МВР не дава граѓанскиот надзор во агенцијата за прислушување да биде без најава


Скопје, 1 февруари, 2018 - 17:10 (META) 

Владата и Министерството за внатрешни работи го прифатиле предлогот на невладините организации Советот за граѓански надзор над прислушувањето да може да врши контрола по сопствена иницијатива, но, не и барањето таа да биде без претходна најава.

Барањата се дел од пакетот коментари и предлози за измена на текстот на Законот што до МВР го доставиле повеќе невладини организации.

„Во однос на коментарот кој се однесува на надзорот над следењето на комуникациите уклажуваме дека е профатена забелешката за надзор над ефективноста на следењето на комуникациите и прифатени се забелешките за допрецизирање на одредбите за Советот за граѓански надзор (да постапуваат по сопствена ионицијатива, право на буџет, просторни услови и друго)“, стои во одговорот на МВР, кој заедно со коментарите и предлозите е објавен на Единствениот национален електронски регистар на прописи (ЕНЕР).

Ова барање веќе е вметнато во текстот на Законот кој е во сообраниска процедура.

Инаку, во првичното решение на новиот Закон за следење на комуникациите, Советот за граѓански надзор беше предвидено да врши контрола единствено „врз основа на барање на граѓани и правни лица за забележано незаконито постапување или неправилности во спроведувањето на мерките за следење на комуникациите.

Сепак, како што може да се види во текстот што е во Собрание, Владата и МВР, кои се предлагачи на Законот не го прифатиле предлогот на невладините Советот за граѓански надзот да врши контрола во Оперативно-техничката агенција без претходна најава.

За утре во собраниската Комисија за одбрана и безбедност во 10 часот е закажана јаавна расправа по предлог-законот за следење на комуникациите и за предлог-законот за Оперативно-техничка агенција.


Администрацијата најмалку одговара на новинарските прашања


Скопје, 19 декември, 2017 - 13:47 (META) 

Има реална потреба од менување на Законот за слободен пристап до информациите од јавен карактер иако попроблематична е неговата примена отколку самиот закон – беше констатирано на денешната јавна расправа за овој закон што ја организираше Министерството за правда.

Законот треба да се менува во роковите, во исклучокот да не се даде информацијата, и во  надлежностите што ги има Комисијата за заштита на ова право, беше речено на расправата одржана во Скопје.

Според статистичките бројки што беа изнесени, администрацијата најмногу го избегнува ова право кога станува збор за медиумите.

– Доколку новинарите поставуваaт прашања, процентот на одговор од администрацијата е околу 37 отсто, доколку тоа го прават граѓаните, тогаш процентот е 50 отсто, а доколку прашува невладина организација, тогаш администрацијата одговара во над 70 отсто случаи – изјави Герман Филков од Центарот за граѓански иницијативи, истакнувајќи ги нивните искуства кои се големи, зашто годишно поставуваат околу 1000 прашања до институциите и имателите на информации од јавен карактер.

Бројките покажуваат дека има потреба од менување во законот, изјави Тамара Чаусидис од Самостојниот синдикат на новинари и медиумски работници, потсетувајќи дека ССНМ и други четири новинарски организации ова барање го имаат испратено и официјално до Владата уште пред повеќе месеци.

Претседателот на Комисијата за заштита на правото на слободен пристап до информации од јавен карактер. Ѓорѓи Сламков. изјави дека Комисијата, исто така, има свои забелешки на законот и тоа во три насоки – нормативен дел од законот, роковите за постапување и надлежностите на Комисијата и капацитетите на самата Комисија.

Тој потенцираше дека Комисијата останала само со тројца членови, а за да ги исполнат роковите од законот и поради големиот број барања држат седници секоја недела преку цела година.

Сламков истакна дека во однос на администрацијата, најдобро зборува податокот дека, од околу 700 жалби во текот на годинава, преку 500 се однесувале на молкот на институциите.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Невладините немаат официјална информација дека истрагите против нив се затворени


Скопје, 22 ноември, 2017 - 12:40 (META) 

Граѓанските организации што беа предмет на истраги на МВР по налог на ОЈО, сè уште немаат добиено официјална информација дека истрагите се завршени и не е пронајден криминал, вели Фани Каранфилова-Пановска, извршната директорка на Фондацијата „Отворено општество“ – Македонија, на денешната конференција „Е-општество“ во организација на Фондацијата за интернет и општество „Метаморфозис“.

– Многу ми е драго што слушнавме изјава од министерот за внатрешни работи дека истрагите што ги спроведуваше МВР по налог на ОЈО кон граѓанските организации се затворени и не се најдени никакви криминални дејства. Таа вест е одлична, но сакам да кажам дека ние, повеќе од 22 организации што бевме предмет на сериозен институционален притисок од декември 2016 до мај, односно јуни 2017 година, сè уште немаме никаков официјален одговор од ОЈО од каде што беше поведена оваа истрага и под чиј налог и МВР и Финансиската полиција и Агенцијата за финансиско разузнавање беа присутни во нашите канцеларии. Немаме никаква официјална информација дека предистражната постапка е запрена затоа што не се најдени прекршувања на законите, а официјална информација за постапките немаме ниту од Управата за јавни приходи – вели Каранфилова-Пановска.

Според неа, медиумските реформи треба да се направат професионално и нагласи дека дебата мора да има и дека треба навремено да се истакнуваат сите недостатоци.

Таа на конференцијата „Е-општество“ истакна дека и не постои никаква гаранција дека сè уште не се прислушува нелегално.

– Можеби и не се прислушува, но јас не добивам таков впечаток ниту од пишаните документи ниту од тоа како течат процесите. Со самиот факт што МВР допрва поведува инцијатива за нов закон за оперативно-техничка агенција што треба да го извади делот за прислушување од УБК, покажува дека таму поставеноста до пристапот до информации не е променета – додаде Каранфилова-Пановска.


Завршени се истрагите против невладините организации – криминал нема, вели Спасовски


Скопје, 17 ноември, 2017 - 15:01 (META) 

Истрагата за невладините организации е завршена затоа што не биле пронајдени нелегални дејности, информираше денеска министерот за внатрешни работи, Оливер Спасовски.

– По извршените анализи и консултации со Основното обвинителство за гонење организиран криминал и корупција, МВР, односно Бирото за јавна безбедност заедно со Управата за финансиска полиција ги затворивме овие истраги бидејќи не постојат никакви докази што можат да ја потврдат основаноста на сомневањата дека нешто е направено. Има поднесено една кривична пријава во СВР Струмица, која се однесува на незначителна сума од прикривање на персонален данок, меѓутоа никаква друга организирана нелегална дејност нема од невладините организации во Република Македонија и затоа е затворена оваа истрага – рече Спасовски.

Истрагите против невладините организацииа ги почна претходната власт на ВМРО-ДПМНЕ , со образложение дека „СДСМ и Сорос константно работат на уништување на граѓанскиот сектор и иницијативи, како и на независното новинарство во Република Македонија“.

Никола Груевски, во таканаречениот „проглас“ на протестот пред Државната изборна комисија на 17 декември минатата година, за првпат ја најави т.н. „десоросоизација“.

– Ќе се бориме за десоросоизација на Република Македонија и за зајакнување на независен граѓански сектор, кој нема да биде под ничија контрола. Ќе се пристапи кон регулирање на областа на финансирање на фондациите и НВО, по теркот на најнапредните демократии во светот – рече тогаш Груевски.


Утре почнува дебатата за предлог-буџетот за 2018 година, со покани и на затворена сесија


Скопје, 1 ноември, 2017 - 15:40 (META) 

Министерство за финансии утре ќе организира дебата на затворена сесија за предлог-буџетот за 2018 година, на која ќе учествуваат само поканети претставници на граѓански организации, синдикати и на стопански комори.

Од Министерство за финансии, за „Мета“ велат дека ќе бидат поканети оние организации што се занимаваат со теми од областа на финансиите.

– Сакаме да бидеме поттик за другите министерства, да покажеме дека треба да организираат дебати и да бидат отворени кон предлози од организации што ја третираат нивната проблематика. Ние сме Министерство за финансии и покануваме организации кои се занимаваат со оваа проблематика – велат од министерството.


Министерство за финансии: Нема спорни исплати кон невладиниот сектор


Скопје, 27 октомври, 2017 - 16:33 (META) 

Министерство за финансии реагира на написите во дел од медиумите, во кои се вели дека на невладините организации се исплатени половина милион евра, појаснувајќи дека станува збор за редовни трансфери, во овој случај, кон спортските федерации, Црвен крст и кон Противпожарниот сојуз.

„Извршена е исплата од страна на Агенцијата за млади и спорт во согласност со планираниот буџет кон спортски федерации и клубови, како и за учество на меѓународни натпревари од околу 26,4  милиони денари. За оваа цел најголем дел од средствата во согласност со закон се обезбедуваат од приредување на посебните игри на среќа и истите се користат за финансирање на спортот, за спортските федерации и клубови. На ист начин се обезбедуваат и средствата кои Министерството за труд и социјална политика ги исплаќа на Црвениот крст, кои исто така спаѓаат во ставката трансфери кон НВО и се редовни исплати. Во текот на вчерашниот ден, исплатени се 500.000 денари за оваа намена. Што се однесува на останатите средства 525.000 денари, станува збор за исплата која Агенцијата за заштита и спасување ја извршила кон Противпожарниот сојуз“, се вели во соопштението.


ВМРО-ДПМНЕ: Дали Владата дала милион евра на невладините за да купува гласови?


Скопје, 4 октомври, 2017 - 17:02 (META) 

„Веќе пет дена Владата не дава одговор на кои невладини организации се префрлени еден милион евра во предизборниот период и за каква намена ќе бидат користени. Повторно го прашуваме СДС, дали се врши масовен поткуп за гласови и дали се прави нов инженеринг за претстојните локални избори“, рече Соња Гелова-Стојановска на партиска прес-конференција во седиштето на ВМРО-ДПМНЕ.

Таа рече дека во четири дена во август на сметка на невладини организации се префрлени 264.000 евра, а трансферите продолжиле и во септември. Според неа, на 20 септември биле префрлени 85.500 евра, на 26 септември – 267.000 евра, а на 27 септември на сметките на невладините организации се префрлени 214.450 евра, односно вкупно 831.000 евра.


Доделени грантови на 18 организации од шест земји во рамки на проектот „Актион СЕЕ“


Скопје, 15 септември, 2017 - 16:00 (META) 

Вкупно 18 граѓански организации од шест држави добија грантови за имплементација на проекти во времетраење до шест месеци. Организациите од Македонија, Србија, Албанија, Косово, Црна Гора и од Босна и Херцеговина, во наредниот период ќе адресираат горливи прашања од локален и од национален карактер за да се унапредат доброто владеење и владеењето на правото.

Грантовите се наменети за локални граѓански организации, а се доделени во рамки на проектот „ACTION SEE – Одговорност, технологија и мрежа на институционална отвореност во Југоисточна Европа“, спроведуван од Фондацијата за интернет и општество „Метаморфозис“ во партнерство со „Вестминстер фондација за демократија“ од Велика Британија, Центар за истражувања, транспарентност и отчетност (ЦРТА) од Србија, Граѓанска асоцијација „Зошто не?“ од Босна и Херцеговина, Центар за демократска транзиција (ЦДТ) од Црна Гора, „Опен дата – Косово“ и Движењето „Доста!“ од Албанија, а со финансиска поддршка од Европската Унија.

Добитници на грантовите во Македонија се Здружението за промоција и развој на инклузивно општество „Инклузива“, Институт за стратешки истражувања и едукација (ИСИЕ), „Профицио“ и „Заеднички вредности“.


Пратениците на ВМРО-ДПМНЕ ги нападнаа медиумите и невладините организации


Скопје, 12 август, 2017 - 14:23 (META) 

Пратениците на ВМРО-ДПМНЕ на денешното продолжение на седницата за разрешување на државниот јавниот обвинител Марко Зврлевски ги нападнаа медиумите и невладините организации дека одработуваат за власта со критики до опозицијата дека го блокира разрешувањето на јавниот обвинител, наместо да известуваат за „важните прашања“.

– Деновиве имаме оркестрирани напади од одредени портали на кои ударните наслови им се дека ВМРО-ДПМНЕ не дозволува и го блокира разрешувањето на Марко Зврлевски, а молчат за важните прашања. Марко Зврлевски ќе биде разрешен, но по 16 октомври, членот 8-а од Изборниот законик е јасен – рече пратеникот на ВМРО-ДПМНЕ, Никола Мицевски.

На него се надоврза пратеникот Зоран Ѓорѓиевски, кој рече дека „антирежимските станаа владини медиуми кои не ги интересира што се случува во државата“.

Павлинче Честојнова од опозициската ВМРО-ДПМНЕ која рече дека невладините здруженија кои претходно „за три пресечени дрвја одржуваа прес-конференции, денес ги нема никаде кога пожарите изгореа голем дел од шумите“.

И на денешното продолжение на седницата на собраниската говорница речиси без исклучок се пратениците на ВМРО-ДПМНЕ, кои меѓусебно си реплицираат и контрареплицираат, барајќи наместо за разрешувањето на Зврлевски, кое според нив во период на распишани локални избори е незаконски, да се расправа за пожарите, задолжувањето, стратегијата за бегалци и кадровските промени во државните институции.

Пратеничката Даниела Рангелова од ВМРО-ДПМНЕ ги повика пратениците од владејачката СДСМ да се вклучат во дискусијата и да ги кажат своите аргументи за разрешување на Зврлевски.

– Најчесно и најдостоинствено ќе ве замолам да се вклучите во дискусијата затоа што во ваш интерес е граѓаните да слушнат зошто Зврлевски треба да биде разрешен. Вака излегува дека единствената причина тој да биде разрешен е за да може да поднесете што повеќе обвиненија пред локалните избори и да правите циркуси и да ги дефокусирате граѓаните – рече Рангелова.

Координаторот на пратеничката група на СДСМ, Томислав Тунтев обраќајќи се процедурално рече дека пратениците на владејачката партија нема да дозволат да бидат вовлечени во ваква бесмислена расправа.

– Јас морам да укажам дека овде најмалку се зборува за темата на дневен ред. Ние веќе кажавме дека во ваква лакрдија нема да учествуваме, не можете да не навлечете да учествуваме во нешто вакво бесмислено. Имаме многу да зборуваме за Марко Зврлевски. Имаме многу да зборуваме за сите зли дела кои беа правени врз невини луѓе. Дајте бре луѓе да тргнеме кон реформите кои ќе чекаат граѓаните и меѓународната јавност. Во сите извештаи беше наведено дека реформите во правосудството треба да тргнат од Јавното обвинителство – рече Тунтев.

Откажување од говорите и репликите од пратениците на ВМРО-ДПМНЕ побара пратеникот на СДСМ, Петар Атанасов.

– Откажете се од говорите и од репликите и да одиме на важните прашања. Ајде да ја завршиме оваа точка и да одиме напред – рече Атанасов.

По двочасовна расправа претседателот на Собранието, Талат Џафери даде пладневна пауза до 15 часот.


ВМРО-ДПМНЕ ја обвини власта за пожарите, Владата тврди дека институциите се на терен


Скопје, 4 август, 2017 - 9:56 (META) 

Наместо проекти, гледаме само диви депонии, депонии кои горат, а никој не ги гаси и пожари на речиси секој дел од нашата земја кои СДС не може да ги згасне, реагираат од ВМРО-ДПМНЕ.

„Пожарите горат, а владата на Заев се чешла. Неспособната влада дозволи и најмал пожар да се прошири во сериозни размери. Тоа се случи со пожарот во Зрновци, во Ѓорче Петров, како и со пожарот во Македонски Брод, кој веќе неколку дена се шири, а владата на СДС не се потруди да го запре и да го згасне бидејќи за нив се побитни луксузните вечери со Каракачанов отколку здравјето на граѓаните. Додека граѓаните деноноќно се задушуваат во чадот од депониите во Струга, Арачиново и во Тетово, функционерите на СДС си организираат средби со разно-разни амбасадори по луксузни хотели и јадат октоподи и морски плодови“, стои во соопштението на ВМРО-ДПМНЕ.

Од партијата наведуваат дека владата ги оставила граѓаните сами да се справуваат со еколошките проблеми, поради што ги повикаа невладините организации да ја осудат ваквата состојба.

„ВМРО-ДПМНЕ како одговорна партија која служи на граѓаните, ги повикува сите невладини организации на Соросовата фондација кои се фалат дека се грижат за здравјето на луѓето и за животната средина да се огласат и да го осудат неработењето на владата на СДС. Доколку овие невладини организации не го сторат тоа, на македонската јавност ќе ѝ докажат дека биле и останале мегафони во рацете на СДС, кои служеле само за да ја критикуваат владата предводена од ВМРО-ДПМНЕ. Време е СДС да ги засука ракавите и да почне да работи во корист на граѓаните, а не да се однесува како да е од друга планета и ништо да не работи“, велат од партијата.

Заменик-директорот на Дирекцијата за спасување и заштита, Шабан Салиу, на синоќешната седница ја информираше Владата за состојбата со пожарите во областа на Македонски Брод и на други локации низ земјата.

На седницата било истакнато дека институциите се на терен сè до конечно згаснување и локализирање на пожарите, а беа преземени и обврски да се истражат причините за појава на зачестените пожари на повеќе локации во земјата.
Владата, исто така, изразила огромна благодарност до Република Бугарија, како и до Република Турција за испратената помош за справување со пожарите.