!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Османи: Политиката нема да се меша, реизборот на судии ќе го прави Судскиот совет


Скопје, 24 јули, 2017 - 14:23 (META) 

Политичките партии од новото парламентарно мнозинство и од Владата се за реформи, но нема да прават генерален реизбор на судии. Надлежноста на тоа е само на Судскиот совет, кој е надлежен да ги решава тие работи, порача вицепремиерот за европски прашања, Бујар Османи, пред почетокот на заедничката работна средба на Секретаријатот за европски прашања и Министерство за правда, која се одржува во Клубот на пратениците во Скопје.

Тој рече дека претходно погрешно се интерпретирале некои делови од изјавите за реформите во судството.

– Во врска со изјавата дали ќе има или не генерален реизбор на судии, консензуален е ставот на Владата на Република Македонија, на Европската комисија, на телата на Советот на Европа, вклучувајќи и Венецијанската комисија, дека неопходни се суштински реформи во судството. Меѓутоа интерпретирањето дека Владата или политичките партии ќе прават реизбор на судии е погрешна интерпретација. Политиката нема да се меша во судството, ниту да прави резибор на судии. Нашиот став е суштински реформи во судството. Таму каде што се згрешило ќе има мерки, но таа надлежност се дава на Судскиот совет како орган кој врз основа на квалитетативни и квантитативни критериуми ќе донесе одлука. Меѓутоа нема да има мешање на политиката, на Владата, на новото парламентарно мнозинство во тој дел. Судскиот совет во рамки на судството ќе треба да прави суштински реформи – рече Османи.

На состанокот покрај министерот за правда, Билен Салији, и претставници на двете тела, присуствуваат и претседателот на Судскиот совет, Зоран Караџовски, и претседателот на Советот на јавните обвинители, Петар Аневски.

Говорејќи пред состанокот, Османи посочи дека реформите на правосудството се клучни и мора да се озбезбеди непристрасно, професионално и независно судство.

– Еден од основните услови во делот на политичките критериуми за членство во ЕУ е непристрасно, професионално и независно судство. Тоа не е само за Македонија, туку за секоја земја кандидат. Оттука и новиот пристап на ЕУ преговорите со кандидатите да ги почнуваат и да ги завршуваат со поглавјата 23 и 24, кои се однесуваат на судството и на човековите права. Но, независно од тоа, независен судски систем, без влијание, правда за сите, судии со висок интегритет, ефикасно судство се основни услови за демократски развој на општеството, за развој на економија, за бизнис-климата. Оттука планот „3-6-9“ најголем број мерки има за правосудството, околу 13 – посочи вицепремиерот Османи, појаснувајќи дека целта на денешниот состанок е заедно со претставниците на независните институции во делот на судството да се создаде консензус за потребата за реформи на правосудството.

Министерот за правда, Билен Салији, посочи дека Министерството за правда формирало Совет за следење на реформите во правосудството, кој веќе работи на повеќе закони за реформи во правосудството. Салији посебно го истакна  предлог-законот со кој ќе се укине Законот за утврдување на факти и укинување на Советот за утврдување на факти и поведување постапка за утврдување одговорност на судија, а сите негови надлежности би се вратиле назад на Судскиот совет на Република Македонија, како што беше претходно.


Судиите од Кривичен се сретнаа со Прибе, бараат да бидат вклучени во реформите


Скопје, 17 јули, 2017 - 17:48 (META) 

Судиите од Основниот суд Скопје 1 денеска имале средба со Рајнхард Прибе и со неговиот тим на експерти, на која било истакнато дека извештајот и препораките на работната група на Прибе од 2015 година „се основа за реформите во судството“.

Судиите на средбата истакнале дека е „потребно нивно поактивно вклучување во процесот на подготвување решенија за прашањата поврзани со финансирање на судството, условите за избор и напредување во кариерата, следењето на работата и оценувањето на судиите, разрешување на судии и други прашања“.

„Воедно судиите истакнаа и дека ги подржуваат процесите кои водат кон зајакнување на нивната независност и враќање на довербата на граѓаните во судството. Присутните на средбата се согласија дека само независно судство може да биде гарант на слободата и на правата на граѓаните“, стои во соопштението на Основниот суд Скопје.

Прибе и неговиот експертски тим, кој од денеска до 21 јули престојува во земјава, денеска имаше средба и со со претседателот на Врховниот суд, Јово Вангеловски. На средбата Вангеловски им ги презентирал неговите предлог-мерки за спроведување на реформите во судството.

Експертот на ЕУ и неговиот тим се ангажирани од Европската комисија да ѝ помогнат и да ја советуваат Владата во спроведувањето на системските реформи за владеење на правото во земјава.


НАТО: Политичката криза ја оддалечува Македонија од членство во Алијансата


Варшава, 9 јули, 2016 - 17:54 (META) 

Политичката криза во Македонија ја оддалечува државата од членството во НАТО. Ова е еден од заклучоците во завршниот извештај на Самитот на НАТО, кој се одржува во Варшава.

„Загрижени сме за развојот на политичките настани во поранешната југословенска Република Македонија, кои ја оддалечуваат земјата од вредностите на НАТО. Ги поттикнуваме политичките лидери во земјата целосно да ги исполнат своите обврски од Договорот од Пржино, донесен во јуни/јули 2015 година, како рамка за одржливо решение за политичката криза. Признавајќи ги првичните чекори за имплементација на договореното, го повторуваме нашиот повик до сите страни да се вклучат во демократски дијалог и да создадат услови за фер и демократски избори, како што е зајакнување на владеењето на правото, слобода на медиумите и независноста на судството“, пишува во извештајот.

Во заклучоците е повторен и ставот од 2008 година од Самитот во Букурешт дека Македонија ќе добие покана за членство во Алијансата, штом го реши проблемот со името.

„Од овие причини силно препорачуваме да се направат интензивни напори за да се најде решение за проблемот со името. Исто така, ги охрабруваме понатамошните обиди за развивање на добрососедските односи и градењето на целосно функционално мултиетничко општество кое се базира на Охридскиот договор“, наведено е во заклучокот.