!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Изградбата на џамијата на Попова Шапка продолжува, иако нема дозвола за градба


Тетово, 14 јуни, 2017 - 16:33 (META) 

На Попова Шапка деновиве повторно продолжија градежни активности за изградба на џамија која нема дозвола за градба. Инвеститорот не се откажува од изградбата на џамијата дивоградба, иако тетовскиот општински инспекторат во изминативе две недели, двапати бил на местото каде што се гради и му наложил да го запре градење.

Иако и двете забрани беа испочитувани неколку дена, ископите за поставување на темелите продолжиле уште во текот на вчерашнот ден. Денеска, местото каде што треба да се гради џамијата беше израмнето и се носеше градежен материјал.

Од секторот за урбанизам при Општина Тетово велат дека на таа локација нема издадено никакво одобрение за изградба на верски објект ниту, пак, за каков било објект. Од тетовски општински инспекторат имаат отворено предмет во кој е констатирано дека џамијата е дивоградба.

Во случајот е вклучен и државниот градежен инспекторат, кој само врши надзор на работата на тетовскиот инспекторат. Но, денеска ниту од Општина Тетово ниту од државниот градежен инспекторат не ни одговараа на повиците да објаснат што ќе преземат против инвеститорот, кој и понатами го крши законот.

Од тетовското муфтиство при Исламската верска заедница денеска не беа достапни за коментар.

Претходно за дел од медиумите негираа дека вршат градежни активности за изградба на џамија на Попова Шапка, иако на повеќе билборди поставени на патот кон Попова Шапка пишува дека во туристичкиот центар ќе се гради џамија, а како инвеститор се наведува ИВЗ.

Планот е џамијата најверојатно да биде на три ката, со големо минаре, а локација се наоѓа веднаш над главниот пат на туристичкиот цетнар, на само десетина метри од викендички.


Данев: Мнозинството поради партиски интереси ги одложува локалните избори


Скопје, 15 мај, 2017 - 16:46 (META) 

„ВМРО-ДПМНЕ кажа дека почетокот на јули е најповолниот датум за одржување на локалните избори, во интерес на граѓаните, но парламентарното мнозинство сметаше дека нивен партиски интерес е да го одложи терминот и практично да го избере последниот што сметавме дека е рационален. Но ВМРО-ДПМНЕ е подготвена да излезе на избори и во јули и во октомври бидејќи знаеме дека народот е на наша стран“а, порача пратеникот на ВМРО-ДПМНЕ, Драган Данев, на прес-конференција.

– Очекуваме дека новото парламентарно мнозинство овојпат ќе си остане на зборот, бидејќи во спротивно ризикува поради својата неподготвеност да ја доведе во прашање локалната самоуправа како една врвна демократска придобивка и право на граѓаните – рече Данев.

Тој повторно го изнесе барањето на ВМРО-ДПМНЕ, во исто време со локалните да се одржат и нови парламентарни избори, за „граѓаните да може да се произнесат и за тиранската платформа“.

– Секој нов обид за неуставни и незаконски потези, само дополнително ќе ја продлабочат кризата во Македонија – порача пратеникот на ВМРО-ДПМНЕ.

Данев рече дека ВМРО-ДПМНЕ не присуствуваше на денешната координација во Собранието зашто „останува на ставот дека Талат Џафери не е избран во легална процедура за претседател на Собранието и тој таа функција само бесправно ја узурпира“, а го признава само како легално избран пратеник.


Одложено судењето на Људмил Кљусев за нелегална дистрибуција на наркотици


Скопје, 22 август, 2016 - 20:16 (META) 

Људмил Кљусев, син на првиот премиер на независна Македонија, Никола Кљусев, останува во притвор во САД откако судењето за нелегално дистрибуирање наркотици било одложено на негово барање, пишува весникот „Њу Хевен реџистер“.

Како што пишува весникот, Кљусев се изјаснил за невин по обвиненијата за препишување лекови без потреба и за перење пари.

Кљусев, кој во САД работи како психијатар, бил уапсен на 12 ноември минатата година, обвинет дека на пациентите им препишувал големи количества лекови „aдерал“ и „занакс“ (кај нас познат под името „хелекс“) за кои тие му плаќале во готово.

Максималната казна за ова дело е 20 години затвор. Кљусев е, исто така, обвинет и за перење пари, за што му се заканува максимална казна од 10 години затвор.


Во Австралија уапсени пет лица затоа што планирале да се приклучат на ИД


Мелбурн, 15 мај, 2016 - 11:24 (META) 

Власта во Австралија денеска поднесе обвиненија против петмина Австралијци кои се товарат дека планирале да се приклучат на Исламската држава.

Лицата официјално се обвинети за планирање влез во странска држава и приклучување кон акти на насилство. За ова обвинетите можат да бидат осудени на доживотен затвор.

Медиумите во Австралија објавуваат дека лицата се на возраст од 21 до 31 година и биле уапсени кога нелегално со брод се обиделе да заминат во Индонезија или Филипините, од каде што планирале да се упатат кон Сирија за да се приклучат на ИД.

Обвинетите биле уапсени во вторникот во градот Кернс, во сојузната држава Квинсленд.


Приведени 80 мигранти кои нелегално влегле во Македонија


Гевгелија, 14 мај, 2016 - 17:21 (META) 

Изминатите 24 часа, македонските безбедносни сили привеле 80 мигранти кои нелегално влегле во Македонија, информираат од Регионалниот центар за управување со кризи од Гевгелија.

Мигрантите се сместени во претприемниот шатор на Прифатно-транзитниот центар Гевгелија (ПТЦ).

Откако од Министерството за внатрешни работи ќе завршат со проверките, мигрантите ќе бидат вратени на грчка територија.

Во ПТЦ Гевгелија сè уште престојуваат стотина мигранти кои останаа заглавени откако за нив се затвори балканскиот коридор.


Повеќе од 20 полицајци се повредени во судирот со мигрантите


Скопје, 10 април, 2016 - 23:18 (META) 

Вкупно 23 лица, односно 14 полицајци и девет припадници на АРМ, се повредени во денешниот судир на полицијата и на мигрантите на македонско-грчката граница, информираат од Министерството за внатрешни работи.

Во соопштението на МВР се вели дека во текот на судирот оштетени биле и три возила на МВР и пет на АРМ.

Според првичните процени на МВР, во нередите учествувале повеќе од 3.000 мигранти, а во текот на целиот настан, грчките полициски службеници воопшто не интервенирале во спречување на нередите на граничната линија.

Од Министерството информираат дека по претходно добиени сознанија дека мигрантите ќе се обидат насилно да влезат на територијата на Македонија, биле преземени мерки за засилено обезбедување на државната граница кон Грција. Преземените мерки вклучувале и засилено присуство на припадниците на МВР и на АРМ, како и на странските полициски службеници од Унгарија, Чешка, Србија, Словенија, Хрватска и од Австрија распоредени на територијата на Македонија.

„Имено, во 9.30 часот на граничен камен 59 дојдоа претставници од грчката полиција и побараа да се оствари средба помеѓу претставници на мигрантите и претставник на нашите гранични служби. Целта на оваа средба беше мигрантите лично да се уверат околу гласините дека границата е отворена, односно мигрантите да се откажат од идејата за влез во Македонија. Во 10.15 часот дојдоа претставници од мигрантите, грчки полициски службеници и новинарски екипи. Мигрантите се интересираа зошто државната граница е затворена и кога истата повторно ќе се отвори. Од страна на претставник на МВР, одговорено е на прашањата по што мигрантите во 10.35 часот си заминаа и се повлекоа во грчкиот камп. Во 10.50 часот поголема група мигранти, помеѓу 1.000 и 2.000 лица, почнаа со насилни протести на околу 100-200 метри десно од граничен камен 59, со извикување, фрлање камења и разни предмети. Службените лица од МВР и од АРМ веднаш почнаа со одбивање на мигрантите, при што употребени се и хемиски средства – солзавец. По половина час беше пробиена заштитната ограда и група од 20 до 30 мигранти се обидоа илегално да влезат на територијата на Македонија, но истите веднаш се спречени во намерата и вратени на територијата на Грција. Друга група мигранти, меѓу од 500-1.000 лица се обидоа да направат пробивање на оградата и лево од граничен камен 59, со каменување кон нашите безбедносни сили. Во 14 часот поголем дел од мигрантите се повлекоа на околу 50-100 метри на грчка територија и состојбата делумно е ставена под контрола, со тоа што во тој период во функција беа ставени и водени топови“, пишува во соопштението на МВР.

Во соопштението се дополнува и дека околу 15 часот безбедноста на границата била подигната на највисоко ниво по добиена информација дека мигрантите подготвувале молотови коктели, но до тоа не дошло.

Каменувањето од страна на мигрантите кон македонските безбедносни сили траело до 18 часот.

Од хуманитарната организација „Лекари без граници“ соопштија дека во денешните немири биле повредени околу 260 мигранти и дека испратиле дополнителни тимови да им помогнат во кампот за бегалци Идомени.


„Катимерини“: Македонската војска ги враќа бегалците низ шуми и планини


Скопје, 15 март, 2016 - 16:15 (META) 

Во грчките медиуми цел ден се поставува прашањето што се случува со бегалците што вчера преку Сува Река преминаа во Македонија.

Иако македонската полиција извести дека бегалците се вратени назад, во Грција сè уште стои ставот дека немало официјално барање од македонска страна за реадмисија на бегалците и се поставува дилемата како се вратени.

Весникот „Катимерини“, повикувајќи се на полициски извори на Идомени, пренесува дека македонската војска и полиција ги враќаат бегалците по нелегален пат, односно по истите планински патчиња по кои и преминале во Македонија.

Полициски извор за весникот изјавил дека македонската полиција ги пренесува во камиони и во автомобили до густи шумски предели каде нема ограда и таму ги остава на грчка страна.


Во две тетовски села откриени 15 нелегални странски државјанки


Тетово, 13 март, 2016 - 13:56 (META) 

Во рамки на две полициски акции што изминатва ноќ биле спроведени во два угостителски објекти биле откриени 19 девојки од кои 15 бил странски државјанки.

Во угостителски објект во село Жеровјане полицијата открила 8 државјанки на други земји, а во објект покрај патот за тетовското село Сараќино се откриени 7 странски државјанки.

Во овој објект имало и четири државјанки на Македонија, жителки на Скопје кои по извршените разговори биле пуштени.

Странски државјанки и сопствениците на угостителските објекти приведени се во тетовската полиција. Девојките се предадени за понатамошна постапка на Отсекот за прекуграничен криминал, миграции, странци и реадмисија.


За девет години од Македонија нелегално се изнесени 5 милијарди долари


Скопје, 15 декември, 2015 - 9:24 (META) 

Во периодот од 2004 до 2013 година, од Македонија на различни начини на финансиски трансакции, како криминал и корупција, се изнесени 5.168.000.000 долари.

Ова го покажува најновото истражување на организацијата „Глобален финансиски интегритет“ (Global Financial Integrity) од Вашингтон.

Според оваа организација, од Македонија во просек годишно нелегално се одлеваат по 516.000.000 долари.

Истражувањето го направиле врз база на анализа на податоци за меѓународна размена и за платен биланс што ги објавува Меѓународниот монетарен фонд, податоци на Светска банка и на институции надлежни за борба против корупцијата и криминалот.

ГФИ е непрофитна организација која подготвува истражувања и анализи за нелегалното одлевање на пари и дава препораки за спречување на перењето пари.


Приведен кичевец за нелегално поседување оружје


Кичево, 5 декември, 2015 - 13:17 (META) 

Кичевската полиција вчера пронашла и одзела пиштол и рамка со шест куршуми, калибар 6,35 милиметри, при преглед на Ф.Е. (50) во угостителски објект во центарот на градот.

Како што соопшти МВР, настанот се случил околу 16.15 часот  кога Ф.Е. пристигнал во угостителскиот објект. По претходни оперативни сознанија, полициските службеници извршиле преглед врз него и ги пронашле пиштолот и рамката со куршуми.

По претходно известување до Основниот јавен обвинител во Гостивар, Ф.Е., кој нелегално го поседувал оружјето, е приведен.

Против него и претходно биле поднесувани кривични пријави, за што бил и затворски осудуван.