!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Одлуките на Апелација за одземените пасоши не кореспондираат со реалноста


Скопје, 18 јули, 2017 - 12:10 (META) 

Одлуките на Апелацискиот суд, со кои не се вратија патните исправи на лицата што се политички гонети од Специјалното јавно обвинителство, се конформистички и не кореспондираат со реалноста, обвинуваат од опозициската ВМРО-ДПМНЕ.

Орце Ѓоѓиевски, член на централниот комитет на партијата денеска пред Апелацискиот суд Скопје изјави дека „одлуките се донесени повеќе како компромис“.

– За да не изгледа дека судот ги отфрлил само апсурдните барања на СЈО за притвори и за поригорозни мерки, тој ги отфрла и жалбите на одбраната за враќање на патните исправи, односно за укинување на мерките за обезбедување. Реална опасност за бегство нема. Судот не треба да потклекнува под политичкиот притисок на СДС или, пак, под канонадата на разни неосновани барања на СЈО – рече Ѓорѓиевски.

Тој истакна дека судот своите одлуки треба да ги носи исклучиво според Уставот и законите и дека „мерките за претпазливост и за обезбедување присуство кои СЈО од почетокот на своите истраги до денес ги побара за раководството на ВМРО-ДПМНЕ се крајно неосновани“.

– Раководството на ВМРО-ДПМНЕ се политичари со изграден лик и почит помеѓу граѓаните, но и во широките меѓународни кругови, каде уживаат голем углед граден со години. Тие поради природата на својата работа имаат чести патувања и ако сакале досега да избегаат, тоа можеле да го сторат безброј пати. Раководството на ВМРО-ДПМНЕ нема сторено ниту едно кривично дело и затоа нема потреба од бегство. ВМРО-ДПМНЕ верува во органите на правосудниот систем и во принципите на владеење на правото и секогаш ќе биде достапно пред тие органи – рече Ѓорѓиевски.


Антикорупциска ги одби сите приговори на СДСМ за предизборни вработувања


Скопје, 4 јануари, 2017 - 13:43 (META) 

Државната комисија за спречување корупција (ДКСК) денеска на јавна седница ги одби како неосновани сите приговори на СДСМ што се однесуваа на незаконски вработувања во неколку државни институции во предизборниот период.

Социјалдемократскиот сојуз на Македонија преку својот претставник Стевица Јосифовски до ДКСК поднесе четири приговори за вработувања во Министерството за правда, односно за избор на шест нотари, во „Македонска пошта“, Театарот за деца и младинци и против ВМРО-ДПМНЕ за поставување камен-темелник за изградба на детска градинка во селото Зрновци во изборниот период.

Според Антикорупциската комисија, приговорите се одбиваат бидејќи од Министерството за правда добиле известување дека сè уште немаат донесено решение за избор на шест нотари, а од „Македонска пошта“ известиле дека не вработиле шалтерски работник бидејќи постапката била прекината. Од Театарот за деца и младинци, пак, ДКСК добила известување дека двајцата актери што требало да се вработат, не се примени на работа иако за нив биле обезбедни финансии за тековната година.

Од овие институции навеле дека вработувања биле итни поради заминување во пензија, смрт или престанување на работен однос по барање на работникот.

Во врска со поставувањето камен-темелник на градинката во Зрновци, ДКСК го одби приговорот, бидејќи од Општината биле известени дека градежни активности биле почнати, но не бил поставен камен-темелник.

До Антикорупциската комисија приговор во врска со вработувања во Агенцијата за вработување поднесе и Наталија Белчевска од Валандово. ДКСК го одби и овој приговор затоа што од Агенцијата за вработување добиле образложение дека тие се предвидени со буџетот за 2016 година.


Судот го одби барањето на СЈО за суспендирање на „Алфите“ од „Тортура“


Скопје, 15 јули, 2016 - 15:40 (META) 

Судијата го одби барањето на Специјалното јавно обвинителство и не им одреди мерки на претпазливост на командантот на полициската едница „Алфа“, Ивица Антевски – Пуки, и на петтемина негови колеги осомничени во случајот „Тортура“, соопштија попладнево од Кривичниот суд.

На судот му беа потребни речиси 24 часа да излезе со информација за исходот од распитот на шесттемина полицајци, кои вчера беа изведени пред судија.

„Судија на претходна постапка, постапувајќи по предлогот на Јавното обвинителство за гонење кривични дела поврзани и кои произлегуваат од содржината на незаконското следење на комуникациите (СЈО) за предметот во јавноста познат како „Тортура“, донесе решение со кое, предлогот за осомничените И.А., Н.С., П.М., М.Ш., Ф.А и Ј.Б., се одбива како неоснован. Имено за горенаведените лица судот не го прифати предлогот на СЈО, а со тоа и не им определи мерка на претпазливост – забрана за вршење на сите полициски овластувања кои осомничениот ги има како полициски службеник и конкретни забрани за вршење на работи и работни задачи и овластувања кои ги има согласно актите за систематизација“, стои во соопштението на судот.

Првично, распитот на полицајците кои го апсеа поранешниот министер за внатрешни работи, Љубе Бошкоски, во 2011 година, во акцијата „Кампања“, требаше да се одржи минатата недела, но беше одложен бидејќи осомничените и нивните адвокати бараа дополнително време за увид во предметот.

Тие се товарат за нечовечко постапување при апсењето на Бошкоски. Првоосмничен во овој случај, кој го отвори СЈО, е поранешниот директор на Управата за безбедност и контраразузнавање, Сашо Мијалков, но за него СЈО не побара ниту притвор, ниту мерки за претпазливост.