Грчкиот парламент не изгласа недоверба на владата на Ципрас


Атина, 17 јуни, 2018 - 10:04 (META) 

Со 127 гласа за и 153 против, парламентот на Грција вчеравечер ја отфрли иницијативата на опозициската Нова демократија за недоверба на владата на премиерот Алексис Ципрас.

Гласаа вкупно 280 од 300 пратеници, а единствено Димитрос Каменос од Независни Грци имаше спротивна линија од партијата и не ја поддржа владата. Поради тоа веднаш претседателот на партијата и министер за одбрана, Панос Каменос, го исфрли од членство.

Расправата за иницијативата на опозициската Нова демократија траеше три дена, од четвртокот напладне, при што се опозицијата обвинуваше дека владата на Ципрас ја издала државата со тоа што дозволила во името да стои зборот Македонија, како и со тоа што признала македонска националност и македонски јазик.

Во еден момент во расправата пратеникот Јоргос Урсузидис од редовите на владејачката партија „Сириза“ испрати порака на бугарски јазик (од 4:57 во видеото) до жителите на Македонија, порачувајќи минатото да се остави зад себе, а да се гледа на иднината и на соработката.


Договорот со Грција ќе се потпишува утре, денеска се гласа доверба на владата на Ципрас


Скопје, 16 јуни, 2018 - 12:27 (META) 

Во текот на утрешниот ден, недела, 17 јуни, во регионот на Преспа, на територија на Грција во засега непознат термин, ќе се одржи церемонијата на која, како што соопшти македонската влада, министерот за надворешни работи на Република Македонија, Никола Димитров и министерот за надворешни работи на  Грција, Никос Коѕиас ќе го потпишат договорот за  решавање на македонско – грчкиот спор за името. По потпишувањето на документот, кој го носи името „Конечна спогодба за решавање на разликите опишани во Резолуциите 817  (1993) и 845 (1993) на Советот за безбедност на Обединетите Нации, за престанување на важноста на Привремената спогодба од 1995 г. и за воспоставување на стратешко партнерство меѓу страните“,  на македонска територија ќе се одржи средба и ручек на претставниците на двете влади.

На утрешниот настан на кој ќе се потпише Спогодбата ќе присуствуваат премиерите на двете земји, Зоран Заев и Алексис Ципрас.

Владата го усвои овој договор на попладневната седница во четвртокот, а потоа ја симна тајноста и го објави на својот веб сајт.

Во грчкиот парламент, пак, денеска  пред 10 часот по локално време почна третиот дел по поднесеното барање од Нова демократија за гласање недоверба на Владата.  Главната тема на 16-часовната дискусија на пратениците вчера беше Конечната спогодба  со Македонија. Притоа пратеникот на ултра-десничарската партија „Златна зора“ Констанинос Барбарусис ја повика армијата да изврши воен удари поради „предавничката“ политика на владата на Ципрас.
Партијата „Златна зора“ ги осуди коментарите на нивниот пратеник и го исклучи од партијата. Исто така, на Златна зора и е забрането да учествува во продолжението на собраниската дебата.

Денеска покрај дискусијата, се очекува да се обратат лидерите на политичките партии и грчкиот премиер, а седницата ќе заврши со гласање недоверба.  Како што јави МИА, според досега изнесените ставови, не се очекуваат изненадувања. Пратениците на СИРИЗА и Независни Грци ќе гласаат против предлогот на Нова демократија, а Владата ќе добие доверба да продолжи да ја води Грција.

Грчките медиуми сензационално објавуваат дека во  текот на денешната расправа министерот за надворешни работи, Никос Коѕијас ќе презентира документи од грчкото МНР за преговорите со Македонија за името во минатото.
Договорот што ќе се потпише утре предвидува големи промени:

  • Двете страни ја потврдуваат постоечката граница меѓу нив како трајна меѓународна граница и ја потврдуваат својата желба за заемно пријателство, добрососедство и партнерство, како и решеноста да не преземаат и да не поддржуваат какви било непријателски чекори кон другата земја.
  • Официјалното име на Република Македонија ќе биде „Република Северна Македонија“, и тоа ќе се употребува ерга омнес. Скратеното име ќе биде „Северна Македонија“.
  • Државјанството ќе биде „македонско/граѓанин на Република Северна Македонија“.
  • Официјалниот јазик ќе биде „македонски јазик“, како што е признаено на Третата Конференција на ОН за стандардизација на географските имиња, одржана во Атина во 1977 година, но како јазик од групата на јужнословенските јазици и воопшто неповрзан со античката елинска цивилизација и култура.
  • Кодот за земјата на регистарските таблички на возилата на Втората страна ќе биде НМ или НМК. За сите други намени, кодот на земјата останува да биде МК и МКД, како што е официјално определено од Меѓународната организација на стандардизација (ИСО).
  • Придавката во однос на државата, нејзините службени органи и други јавни институции ќе биде „на Република Северна Македонија“ или „ на Северна Македонија“. Приватните лица и тела кои не се поврзани со државата и јавните институции и органи и не добиваат финансиска поддршка од државата за активности надвор од државата, можат да ги користат придавките изведени од зборот „Македонија“, но со јасна напомена дека тие придавки воопшто не се однесуваат на древна Македонија и на она што Грција го подразбира како македонски дел од своето историско наследство.
  • Македонија ќе го смени Уставот за да го промени името во Република Северна Македонија и да ги внесе погоре наведените промени.
  • Спогодбата подразбира македонското Собрание набргу да ја ратификува Спогодбата и за тоа да ја извести Грција, а потоа, според текстот, во Македонија може, но не мора, да се организира референдум.
  • Уставните промени преку амандмани мора да се направат до крајот на годинава. Откако тоа ќе се случи, Спогодбата треба да биде ратификувана и од грчкиот парламент.
  • Грција, откако ќе биде известена дека Македонија ја  ратификувала спогобата, ќе го извести Претседателот на Советот на Европската Унија дека дава поддршка за почеток на преговори за членство на Македонија, но под името Република Северна Македонија.
  • Истовремено, ќе го извести Генералниот секретар на НАТО дека дава поддршка НАТО да ѝ упати покана за пристапување на земјава под новото име, но конечната поддршка ќе зависи од исходот на референдумот, ако се организира, и од уставните измени, а ако референдумот го потврди новото име и амандманите на Уставот се додадени, Грција ќе го  ратификува Протоколот за пристапување на нашата држава под новото име во НАТО, а таа ратификација во грчкиот парламент ќе се направи паралелно со ратификацијата на Спогодбата што ќе се потпишува утре.

Утре прва расправа и гласање за (не)доверба за владата на Зоран Заев


Скопје, 10 април, 2018 - 0:46 (META) 

Собранието на својата веб-страница го објави барањето на ВМРО-ДПМНЕ за гласање на доверба на Владата, а собранискиот спикер, Талат Џафери, потврди дека расправата ќе се одржи утре.

„Единствени проекти коишто ги спроведе Владата на СДСМ и ДУИ во изминатиов период се партизирање на институциите и нивно деградирање, заробено судство, луксузирање на владините функционери со парите на граѓаните и политички реваншизам“, пишува во образложението на опозициската партија во барањето за изгласување на недоверба на Владата, потпишано од 41 пратеник на ВМРО-ДПМНЕ.

Во документот се вели дека СДСМ и ДУИ за да ја одржат коалицијата ја погазиле демократијата во државата, Уставот, законите и собранискиот Деловник. Дека на сила го изгласале Законот за јазиците, не спровеле ниту една реформа од планот 3-6-9, кој, велат, доживеал целосен колапс.

Претседателот на Собранието, Талат Џафери, со СМС-пораки им потврдил на пратениците дека утре ќе се одржи расправата за доверба на Владата.

Лидерот на ВМРО-ДПМНЕ, Христијан Мицкоски изјави дека очекува Собранието да изгласа недоверба на Владата и да се организираат предвремени парламентарни избори.

– Очекувам на крај на денот да се изгласа недоверба на Владата и да можеме понатаму да видиме како ќе ја развиваме Република Македонија, да организираме предвремени парламентарни избори и се што оди со тоа – рече Мицкоски.

Според собранискиот Деловник, гласањето за доверба на Владата се врши по истекот на три дена од поставувањето на прашањето за доверба.

За изгласување недоверба потребно е апсолутно мнозинство, односно 61 глас од вкупниот број на пратеници.


Хан изрази жалење поради изгласувањето недоверба во владата на Косово


Брисел, 10 мај, 2017 - 19:49 (META) 

Еврокомесарот за проширување и за соседска политика, Јохнаес Хан, изрази жалење поради тоа што косовскиот парламент изгласа недоверба за владата.

„Жалам поради денешното изгласување недоверба во владата на Косово. Политичките лидери, институции не смеат да ги загубат од вид предизвиците со кои се соочува Косово“, напиша Хан на својот твитер-профил.

Тој додаде дека владеењето на правото, развојот на економијата, дијалогот и визната либерализација мора да продолжат за доброто на граѓаните.


Косовскиот парламент не изгласа доверба на владата, на повидок избори


Приштина, 10 мај, 2017 - 16:11 (META) 

Владата на Косово денеска „загуби“ на гласањето доверба во парламентот, со што Косово го очекуваат предвремени избори најдоцна за 45 дена.

Седницата на косовскиот парламент мина во тензична атмосфера, а Демократската партија гласаше исто како и опозицијата, на иницијативата на Фатмир Лимај, претседател на партијата Иницијатива за Косово.

Според проценките, претседателот на Косово треба утре да почне консултации со парламентарните партии за да се одреди датум за предвремени избори.

Владата предводена од Иса Мустафа долго беше блокирана поради неможноста да обезбеди мнозинство во парламентот за договорот за демаркација на границата со соседна Црна Гора, а потоа и за визната либерализација.


ДС предлага деблокирање на Собранието во три седници


Скопје, 31 март, 2017 - 12:10 (META) 

Демократскиот сојуз (ДС) предлага да се одржат три седници на Собранието на Република Македонија, со кои ќе се деблокира работата на законодавниот дом и ќе се изберат нов спикер и нова влада.

Според предлогот на партијата на поранешниот пратеник Павле Трајанов, прво 20 пратеници треба да поднесат барање за одржување вонредна седница на Собранието со единствена точка на дневниот ред – избор на претседател на Собранието. Ваква седница, како што велат од партијата, мора да се одржи во рок од десет дена од денот на доставување барање за вонредна седница.

„Второ, да се постави прашање за доверба на Владата на Република Македонија и да ѝ се изгласа недоверба. Седницата може да трае најдолго три дена од денот на доставување на предлогот за доверба на Владата. Трето, мандатарот да достави предлог за избор на нова влада и програма за работа на новата влада. Изборот на влада ќе мора да заврши најмногу за 17 дена од денот на доставување на предлогот“, се вели во соопштението на ДС.

На овој начин, во согласност со Уставот на Република Македонија и со деловникот за работа на Собранието, велат од партијата, ќе се деблокираат институциите и ќе почне процес на стабилизација на државата и нормализирање на животот на граѓаните.


Отфрлено барањето за гласање недоверба на бугарската влада


Софија, 19 февруари, 2016 - 9:37 (META) 

Бугарскиот парламент денеска го отфрли барањето на опозицијата за гласање недоверба на владата на премиерот Бојко Борисов.

Барањето на опозицијата е отфрлено со 130 гласа. 80 пратеници гласале „за“, додека пет биле воздржани.

Коалициската влада на Борисов, која е на власт од ноември 2014 година, нема апсолутно мнозинство, но има поддршка од две помали партии.

Опозицијата ја обвини владата дека не спровела реформи во здравствениот систем, како и дека презела чекори што би довеле до затворање болници.


Падна владата на португалскиот премиер Пасос Коелјо


Лисабон, 11 ноември, 2015 - 9:30 (META) 

Шест недели по изборот, падна малцинската влада на португалскиот премиер Педро Пасос Коелјо, откако синоќа ѝ беше изгласана недоверба.

Владата на Пасос Коелјо успеа да добие само 123 од вкупно 230 гласови на изјаснувањето за предлогот на Социјалистичката партија.

Социјалистите, марксистичкиот Лев блок, Комунистичката партија и зелените ѝ изгласаа недоверба на владата на десниот центар на Пасос Коелјо и на неговиот нов пакет економски мерки.


Зврлевски: Не гледам причина за недоверба во работата на јавниот обвинител


Скопје, 8 март, 2015 - 11:09 (META) 

Државниот јавен обвинител, Марко Зврлевски, изјавил дека не гледа никаква причина за недоверба и за сомневање во неговата работа, објави „Дојче веле“, отакако партијата ДОМ, која е дел од владејачката коалиција, преку соопштение побара Зврлевски да си поднесе оставка.

– Јас не гледам причина за недоверба и за сомневање во работата на државниот јавен обвинител. Досега, со моето професионално постапување во рамките на моите надлежности, јас не сум сторил ништо со што би се нарушила или изгубила довербата во јавното обвинителство – изјавил Зврлевски.