По инспекцијата во гевгелиската градинка, директорката ќе го решава случајот


Скопје, 7 август, 2018 - 14:56 (META) 

Министерството за труд и социјална политика (МТСП) соопшти дека по извршената инспекција во градинката „Детска Радост“ во Гевгелија, директорката на установата ќе треба да утврди дали има прекршување.

Министерството вчера испрати инспекција во градинката по видеото објавено на социјалните мрежи, кое беше пренесено во медиумите, а во кое, наводно воспитувачка, вика и ги навредува децата.

Од МТСП велат дека се земени изјави од вработените и директорката и таа е задолжена да ја утврди фактичката состојба, а доколку најде докази дека е сторен некаков прекршок, да поднесе иницијатива за покренување на дисциплинска постапка или пријава за сторено кривично дело.


Приврзаници на чешкиот претседател Земан ги нападнаа новинарите по изборната победа


Прага, 28 јануари, 2018 - 14:46 (META) 

Чешката полиција поведе истрага откако редарите и симпатизерите на чешкиот претседател Милош Земан ги нападнаа новинарите во неговиот изборниот штаб по победата во вториот круг од претседателските избори во земјата.

Редарите и симпатизерите синоќа со тупаници ги напaднаа акредитираните новинари, турнаа и скршија камера на чешката приватна телевизија „ТВ Нова“ и ги навредуваа медиумските работници.

Нападот се случи во хотелот ТОП во Прага, каде што во изборниот штаб се славеше победата на претседателот Земан.

Инцидентот се случи кога новинарите сакаа да го снимаат доаѓањето на итната помош поради еден гостин на Земан, кој видно алкохолизиран падна со шишето пиво в рака.

Поради тоа реагираа од изборниот штаб, почнаа да ги туркаат новинарите за да ја затворат салата и да ги спречат да снимаат.

Еден од редарите ја фрли камерата на земја на приватната телевизија, а во тепањето се приклучи и еден од гостите на претседателот со иста жолта новинарска пропусница кој со тупаници нападна еден од новинарите, а од насилство неа беа поштедени ниту новинарките.

Од кабинетот на претседателот се правдаат дека напаѓачите не се од државното обезбедување на претседателот и ги повикаа новинарите на кафе како гест на извинување.

Инцидентот го осудија и „Репортери без граници“ од каде истакнаа дека тоа е срам за европската демократија и дека нападите врз новинарите мора да престанат.


Трамп вели дека за Африканците го кажал тоа што многумина го мислат


Вашингтон, 14 јануари, 2018 - 10:46 (META) 

Извор од Белата куќа тврди дека американскиот претседател Доналд Трамп во врска со неговата навредлива изјава за африканските и некои централноамерикански држави, оценил дека „едноставно го рекол тоа што многумина го мислат, а не смеат да го кажат на глас“.

Истиот извор изјавил дека ваквиот став Трамп го искажал на средба со најблиските соработници, на која се расправало за последиците од неговата изјава дека африканските земји, како и Хаити и Салвадор се „клоака држави“.

Како што објави вчера „Вашингтон пост“, на состанок со конгресмени во Белата куќа, на кој бил претставен компромисот за младите имигранти (ДАКА), Трамп прашал „Зошто сите тие лица од клоака-држави доаѓаат овде? (Why are we having all these people from shithole countries come here?)“.

Според неименувани извори, Трамп алудирал на африканските држави, како и на Хаити и Салвадор, објаснувајќи дека САД наместо нив би требало да примаат државјани од Норвешка, со чија премиерка имаше состанок еден ден претходно.

Трамп вчера негираше дека изрекол навреди. „Речникот што го користев на состанокот за ДАКА беше остар, но не ги употребив тие зборови“, напиша Трамп на Твитер.


Антисемитски и антикомунистички графити на советски споменик во Пловдив


Пловдив, 13 ноември, 2017 - 11:53 (META) 

Со графити со кукасти крстови, со антисемитски пораки „Убиј го Евреинот“ и „Комунизам – Еврејство“, како и навреди за Марија Захарова, министерката за надорешни работи, во петокот осамна споменикот „Аљоша“, познат како „Советскиот споменик“ во бугарскиот град Пловдив.

Иако по неколку часа графитите се избришани, настанот крена бура во социјалните медиуми. Со различни реакции се огласија повеќе истакнати фигури во Бугарија, а реагираше и внукот на поетот Венко Марковски, Вени Марковски, кој ги критикуваше реакциите во кои не се осудува антисемитизмот.

Вени Марковски е потпретседател на ИКАН, меѓународното тело за регулирање на интернетот.


Охриѓанка го заклучувала 34-годишниот син и го малтретирала


Охрид, 18 октомври, 2017 - 11:59 (META) 

Охриѓанката Ф.Ѓ. (56) добила кривична пријава од СВР Охрид за загрозување на сигурноста, поради тоа што, како што велат од полицијата, подолго време го малтретирала и го заклучувала 34-годишниот син, поради што нему му се влошила здравствената состојба.

Според СВР Охрид, пријавената 56-годишна жена подолг временски период во семејната куќа го вознемирувала нејзиниот син В.Ѓ. (34), го заклучувала и не му дозволувала слободно движење низ заедничките семејни простории.

„Таа, исто така, му упатувала сериозни закани и ја загрозувала неговата сигурност, со што му предизвикала чувство на страв и несигурност, го малтретирала оштетениот и му упатувала низа навредливи и заканувачки зборови. Поради тоа, на сега оштетениот В.Ѓ. значително му се влошила здравствената состојба и често барал лекарска помош во Општа болница Охрид“, соопшти СВР Охрид.


Вучиќ: Не ми пречи што Заев ме навредува, важно ми е како ќе се однесува кон Србија


Белград, 18 мај, 2017 - 16:21 (META) 

Премиерот на Србија, Александар Вучиќ, денеска изјави дека не го интересираат внатрешните односи во Македонија, ниту дали мандатарот за состав на новата македонска влада го навредува, туку го интересира како Македонија ќе се однесува кон Србија.

– Не би сакал да зборувам што мислам за Зоран Заев. Ниту сакам ниту можам да зборувам остро, иако тоа некои можеби го сакаат. Тој ја претставува втората партија по сила во Македонија. Ќе судиме во делата – изјави Вучиќ.

Лидерот на СДСМ, Зоран Заев, вчера во интервју за регионалната телевизија „Н1“ изјави дека е непријатен начинот на кој Србија ги коментира случувањата во Македонија, но дека ќе се труди да има добри односи со Белград.

„Вучиќ водеше кампања и буквално на секој од своите настапи зброуваше за некакво „македонско сценарио“. За жал, мене ми беше непријатно за слушање како нашиот сосед зборува за Македонија“, рече Заев.

Вучиќ денеска додаде и дека не му пречи „кога Заев го навредува“, туку дека „единствено го интересира Србија да ја остават на мира“.

– Не сакам да ги коментирам односите во Македонија. Мене не ми пречи што ме навредуваше, за мене е важно како ќе се однесувате (мисли на Македонија, н.з.) кон Србија. Ако сум ја критикувал Македонија, тоа сум го направил затоа што гласаше за влегување на Косово во УНЕСКО – рече Вучиќ.

Во врска со можноста Рамуш Харадинај, кого Србија го товари за воени злосторства, да биде новиот косовски премиер и главен преговарач во дијалогот меѓу Белград и Приштина во Брисел, Вучиќ изјави дека тоа би било понижување и за ЕУ. Тој додаде дека останува да се види што ќе се случи на изборите на Косово, „каде има две коалиции, едната во која се поранешните водачи на ОВК и другата – „американска“ – на чело со Беџет Пацоли, додека „Србија и српскиот народ треба да се гледаат себе“.


ВМРО-ДПМНЕ: Заев молчи и се надева на влада која зависи од „радикалот Села“


Скопје, 22 април, 2017 - 9:54 (META) 

Нема да се реализираат елементите од тиранската платформа затоа што граѓаните ја осудуваат и не гласаа за неа, порачуваат од ВМРО-ДПМНЕ во редовното утринско соопштение на партијата.

Оттаму велат дека лидерот на СДСМ, Зоран Заев, во надеж дека ќе се спаси себеси и „криминогената врхушка на СДС околу него од кривичен прогон“ е подготвен да направи влада врз основа на платформата од Тирана.

„Криминалецот Заев и СДС во целост ја прифатија тиранската платформа и сите точки од истата, а тоа го потврди и неговиот сопартиец Мухамед Зекири. Криминалецот Заев, ако мора да си го плати долгот кон нарко-мафијашките структури и партнерите од надвор, кои и му ја сервираа тиранската платформа, што мора да ја испорача, може да го плати од фирмите на кланот Заеви, становите на Шекеринска и на Шилегов и од хациендите на Богоев, но не и со македонските национални интереси“, стои во соопштението на ВМРО-ДПМНЕ.

Партијата повторно го обвинува Заев дека молчи пред навредите и антимакедонските ставови на Еди Рама, Дитмир Бушати и на Зијадин Села.

„Криминалецот Заев молчи и се надева на влада која зависи од радикалот Села… За разлика од криминалецот Заев, македонскиот народ не дава да му се свитка ’рбетот и не сака да ги плаќа долговите на Заев. Народот тоа го докажува секој ден на улиците низ државата“, велат од ВМРО-ДПМНЕ.


Денеска нова седница со стари позиции и со деловнички блокади


Скопје, 28 март, 2017 - 9:40 (META) 

Конститутивната седница на Собранието, на која се расправа за избор на претседател, заменик-претседател, членови и нивни заменици на Комисијата за избори и за именувања, ќе продолжи денеска напладне.

Вчера, 20 пратеници поднесоа предлог за кандидат за претседател на Собранието на Република Македонија да биде Талат Џафери.

Разврската останува неизвесна, како поради бројот на пријавените пратеници за дискусија, така и поради генералната атмосфера на конфронтации и на високи тонови и навреди. ВМРО-ДПМНЕ постојано бара дистанцирање од т.н. платформа на Албанците и нејзините пратеници тврдат дека изборот на Албанец за претсeдaтел на Собранието би бил доказ дека тој документ е на сила. СДСМ вели дека противниците само купуваат време и го блокираат процесот „за да не одат в затвор“. Дополнителна компликација внесува одлуката на Беса да не ја поддржи кандидатурата на Талат Џафери за претседател на Собранието.

Вчера речиси целата седница помина во реплики и во контрареплики на пратениците на ВМРО-ДПМНЕ за платформата на Албанците, како и „за зачувување на унитарноста и на суверентетот на државата“.

Пратеникот на ВМРО-ДПМНЕ и претседател на Комисијата за избори и за именувања, Илија Димовски, рече дека пратениците на ВМРО-ДПМНЕ „го црпат правото за дебатирање од демократијата“.

– Легитимно е 20 пратеници да го предoлжат Џафери, но тие не смеат да го блокираат правото на Комисијата или на други 20 пратеници да предложат кандидат – рече Димовски.


Графити и против Спасовски и Шахпаска


Куманово, 28 февруари, 2017 - 16:56 (META) 

Непознат сторител напишал навредливи графити во близина на куќата на О.С. во Куманово, извести МВР во денешниот полициски билтен. Во него е и информацијата дека навредлив графит бил испишан на семејната куќа на Ј.Ш. во Берово.

Во полицискиот билтен за случаите, освен иницијалите, не се открива идентитетот на оштетините, но според неофицијални информации, станува збор за пратениците и високи функционери на СДСМ, Оливер Спасовски и Јагода Шахпаска.

Шахпаска на својот фејсбук-профил денеска објави фотографија од графитот испишан на нејзината куќа, кој гласи „Предавници!“

Полицијата вели дека се трага по сторителите.

Слични графити вчера беа претходно испишани и пред домовите на Васко Ковачевски во Битола, на Петре Шилегов во Скопје, на Максим Димитриевски во Куманово и пред домот на Јован Митрески од Струга.


ВМРО-ДПМНЕ: Нова хистерична епизода на Јанева и на Фетаи


Скопје, 22 февруари, 2017 - 16:43 (META) 

Катица Јанева и Фатиме Фетаи продолжуваат да прават циркус од себе и со своето непознавање на правото и со недоличното однесување се срам за целокупниот правосуден систем во Македонија, обвинија денеска од ВМРО-ДПМНЕ, по случувањата на судското рочиште за насилствата пред Општина Центар, за кои меѓу обвинетите е и лидерот на партијата, Никола Груевски.

– Правната инфериорност и немањето докази доведоа до нова хистерична епизода на Јанева и на Фетаи, во која специјалните обвинителки наместо да го водат случајот, решија да го блокираат. Ваквото недолично однесување и непочит на Јанева и на Фетаи и, конечно, на СЈО кон судот во Република Македонија е уште едно парче во мозаикот во кој се добива целата слика на Специјалното јавно обвинителство – изјави членот на ВМРО-ДПМНЕ и заменик-министер за образование и наука во оставка, Спиро Ристовски.

Заканите на Јанева и на Фетаи до судијката Татјана Михајлова, Ристовски вели дека се идентични на заканите на Зоран Заев за целосен реизбор на судиите.

Тој рече дека СЈО не процесирало ниту еден случај против член на СДСМ и дека служи „за заплашување на сите што му стојат на патот на Заев или се двоумат во извршувањето на неговите антидржавни и криминални наредби“.

– СЈО не се бори против криминалот, туку се бори исклучиво против ВМРО-ДПМНЕ, рамо до рамо со аболираниот криминалец Зоран Заев. Јанева и Фетаи со ароганцијата и со хистеријата не можат да ја покријат ниту сопствената нестручност, ниту работењето под директни инструкции на СДСМ – заклучи Ристовски.