!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Иванов – Креј: Македонија да го добие заслуженото место во НАТО


Скопје, 14 септември, 2017 - 12:37 (META) 

Македонија ги исполнува сите услови и критериуми за членство во НАТО, а со учеството во мировните мисии де факто се однесува како членка на северно-атлантската организација, истакнал претседателот на државата, Ѓорге Иванов, на средбата со командантот на Националната гарда на Вермонт, генерал-мајор Стивен Креј, кој е во официјална посета на земјава.

Во овој контекст Иванов изрази очекување за понатамошна интензивна американска поддршка, за Македонија да го заземе заслуженото место во НАТО.

„Генерал-мајор Креј оддаде признание за севкупниот ангажман на македонските војници во меѓународните мировни мисии и додаде дека САД, како и досега, ќе продолжат да бидат поддржувач на стратешката определба на Република Македонија за целосна интеграција во евроатлантските структури“, стои во соопштението за средбата.

Иванов и генерал Креј на средбата размениле мислења за долгогодишната плодна соработка меѓу Армијата на Република Македонија и Националната гарда на Вермонт преку заедничкото учество во мировни мисии, реализацијата на заеднички вежби, обука и едукација на припадниците на двете армии.

Инаку, во 2012 година Иванов ја одликуваше Националната гарда на Вермонт со Орден за воени заслуги.


Шекеринска: Сметаме на нашите стратешки партнери за членството во НАТО


Скопје, 13 септември, 2017 - 15:47 (META) 

Македонија смета на своите стратешки партнери, особено сега кога работиме забрзано и искрено за членството во НАТО, истакна министерката за одбрана, Радмила Шекеринска, по денешната средба со командантот на Националната гарда на Вермонт, генерал-мајор Стивен Креј, кој е во официјална посета на Македонија.

– Македонија – членка на НАТО е заедничка цел зашто служи на двата крупни интереси – стабилен регион, но и стабилни и безбедни граѓани на Република Македонија. Нашата определба за членство на Македонија во НАТО ја докажавме и преку нашето постојано учество во меѓународните мисии, вклучително и со мисијата во Авганистан, кое го продолжуваме и ќе го зголемиме. Ја покажавме, исто така, и во заедничката вежба што ја имавме со воените сили на САД ова лето на Криволак – изјави Шекеринска, посочувајќи дека повеќе од 4.500 војници на Амијата на Република Македонија учествувале во заедничките активности со Националната гарда на Вермонт.

Генералот Креј истакна дека од 70 партнерства на националните гарди на САД во светот, партнерството на Националната гарда на Вермонт и на АРМ е еден од најуспешните примери на соработка која има неограничен потенцијал.

– Стратегиското партнерство е навистина корисно за двете земји и ние сме горди за сè што успеавме да обезбедиме за Македонија, меѓутоа и за искуството кое ние го стекнавме овде во Македонија – рече командантот на Националната гарда на Вермонт.

Тој порача дека интеграцијата на Македонија во НАТО е дел од целите на партнерството и дека во текот на посетата ќе се разговара за активностите што ќе се преземаат следните години, и за помошта во однос на членството во НАТО и за другите цели на државата.