!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Поплави и свлечишта во Перу усмртија 75 лица


Лима, 20 март, 2017 - 12:32 (META) 

Поројни дождови, поплави и свлечишта во Перу ги однесоа животите на 75 лица, соопштија локалните власти.
Перуанската цивилна заштита соопшти дека 75 лица настрадале, 625.000 лица се загрозени, додека 70.000 останале без покрив над глава.

Поради поројните дождови поплавен е системот за канализација во градовите долж Тихиот Океан, а властите почнале да преземаат мерки против комарци.

Владата ја испрати војската да ѝ помогне на полицијата во одржување на јавниот ред во повеќе од 800 градови, во кои е прогласена вонредна состојба.


Еден загинат во силно невреме на југот на Бразил


Бразилија, 13 март, 2017 - 10:54 (META) 

Во невреме што го погоди јужниот дел на Бразил, загина едно лица, а повеќе десетици се повредени.

На снимките што ги пренесоа локалните медиуми, прикажани се потопени улици во градот Порто Алегре, главен град на бразилската држава Рио Гранде до Сул, а на веб-страницата на локалните власти е објавена фотографија од куќа која е урната од невремето.

Властите соопштија дека еден од најтешко погодените градови е Сао Франциско де Паула, каде загина едно лица, а многу жители се принудени да ги напуштат своите домови.


Во невреме на југот на САД загинаа 18 лица


Вашингтон, 23 јануари, 2017 - 10:15 (META) 

Во невремето што викендов го зафати југот на САД, настрадаа 18 лица, соопштија денеска локалните власти.

Вкупно 14 лица загинаа ноќта меѓу сабота и недела во американската држава Џорџија, каде што уште пет лица се водат за исчезнати.

Четворица настрадале и 20 се повредени во торнадо на југот на државата Мисисипи.

Невремето предизвикало материјална штета и многу домаќинства останале без електрична енергија, бидејќи силниот ветер носел дрва и ги прекинал електричните кабли.


Забранет влез за камиони и за автобуси во Грција, поради лошите временски услови


Скопје, 11 јануари, 2017 - 18:55 (META) 

Сообраќајот по државните патишта се одвива во зимски услови по претежно влажни коловози, со остатоци од снег на коловозот, информираат од Автомото-сојузот на Македонија.

Од АМСМ велат дека поради лошите временски услови и состојбата на патиштата, не се дозволува влез на товарни возила и на автобуси во Грција.

Забранa за сообраќај за тешки товарни возила има и на патниот правец Маврово – Дебар.

Снег со слаб интензитет провејува во Делчево, Крива Паланка и во Маврово. Поради ниската температура, на места е можна појава на голомразица.

Во клисурите и во засеците можна е појава на помали одрони, особено на патните правци Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.


ЦУК: Состојбата е стабилна, но ниската температура е нов ризик-фактор


Скопје, 7 јануари, 2017 - 17:31 (META) 

Управувачкиот комитет за кризи на денешната седница заклучи дека состојбата во Македонија со невремето предизвикано од неповолните метеоролошки услови е генерално стабилна, но оти сè уште простојат ризици за негативен развој на настаните, особено од ниската температура што може да предизвика проблеми во снабдувањето со електрична енергија и со вода, како и во сообраќајот.

Портпаролот на Владата, Александар Ѓорѓиев, рече дека надлежните служби прават сè што е во нивна моќ на централно и на локално ниво за да се надминат предизвиците со кои се соочува земјата. Тој рече дека од денеска во следните денови главен предизвик со кој ќе се справуваат е ниската температура, која создава проблеми со здравјето на населението, снабдувањето со електрична енергија и со водоснабдувањето, како и со движењето на лицата и со сообраќајот.

Ѓорѓиев рече дека институциите остануваат подготвени во секој момент да дејствуваат и на секој дел од теренот и да сторат сè што е во нивна моќ за да се сведат ризиците на минимум и последиците да бидат надминати во краток временски период. Тој истакна дека на сила остануваат препораките и законските обврски за движење во сообраќајот и нагласи граѓаните кои мора да патуваат, тоа да го прават во периодот од денот кога има повисока температура.

„ЕВН Македонија“, како што рече Ѓорѓиев, во текот на минатата вечер имале поголем број интервенции во западниот дел од земјава, а во моментов работат на санирање на проблемите во некои од планинските села во источниот дел од Македонија. Според податоците на „ЕВН Македонија“, потрошувачката на електрична енергија за разлика од вчера, кога беше повисока за 5 отсто од вообичаеното, денеска е зголемена за 10 отсто. Тоа, како што соопштиле од „ЕВН Македонија“, може да предизвика проблеми со снабдувањето, поради што се препорачува граѓаните рационално да ја користат електричната енергија.

Од Центарот за управување со кризи (ЦУК) истакнаа дека магистралните патишта во земјава и во најголем дел регионалните се проодни во зимски услови и отежнато. Авионскиот и железничкиот сообраќај се одвиваат редовно, освен на делот од пругата од Велес кон Кочани, каде од синоќа од 21 часот има наноси на снег.

– Меѓуградските линии се одвиваат редовно, со задоцнување од половина час до час, а забрани за сообраќај за тешки возила засега има на планинскиот превој Маврово, но забраните во текот на денот повторно може да стапат на сила, бидејќи од час на час состојбата се менува. На бесплатниот телефонскиот број на ЦУК за итни повици 195, во последното деноноќие имавме околу 60 повици, кои во најголем дел беа од инфромативен карактер – рече Надица Вчкова од ЦУК.


Отсечени села во охридско, меѓуградскиот сообраќај во отежнати услови


Скопје, 6 јануари, 2017 - 12:43 (META) 

Сите крајезерски села од Пештани кон Свети Наум се отсечени поради снежните наноси и ниската температура.
До Трпејца, Љубаништа и со Свети Наум откажани се линиите во меѓуградскиот сообраќај, а тешко се стигнува и до повисоките села како Велестово, Елшани, Коњско и Шипокно.

Отсечени се и планинските села во општина Дебрца.

Автобусите кои сообраќаат од Охрид до Скопје и обратно, како и дел од тие што сообраќаат до другите дестинации во земјава, поаѓаат во редовните термини, но пристигнуваат на крајната дестинација со задоцнување.
Од охридската транспортна фирма „Галеб“ велат дека нивните возила патуваат и преку превоите без поголеми проблеми, но со мало задоцнување.

– Во моментов сообраќајот на Стража се одвива подобрено во однос на синоќа и превојот е прооден. Полошо е на Пресека, но автобусите сепак се движат натаму. Кон Велес и кон Штип и Кочани е исто така проблематично (особено на Плетвар), но сообраќајот се одвива со мало доцнење. Автобусот кој синоќа тргна кон Белград во моментов е во Ниш затоа што автопатот е привремено затворен поради снежни навеви и наноси на коловозот – информираат од најголемиот автопревозник во Охрид, АД „Галеб“.


Најмалку шест загинати и 18 исчезнати во тајфунот што ги погоди Филипини


Манила, 27 декември, 2016 - 9:53 (META) 

Најмалку шест лица загинале, а 18 се водат како исчезнати во силниот тајфун Нок Тен што завчера ги погоди Филипини, соопштиле властите во Манила, јавуваат светските медиуми.

Невремето, кое е ретка појава за ова време од годината, поминало низ пет филипнски провинции и стигнало во близина на главниот град, кој бил поштеден од бурата. Тајфунот со ослабен интензитет продолжил да се движи кон Јужното Кинеско Море.

Тајфунот Нок Тен во неделата првин ја погодил источната провинција Катандуан, каде ветерот достигнал брзина од 235 километри на час. Поради невремето, повеќе области останале без електрична енергија, биле евакуирани повеќе од 400.000 луѓе, а откажани се и 330 домашни и меѓународни летови.

Како што пренесуваат светските агенции, станува збор за најсилното невреме што ги погодило Филипините, по тајфунот Хаијан во 2014 година, кога загинаа или исчезнаа повеќе од 7.300 лица.


Невреме со силен ветер и со дожд го погоди Лондон


Лондон, 20 ноември, 2016 - 15:28 (META) 

Невреме проследено со силен ветер и со дожд го погоди Лондон, а граѓаните останале без превоз бидејќи многу возови кон претстолнината биле откажани.

Невремето Ангус го погодило и јужното крајбрежје на државата, а во Дорсет патиштата биле оштетени. На каналот Ламанш дувале ветрови со брзина од 156 километри на час.

Во Лондон брзината на ветрот изнесувала 64 километри на час, а во западниот дел на градот имало поплави.

Властите издале повеќе од 25 предупредувања за можни поплави и на подрачјето на југозападот на Англија.


Најмалку тројца загинати во невремето и во поплавите во Албанија


Тирана, 8 ноември, 2016 - 15:28 (META) 

Најмалку три лица ги загубиле животите во невремето и во поплавите што синоќа и денеска ја зафатија Албанија, јавува дописникот на „Мета“ од Тирана.

Првиот случај е регистриран во општината Клос, каде 42-годишниот Џевахир Ндои загинал откако воден бран го одвлекол заедно со возилото во кое се наоѓал.

Втората жртва, идентификувана како 50-годишниот Кастриот Спахиу од селото Сука, настрадал додека вршел поправки на покривот од својата куќа, кој бил откорнат од силниот ветер.

Попладнево околу 13.30 часот полицијата соопштила дека било пронајдено мртво тело во реката Тирана. Лицето, за кое се претпоставува дека е на околу 50-годишна возраст, но засега е сè уште неидентификувано, според полицијата најверојатно настрадало во поплавите.

Албанија од ноќеска е зафатена од силно невреме. Поради силните врнежи од дожд и ветерот, голем дел од Тирана остана без електрична енергија. Поплавени беа куќи и автопатишта, а траекти останаа блокирани на пристаништето во Валона поради големите бранови.


Невреме во Албанија – исклучена струја, поплавени куќи, блокирани автопатишта


Тирана, 8 ноември, 2016 - 12:23 (META) 

Лошото време и обилните врнежи од дожд што синоќа и утрово зафатија делови од Албанија предизвикале прекин на електричната енергија во поголем дел од главниот град на земјата, јавува дописникот на „Мета“ од Тирана.

Од фирмата за дистрибуција на електрична енергија (ОШЕЕ) соопштиле дека некои од трансформаторите биле поплавени поради што морале да ја исклучат струјата за да можат да интервенираат и да го намалат нивото на водата.

Во изминатите неколку часа, поради силните ветрови, имало големи бранови во морето, поради што два траекти кои сообраќаат на релацијата Валона – Бриндизи (Италија) не можеле да испловат утрово од пристаништето во Валона, а околу 300 патници останале блокирани.

Силните врнежи поплавиле и неколку автопатишта во Албанија, а ризик од поплавување им се заканува и на повеќе куќи. Според информациите, сообраќајната полиција веќе интервенирала и евакуирала граѓани кои биле заробени во своите возила, а сообраќајот на дел од патиштата се одвива отежнато.

Во меѓувреме, метеоролозите предвидуваат дека слични временски услови, силни дождови и ветер, ќе преовладуваат во текот на целиот ден.