Малолетник и 19-годишник ги испишале графитите во Битола


Битола, 22 јануари, 2018 - 14:10 (META) 

На разговор во полициска станица во врска со графитите со говор на омраза што беа испишани во петокот на Широк Сокак во Битола, битолската полиција повикала еден малолетник и еден 19-годишник.

Случајот потоа бил расчистен и било утврдено дека младите битолчани ги испишале графитите, и по документирање на случајот, против нив ќе бидат поднесени пријави.


Теодоракис: Загубивме 25 години во спор со земја што може да биде верен сојузник


Атина, 22 јануари, 2018 - 12:16 (META) 

Ставрос Теодоракис, претседателот на грчката либерална и социјал-демократска партија „Потами“ (Река) вчера по големиот антимакедонски митинг во Солун, на својата Фејсбук страница искажа силна осуда за грчкиот национализам.

Во постот насловен „Зошто не сум на протестот во Солун“, тој вели дека Грција губи веќе 25 години со одржувањето на воинствена атмосфера кон една мала земја што може да биде нејзина верна сојузничка. Теодоракис искажува и презир кон оние што си градат кариера преку популистичко однесување и национализам.

„Бидејќи не гледам голема разлика помеѓу „Поранешна југословенска република Македонија“ – име што сите го прифативме – и Нова или Северна или Горна Македонија. Бидејќи во „македонското“ прашање, исто како во „кипарското“, неактивноста и одлагањето се на штета на Грција и елинизмот. Бидејќи со ништо не сум политички или естетски поврзан со оние што велат дека сме под окупација и зборуваат за предавници, анти-Хелени, бесења и ковчези. Бидејќи ваквото дејствување води до политички терор. Бидејќи секој пат кога една држава на Обединетите нации ја признава „Република Македонија”, грчката дипломатија е ослабена. Затоа што не сакам соседната земја да се распадне – сакам да го спречам „муслиманскиот подарок на турската мајка” и „Голема Албанија”, посочува Теодоракис на Фејсбук.

Тој вели и дека не сака децата во соседната земја да растат со омраза кон Грција и дека препораките да не се брза со решавање на проблемот со името од 1992 година досега „ја призна“ „Република Македонија“.

Според него, Солун е главен град на Балканот, а не фобичната провинција Атина и вели дека Касториа (Костур), Флорина (Лерин), Пела, Килкис (Кукуш), Серес, Драма, сакаат работни места и развој, а не сомнителни бизниси во нови „изолирани зони“.


Османи: Очекуваме поддршка од Естонија во 2018, која е историска за нашата ЕУ-интеграција


Талин, 5 декември, 2017 - 11:55 (META) 

Вицепремиерот за европски прашања, Бујар Османи, за време на работната посета на Естонија, се сретнал со високи претставници на државата, како директорот на канцеларијата за европски прашања, Клен Јарац, претседателот на Комисијата за европски прашања при естонскиот парламент, Томас Витсут, и со претседателот на парламентарната група помеѓу Македонија и Естонија, Ерик Нилс Крос.

На средбите се разговарало за билатералната соработка помеѓу Македонија и Естонија, регионалната соработка во рамки на земјите од Западен Балкан, како и за проширувањето на Европската Унија со земјите од регионот.

„Следната година претставува историска година за Македонија по прашањето на нашите интеграции и за тие наши амбиции, очекуваме поддршка од  Естонија“, истакна Османи.

Соговорниците дискутирале и за справувањето со европските предизвици, како што се лажните вести, пробивот на радикалниот популизам, национализмот, геополитичко влијание од Исток, предизвиците на мигрантската криза итн.

Претходно, во рамки на својата работна посета на Естонија, Османи се сретна и со министерот за надворешни работи на Естонија, Свен Миксер.


Европа да ги отфрли сепаратизмот и национализмот, порача Јункер од Шпанија


Саламанка, 9 ноември, 2017 - 19:16 (META) 

Претседателот на Европската комисија, Жан Клод Јункер денеска ја повика Европа да се спротивстави на сепаратизмот во време кога иницијативата за незaвисноста на Каталанија длабоко ја подели Шпанија, јавуваат светските агенции.

– Национализмот е отров кој ја спречува Европа да функционира обединето – рекол Јункер во својот говор на универзитетот во шпанскиот град Саламанка, каде денеска му била врачена награда.

Тој додал дека на ситуацијата „не може да се гледа со скрстени раце“ и дека е против „сепаратизмот која ја слабее Европа и дополнително ги проширува постоечките пукнатини“.

Шпанскиот премиер, Маријано Рахој, кој го придружувал Јункер во Саламанка, му се заблагодарил на претседателот на ЕК за поддршката во вакви тешки времиња.

– Јункер ги поддржува потезите на шпанската влада, нашиот устав и правосуден систем – изјавил Рахој.


Заев: Очигледно е дека опозицијата ќе треба да ги промени ставовите по изборниот резултат


Скопје, 16 октомври, 2017 - 14:13 (META) 

Резултатите на локалните избори не се добри, туку се одлични, изјави премиерот и лидер на СДСМ, Зоран Заев, одговарајќи на новинарско прашање на денешната заедничка прес-конференција со црногорскиот премиер Душан Марковиќ.

Заев истакна дека тие се дополнителен мотив за Владата и дека претставуваат показател дека опозицијата треба да ги промени ставовите од изминатите месеци.

– Граѓаните дадоа поддршка во кој правец ќе се движи Македонија и ставија крај на национализмот. Порака стигна и до опозицијата. И во Источна и во Западна Македонија покажаа дека национализмот не поминува. Опозицијата очигледно треба да ги промени ставовите од изминатите месеци – рече Заев, наведувајќи дека не сака да се меша во внатрешните работи на опозицијата и додаде дека силна опозиција води до поодговорна власт.


Себастијан Курц е на пат да ја освои титулата најмлад премиер во Европа


Виена, 15 октомври, 2017 - 20:10 (META) 

Досегашниот шеф на дипломатијата на Австрија, младиот конзервативец Себастијан Курц, е на пат да стане нов канцелар и со тоа и најмладиот премиер во Европа. Тоа се должи на предвидувањата на анкетите за гласовите што ќе ги добие неговата конзервативна Народна партија, на денешните парламентарни избори во Австрија.

Според сегашните проекции, Народна партија може да се надева на 30,2 проценти гласови, значително пред ултрадесничарската Партија на слободата со 26,8 проценти и пред социјалдемократите на сегашниот канцелар Кристијан Керн со 26,3 отсто.

Се очекува Курц по веројатната изборна победа да формира коалиција со Партијата на слободата. Но, можно е да се формира и голема коалиција, повторно предводена од Курц, овојпат со социјалдемократите, што според аналитичарите, е малку веројатно по 10 години заедничко владеење, кое Курц го прекина во мај годинава со раскинување на коалицијата.

Ако ултрадесничарската Партија на слободата, која е против имиграцијата, сепак дојде на власт, тоа ќе биде голем проблем за Брисел, кој по излегувањето на Велика Британија од ЕУ се бори со засилен национализам во Унгарија, Полска и во Германија, како и во други земји.

Партијата на слободата е формирана од поранешни нацисти во 1950 година.


Димитров: Во преговорите со Грција треба да си создадеме пријател


Прилеп, 6 октомври, 2017 - 19:26 (META) 

Во преговорите со Грција треба да се настапува позитивно, а не со површен национализам, порача министерот за надворешни работи, Никола Димитров, денеска во Прилеп. Тој беше во градот под Маркови Кули за да му даде поддршка на кандидатот за градоначалник, Илија Јованоски.

Шефот на македонската дипломатија вели дека главната поента во преговорите со Грција во спорот за името е да настапува позитивно за да не се засили блокадата.

– Сега нашиот главен пристап е да им ги одземаме аргументите што би ја отежнале блокадата и да не изнесуваме аргументи што би ја бетонирале блокадата, да работиме на враќање на старите и стекнување нови пријатели, бидејќи за да го решиме тој проблем, мора да имаме пријатели – рече Димитров.

Тој не гледа причина да се даваат остри изјави, бидејќи тоа би бил површен национализам што Македонија би ја држел уште неколку години во застој.

–  Мојата задача е да извлечам максимум. А за толку важно прашање, мора сите заедно да видиме што е и како е. Лесно е да се каже некоја остра изјава контра Грција и да бидам „херој во Прилеп“, но што сме направиле тогаш со иднината на Македонија и каде се гледаме по пет години? Површниот национализам ги поразува националните интереси на земјата – изјави Димитров.


Божидар Димитров заминува во пензија


Софија, 29 септември, 2017 - 18:19 (META) 

Божидар Димитров, директорот на Националниот историски музеј во Софија, познат по честото застапување на тезата за бугарското потекло на Македонците, си дал оставка и наскоро заминува во пензија, соопшти бугарското министерство за култура. Според министерството, Димитров ќе се пензионира на 1 ноември, бидејќи ги исполнува старосните услови.

Тој првпат на таа функција стапи во декември 1994 година, но беше сменет по четири години поради спорот со тогашниот бугарски претседател Петар Стојанов поради враќањето на ракописот на „Историја славјаноблгарска“ на Пајсиј Хилендарски во Зографскиот манастир на Света Гора.

Повторно беше назначен за директор на Националниот историски музеј во 2011 година и оттогаш непрекинато ја извршува функцијата.


Борисов кажа сè, само „македонски јазик“ не


Софија, 20 јуни, 2017 - 15:49 (META) 

Запрашан на денешната прес-конференција со неговиот македонски колега Зоран Заев на каков јазик ќе се потпише договорот за добрососедство, бугарскиот премиер Бојко Борисов даде одговор дека тој мора да биде составен „на јазикот што е наведен во Уставот“ на Македонија.

– Детали што, всушност, се важни, но не за денес, туку за евентуално следното поколение. Истовремено, ние како држава први ја признавме Македонија. Во Уставот на Македонија е кажано каков јазик има таа држава. Соодветно на договорот, таа треба да потпише на јазикот што е наведен во Уставот, а во спротивно ќе го нарушите Уставот – рече бугарскиот премиер, пренесува бугарската агенција „Фокус“.

До потпишување на договорот, сепак, вели Борисов, ќе дојде откако министрите за надворешни работи на двете земји ќе стигнат до последната верзија и тогаш ќе се донесе одлука.

– Јас сум многу добронамерен човек и вистински ве сакам како луѓе. Немаме поблизок народ. Кога историчарите ќе предложат термини за да го затвориме овој договор, тоа ќе биде огромен успех и чекор напред. Ќе дадеме добар пример на Балканот и ќе отвориме пат на Македонија по патот кон НАТО и кон ЕУ. Затоа сакаме да го направиме тоа. Ако се поведеме само по националистички чувства, ништо добро не нè чека – вели Борисов.


Националистот Каракачанов го славеше Денот на Македонија како министер


Софија, 6 јуни, 2017 - 12:51 (META) 

Бугарскиот вицепремиер за јавен ред и безбедност и министер за одбрана на Бугарија, Красимир Каракачанов, вчера во Софија пред споменикот на револуционерите од Македонија и Тракија, првпат го одбележа Денот на Македонија како владин министер, јави „Балкан инсајт“. Претходно Каракачанов, според бугарските медиуми, бил редовен учесник на одбележувањата, но првпат годинава го зеде под свое патронство ова празнување на бугарските националисти.

Прославата организирана од т.н. Македонскиот научен институт (МНИ) почна пред споменикот во Софија, оддавајќи им признание на паднатите борци, по што се одржаа панихида и научна конференција.

Во официјалното обраќање на конференцијата одржана во МНИ, Каракачанов, кој исто така е член на институтот, ги повика Бугарите „да не ги заборават вистината и идеалите на хероите што паднале за Македонија“.

Каракачанов е долгогодишен лидер на бугарската ВМРО-БНД, која е позната по екстремниот национализам во поглед на Македонија и ја пропагира тезата за национален идентитет на етничките Македонци во Република Македонија.

На сметка на Каракачанов од истакнати научници беа пласирани критики дека го злоупотребува „македонското дело“, како што се нарекува борбата за бугарската кауза на територијата на денешна Република Македонија и на териториите на Грција и на Албанија.