Тероризмот повеќе не е во безбедносниот фокус на САД, туку Русија и Кина


Вашингтон, 19 јануари, 2018 - 22:10 (META) 

Министерот за одбрана на САД, Џејмс Матис денеска изјави дека натпреварот помеѓу големите сили, а не тероризмот, е сега во фокусот на американската одбранбена стратегија, пренесува „Би-би-си“.

Зборувајќи во Вашингтон, Матис рече дека САД се соочуваат со „растечки закани од ревизионистичките сили, како што се Кина и Русија“, кои сакаат да „создадат свет во склад со нивните авторитарни модели“.

– Ќе ја продолжиме кампањата против терористите, но натпреварот меѓу големите сили, а не тероризмот, сега е во фокусот на американската национална стратегија – рече Матис, претставувајќи ја новата одбранбена стратегија на САД.

Тој, исто така, апелираше до Конгресот соодветно да ја финансира војската и да се воздржи од кратења во федералниот буџет на САД.

Заменик-помошникот на министерот за одбрана, Елдриџ Колби изјавил дека Русија е многу подрска од Кина во користењето на воена моќ, пред се со анексијата на Крим во 2014 година и со помошта што ја дава на сирискиот претседател, Башар ал Асад.

Сепак, Москва има ограничени економски ресурси, додал Колби, додека Кина, од друга страна, ја опишал како сила која е во подем и економски и воено.


Трамп предложи да се доделува трофеј за лажни вести


Вашингтон, 27 ноември, 2017 - 20:53 (META) 

Претседателот на САД, Доналд Трамп, предложи на медиумите кои, според него, најнеискрено го претставуваат, да им се додели трофеј за лажни вести.

„Треба да одржиме натпревар и да видиме која мрежа плус „Си-ен-ен“ и без „Фокс њуз“ е најнеискрена, најкорумпирана и која најмногу го извртува политичкото покривање на вашиот омилен претседател (јас). Сите се лоши. Победникот да добие трофеј за лажни вести“, објави Трамп на „Твитер.

Откако дојде на местото на претседател на САД, Трамп константно се жали за начинот на кој медиумите го претставуваат и особено ги критикуваше „Си-ен-ен“ и „Ен-би-си“, а особено ја фали „Фокс њуз“.


Изменет сообраќаен режим поради натпреварот помеѓу „Вардар“ и „Фенербахче“


Скопје, 17 август, 2017 - 15:59 (META) 

СВР-Скопје денеска воспостави посебен сообраќаен режим на движење на возила и на пешаци кон Градски стадион, поради вечерашниот натпревар помеѓу фудбалските клубови „Вардар“ и „Фенербахче“, кој ќе почне во 20 часот.

„Идентично на мерките од неодамна одржаниот Суперкуп на УЕФА, се пропуштаат само возила и лица кои имаат посебни акредитации за движење кон стадионот и кон објектите лоцирани во непосредната околина на Градски парк, како и оние лица кои што имаат билети за најавениот фудбалски натпревар“, се вели во соопштението на МВР.


Македонски виолинист ќе ја претставува Европа на натпревар во Јапонија


Виена, 18 мај, 2017 - 11:21 (META) 

Македонскиот виолинист Александар Иванов (16 години), на аудиција беше избран како единствен кандидат од цела Европа за да учествува на еден од најголемите светски натпревари за виолинисти во Осака, во октомври. Со овој избор и со неговиот настап во Јапонија тој ќе ја претставува Европа.

Иванов, иако е на средношколска возраст, сепак е најмладиот студент на Конзерваториумот „Рихард Вагнер“ во Виена, Австрија, во класата на професор Игор Петрушевски, кој предавал и на Кралската академија во Лондон.

На овој конзерваториум студираат исклучителни таленти од целиот свет.

„Успеав да се вклопам многу добро во австриската престолнина и на самиот конзераториум. Средина каде се цени врвната професионалност“, вели Иванов.

Инаку, Александар е најмладиот добитник на наградата „Виртуози“ во 2015 година, манифестација што ја организираат Македонската опера и балет, Македонската филхармонија и Сојузот на композитори на Македонија.


Емилија Стефанџиевска од Битола победи на државниот натпревар „Вешта жена“


Лешок, 14 мај, 2017 - 14:37 (META) 

Емилија Стефанџиевска од Битола го освои првото место на манифестацијата „Вешта жена“, вчеравечер. Манифестацијата на која се натпреваруваа жени од целата земја се одржа во ресторанот во манастирискиот комплекс во тетовското село Лешок.

Стефанџиеска на 25. издание на оваа манифестација – кулинарски натпревар, се претстави со разни домашни специјалитети, а нејзината маса беше насловена „Патот кон богатството“.

На финалната манифестација во Лешок учествуваа победничките од регионалните натпревари „Вешта жена“, што се одржуваа во 15 градови на Македонија.


Фудбалската репрезентација на Македонија вечерва домаќин на Италија


Скопје, 9 октомври, 2016 - 12:55 (META) 

Македонија е домаќин на репрезентацијата на Италија, а фудбалскиот натпревар ќе се одржи вечерва на Национална арена „Филип Втори“ во 20.45 часот.

Натпреварот е во рамките на квалификациите за Светско првенство во 2018 година.

Од Фудбалската федерација на Македонија (ФФМ) апелираат навивачите да дојдат навреме и нагласуваат дека вратите на арената ќе бидат отворени од 18.45 минути, а ќе бидат затворени 15 минути пред почетокот на натпреварот.


Награда од 10.000 долари за борба против климатските промени


Скопје, 24 јуни, 2016 - 16:39 (META) 

Девет тимови викендов во Скопје, на климатскиот камп, ќе се натпреваруваат за награда од 10.000 долари за борба против климатските промени и поттикнување на урбаната отпорност.

УНДП и УСАИД, во април годинава, објавија предизвик до сите граѓани да предложат иновативни идеи за справување со климатските промени. Предизвикот, кој беше организиран во партнерство со Амбасадата на Шведска, Министерството за животна средина и просторно планирање, Милиеуконтакт Македонија и Факултетот за информатички науки и компјутерско инженерство, има цел да ги искористи талентите на граѓаните како поддршка во остварување на глобалните цели за одржлив развој поврзани со климатски промени и одржливи градови.

– Борбата против климатските промени е една од седумнаесетте глобални цели усвоени од сите земји членки на Обединетите нации минатата година. Секоја земја и секој поединец има улога во оваа борба. Политиките и заложбите треба да се преточат во конкретни активности преку свежи идеи и ангажман од сите страни за нашите градови да станат побезбедни, позелени и почисти – изјави постојаниот претставник на УНДП, Луиза Винтон.

Директорот на мисијата на УСАИД во Македонија, Џејмс Стајн, соопшти дека се фокусирани на урбаната отпорност бидејќи порастот на популацијата и урбанизацијата вршат сериозен притисок врз нашите градови.

– Проценките укажуваат дека до 2050 година, 70 отсто од светската популација, или 6,3 милијарди луѓе ќе живеат во градовите, зголемувајќи ги побарувачката за енергија и загадувањето на воздухот. Во сржта на овој отворен собир е активното учество на секој од вас и на вашите заложби да ги преточите идеите во конкретни проекти што ќе донесат вистинска промена – рече Стајн.

Повеќе од 60 идеи беа испратени за натпреварот, од кои деветте најдобри се најдоа во потесниот избор за понатамошен развој, а тоа се: герила-постојки за велосипеди, мотори и автомобили што работат на компримиран воздух, употреба на зеолити во борбата со емисиите на штетни гасови, билборди за прочистување на воздухот, машина која рециклира пластика во супермаркети, паметен енергетски чадор, своевидниот часовник за подигнување на свеста за квалитетот на воздухот во нашите домови, интернет-страница и мобилна апликација која ќе служи за заштита на зеленилото во градот и „детектор на богатство“ за редуцирање цврст отпад.


Во Марсеј тепачка помеѓу навивачи на Русија и на Англија


Марсеј, 11 јуни, 2016 - 11:11 (META) 

Група руски и англиски навивачи се степаа во Марсеј, а снимката од тепачката во која летале шишиња и столови е објавена на интернет.

Тепачката се случила во пресрет на натпреварот на двете фудбалски репрезентации на Европското првенство во фудбал, кое вчера почна во Франција.

Полицијата против напаѓачите употребила солзавец. Во тепачката учествувале околу 200 луѓе, а двајца Англичани се уапсени.

Натпреварот помеѓу репрезентациите на Русија и на Англија се игра вечерва, со почеток во 21 часот, на стадионот „Велодром“ во Марсеј.


Реал Мадрид ја освои Лига на шампиони


Милано, 29 мај, 2016 - 10:29 (META) 

Фудбалскиот клуб Реал Мадрид го победи Атлетико Мадрид на пенали 5:3, откако и по продолженијата резултатот остана нерешен 1:1.

Со оваа победа, фудбалерите на Реал по 11 пат застанаа на европскиот трон и ја освоија Лига на шампиони.

Кристијано Роналдо со неговиот гол на пенали, го реши натпреварот на стадионот Сан Сиро во Милано.


Македонија загуби од Франција на почетокот на Европското првенство во ракомет


Варшава, 15 јануари, 2016 - 20:21 (META) 

Македонската ракометна репрезентација беше поразена од репрезентацијата на Франција (23-30) на Европското првенство во Полска.

Македонија е во групата А, каде што се и репрезентациите на Полска и на Србија.

Следен противник на нашата репрезентација е домаќинот Полска, а натпреварот треба да се игра на 17 јануари (недела), со почеток во 20.30 часот.