!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Малтретирањето на дипломатите е редовна разузнавачка забава од Москва до Македонија


Вашингтон/Скопје, 1 јануари, 2017 - 12:01 (META) 

Дипломатите на САД, персоналот во амбасадите и нивните семејства во Москва и во уште неколку други европски држави изминатиов период биле цел на малтретирања и на заплашувања, како дел од организирана кампања, оркестрирана и систематски спроведувана од руските разузнавачки и безбедносни служби, пишуваше во јуни угледниот американски весник „Вашингтон пост“.

Неодамна и кај нас се појавија и „некролози“ на актуелни и на поранешни амбасадори. Тие се само дел во шаренилото од малтретирања и од заплашувањата на кои систематски биле изложени нивните колеги дипломати во Русија и во Европа, кои се пожалиле на серија чудни, но многу сериозни малтретирања од претставници на руските тајни служби.

Според дописите што амбасадорите на САД ги испраќале во Вашингтон, дел од малтретирањата биле „рутински“:

  • Следење на дипломатите или членови на нивните семејства;
  • Непоканети лица се појавувале на настани организирани од нивна страна;
  • Новинари биле плаќани да пишуваат негативни написи за нив;
  • Лица од руските безбедносни служби провалувале во нивните домови ноќе, го разместувале мебелот или ги оставале вклучени сите светилки и телевизорите;
  • Еден дипломат пријавил дека натрапник извршил голема нужда на тепихот во дневната соба од неговиот стан;
  • Дипломатите пријавувале издупчени гуми на автомобилите;
  • Редовни малтретирања од страна на сообраќајната полиција.

Работата, како што пишува американскиот весник, отишла дотаму што државниот секретар на САД, Џон Кери, морал да интервенира до рускиот претседател Владимир Путин со барање малтретирањата и заплашувањата веднаш да запрат.

Малтретирањето на американските дипломати не е нова појава, а вакви случаи биле пријавувани и за време на првиот претседателски мандат на Барак Обама, кога припадници на руското разузнавање провалиле во куќата на аташето за одбрана на САД во Москва и му го убиле кучето. Вознемирувањето, заплашувањето и следењето на американските дипломати во Москва од страна на руските безбедносни служби и сообраќајната полиција особено зачестиле по интервенцијата на Москва во Украина во 2014 година и анексијата на полуостровот Крим, пишува „Вашингтон пост“.

Изминативе два дена меѓу САД и Русија владее дипломатска престметка, која во многу потсетува на периодот на Студената војна. Администрацијата на претседателот на САД во заминување, Барак Обама, реши да протера 35 руски дипломати од САД поради наводното хакирање на интернет-страници и елекстронска пошта на Демократската партија на САД, но и како одговор на кампањата на вознемирување на американски дипломати во Русија. Руското министерство за надворешни работи веднаш побара идентична контрамерка, која претседателот Владимир Путин не ја прифати и одлучи да не протерува американски дипломати од Русија.

Изминатава година и во Македонија зачестија заканите кон амбасадорите во земјава, особено кон оние кои поактивно беа вклучени и посредуваа во преговорите меѓу политичките партии во земјава за наоѓање на решение за излез од политичката криза.

Негативните написи во провладините медиумите против дел од дипломатскиот кор во земјава се честа појава, но имаше и настани кои буквално ги активираа алармите во амбасадите.

На 15 септември, само неколку часа откако Специјалното јавно обвинителство објави дека ги поднесува првите две обвиненија, полициската единица за прв одговор и интервенции „Алфа“, по наредба на началникот на единицата Ивица Анчевски – Пуки, пред Амбасадата на САД изведе вежба – симулирана реакција во случај на терористички напад, без за тоа да ја извести амбасадата како што е редовната процедура во таков случај. Присуството на дваесетина припадници на полициската единица „Алфи“ во близина на амбасадата, довело до активирање на американските безбедносни протоколи и до инструкции за вработените да се тргнат од прозорците и да се засолнат, а на разгласот повеќепати се повторувало „Ова не е вежба“.

По изборите на 11 декември, и само неколку дена по говорот на претседателот на ВМРО-ДПМНЕ, Никола Груевски, во кој го објави прогласот на извршниот комитет на партијата, во кој меѓудругото се вели дека некои амбасадори почнале премногу да се мешаат во внатрешната политика на земјата и дека тоа мора да запре, на интернет-страницата „Имгур“ се појавија посмртни фотографии на дел од актуелните и поранешни амбасадори во Македонија. Партии, меѓу кои и ВМРО-ДПМНЕ, го осудија поставувањето на фотографиите, но досега ниту една надлежна институција, односно Јавното обвинителство, не излезе со информација дали нешто е преземно во врска со случајот.

Претходно, на постојани вербални напади беше изложен поранешниот евроамбасадор во Македонијав Ерван Фуере, кој и ден-денеска се јавува со критички ставови за актуелната политичка состојба во Македонија.

Неговиот наследник, Аиво Орав, на седница на собраниската Комисија за европски прашања и Националниот совет за евроинтеграции изјави дека морал да го зголеми обезбедувањето бидејќи „многу медиуми поведоа засилена кампања против европските претставници“.

Посредникот во преговорите помеѓу партиите за Договорот од Пржино, Белгиецот Питер Ванхауте, од партијата на власт беше прогласен за „персона нон грата“ и му беше порачано дека во земјава може да дојде само како „турист“.


Пломп: Загрижен сум за општата атмосфера на говор на омраза


Скопје, 24 декември, 2016 - 17:54 (META) 

Амбасадорот на Кралството Холандија, Ваутер Пломп, во емисијата „360 степени“ соопшти дека сите земји чии амбасадори беа објавени со некролози на социјалната мрежа „Имгур“, ги повикале македонските амбасадори во нивните земји и им побарале објаснување за дипломатскиот скандал.

– Јас лично не бев многу погоден од овие фотографии. Но, моето министерство во Хаг покажа голема загриженост и веднаш го повикаа македонскиот амбасадор во Хаг за да праша што се случува во Македонија, а истото го направија и другите министерства чии амбасадори беа засегнати. За среќа потоа добивме цврсти уверувања од Владата на Македонија дека целосно го осудува ваквиот говор на омраза кон странските амбасадори и ветување дека ќе преземат мерки за идентификување и за санкционирање на одговорните, како и дека ќе овозможат максимална безбедност за сите амбасадори – вели Пломп.

Холандскиот амбасадор додаде дека е загрижен за општата атмосфера на говор на омраза и за остриот говор кој се користеше деновите по изборите. Според него, тоа ќе доведе до понатамошни поделби и ќе ја отежне ситуацијата за соработка помеѓу партиите и невладиниот сектор.

– А токму таква соработка е потребна за формирање стабилна влада, која ќе може да ја извлече земјата од политичката криза. Тука би сакал да ја истакнам мојата загриженост од острите тонови кон граѓанското општество, кое игра важна улога во секоја држава. Јас овде се чувствувам добредојден, ја сакам Македонија, тука сум година и половина, го сакам народот на Македонија и не сум загрижен – додава Пломп.

Амбасадорот на Холандија оцени дека изборниот ден поминал добро, но дека загрижувачки се критиките кон државните институции по изборите кои пристигнале од партијата на власт, за што Пломп изрази изненадување.

– Тој тип на критики кон државните институции може евентуално да ги делегитимираат изборите, што воопшто не би помогнало. За среќа, институциите продолжија со својата работа и го направија тоа што требаше да го направат и, како што знам, процесот ќе финишира со прегласување во Теарце и ќе треба да го почекаме конечниот исход. Потоа од извонредно значење ќе биде што е можно побргу да се формира стабилна влада која ќе ја извлече земјата од политичката криза – рече холандскиот амбасадор.


Француската амбасада во Скопје побарала засилено полициско обезбедување


Скопје, 24 декември, 2016 - 16:24 (META) 

МВР ја зголемило безбедноста врз Амбасадата на Франција во земјава. Ова за телевизија „Телма“ го потврдуваат од министерството, од каде поради безбедносни причини не можат да кажат повеќе детали.

Амбасадата побарала дополнителни безбедносни мерки, а министерството соодветно одговорило на сè што е побарано. Ова е единствената амбасада која засега побарала какво било обезбедување по засилените вербални напади, но и морничави фотографии со некролози кои се појавија на социјалната мрежа „Имгур“.

„Телма“ информира дека денеска се обидела да дознае кои македонски амбасадори биле повикувани во матичните земји на амбасадорите и од кои било барано да дадат објаснување што се случува со безбедноста на нивните претставници тука, но не добила одговор од МНР.

Официјално досега во МВР никој не побарал истрага за објавувањето на сликите.


ВМРО-ДПМНЕ: Ние сме единствената партија што го осуди објавувањето на некролозите


Скопје, 23 декември, 2016 - 18:12 (META) 

ВМРО-ДПМНЕ остро ги осудува манипулациите објавени во текстот на порталот „Мета“ со наслов  „Дали странците треба да се загрижени кога ВМРО им се заканува“, објавен на 23 декември 2016 година, се вели во реакцијата на ВМРО-ДПМНЕ по повод објавениот текст на новинската агенција „Мета“.

– Наводите во текстот се груби манипулации со кои некој сака да создаде погрешна претстава во јавноста. Напоменуваме дека ВМРО-ДПМНЕ е единствена политичка партија во земјава која ги осуди ширењето и објавувањето на некролозите со меѓународните претставници во земјава, чин кој не го стори ниту една друга политичка партија. Дополнително, обидот да се поврзе ВМРО-ДПМНЕ со нападот на американската амбасада во Скопје во 1999 година, претставува обид да се демонизира ВМРО-ДПМНЕ со настани со кои нема апсолутно никаква врска, а тоа претставува крајно безобразен чин на манипулативно информирање на јавноста – се вели во реакцијата на ВМРО-ДПМНЕ.


Македонските дипломати бараат истрага за некролозите со амбасадорите


Скопје, 23 декември, 2016 - 11:56 (META) 

Синдикатот на македонската дипломатска служба го повика Јавното обвинителство да го истражи случајот со објавувањето некролози од поранешни и од актуелни амбасадори во Македонија на интернет-страницата „Имгур“ и да ги открие лицата што ги поставиле.

„Го повикуваме раководството на македонското Јавно обвинителство итно и најсовесно да ги искористи своите законски овластувања во сферата на истражувањето кривични дела и да ги открие физичките лица – автори на објавувањето некролози на редица странски амбасадори во државата Македонија на социјалната мрежа „Имгур“, инаку веќе затворена. Работата на ЈО е многу олеснета во случаите кога државни функционери на своите фејсбук-профили отворено ги навредуваат, омаловажуваат, па дури им се закануваат на странските претставници што беа инволвирани во т.н. Договор од Пржино, инаку уредно потпишан и од политичката партија на која тие функционери припаѓаат“, велат од Синдикатот.

Оттаму посочуваат Јавното обвинителство да процени дали станува збор за „сериозна закана“ што е санкционирано со членот 420, став 1 од Кривичниот законик, со казна затвор.

„Доколку истрагата укаже дека не се работи за сериозна закана, тогаш тоа ќе значи дека авторите ги сториле кривичните дела утврдени во членовите 181, односно 182 од Кривичниот законик или поточно ги изложиле на подбив овие странски претставници, бидејќи е и смешно и тажно овие некролози да се толкуваат како заштита на јавен интерес или нешто слично. Потсетуваме дека со законските измени на овие одредби не е веќе потребно тие, значи самите странски претставници, да поднесат кривична пријава туку Јавното обвинителство треба да постапува по основа на т.н. ’допрен глас’“, велат од Синдикатот на македонската дипломатска служба.

Од Синдикатот посочуваат дека одлуката за тоа со кои држави и до кој степен ќе соработува земјава, е одлука на самата држава Македонија, а не на некоја партиска структура и дека никој во држвата не смее да си „поигрува или уште пострашно да им се заканува на претставниците на тие држави во Македонија, а кои уживаат меѓународна заштита“.

„Тоа, дека уживаат меѓународна заштита значи дека ние, државата Македонија, сме должни да ги заштитиме кога се на наша територија, а преку членот 29 од Виенската конвенција за дипломатски односи и формално и императивно се имаме обврзано на тоа“, се нагласува во соопштението.

Синдикатот на македонската дипломатска служба потсетуваат дека Македонија нема „најчисто досие“ кога станува збор за „неоправдано превртување на гневот од внатрешните состојби кон странските претставници“.

„Во нашето „досие“ има и повици за линч, обиди за палење амбасади, пласирање теории за „странски заговор“ против Македонија и многу говор на омраза. Следствено, ако сакаме и во еден ваков период да го сочуваме оној краен бастион – дека Македонија вака или онака е држава – должни сме итно и најсовесно да го истражиме објавувањето некролози и таа истрага да резултира со јасни правни заклучоци, па дури и последици“, порачуваат од Синдикатот.

На постизборните случувања во земјава, на говорот на омраза кон странските претставници реагираа Европската комисија и американскиот Стејт департмент, кои ја осудија „запаливата реторика од некои политички лидери, која дава дозвола за напади на демократски институции и на амбасадори акредитирани во Македонија“.

Владејчката ВМРО-ДПМНЕ, чиј лидер во саботата минатата недела рече дека „некои амбасадори почнале премногу да се мешаат во внатрешната политика на земјата“ и дека „тоа мора да запре“, вчера од Европската комисија побара да прецизира и да појасни кој и како им се заканувал на меѓународните претставници во Македонија и да посочи конкретен пример за тоа.