!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Денеска е Меѓународен ден на проверка на фактите


Скопје, 2 април, 2017 - 18:52 (META) 

Денеска (2 април) е промовиран како Меѓународен ден на проверка на фактите од страна на Меѓународната мрежа за проверка на факти основана при институтот „Поинтер“ од Сент Питерсбург, сојузна држава Флорида, САД, во соработка со организациите за проверка на факти од светот.

„Ова не е само обичен настан, туку верување дека повеќе од кога било е потребна проверка на фактите во политиката, во новинарството и во сите други области“, вели организаторот на настанот на својата веб-страница.

Денот не е случајно одбран, велат организаторите, туку станува збор за ден кој доаѓа по Меѓународниот ден на шегата (и лагата, н.з.), за да се истакне значењето на проверката на фактите.

На веб-страницата може да се најдат и упатства како да се прави „факт-проверка“ и зошто е тоа важно.

Фондацијата за интернет и општество „Метаморфозис“ заедно со своите медиумски проекти „Сервис за проверка на фактите во медиумите“ и „Вистиномер“ е единствен член од Македонија на глобалната мрежа за проверка на факти составена од 45 невладини и медиумски организации.


Спотот на Вучиќ за претседателските избори забранет да се емитува во медиумите


Белград, 17 март, 2017 - 17:32 (META) 

Советот на Регулаторното тело за електронски медиуми (РЕМ) им наложи на српските медиуми во рок од 24 часа да прекинат со емитување на предизборниот спот за престедателскиот кандидат на владејачката коалиција, Александар Вучиќ, во кој се извикува „Вучиќу педеру“, јавува дописничката на „Мета“ од Белград.

Како што е објавено на веб-страницата на РЕМ, спотот е забранет бидејќи го крши Законот за огласување според кој „огласната порака не смее да содржи изјави или визуелно претставување кое може да биде навредливо“.

Имено, РЕМ на веб-страницата наведува дека врз основа на реакциите на дел од невладините организации кои се занимаваат со заштита на правата на ЛГБТИ-лицата, се утврдило дека на крајот на предизборниот спот на претседателскиот кандидат Вучиќ шестпати се слуша викање од стадион „Вучиќу педеру“.


Вклученоста на Ромите во образовниот процес е значително подобрена, велат невладините организации


Тетово, 16 март, 2017 - 13:55 (META) 

Состојбата на Ромите и нивното вклучување во образованието етапно се подобрува, како резултат на проектите што ги спроведуваат невладините организации, сметат учесниците на тркалесната маса „Подобрување на состојбата на Ромите во образовните процеси“.

Од невладината „Сонце“ велат дека бројката на Роми што се запишуваат во основно и во средно образование е многу зголемена. Ваквиот став го делат и други невладини организации што учествуваа на денешната тркалезна маса.

– Децата подолго престојуваат во училиште и мошне е подобрена состојбата со завршување и на основно и на средно образование. Со големи напори на невладиниот сектор и на државните институции, сметаме дека од сите сектори каде може да се дејствува во образованието е најмногу постигнато и ние работиме да се зајакнат капацитетите на семејствата и да го поддржуваат образованието кај своите деца – рече Елена Мишиќ, од фондацијата „Чекор по чекор – Македонија“.

На тркалезната маса учествуваа и претставници на невладини организации од Косово, кои нагласија дека Ромите не се прифатени во нивното општество. Најчесто, како што посочија, тие се дискриминирани во процесите на вработување и на образование.

Оттаму се надеваат дека со нивните активности и преку националната стратегија за подобрување на статусот на Ромите, дискриминацијата кон оваа заедница ќе се намали.


Панел-дискусија: Депониите во Тетово се резултат на немањето политичка волја


Тетово, 9 март, 2017 - 16:58 (META) 

Дивите депонии во Полошко се резултат на немањето политичка волја за решавање на еколошките прашања и ниската граѓанска еколошка свест. Ова се размислувањата на дискутантите, кои денеска во Тетово учествуваа на панел-дискусијата „Депонии без стандарди во Тетово“.

– Во Тетовско имаме стотици диви депонии затоа што ѓубрето кое се фрла на дневна основа не се собира редовно, за разлика од Скопскиот Регион каде 95 отсто од ѓубрето кое го фрлаат домаќинствата се собира. Затоа мора властите многу подобро да менаџираат со оваа работа, за да не ни се создаваат нови диви депонии – вели Баже Јосифоски од невладината огранзиација „Ајде Македонија“.

Од граѓанската организација „Еко-герила“, сметаат дека властите треба да најдат долготрајно решение за да се реши проблемот со појавата на дивите депонии.

– Мора во Полошкиот Регион да се изгради современа регионална депонија, каде ќе се депонира и ќе се рециклира целиот смет собран од областа. Само така може да се надмине проблемот. Парцијалните решенија, како изградба на станица за претовар на отпад, каде одредено време ќе се депонира отпадот, а потоа ќе се транспортира во скопската депонија Дрисла не може да го реши проблемот – изјави Гани Мехмеди од „Еко-герила.“

Џелал Цека, директор на Јавното комунално претпријатие Тетово, вели дека моментално работат на изградба на претоварна станица за отпад. Тој изјави дека без поддршка од владата, не може во Полошкиот Регион да се изгради современа регионална депонија за депонирање и за рециклирање на сметот, па мора да работат на вакви решенија, со кои се ублажува проблемот со дивите депонии.

Министерството за животна средина во соработка со општините од Полошкиот Регион, неколкупати почна постапка за изградба на регионална депонија во гостиварско Русино. Досега, на таа локација, каде сè уште без никакви стандарди се фрла сметот, нема ништо изградено.


Две штипјанки ги загубиле работните места бидејќи останале бремени


Штип, 23 февруари, 2017 - 18:23 (META) 

На две штипјанки не им биле продолжени договорите за работа, бидејќи останале бремени. Тие случаите ги пријавиле во Комисијата за заштита од дискриминација при Општината Штип, но тоа не ги спасило од статусот невработени мајки.

Ова како податок го изнесе Снежана Санева од Комисијата за заштита од дискриминација, а дека отказите не добиле завршница во институциите на системот, потврди и заменичката на народниот правобранител, Елена Ѓорѓоноска-Маневска, во чија канцеларија нема ниту една претставка за дискриминација.

Покрај родовата припадност, дискриминацијата при вработување е најчеста основа за обесправување во државата, покажало истражувањето на невладините организации ХЕРА и Коалицијата „Сексуални и здравствени права на маргинализираните заедници“. Преку проект, организациите ќе се обидат да им ја доближат работата на оваа сензитивна тема и на граѓаните во градовите од внатрешноста.

– Се утврди потребата повеќе да се работи на локално ниво. На национално ниво, т.е. во Скопје, ја имаме Комисијата за заштита од дискримацијата, која е централизирано тело и е потешко достапно за граѓаните од другите градови – изјави Драгана Дрндаревска при презентирање на проектот во Штип.

Во рамките на овој проект ќе бидат формирани координативни тела во општините Штип, Куманово и Струмица, каде ќе можат да се пријавуваат облици на дискриминација.


ВМРО-ДПМНЕ: СДСМ и Сорос го приватизираа и уништија невладиниот сектор


Скопје, 16 февруари, 2017 - 9:57 (META) 

СДСМ и Сорос 20 години го приватизира и уништува НВО секторот, како да го добиле на тендер во Струмица, велат од ВМРО-ДПМНЕ преку писмено соопштение.

„Фондација „Отворено општество Македонија“, Младинскиот образовен форум, Фондацијата „Метаморфозис“, Хелсиншки комитет за човекови права на Република Македонија, ЏЕФ Македонија и останатите десетици невладини кои потпишаа договор со СДСМ се само маша на аболицираниот криминалец Зоран Заев преку која коалицијата СДСМ и Сорос го уништува невладиниот сектор 20 години. Овие квази-граѓански организации палеа и уништуваа за време на платеничката револуција лажејќи дека се борат за правда, а беа предводени од аболицираниот Зоран Заев“, се вели во партиското соопштение.

Од ВМРО-ДПМНЕ додаваат дека ваквото, како што велат, грубо силување на невладиниот сектор од страна на СДСМ и Сорос е најдобар показател зошто во Македонија е неопходен и итен процесот на десоросоизација.


Прес-конференција на невладините организации во 12 часот во ГЕМ-клуб


Скопје, 7 февруари, 2017 - 10:43 (META) 

Во 12 часот во ГEM-клуб, претставници на невладиниот сектор и на повеќе граѓански организации ќе одржат прес-конференција во врска со клетвите, лагите и со обвинувањата упатени кон нив од претставници на „Стоп операција Сорос“.

Невладини и граѓански организации вчера испратија деманти и побараа извинување од Цветин Чилиманов, Ненад Мирчевски и од Никола Србов, кои на прес-конференција во саботата ги обвинија дека „работеле против државните и демократските интереси на Македонија, преку обиди за влијаење на предвремените парламентарни избори“.

Организациите наведуваат дека информациите што Чилиманов и Србов ги изнеле се клевети насочени кон сите организации што биле критични кон работата на институциите во Македонија.

Фондацијата за интернет и општество „Метаморфозис“ во својот демант вели дека „СОС дрско одработува за интересите на една политичка партија, односно се вклучува во нејзината јавно објавена агенда за пресметка со независниот и прогресивниот дел од граѓанскиот сектор“.

„Ниту фондацијата „Метаморфозис“, ниту кој било од донаторите со кои соработуваме, не финансираат ниту спроведуваат проекти базирани на партиски или идеолошки ориентации. Сите наши активности и финансиски извештаи се достапни за јавноста“, стои во дописот, со кој се бара јавно извинување.


Јавното обвинителство води предистажни постапки против невладините и Беса


Скопје, 3 февруари, 2017 - 21:42 (META) 

Одделението за организиран криминал при Јавното обвинителство Скопје води предистражна постапка за незаконско финансирање на изборниот процес против повеќе невладини организации и политичката партија Беса, јавува „Нова ТВ“.

Порталот како извор на информацијата посочува „многу високи извори во истрагата кои поради личната безбедност побарале да останат анонимни“.

Според нив, станува збор за невладини организации кои се финансирале од странски донатори, како владата на САД и други влади од западните земји и од Фондацијата „Отворено општество“.

Предметот, пишува „Нова ТВ“, бил оформен помеѓу 20 и 30 декември минатата година, непосредно по завршувањето на предвремените парламентарни избори или три дена по прогласот на ВМРО-ДПМНЕ во кој најави борба со невладиниот сектор или таканаречената „десоросизација“.

Во предистражната постапка, наводно, биле вклучени високи безбедносни служби во полицијата.


Јанкулоска: Никој не е недопирлив, па ни НВО финансирани од Сорос


Скопје, 30 јануари, 2017 - 11:08 (META) 

„Никој не е недопирлив, па ни невладините организации финансирани од Сорос… Потребно е да има еднакви правила и ред и во функционирањето на невладиниот сектор, а институциите мора да бидат оставени непречено да постапуваат и да си ја работат сопствената работа“, вели во интервју за „Дневник“ поранешната министерка за внатрешни работи и висок функционер на ВМРО-ДПМНЕ, Гордана Јанкулоска.

„Граѓанското општество и функционирањето на невладиниот сектор е од клучно значење за развојот и за функционирањето на една демократија. НВО во едно општество и тоа како, може да бидат коректив на институциите и да наметнува теми кои се од значење за граѓаните. Сепак, општественото значење што го имаат невладините организации не може да биде параван за деструкција и за насилно менување на демократски избрана власт. За жал, кај нас токму тоа се случи. Мрежата на НВО финансирани од Сорос безмалку се претвори во монопол, со својата финансиска доминација истиснувајќи ги од сцената невладините организации кои имаат ставови поинакви од нивните. Ваквото деструктивно дејствување наместо коректив на институциите, ги претвори во деструктивен елемент во општеството. Но, светот се менува, а нашето општество созрева“, вели Јанкулоска во интервјуто.

Таа во него зборува и за повлекувањето на обвинението за случајот „Пуч“, и во тој контекст вели дека „целокупното дејствување на Катица Јанева, поддржано и од некои дипломатски претставници во земјава, во изминатава година беше насочено кон создавање алиби за Зоран Заев, Зоран Верушевски и за нивните инспиратори, односно чадорот“.

Во врска со случајот „Тенк“ на СЈО, таа категорично негира дека учестувала во набавката на блиндираниот „мерцедес“ од 600.000 евра и вели дека службите во МВР задолжени за јавни набавки професионално си ја завршиле работата.


ВМРО-ДПМНЕ и ДУИ не се согласуваат околу „десоросоизацијата“


Скопје, 16 јануари, 2017 - 16:37 (META) 

ДУИ не се согласува со досегашниот коалиционен партнер ВМРО-ДПМНЕ кога станува збор за процесот на „десоросоизација“, најавен од лидерот на ВМРО-ДПМНЕ, Никола Груевски.

Од ДУИ за телевизија „Алсат М“ велат дека имаат добра соработка со невладиниот сектор и со Фондацијата „Отворено општество“. Не споменувајќи ја директно ВМРО-ДПМНЕ, од ДУИ велат дека државните органи треба да се занимаваат со можните сомнежи од аспект на финансирањето на невладините организации, а не со нивната дејност.

„Невладините организации треба да имаат можност слободно да работат. Истото се однесува и на Фондацијата „Отворено општество“. Државните органи треба и ќе реагираат само доколку постојат сомневања околу изворите на финансирање или доколку нивната дејност е спротивна на законот. ДУИ ќе продолжи да има коректна соработка со невладините организации во земјава“, велат од ДУИ.

Прашани кој би бил нивниот став доколку ВМРО-ДПМНЕ на преговарачката маса бара да се преземат заеднички конкретни мерки при „десоросоизацијата“ на Македонија, од ДУИ велат дека немаат информации за тоа која невладина организација или кој медиум со кого е и од кого е финансиран.

Поимот „десоросоизација“ првпат го спомена Груевски во таканаречениот „проглас“, кој го соопшти на протестот пред Државната изборна комисија на 17 декември.

– Ќе се бориме за десоросоизација на Република Македонија и за зајакнување на независен граѓански сектор кој нема да биде под ничија контрола. Ќе се пристапи кон регулирање на областа на финансирање на фондациите и НВО, по теркот на најнапредните демократии во светот – рече Груевски.