Нова демократија не прифаќа решение за името „на рати и со одложено дејство“


Софија, 16 мај, 2018 - 11:18 (META) 

Околу можноста за решение на проблемот со името и можноста а постигнување на договор Ципрас – Заев, извори од опозиционата Нова демократија (НД) за грчка „Иефимерида“ велат дека нема да прифатат никакво решение „на рати“,  бидејќи сметаат дека со тоа не би се исполнил условот договорот да биде траен.

Лидерот на Нова демократија, Киријакос Мицотакис, денеска е во Софија на Конгрес на европските десничарски партии (ЕПП) и изјави дека нема да прифати никаков притисок од страна на ЕУ или на НАТО во врска со името на северниот сосед.

Според партијата, Грција не треба да прифати решение со „одложено дејство“ и дека само „конечно име и промена на Уставот“ би биле гаранција за поддршка за ЕУ и НАТО.

– Потребна е промена која нема само да претпостави, туку и ќе гарантира и ќе се примени во практика пред било каков конечен договор – вели одговорниот за надворешна политика во НД, Јоргос Кумуцакос.


Грчката влада демантира: Само сложено име за сите употреби ги отвора вратите на ЕУ и НАТО


Атина, 14 мај, 2018 - 15:46 (META) 

Промената на уставното име на Македонија е услов за поддршката на Грција за интеграцијата на соседот во ЕУ и НАТО, нагласуваат владини извори, кои ги пренесува грчката државна телевизија ЕРТ, како реакција на информациите кои ги пласираше десничарскиот весник „Естиа“.

Според грчката влада, тврдењата на весникот дека “НАТО како ПЈРМ и со цврст меѓународен договор“ не ја отсликуваат реалноста.

Поточно, истите извори, истакнуваат дека “актуелната влада преговара со власта во ПЈРМ само за зачувување на националните интереси и за тоа постави два јасни услова за нивна заштита – сложено име и име за сите употреби”.

Се нагласува дека „промената на уставното име на нашиот сосед е предуслов за нашата поддршка за интеграцијата во ЕУ и во НАТО, па поред тоа, она што го наведува „Естиа“ не е точно, нагласуваат извори од владата во Атина.


Матис до Шекеринска: Не сакаме да ве видиме запрени пред вратите на НАТО


Вашингтон, 1 мај, 2018 - 18:58 (META) 

Македонија и САД имаат цврсто стратешко партнерство. САД ги ценат чекорите кои Македонија ги презема кон НАТО и не сакаат да ја видат Македонија запрена пред вратите на Алијансата, е порака од официјалната средба на министерката за одбрана на Република Македонија, Радмила Шекеринска, со американскиот секретар за одбрана, Џејмс Матис, во Пентагон.

Матис на почетокот од средбата потсетил на зборовите на министерката Шекеринска на состанокот на министрите за одбрана на НАТО, околу предизвиците со кои се соочува Западот.

-Бевте убедлива и вашите зборови доминираа во дискусијата, силно потсетувајќи нè на нашата одговорност да ги одбраниме демократските вредности – рече Матис.

Тој додал дека САД ги ценат обврските кои Македонија ги презема како партнер на НАТО – испраќањето на војници во мисијата „Одлучна поддршка“ во Авганистан, придонесот кон коалицијата за пораз на ИСИС, како и решителната одлука да се издвојуваат 2% од БДП за одбраната.

-Ние ги цениме вашите напори. Тие ја афирмираат одлукатa на НАТО во Букурешт во 2008, Македонија да добие покана за членство ‘веднаш штом ќе се постигне заеднички прифатливо решение на прашањето за името’ со Грција. Ја поздравуваме вашата работа со Грција на разрешувањето на ова прашање и се надевам дека наскоро ќе има резултати. Не сакаме да ве видиме запрени пред вратите на НАТО. Денешната безбедносна состојба бара дух на пријателство меѓу сите оние кои се залагаат за слобода, основни човекови права и владеење на правото – рече Матис.

Шекеринска се заблагодарила за цврстата поддршка што Македонија ја добива од САД и потсетила на силниот консензус во државата од нејзиното осамостојување, за членство во НАТО.

-Дозволете ми да ве уверам дека Македонија е подготвена за членство во НАТО. Ние брзо се опоравивме од долгата политичка криза и по еден силен реформски залет, на нас се гледа како на извор на надеж на Балканот. Започнавме важни одбранбени реформи и го зголемивме нашиот придонес во мисијата предводена од НАТО во Авганистан. Докажавме дека сме посветен и сигурен партнер. Наша цел е да бидеме и таков сојузник. Затоа, дозволете ми да ја побарам вашата поддршка како стратешки партнер на нашето членство во НАТО. Поканата за Македонија во јули годинава ќе нè поддржи во нашата стратешка цел, ќе му помогне на регионот во градењето на долготрајна стабилност и ќе ги зголеми влијанието и подготвеноста на САД и НАТО – рече Шекеринска.


Шекеринска од Вермонт: Македонија го заслужува членството во НАТО


Вашингтон, 1 мај, 2018 - 13:15 (META) 

Вицепремиерката и министерка за одбрана Радмила Шекеринска за време на нејзината официјална посета на САД изјави дека Македонија го заслужува членството во НАТО.

Таа на прес-конференција во американската сојузна држава Вермонт порача дека Македонија покажала дека е посветен партнер на кој членките на Алијансата можат да сметаат.

-Мојата цел е да ја побарам поддршката од стратешкиот партнер на Македонија, САД, во пресрет на Самитот на НАТО. Македонија го заслужи местото во НАТО, работевме напорно. Покажавме дека Македонија е посветен партнер на кој членките на Алијансата можат да сметаат. Веруваме дека поканата за Македонија за членство во НАТО ќе придонесе за нашата стабилност, но и за стабилноста во регионот, и ќе биде во интерес на САД- рече Шекеринска.

Таа во Вермонт се сретна со гувернерот Фил Скот и со командантот на Националната гарда, генерал мајор Стивен Креј.

Министерката за одбрана денеска во Вашингтон треба да се сретне со американскиот секретар за одбрана Џејмс Матис.


Мета: Албанците и Македонците заедно да најдат решение со Грција


Струга, 28 април, 2018 - 18:03 (META) 

Албанците и Македонците заеднички да го решат прашањето за името со Грција, побара албанскиот претседател Илир Мета по денешната посета на Струга и средбата со градоначалникот Рамиз Мерко, јави Алсат-М.

Мета потенцира дека е оптимист дека ќе се дојде до решение пред самитот на НАТО во јули во Брисел.

-Името е прашање за кое Македонците и Албанците заедно треба да се согласат. Се надевам дека ќе има решение за сите и што ќе ги почитува и Македонците и Албанците и другите – посочи претседателот на Албанија.

Во однос на Законот за јазици кој претседателот на Македонија, Иванов, одбива да го потпише, Мета се надева дека ќе се надмине и тоа прашање.

-Ова прашање требаше да се реши од порано. Во секој случај мислам дека ова е многу добар закон што ќе се имплементира за многу брз период бидејќи волјата на оваа гарнитура е голема и решителна е да го имплементира за да се оди напред за подобар соживот – истакна Мета.

Албанскиот претседател вчера учествуваше во самитот на Процесот Брдо – Крањ, што во Скопје го организираше неговиот македонски колега Ѓорге Иванов.


Шекеринска во Стејт Департментот: Македонија е подготвена за членство во НАТО


Вашингтон, 28 април, 2018 - 12:21 (META) 

Министерката за одбрана Радмила Шекеринска на вториот ден од официјалната посета на САД се сретна со заменик – помошникот на секретарот за одбрана Лора Купер и со високи официјални лица во Стејт Департментот.

Како што соопшти Министерството за одбрана, на средбата со првиот заменик – помошник секретар во Бирото за европски и евроазиски работи на Стејт Департментот, Елизабет Милард, министерката Шекеринска ги образложила аргументите поради кои Македонија го заслужува членството во НАТО – зголемувањето на буџетот и платите за Армијата, одбранбените реформи, зголемувањето на бројот на војници во мисијата во Авганистан, но и на поширок план – враќањето на критичките и слободни медиуми, владеењето на правото, активната транспарентност на која се обврза Владата како една од алатките против корупцијата.

Високата претставничка на Стејт Департментот Милард, се посочува, оддаде признание за напредокот, кој го постигна земјата само една година по кризните настани во Собранието, и потенцираше дека САД се силен пријател на Македонија кој одблизу го следи и поддржува прогресот на земјата.

Во Стејт Департментот министерката Шекеринска се сретна и со заменик – помошник секретарот Метју Палмер, кој истакна дека работите во Македонија се одвиваат многу бргу, а земјата е подготвена не само да биде членка на НАТО, туку членка која активно придонесува во Алијансата.


Столтенберг: НАТО е подготвенa да ја покани Македонија веднаш штом се реши името


Брисел, 27 април, 2018 - 16:00 (META) 

Генералниот секретар на НАТО, Јенс Столтенберг, изјави дека Алијансата е подготвена да ја покани Македонија за членство веднаш штом ќе се реши прашањето за името. Столтенберг на денешната прес-конференција во Брисел рече дека и покрај тоа што Русија се спротивставува на ширењето на западниот воен сојуз, вратите на НАТО остануваат отворени.

– Јас го посетив Скопје и јасно реков дека НАТО останува посветен на она што беше зацртано на Самитот во 2008 година во Букурешт – ние сме подготвени да ја поканиме земјата да стане членка на НАТО веднаш штом се реши прашањето за името. Таа одлука сè уште стои. Преговорите за името се во тек и се надевам дека тие ќе бидат успешно завршени, а потоа ќе продолжиме понатаму – рече Столтенберг.

Запрашан за можните пречки од Русија во процесот на пристапување на Македонија кон НАТО, Столтенберг рече дека основно право на секој народ е да одлучи на кој безбедносен блок ќе му се приклучи.

– Русија се противи на проширувањето на НАТО со години. Речиси секогаш протестира кога ќе добиеме нови членки, но факт е дека вратата на НАТО е отворена. Дали НАТО ќе добие нов член, зависи од интересот на земјите. Никој нема право да интервенира во тоа или да го спречи тој процес – заклучи Столтенберг.


Столтенберг: Русија не одлучува за членството на Македонија во НАТО


Брисел, 26 април, 2018 - 13:16 (META) 

Генералниот секретар на НАТО Јенс Столтенберг, денеска порача дека само Македонија и 29-те земји членки на Алијансата можат да одлучуваат за членството на земјата во Алијансата, пренесува МИА.

На прес-конференција ден пред состанокот на министрите за надворешни работи на НАТО членките во Брисел, генералниот секретар Столтенберг, прашан да ги коментира изјавите на рускиот амбасадор во Македонија дека земјата ќе стане „легитимна цел“ во случај на конфликт доколку стане членка на НАТО, рече дека станува збор за покажување сила.

– Целата идеја дека Русија нема да прифати одредени земји да станат членки на НАТО е идеја на сфери на влијаниа каде големите сили ги контролираат помалите држави и тоа е во контрадикција со се за што НАТО се залага. Прво мислам дека е важно правото на секоја нација да одлучи за сопствениот пат и безбедносни договори, ова е фунадаментален принцип за НАТО. На Скопје е да одлучи за сопствениот пат и дали сака да се приклучи кон НАТО. Македонија и 29-те сојузници на НАТО одлучуваат за тоа и никој друг нема збор во овој процес – одговори Столтенберг.

Како што јави дописничката на МИА во Брисел, Столтенберг рече дека го поздравува напредокот во преговорите за спорот за името и оти е информиран за тоа.


Робертсон, Солана, Ле Роа, Ишингер и Гелбард како „Група Охрид“ ќе помагаат за ЕУ и НАТО


Скопје, 24 април, 2018 - 17:02 (META) 

Премиерот Зоран Заев денеска на заедничка прес-конференција со поранешниот генерален секретар на НАТО, лордот Џорџ Робертсон, ја промовираше „Групата Охрид“ за поддршка на Македонија на нејзиниот пат кон членство во НАТО и ЕУ

– Во оваа група има членови кои ставија печат со нивната дипломатска кариера и дадоа поддршка за нашите напори за изградба на демократска, стабилна и просперитетна држава. Тие се тука да го поддржат нашето членство во ЕУ и НАТО – рече Заев.

Во групата, освен Џорџ Робертсон, се вклучени и поранешниот висок претставник на ЕУ за надворешна политика и безбедност, Хавиер Солана, поранешниот шведски премиер и министер за надворешни работи Карл Билд и истакнатите дипломати како Кристофер Гајд, Роберт Гелбард, Ален Ле Роа, Волфганг Ишингер, Дајмонд Вилсон и Зоран Чичак.

Робертсон посочувајќи дека поминале 17 години, откако последен пат се обратил на прес-конференција во Македонија, истакна дека името „Група Охрид“ е избрано, бидејќи тој град има големо значење за земјата, со оглед на тоа дека таму е потпишан Охридскиот договор, но исто така тоа е и град заштитен од УНЕСКО.

Тој потсети дека 11 пати заедно со Солана ја посетиле земјава и биле сведоци на потпишувањето на Охридскиот договор.

– Земјата, која беше на работ на граѓанска војна, стана земја која тропна на европските врати и ја разбра потребата за подобра иднина – рече Робертсон и додаде дека оваа група нема да се меша во внатрешната работа на земјата, ќе ги советува Владата и министрите, но ќе биде достапна и за опозицијата и претседателот на државата.

Робертсон, исто така кажа дека решението за спорот за името со Грција ќе го остави на двете држави и дека нема да се меша во одлуката.


Шчербак: За националните интереси погубно е кога солидарноста се става над здравиот разум


Скопје, 24 април, 2018 - 15:51 (META) 

Рускиот амбасадор во Македонија, Олег Шчербак денеска изјави дека секоја држава има сопствен избор за градење на националната безбедност, без разлика дали тоа е со членство во НАТО или воена неутралност.  Според него, секоја земја треба самостојно со референдум и почитување на волјата на мнозинството да одлучи за членство во сојузи.

– Постојат успешни воено неутрални држави во Европа и таквиот пристап на решавање на националната безбедност е рационален – изјави Шчербак на Факултетот за безбедност, каде денеска одржа предавање „Системите на колективна безбедност: историски и актуелни погледи од призма на Руската федерација”.

Рускиот амбасадор наведе дека ефикасната безбедност во 21. век може да биде изградена само врз основа на колективна безбедност и со заеднички напори на сите и мали и големи земји.

– Воено-неутралниот статус на Македонија може да ѝ даде многу и во таков случај таа ќе биде отворена за сите и ќе може да ги оствари економските и социјални интереси на граѓаните, без да биде под товарот на европската солидарност. Добро знаете дека кога солидарноста се става над здравиот разум, тоа е погубно за националните интереси – изјави Шчербак.

Амбасадорот вели дека НАТО претставува воено-политички блок создаден од САД со една цел да се спротивстави на Варшавскиот пакт, но иако тој веќе 30 години не постои, НАТО сè уште се шири кон исток. Според Шчербак,  постои пропаганда со која Русија се претставува како агресор и дека земјите од Балканот се принудуваат да направат вештачки избор меѓу Истокот и Западот.