!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Самоубиствен напад во џамија во Нигерија, загинаа 50 луѓе


Абуџа, 21 ноември, 2017 - 12:11 (META) 

Најмалку 50 лица загинале во североисточниот нигериски град Муби, кога бомбаш самоубиец, тинејџер, се разнел во џамија, соопштија локалните власти.

Според портпаролот на нигериската полиција, Отман Абубакар, сè уште не се знае колку лица се повредени затоа што се префрлени во многу болници.

Абубакар изјави дека бомбашот самоубиец го детонирал експлозивот додека се наоѓал со други верници во џамијата, а верниците пристигнувале на утринската молитва.

Засега никој не ја презема одговорноста за нападот, но постојат сомневање дека одговорни се припадниците на исламистичката милитантна група Боко харам.


Во Нигерија убиен киднапиран Британец


Лондон, 6 ноември, 2017 - 16:04 (META) 

Државјанин на Велика Британија, кој на средината од октомври беше киднапиран во Нигерија, е убиен, додека тројца се ослободени, соопштија денеска во Лондон.

Британското Министерство за надворешни работи објави дека четворица Британци се киднапирани во нигериската држава Делта на 13 октомври.

Како што се наведува, убиен е Јан Сквир, а британскиот Висок комесаријат и нигериските власти успеале да испреговараат ослободување на Алан Карсон, Дејвид Донован и на Ширли Донован, пренесува „Би-би-си“.


Тринаесет загинати во три самоубиствени напади во Нигерија


Абуџа, 23 октомври, 2017 - 13:43 (META) 

Тринаесет лица загинаа, а 16 се повредени во три самоубиствени напади во североисточниот нигериски град Маидугури, соопштија локалните власти.

Како што јавуваат локалните медиуми, нападите ги извршиле жени, кои на себе носеле експлозивни појаси. Првиот напад се случил во ресторан, а набргу потоа и двете жени – самоубијци се саморазнеле, повредувајќи случајни минувачи.

Северниот дел на Нигерија е честа мета на исламистичката група Боко харам, блиска до Исламска држава. Досега околу 20.000 лица загина во нападите на Боко харам, а од почетокот на борбите на нигериската војска со исламистите, односно од 2009 година, околу два милиона граѓани се внатрешно раселени.


Во Нигерија од колера починале 14 лица


Абуџа, 3 септември, 2017 - 17:20 (META) 

На североистокот на Нигерија од колера починале 14 лица, а жртвите претежно биле раселени лица во прифатни центри кои побегнале поради насилствата на Боко харам.

Нигериското министерство за здравство соопшти дека до 1 септември умреле 14 лица и додаде дека околу 180 лица се заразени со колера.

Колерата е многу заразна болест од која може да се умре за неколку часа доколку на заразениот не му биде укажана лекарска помош. Симптомите се повраќање, дијареја, грчеви во мускулите и општа дехидрација на организмот. Обично се јавува во средини каде има лоши хигиенски услови.


18 жртви на Боко харам во Нигерија


Абуџа, 2 септември, 2017 - 11:00 (META) 

Припадниците на екстремистичката група Боко харам убија 18 лица на североистокот на Нигерија, соопштија нигериските власти.

Нападот е извршен ноќта помеѓу четвртокот и петокот на границата со Камерун, а екстремистите со ножеви ги убивале жртвите.

Нападот го потврди и претставникот на цивилните сили.

Зачестеноста на нападите се зголеми во последните неколку месеци, при што убиени се 172 лица.


Во напад на Боко харам во Нигерија загинаа 40 лица


Абуџа, 28 јули, 2017 - 10:06 (META) 

Најмалку 40 лица загинаа откако исламистичката организација Боко харам нападна група истражувачи на нафта во североисточниот дел на Нигерија, соопштија нигериските власти.

Во борбите во близина на градот Маигури загинаа пет истражувачи. Меѓу загинатите има и нигериски војници и екстремисти, пренесува „Би-би-си“.

Властите стравуваат дека бројот на жртвите би можел да се зголеми.

Побуната на Боко харем трае осум години и досега однесе повеќе од 20.000 животи.

Исламистичката група и понатаму изведува смртоносни напади и покрај тоа што владата минатата година соопшти дека екстремистите се поразени.


Девет загинати и 10 повредени при експлозија на резервоар за гас во Нигерија


Абуџа, 17 јули, 2017 - 11:41 (META) 

Најмалку девет лица загинаа, а 10 добија тешки повреди при експлозија на резервоар за гас во комплекс за гориво на југозападот на Нигерија.

Засега нема објаснување како дошло до експлозијата во објектот на нигериската компанија „Линк оил анд гас“ во Калабара, соопшти полицијата.

– Засега е потврдена смртта на девет лица, а многумина добиле различни изгореници и во моментов се на лекување во локалната болница – соопшти портпаролот на полицијата.

Според очевидци, би можело да се очекува бројот на загинатите да се зголеми.

Како што се наведува, експлозиите на гас се чести во Нигерија, најголемиот африкански произведувач на нафта, затоа што нафтата се транспортира по лоши патишта, во камиони кои се во лоша состојба.

Несреќите редовно се случуваат бидејќи крадците често ги оштетуваат гасоводите.


ОН: Без финансиска помош, повеќе од милион лица во Нигерија ќе остане без храна


Женева, 15 април, 2017 - 14:38 (META) 

Доставувањето храна за повеќе од еден милион луѓе во Нигерија ќе биде прекинато доколку не се исполни ветеното финансирање од меѓународната заедница, соопшти денеска заменик-координаторот за хуманитарна помош при ОН, Петер Лундберг.

– Без доволно финансирање, Светската програма за храна ќе ја намали својата најважна поддршка – изјави Лундберг, додавајќи дека во северниот дел на Нигерија половина милион деца страдаат од глад.

Тој истакна дека се потребни 242 милиони долари помош за следните шест месеци, за да им се помогне на 1,8 милиони луѓе.


Спречен напад на Боко харам на амбасадите на САД и на Британија во Нигерија


Абуџа, 12 април, 2017 - 16:57 (META) 

Претставници на безбедносните сили на Нигерија соопштија дека спречиле обид на припадник на терористичката група Боко харам, блиска до Исламска држава, да изврши напад на амбасадите на САД и на Велика Британија.

Нигериските власти соопштија дека кон крајот на минатиот месец е разбиен синџир на терористи кои „усовршувале планови за напад“ на амбасади и на „други мети кои се од интерес за Западот“ во главниот град, Абуџа.

Во соопштението не се откриваат детали, но се наведува дека пет осомничени се уапсени.


Нигериската војска „случајно“ бомбардирала бегалски камп, повеќе од 100 загинати


Абуџа, 17 јануари, 2017 - 20:20 (META) 

Авион на нигериската војска во акција против Боко харам „случајно“ бомбардирал бегалски камп, при што биле убиени повеќе од 100 бегалци, соопштија нигериските власти.

Командант Лаки Ирабор потврди дека владин авион по грешка бомбардирал бегалски камп во североисточната област Ран, во близина на границата со Камерун.

Во бомбардирањето се повредени повеќе бегалци и хуманитарни работници, меѓу кои и персонал на организацијата „Лекари без граници“ и на Црвениот крст.

Претставниците на државата Борно помагаат во координација и во евакуација на повредените.
Ова е првпат нигериските претставници да признаат ваква грешка.