Голден стејт постигна нов рекорд во НБА-лигата


Оукленд, 25 ноември, 2015 - 12:00 (META) 

Кошаркарите на Голден стејт вориорс, со резултат од 16 победи и ниту еден изгубен меч, поставија нов рекорд за најдобар почеток на сезоната во историјата на НБА-лигата, така што синоќа на домашен терен го совладаа Лос Анџелес лејкерс, со резултат 111 – 77.

Актулениот НБА-шампион со тоа го урна досегашниот рекорд од 15 – 0 во победи, што го држеа тимовите на Вашингтон од сезоната 1948-1949 и Хјустон од сезоната 1993-1994.

Тимот на Голден стејт, до значајниот триумф, го предводеше Стефон Кари, кој мечот го заврши со постигнати 24 поени и со 9 асистенции.

„Овој рекорд е навистина нешто особено. Многу великани на кошарката играле во оваа лига, многу големи тимови, но никој не го постигнал ова. Мораме да бидеме горди. Малку ќе славиме, а потоа продолжуваме понатаму. Многу ни значи поддршката што ја добиваме овде, ова се најдобрите навивачи во лигата“, изјави Кари по мечот.


НБА: Деандре Џордан се премисли, останува во Лос Анџелес клиперс


Лос Анџелес, 9 јули, 2015 - 11:46 (META) 

Центарот на Лос Анџелес клиперс, Деандре Џордан, останува во тимот од Калифорнија, откако се премислил и го повлекол усниот договор што пред неколку дена го постигнал со Далас маверикс, објавуваат светските агенции.

Според информациите, Џордан наводно се премислил по тет-а-тет средбата во неговиот дом во Хјустон, со делегација од неговите соиграчи од „клиперс“, меѓу кои Блејк Грифин и Пол Пирс.

Од денеска, кога истекува мораториумот на НБА, играчите ќе можат да ги потпишуваат новите договори и трансфери во нови тимови.

„Клиперси“ го објавија останувањето на Џордан вчера доцна вечерта, посакувајќи му преку „Твитер“ добредојде назад во тимот.


НБА: Сан Антонио „опасно“ се засилува за следната сезона


Сан Антонио, 7 јули, 2015 - 11:14 (META) 

Тимот на петкратниот НБА-шампион Сан Антонио спарс во наредната сезона, по сè изгледа, ќе биде еден од главните претенденти за престижната титула.

За ваквите планови на „мамузите“ јасно говорат имињата на играчите кои како засилувања треба да пристигнат во тимот од Тексас, а за кои веќе наголемо пишуваат американските медиуми.

Најзвучното засилување е моќниот крилен играч Ламаркус Олдриџ, кој по девет сезони поминати во тимот на Портланд трејл блејзерс се сели во Сан Антонио.

Олдриџ минатата сезона имаше просек од 23,4 поени и од 10,2 скока по натпревар и покрај повредите на раката.

Олдриџ, кој има пораснато во околината на Далас и две години играл за Универзитетот на Тексас, според „Њујорк тајмс“ се согласил на четиригодишен договор со Сан Анатонио, вреден 80 милиони долари. Сепак, за официјализирање на договорите ќе се почека до четврток, кога завршува мораториумот во НБА за нови договри и за трансфери на играчите.

„Среќен сум што се враќам во Тексас и ќе бидам „мамуза“ (spur)“, напишал Олдриџ на својот твитер-профил.

По продолжувањето на соработката со Кавај Ленард и со Дени Грин, своето останување во Сан Антонио го објавија и ветернатите Тим Данкан и Аргентинецот Ману Џинобили.

Во тексашкиот тим, според информациите, доаѓа и искусниот Дејвид Вест, кој минатите четири сезони ги мина во тимот на Индијана пејсерс.

Вест, кој минатата сезона имаше просек од 11,7 поени и од 6,8 скока по натпревар, се согласил на едногодишен договор со „мамузите“, за ветерански минимум од 1,5 милион долари.


Голден Стејт е новиот НБА-шампион


Сан Франциско, 17 јуни, 2015 - 10:17 (META) 

Голден Стејт со победата над Кливленд од 105:97 и финални 4:2 ја осви шампионската титула во НБА.

Ова е четврта титула на клубот, прва по 40 години.

Најефикасни кај Голден Стејт беа Стеф Кари и Андре Игудала, секој со 25 поени.

Драјмонд Грин натпреварот го заврши со трипл-дабл од 16 поени, 11 скокови и од 10 асистенции.

Леброн Џејмс, иако постигна 32 поени, 18 скокови и девет асистенции, не успеа да му ја донесе победата на Кливленд.


НБА: Голден Стејт на чекор до шампионската титула


Оукленд, 15 јуни, 2015 - 11:53 (META) 

Кошаркарите на Голден Стејт вориорс се на чекор до освојување на шампионската титула откако синоќа го совладаа тимот на Кливленд кавалирс со 104-91 и поведоа со 3-2 во финалната серија на НБА.

Предводник на домашниот тим до победата беше Стеф Кари, кој мечот го заврши со 37 поени, од кои седум тројки, на кои додаде седум скока и четири асистенции.

Солидна партија покажаа и неговите тимски колеги Дрејмонд Грин, кој постигна 16 поени и девет скока, а Андре Игудала реализира 14 поени, осум скока и седум асистенции.

Кај поразениот тим, Леброн Џејмс постигна нов трипл-дабл, односно 40 поени, 14 скокови и 11 асистенции, кои не беа доволни за конечен исход во корист на Кливленд.

Наредниот, шести меч, ќе се игра во вторник, во Кливленд.


НБА: Голден Стејт со убедлив триумф израмни на 2 – 2


Кливленд, 12 јуни, 2015 - 9:55 (META) 

Кошаркарите на Голден Стејт вориорс со убедлив триумф над Кливленд кавалирс од 103 – 82, на гостински терен, израмнија на 2 – 2 во победи во финалната серија од плејофот на НБА-лигата.

Најефикасни во победничкиот тим беа Стеф Кари и Андре Игудала, кои постигнаа по 22 поени. Кај Кливленд најмногу поени постигна Тимофеј Мозгов, односно 28.

Кошаркарите на Голден Стејт доминираа уште од почетокот на натпреварот, но победникот, сепак, се решаваше во последната четвртина, која гостите ја добија со 27 – 12.

Ѕвездата на Кливленд не постигна ниту еден поен во последната четвртина и мечот го заврши со скромни, за него, 20 поени, 12 скокови и со осум асистенции.


НБА: Кливленд поведе со 2-1 во финалната серија против Голден Стејт


Кливленд, 10 јуни, 2015 - 13:54 (META) 

Екипата на Кливленд кавалирс поведе со 2-1 во финалната серија во НБА-лигата, откако утрово на домашен терен го совладаа тимот на Голден Стејт вориорс со 96-91.

Најзаслужен за победата на „кавалирс“ беше ѕвездата на тимот, Леброн Џејмс, кој мечот го заврши со извонредни 40 поени, 12 скокови и со осум асистенции.

Одлична игра за домашниот тим прикажа и Метју Делаведова, кој постигна 20 поени, пет скока и четири асистенции.

Во редовите на Голден стејт, најефикасен беше Стеф Кари, со реализирани 27 поени, од кои 17 ги постигна во последната четвртина.


Кливленд со трипл-дабл на Џемјс израмни во финалната серија на НБА


Оукленд, 8 јуни, 2015 - 10:03 (META) 

Кошаркарите на Кливленд кавалирс синоќа го совладаа тимот на Голден Стеј вориорс со конечен резултат од 95 – 93 и израмнија на 1 – 1 во финалната серија во НБА-лигата.

Најзаслужен за победата на „кавалирс“ беше Леброн Џејмс, кој мечот го заврши со трипл-дабл од 36 поени, 16 скока и од 11 асистенции.

Трагичар на мечот беше ѕвездата на Голден Стејт, Стеф Кари, кој во последниот напад ја загуби топката и не успеа на својот тим да му обезбеди нова победа.

Кари го заврши мечот со скромно, за него, постигнување од 19 поени, додека најдобар во тимот на „вориорс“ беше Клеј Томсон со 34 поени.


Голден Стејт во финале по 40 години


Сан Франциско, 28 мај, 2015 - 13:05 (META) 

Голден Стејт со 104-90 славеше против Хјустон и со вкупно 4-1 од петте натпревари од финалната серија на Западната конференција се пласираше во финале, каде за титулата ќе игра против Кливленд.

Стеф Кари повторно беше најефикасен, со 26 поени, осум скока и so шест асистенции. На спротивната страна Двајт Хауард постигна 18 поени и 16 скока.

„Вариорс“ првпат по 1975 година ќе играат во финале и ќе имаат можност да ја освојат втората титула откако таа година во серијата за титулата славеа над Вашингтон со 4-0.

Претходно во конференциското финале на Истокот, Кливленд со 4-0 во серија ја елиминираше Атланта. Финалната серија што се игра до четири победи почнува на четврти јуни, а предноста на домашниот терен во евентуалната мајсторка ја има Голден Стејт.


Леброн со трипл-дабл за победа на Кливленд


Кливленд, 25 мај, 2015 - 16:33 (META) 

Кошаркарот на Кливленд, Леброн Џејмс, постигна 37 поени на натпреварот против Атланта, со што успеа по 75. пат во плејоф-натпреварите да постигне повеќе од 30 поени.

Со ова постигнување Џејмс се изедначи со кошаркарот на Лос Анџелес Лејкерс, Карим Абдул Џабар. Сепак, на врвот на листата на најпрецезни кошаркари во разигрувањата за шампионскиот прстен се Коби Брајант, кој 88 пати постигнал повеќе од 30 поени и Мајкл Џордан, кој тоа го направил 109 пати.

Во натпреварот против Атланта, Леброн го постигна неговиот дванаесети трипл-дабл во плејоф-натпреварите, со 37 поени, 18 скока и со 13 асистенции.

Сега тој се наоѓа на второто место, по рекордерот Меџик Џонсон, кој 30 пати реализирал трипл-дабл. Третото место го делат Лери Брд и Џејсон Кид, кои имаат по 11 такви постигнувања.