата во минатото и за иднината на татковината, бегањето од волјата на народот, односно референдумот, не може да биде патриотизам, бидејќи патриотизмот значи храброст, одговорност и одлуки во името на повисоки цели и идеали.


Повторно одложена седницата на која Димитров треба да реферира за надворешната политика


Скопје, 1 август, 2018 - 10:54 (META) 

Седницата на собраниската Комисија за надворешна политика на која експозе за надворешната политика требаше да има шефот на дипломатијата Никола Димитров четврти пат е одложена и презакажана за 23 август во 10 часот.

Министерот Димитров не успеа да се обрати пред членовите на Комисијата, бидејќи претседателот на Комисијата Антонио Милошоски бараше пратениците кои поседуваат безбедносен сертификат да ги добијат класифицираните материјали од две лидерски средби одржани кај претседателот на . Материјалите, според Милошоски, се битни за меѓународната политика и за работата на министерот Димитров. Недоставувањето, според Милошоски, значи дека владејачкото мнозинство нешто сокрива и остава простор за сомнеж. СДСМ пак му најави кривична пријава на Милошоски за земањето на строго доверливи документи иако повеќе од две години немал безбедносен сертификат.

Дирекцијата за безбедност на класифицирани информации направи инспекција во вила Водно, и утврдиле дека во кабинетот на Иванов направиле пропусти кога на Милошоски му ги дале строго доверливите документи за лидерските средби за името.

Првиот пропуст е тоа што не провериле дали барателот, во случајот Милошоски има или нема соодветен безбедносен сертификат и не провериле дали тој има потреба да биде запознаен со содржината на документите во рамки на неговите надлежности. Требало да се провери и дали барањето е за поголема група луѓе, во случајот цела комисија и дали сите имаат сертификати. Иако не провериле ништо од ова, од кабинетот ја подготвиле пратката и по курирска служба му ја доставиле на рака на Милошоски иако согласно законот такви документи требало да бидат предадени во собраниска архива, да се заведат во посебна деловодна книга, и да бидат чувани одделно од некласифицираните информации. Откако е утврден пропустот изготвен е извештај и сега најверојатно дирекцијата ќе го предупреди кабинетот и ќе му даде корективни мерки за да се спречат слични упади во доверливите информации во иднина.


Димитров по четврти пат ќе се обиде да реферира за надворешната политика


Скопје, 1 август, 2018 - 9:18 (META) 

Во Собранието денеска седници треба да одржат Комисијата за надворешна политика и Буџетскиот совет на Собранието на Република Македонија.

Комисијата за надворешна политика треба да ја продолжи седницата на која е најавено излагање за остварувањето на меѓународната политика на министерот за надворешни работи Никола Димитров. Седницата на оваа Комисија досега беше неколкупати одложувана.

Министерот Димитров не успеа да се обрати пред членовите на Комисијата, бидејќи претседателот на Комисијата Антонио Милошоски бараше пратениците кои поседуваат безбедносен сертификат да ги добијат класифицираните материјали од две лидерски средби одржани кај претседателот на Република Македонија. Материјалите, рече, се битни за меѓународната политика и за работата на министерот Димитров.

Недоставувањето, според Милошовски, значи дека владејачкото мнозинство нешто сокрива и остава простор за сомнеж.

Во понеделникот седницата беше презакажана за 1 август поради одредени собраниски обврски поврзани со координацијата на пратеничката група, во врска со најавената пленарна седница за утврдување на референдумското прашање во однос на Договорот помеѓу Република Македонија и Република Грција.

Предлог-буџетското барање на Собранието на Република Македонија за 2019 година е единствена точка на дневниот ред на Буџетскиот совет на Собранието.


Повторно одложена Комисијата за надворешна политика на која Димитров треба да реферира


Скопје, 30 јули, 2018 - 9:56 (META) 

Второто продолжение на Комисијата за надворешна политика на која треба да реферира шефот на дипломатијата Никола Димитров е повторно одложено и презакажано за 1 август.

Од Собранието велат дека седницата се презакажува поради одредени собраниски обврски поврзани со координацијата на пратеничката група, во врска со најавената пленарна седница за утврдување на референдумското прашање во однос на Договорот помеѓу Република Македонија и Република Грција.

Последното продолжение требаше да се одржи во четвртокот, но седницата беше одложена за понеделник. Претседателот на Комисијата Антонијо Милошоски тогаш рече дека седницата ќе продолжи со работа кога пратениците кои поседуваат безбедносен сертификат ќе ги добијат класифицираните материјали од две лидерски средби одржани кај претседателот на Република Македонија. Тој информираше дека пратениците со писмо ќе ги побараат овие материјали кои, според него, се наоѓаат кај генералниот секретар на Собранието Цветанка Иванова.


Отфрлена кривичната пријава против Заев и Димитров за загрозување на независноста


Скопје, 27 јули, 2018 - 16:09 (META) 

Основното јавно обвинителство ја отфрли кривичната пријава која ја поднесе Граѓанската иницијатива за здраво, достоинствено и возвишено живеење „Преродба“ – Движење на носителите и бранителите на државниот суверенитет „Македонска преродба“ против премиерот Зоран Заев и министерот за надворешни работи Никола Димитров за загрозување на независноста бидејќи пријавеното дело не било кривично дело за кое се гони по службена должност.

Како што информираат од ОЈО, Движењето ја поднело пријавата против Заев и Димитров поради потпишување на спогодбата со Грција со која според нив биле „разнишани темелите постоењето на Република Македонија, како и со која се врши разнебитување и културен геноцид врз Македонците и Република Македонија“.

Во образложението од ОЈО велат дека Заев и Димитров биле пријавени и за кривичното дело Злосторство против човечноста за кое треба да постапува Основното јавно обвинителство за гонење на организиран криминал и корупција.

„Основното јавно обвинителство Скопје, по анализа на спомнатата Спогодба, тргнувајќи од Преамбулата во која се изнесени целите на актот и нејзините основни начела, оцени дека при склучување на Спогодбата договорните страни се повикале на начелата и целите на Повелбата на Обединетите нации, Завршниот документ од Хелсинки од 1975 година, релевантните акти на Организацијата за безбедност и соработка во Европа и вредностите и начелата на Советот на Европа. При тоа се воделе од духот и начелата на демократијата и се повикале на нивна обврска согласно Повелбата на Обединетите нации и меѓународното право, под каков било изговор и во било која форма, да не се мешаат во внатрешните работи и надлежности една на друга. Надлежниот јавен обвинител ценеше дека пријавените при потпишување на Спогодбата не биле ниту под влијание, ниту пак имале помош од државата кон која нашата земја се доведува во потчинетост или зависност, уште повеќе што по потпишувањето на наведената Спогодба следат и други правни инструменти – ратификација и референдум“, додаваат од Обвинителство.


Димитров: Оддавањето државна тајна го доживувам како антидржавен процес


Скопје, 26 јули, 2018 - 10:52 (META) 

Министерот за надворешни работи, Никола Димитров, на вториот ден од работата на Комисијата за надворешни прашања рече дека нема што да крие, а го праша претседателот на комисијата, Антонио Милошоски, зошто материјалите не биле навремено доставени туку пет минути пред седницата.

-Државна тајна значи дека објавување такви информации може да наштети на процесот кој не е завршен. Во јануари не се договоривме да водиме службени белешки. Во крајна линија се надевавме дека ќе се издигнеме над предизвикот. Надмудрувања од овој тип е како болеста да дојде и да го праша лекувањето до каде е процесот. Оваа саботажа ја доживувам како антидржавен процес – рече Димитров.

Пратениците од опозициската ВМРО-ДПМНЕ бараат Талат Џафери да ги одобри и достават класифицираните материјали, па потоа да се чуе извештајот на министерот за надворешни работи, Никола Димитров.


Димитров ќе дава отчет за надворешната политика пред пратениците


Скопје, 25 јули, 2018 - 10:11 (META) 

Министерот за надворешни работи, Никола Димитров, денеска пред членовите на собраниската Комисија за надворешна политика ќе го презентира извештајот за остварувањето на надворешната политика и меѓународната положба на Република Македонија, а ќе бидат претставени платформите за дипломатските активности на вонредните и ополномоштени амбасадори на Република Македонија во Осло, Кралството Норвешка Серџим Мухамед, во Република Полска Васил Пановски, во Црна Гора Михајло Трпкоски и во Обединетото Кралство на Велика Британија и Северна Ирска, Александра Миовска.

На дневен ред на седницата е и завршниот извештај на Пајо Авировиќ вонреден и ополномоштен амбасадор на Република Македонија во Израел, за време на извршување на мандатот (3 март 2014 година – 28 февруари 2018).

Во Собранието на Република Македонија денеска ќе заседава и комисијата за транспорт, врски и екологија која ќе ги разгледа измените и дополнувањата на Законот за аудио и аудиовизуелни медиумски услуги и измените и дополнување на Законот за основање на Јавно претпријатие Македонска радиодифузија, двата во второ читање.


Димитров: Со контрамерки кон Косово кризата ќе ескалира, мора да најдеме решение


Приштина, 20 јули, 2018 - 15:08 (META) 

Министерот за надворешни работи, Никола Димитров при денешната посета на Косово рече дека ако Македонија воведе контрамерки работата ќе ескалира во лош правец и потоа, повторно ќе мора да се седне за да се најде решение, осврнувајќи се на косовската одлука за зголемувањето на царините на овошјето и зеленчукот.

Тој е убеден дека двете држави ќе ја следат новата европска практика и низ брз дијалог ќе се надмине ова прашање.

– Во време на поврзување и имплеменитрање на Берлинскиот процес кој токму тоа го налага, треба да се елиминираат бариерите. Мислам дека само тоа е патот за заштита и на нашите и на вашите производители. Мислам дека не можете да се заштитите себе си ако го повредите соседот. Не може една мерка да биде добра за Косово, ако не е добра за пријателот во соседството. Мора да најдеме решение – рече Димитров.