!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Немири на протестите против измените на законот за работа во Париз


Париз, 12 септември, 2017 - 17:12 (META) 

Париската полиција употреби солзавец за да го растури протестот против измените на законот за работа, откако демонстрантите почнаа да фрлаат камења кон безбедносните сили.

Во повеќе градови во Франција се одржуваат демонстрации против измените на законот што ги планира претседателот Еманиел Макрон. Колона пешаци, сочинета од неколку десетици илјади лица, околу 14 часот се упатија од плоштадот Бастилја кон плоштадот Италија.

Прошетката мина во мирна атмосфера, но млади облечени во темна облека се судрија со полицијата која ја следела колоната. Хулиганите палеле димни бомби и извикувале навредливи пароли, а полицијата одговорила со солзавец.

Генералната конфедерација за труд, еден од најголемите синдикати во Франција, ги повика своите членови на штрајк, а на улица се студентите и работниците од неколку области. Тоа е прв протест против предложените реформи.

Француската полиција на улиците на Париз распореди мобилни полициски единици.

Повеќе илјади синдикални активисти утринава протестираа во Марсеј, Арве и во други француски градови.


ОН: 87.000 лица од Мјанмар побегнaле во Бангладеш


Њујорк, 4 септември, 2017 - 10:43 (META) 

Од 25 август, кога почнаа судирите во Мјанмар, во Бангладеш стигнале вкупно 87.000 бегалци, претежно припадници на муслиманскиот народ Рохинџа, соопштија Обединетите нации.

Светските агенции наведуваат дека преполни се камповите во Бангладеш со Рохинџа-муслимани.

Во текот на претходната недела, повеќе од 2.600 куќи се запалени на северозападот на Мјанмар, во областа каде живеат Рохинџа-муслимани, соопшти претставник на УНХЦР.

Властите на Мјанмар за палењето на куќите ја обвинија исламистичката група Војска за спас на Аракан Рохинџа, истата група која ја презеде одговорноста за координираните напади на безбедносните пунктови, што ги предизвика минатонеделните судири.

Сепак, Рохинџа-муслиманите кои пребегнале во Бангладеш велат дека кампањата на палење куќи и убиствата ги врши војската на Мјанмар, која се обидува да ги протера од таа област.

Генералниот секретар на ОН, Антонио Гутереш, претходно предупреди за можна хуманитарна катастрофа на западот на Мјанмар и инсистира безбедносните сили на земјата да запрат со насилството, откако 400 лица, претежно Рохинџа-муслимани загинаа во судирите.


Трамп повтори дека двете страни се виновни за немирите во Вирџинија


Вашингтон, 16 август, 2017 - 11:28 (META) 

Американскиот претседател Доналд Трамп ја повтори првобитната и контроверзна реакција за неодамнешните немири во сојузната држава Вирџинија, оценувајќи дека „двете страни“ се виновни.

– Мислам дека двете страни се виновни – рече доцна синоќа Трамп, алудирајќи на членовите на екстремната десница и расистите од една страна и демонстрантите на контрапротестот во градот Шарлотсвил, во кој едно лице настрада.

Една 32-годишна жена настрада во Шарлосвил во саботата кога симпатизер на неонацистите со автомобил влета во демонстрантите на контрапротестот.

Трамп се најде на мета на критики откако првобитно обвини „многу страни“ за омразата и нетрпеливоста, без отворено споменување на неонацистите и расистите кои го организира собирот.

– Кога давам изјава, сакам да бидам точен и да ги знам фактите – им рече Трамп на новинарите во Њујорк.

Трамп, под притисок два дена подоцна го „осуди расистичкото насилство“.

– Ги осудив неонацистите, но и сите кои биле таму. Не биле само неонацисти и расисти – рече американскиот претседател.

Во Шарлотсвил во Вирџинија во саботата изби насилство откако неонацистите, скинхедсите, приврзаниците на некогашната организација „Кју-клус-клан“ и други екстремисти се собраа за, како што рекоа, „да ја вратат Америка“, како и да искажат противење на отстранувањето на статуата на командантот на силите на Југот (Конфедерацијата) во Граѓанската војна, Роберт Ли.

Од другата страна се собрале противници на екстремните десничари, по што дошло до судири и улични тепачки.


Нередите за време на самитот Г20 ќе ја чинат Германија 12 милиони евра


Хамбург, 18 јули, 2017 - 12:52 (META) 

Нередите за време на Самитот на групата 20 индустриски најразвиени земји во Хамбург би можеле да ги чинат осигурителните куќи до 12 милиони евра.

Додека лидерите на најсилните светски економии се состануваа на 7 и 8 јули, на улиците на Хамбург организирани беа атниглобализациски протести, а за време на ноќта имаше големи нереди и судири со полицијата.

Осигурителното здружение денеска соопшти дека според првичната процена на штетата, која треба да ја покријат осигурителните компании, изнесува дури 12 милиони евра. Третина од тој износ е поради оштетени автомобили, а тука се вклучени и штетите на куќите и на фирмите.

Германската канцеларка Ангела Меркел по самитот вети дека со градските власти ќе работи на пружање помош на луѓето погодени со немирите.

Федералните и градските власти основаа и фонд за помош на тие граѓани.


Хаос во Хамбург во пресрет на самитот на Г20


Хамбург, 7 јули, 2017 - 10:17 (META) 

Во немирите што избија во Хамбург во пресрет на денешниот состанок на лидерите на 20 најразвиени земји во светот, повредени се 76 лица и голем број демонстранти, соопшти локалната полиција.

Ниту еден полицаец не е потешко повреден, а засега не е познат точниот број на повредени демонстранти.

Во протестите кои беа најавени како мирни, според процените на полицијата, учествувале 12.000 лица, а проблем направила група од околу 1.000 анархисти, кои почнале да фрлат шишиња, камења и петарди кон полицијата.
Безбедносните сили одговориле со водени топови и со солзавец, а немирите бргу се прошириле на повеќе локации во градот.

Неколку возила се запалени, оштетени се излози на продавници и на бакни, а на повеќе места се подигнати барикади.
Демонстрациите кои го организираат антикапиталистички организации ќе бидат одржани и денеска, а ќе ги надгледуваат околу 20.000 полицајци.


Ахмети: Постои можност за поттикнување немири во земјава за геополитички интереси


Скопје, 5 мај, 2017 - 12:38 (META) 

Новата реформска влада ќе се формира наскоро, а новоименуваниот претседател на Собранието го врши својот дел од обврските за да се олесни и да се забрза овој процес, истакнал лидерот на ДУИ, Али Ахмети, на синоќешната средба со специјалниот претставник на претседавачот на ОБСЕ, амбасадорот Кристијан Штрохал, и со амбасадорката на ОБСЕ во Македонија, Нина Суомалаинен.

Ахмети и Штрохал разговарале за политичката ситуација во земјава по настаните во Собранието од 27 април. Во тој контекст, лидерот на ДУИ ѝ се заблагодарил на мисијата на ОБСЕ во Македонија за постојаниот контакт со пратениците во текот на насилствата во Собранието.

Ахмети, како што соопштуваат од ДУИ, на средбата зборувал за приоритетите на новата влада, како реформите во судството, евроатланската интеграција, Охридскиот рамковен договор, добрите меѓуетнички и соседски односи, како и за отварањето нови работни места.

Истовремено, лидерот на партијата изразил загриженост за „можноста за поттикнување немири во земјата за геополитички интереси“ и побарал од меѓународната заедница своето внимание да го фокусира кон случувања во земјава и во регионот.


Насилни судири во бегалски камп на Хиос


Атина, 23 март, 2017 - 12:03 (META) 

Насилни судири се случуваа ноќеска во бегалскиот камп Суда на островот Хиос во Грција. Според локалната информативна веб-страница „Политис Хиос“, група бегалци од Авганистан и од Алжир вчера вечерта се судриле физички, создавајќи нов хаос и немири за сите бегалци и мигранти во Суда.

Инцидентите почнале кога група бегалци од Авганистан од друг камп на Хиос влегле во Суда и почнале да напаѓаат бегалци од Алжир. Во судирите се напаѓале со дрва и со камења, создавајќи огромен инцидент во кампот, кој почнал да заличува на воено поле.

Инцидентите траеле околу половина час, а судирите се смириле по интервенција од грчката полиција. Во инцидентите се повредени жена и дете, а приведени биле три лица што учествувале во судирите.

Нетолеранцијата на бегалците по етничка основа често е причина за судири и за инциденти во бегалските кампови.

На островот Хиос има околу 4.000 бегалци, а вкупно на грчките острови има повеќе од 14.000 бегалци. Последниве денови се забележува зголемување на бројот на бегалците на островите. Според информациите од грчката влада, до утрово на островите пристигнале 118 нови лица.


Немири во Париз поради полициска бруталност


Париз, 8 февруари, 2017 - 13:15 (META) 

Седумнаесет лица се уапсени во немири во предградие на Париз кои избија откако полицаец, наводно, со пендрек, сексуално малтретирал црно момче.

Демонстрантите во текот на ноќта палеле автомобили и контејнери, а насилствата од североисточното предградие на Париз се прошириле во уште пет града.

Протестите и немирите почнаа по извештаите дека полицијата минатата недела нападнала 22-годишен црнец за време на редовна проверка на лични документи.

За време на насилствата во понеделникот, полицијата привела 26 лица.

Момчето Тио, чие презиме не се открива, изјавило дека четворица полицајци го удирале, го прскале со солзавец и го силувале со полициска палка.

Еден полицаец во неделата е обвинет за силување, а тројца за тежок напад.

Тио добил тешки повреди и е опериран, но и понатаму е во болница, каде вчера попладне го посети претседателот Франсоа Оланд.


Бразилската полиција штрајкува, а бандите беснеат по улиците


Бразилија, 8 февруари, 2017 - 10:07 (META) 

Полицијата во 30 градови во Бразил штрајкува и одбива да го спроведува законот и да ги штити граѓаните, а последиците од безвластието се застрашувачки, пишуваат светските медиуми.
Како што јавува „Дејли мејл“, за три дена од почетокот на полицискиот штрајк, бројот на убиства се зголемил за неверојатни 650 проценти.

Најмалку 52 лица се убиени, а бандите беснеат по улиците, вооружени со мачети и со огнено оружје, ограбувајќи продавници, палејќи возила и оставајќи мртви тела зад себе.

Во крајбрежната сојузна држава Есприто Санто, нередите и злосторствата ги принудиле властите да ги затворат болниците и училиштата.

На барање на локалните власти, сојузните воени трупи почнале да пристигаат во понеделникот и да патролираат по улиците. Испратени се 1.000 војници и 200 припадници на националната гарда, а командант на воената полиција во меѓувреме е сменет.

По избивањето на крвавите немири, сојузните власти се согласија да се сретнат со полициските претставници и да преговараат за поголеми плати, јавува „Естадо Бразил“.


Борисов предупреди дека е можен терористички напад по немирите во бегалскиот камп


Софија, 25 ноември, 2016 - 15:48 (META) 

Состојбата во бегалскиот камп во Харманли на југот на Бугарија се нормализира по безредијата и немирите, кои избувнаа вчера и продолжија во текот на ноќта. Повеќе од 400 мигранти се задржани во притвор поради вандалско однесување, а во нередите се повредени 24 полицајци, од кои најтешко настраданиот има скршеница на раката.

Од Министерството за внатрешни работи на Бугарија соопштија дека се формирани две предсудски постапки за лицата кои учествувале во нередите.

Бугарскиот премиер во оставка, Бојко Борисов, кој ноќеска за време на немирите пристигна во бегалскиот камп, соопшти дека против сите што учествувале во безредијата ќе бидат поднесени обвиненија.

Тој повика и предупреди да се внимава на повиците за напади и на она што се објавува на социјалните мрежи бидејќи вакви настани вообичаено се проследени со терористички напади.

„Обично, онаму каде што има зголемување на насилствата, секогаш има и терористички акт, секогаш се активираат ќелиите со спијачи… Мрежите на Исламска држава многу внимателно го следат „Фејсбук“ и она што излегува во медиумите. Таквите, кои се прават големи херои, треба да знаат дека со вакво поведение можат да изложат на ризик огромен дел од населението“, изјави премиерот во оставка.

Претседателката на Агенцијата за бегалци, Петја Прванова, истакна дека најверојатно постои поврзаност меѓу мигрантските протести во Бугарија со оние во камповите во другите европски земји.

„Кога се запали кампот во Кале (Франција), инциденти имаше и во Харманли, кога имаше инцидент во Германија, имаше и тука. Вчера се запали камп на островот Лезбос, сега и тука. Очигледно има врска меѓу овие настани“, изјави Прванова за БТВ.

Немирите во кампот во Харманли биле предизвикани главно од мигранти од Авганистан.

„Групи Авганистанци тепаа Сиријци, за да излезат да се бунтуваат“, изјави Борисов.

Според него, постои можност бунтот да е организиран од надвор. Како аргумент за ова, тој го посочи фактот дека самите мигранти преку мобилни телефони пуштале снимки на социјалните мрежи.

Во декември треба да почне екстрадицијата, односно враќањето назад во нивната земја, на мигрантите од Авганистан. Како што соопшти Борисов, веќе бил нарачан авион од Кабул, а летот е организиран од бугарските власти во координација со Европската агенција за гранична и крајбрежна заштита.

По нередите, кампот во Хармални е целосно оштетен. Нанесена е сериозна материјална штета, а според зборовите на Борисов, не е останат ниту еден здрав прозорец.

Во моментов во центарот во Хармални има околу 2.700 лица, кои се разделени и групирани според нивната националост за да не дојде до нови судири. Во кампот има околу 600 деца и од 400 до 500 жени, кои, како што соопшти Прванова, се сместени на безбедно.