!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шекеринска: Спремни сме за рационален компромис, ако не ни се загрозува идентитетoт


Лондон, 16 декември, 2017 - 16:03 (META) 

Напорите за промовирање на либералната политика на Балканот ќе бидат запрени доколку на Македонија не и биде понудена цврста можност за членство во НАТО и ЕУ следната година, предупредуваат лидерите на новоформираната влада во земјата“– пишува „Гардијан“ во текстот под наслов „Македонија вели дека треба да се приклучи кон ЕУ за да го спречи авторитаризмот“.

Текстот пренесува цитати од интервјуто со вицепремиерката и министерка за одбрана, Радмила Шекеринска, која одговара на прашањата за евроатлантските перспективи на Македонија и спорот со Грција околу името.

– Следната година е клучна. Треба да покажеме дека има развој – луѓето не очекуваат се да биде решено утре, но очекуваат напредок бидејќи бевме заглавени 10 години. Она што ќе се случи ќе создаде или инспирација, или фрустрација низ целиот Балкан – вели Шекеринска.

Министерката вели дека владата сака да најде решение на 26 години долгиот спор со Грција за името.

– Повеќето од луѓето ќе прифатат пристоен и рационален компромис, се додека се уверени дека решението ги отвора перспективите за иднината и не го загрозува нашиот идентитет, гордост или етничките карактеристики. За да има одржливо решение, ние мора да потврдиме пред нашите граѓани дека нашите цели за членство во ЕУ и НАТО се реалистични – вели министерката Шекеринска во интервјуто за „Гардијан“.

Шекеринска исто така истакнува дека Македонија сака решение кое нема да им наштети на грчките интереси, но нема ни да го загрози македонскиот идентитет.

– Но, за танго се потребни двајца, се надеваме дека грчката страна ќе биде еднакво посветена – вели Шекеринска.


Оптимисти сме за името, но не сме сигурни во целосната искреност на Грција во спорот


Скопје, 14 декември, 2017 - 15:54 (META) 

Македонските власти не се целосно сигурни колку Грција е искрено целосно отворена за решавањето на спорот за името, велат дипломатски извори, кои побараа да останат анонимни. Според нив, засега врз ниту една од страните не се врши притисок од надвор, но не се исклучува можноста доколку преговорите напреднат да се зголеми притисокот врз двете страни, па дури и да се вклучат и други посредници.

Според истите извори, во досегашните грчко-македонски средби, вклучувајќи ја и последната средба на преговарачите на Македонија и на Грција со медијаторот Метју Нимиц не се разговарало за можни предлози за името, но веројатно тоа ќе биде направено на некоја од средбите во јануари, февруари и март.

Решавањето на спорот е можен само доколку и двете страни направат отстапки од досегашните позиции. Македонските власти се претпазливо внимателни во преговорите, велат изворите, кои не ја исклучуваат можноста Владата да направи промена на името на аеродромот „Александар Велики“, но веројатно ќе бара и Грција да покаже на дело дека е подготвенa за решавање на спорот.

Дипломатските извори сепак наведуваат дека со актуелната политичка состојба, дури и преговарачот Нимиц да даде прифатлив предлог, мала е веројатноста дека Владата ќе успее да постигне национален консензус, особено ако не се смени сегашниот наратив дека новата Влада е поставена за да ги продаде националните интереси. Изворот наведува дека и во Грција потребно е да се смени наративот, имајќи предвид дека грчката јавност има големо влијание и оти можни се нови избори во зависност од справувањето со економската криза.

Во однос на евроинтеграциите, Македонија, како што и претходно беше соопштено, ќе се најде во Стратегијата за европските перспективи на Западен Балкан, а не се исклучува и можноста препораката за почеток на преговорите со ЕУ да биде дадена и пред април, кога Европската комисија го има редовниот извештај за прогресот за земјите-кандидатки. Сепак, проблем претставува бојкотот на опозицијата, која соопшти дека нема да учествува во работата на носењето на реформските закони.

Дел од земјите-членки на НАТО целосно го поддржуваат приемот на Македонија во Северноатлантската алијанса и веруваат дека најавените реформи ќе се спроведат, но дел се резервирани и сакаат да видат дали „реформскиот бран“ ќе потрае.


Шекеринска – Данкан: Продолжува поддршката од Велика Британија за eвроинтеграцијата


Лондон, 13 декември, 2017 - 19:00 (META) 

Министерката за одбрана, Радмила Шекеринска денеска се сретна со британскиот министер за Европа и Америка, Алан Данкан, во Министерството за надворешни работи и Комонвелт.

„Работиме на суштински внатрешни реформи како и на подобрување на односите со соседите. Тоа се сложени процеси, кои бараат политичка волја, време, но и постојана поддршка од нашите сојузници“, изјавила Шекеринска.

Данкан истакнал дека, Велика Британија продолжува да ја поддржува Македонија во нејзината интеграција во НАТО и Европската Унија, истакнувајќи дека, Самитот за Западен Балкан што ќе се одржи во 2018 во Обединетото Кралство, претставува одлична можност да се покаже напредокот на Македонија во повеќе области.


Томан до Груби: Вратите на ЕУ се отворени, останува да ги испорачате реформите


Скопје, 12 декември, 2017 - 9:54 (META) 

Треба да се искористи моментумот на поддршка од страна на институциите на Европската Унија во однос на интеграцијата на земјите од Западен Балкан, вратата е отворена, останува на земјите-аспиранти да ги испорачаат бараните реформи, истакнал амбасадорот на Чешката Република во земјава, Мирослав Томан на средбата со претседателот на собраниската Комисија за европски прашања, Артан Груби.

На средбата, како што информираат од кабинетот на Груби, било разговарано за актуелните случувања во Македонија, за реализацијата на реформскиот план на Владата и имплементацијата на нормативниот дел од Охридскиот рамковен договор.

Груби на средбата го истакнал „значењето и напорите кои се прават во однос на решавањето на споровите со соседите“ и го посочил постигнувањето на Договорот со Бугарија за добрососедство, при што истакна дека „коалицијата со истата смелост ќе пристапи и по однос на прашањето за името со Грција“.

„Што се однесува до реформите, Груби изјави дека се залага за годинава да се реши прашањето за новиот обвинител, Законот за верификации на факти и Законот за судскиот совет, Законот за заштитени сведоци со надеж дека и опозицијата ќе продолжи да делува во Собранието, дека ќе ги поддржи и ќе стане дел од реформските решенија со што ќе се испорачаат видливи резултати до Брисел, со цел добивање на чиста препорака и датум за почеток на преговорите со Европската Унија“, стои во соопштението за средбата.

Амбасадорот Томан ја истакнал чешката поддршка за Република Македонија на патот кон НАТО и ЕУ. Тој информирал дека Чешката Република е силен поддржувач на процесот на проширувањето на ЕУ со земјите од Западен Балкан и дека ќе дава силен импулс и кон останатите земји-членки на Унијата во континуитет да работат на процесот на обединета Европа.


Ахмети на средба со Палмер: Членството во НАТО е апсолутен приоритет


Скопје, 11 декември, 2017 - 18:51 (META) 

Лидерот на ДУИ, Али Ахмети денеска во амбасадата на САД во Скопје се сретнал со директорот на Канцеларијата за Јужна и Централна Европа на Стејт департментот, Метју Палмер, како и со американскиот амбасадор, Џес Бејли, соопштија од ДУИ.

Ахмети и Палмер разговарале околу политичките случувања во земјата и во регионот, системските реформи, владеењето на правото, односите со соседите како и интеграцијата во НАТО и во Европската Унија.

Ахмети ги запознал Палмер и Бејли за фокусот на ДУИ во системските реформи, владеењето на правото, заокружувањето на Охридскиот Договор, како и непосредна интеграција во НАТО и започнувањето на преговорите за членство во Европската Унија.

Ахмети повторил дека членството во НАТО е апсолутен приоритет и ДУИ прави сé за постигнување на оваа цел на земјата.

-Членството во НАТО ги заокружува сите стратешки дилеми на Македонија, влијае во меѓуетничките односи, но и на стабилноста во регионот, затоа работиме напорно во овој правец – истакнал Ахмети на средбата.

Соговорниците разговарале и околу јазичната еднаквост и ситуацијата во регионот.


Рот на Димитров му ја потврдил германската поддршка за македонските евроинтеграции


Берлин, 11 декември, 2017 - 16:32 (META) 

Министерот за надворешни работи, Никола Димитров денеска во Берлин се сретнал со Михаел Рот, државен министер надлежен за Европа во Министерството за надворешни работи на Сојузна Република Германија.

Во соопштението од МНР се вели дека Димитров го информирал Рот за тековните активности и за предвидената динамика за имплементација на реформите во насока на исполнување на неопходните критериуми за почеток на преговорите за членство на земјата во Европската Унија и влез во НАТО.

Министерот Рот изразил задоволство од досегашниот напредок на реформскиот процес и политиките на Владата во функција на заживувањето на македонските евроинтеграции.

– Сакаме Македонија да биде успешна приказна и во 2018-та година – изјавил Рот кој ја потврдил германската поддршка во исполнувањето на европските приоритети и заложбите за интегрирање во ЕУ и НАТО.


Груби дводневната посета на Брисел ја почнал со средби во НАТО


Брисел, 5 декември, 2017 - 14:31 (META) 

Претседателот на Комисијата за европски прашање на Собранието на Република Македонија, Артан Груби, ја започна дводневната посета во Брисел со средба со Кнут Кирстен, одговорен за политичкото одделение на НАТО за Македонија, како и со политичките претставници во НАТО на САД, Велика Британија, Унгарија, Романија, Словенија, соопштија од Комисијата за европски прашања.

На средбите Груби ја истакнал неопходноста за итно членство на Македонија во НАТО и подготвеноста на властите во Скопје за сериозно и итно решавање на реформите, прашањата со соседите, Грција и Бугарија.

Покрај добрососедството, Груби говорел и за посветеноста на Скопје кон спроведување на реформите за да се гарантира владеење на законот и правото во Македонија, јазичната еднаквост и останатите теми од интерес за соговорниците.

Пратеникот Груби исто така денес учествувал на тркалезната маса со тема: „Западниот Балкан на крстопат: Нови предизвици, променета динамика„ која се одржува во Брисел, на покана на „Пријателите на Европа“ и на Европскиот самит за европска политика.


Владата денеска ќе расправа за програмата за членство во НАТО


Скопје, 5 декември, 2017 - 11:31 (META) 

На денешната седница, Владата ќе расправа за неколку важни прашања, меѓу кои предничат информацијата за реконструкцијата на пругата Куманово – Бељаковце од железничкиот коридор 8, како и за проекти на ЕЛЕМ кои не се во рамките на основната дејност на државниот производител на струја.

Од стратешките теми, на маса е и предлог-текстот на годишната Национална програма на Република Македонија за членство во НАТО за 2017-2018 година.

На предлог на Управата за хидрометереолошки работи, ќе се разговара за потребата за санација на метеоролошките станици во Демир Капија, Штип и во Крива Паланка и за поправка на радарскиот систем „Ѓуриште“.

На дневниот ред е и предлог-законот за ратификација на Конвенцијата за спречување и борба против насилството врз жените и домашното насилство на Советот на Европа.

Министрите денеска ќе ја разгледаат и одлуката за утврдување на цената на годишната претплата на „Службен весник на Република Македонија“ и за годишната претплата на Регистарот на прописи на Република Македонија за 2018 година.

Ќе се разговара и за превентивни прегледи на социјално ранливи категории на граѓани, како и за предлог-законот за изменување и за дополнување на Законот за заштита на културното наследство.


Албанија и Бугарија ќе се залагаат Македонија поскоро да влезе во НАТО


Охрид, 1 декември, 2017 - 19:27 (META) 

Албанскиот заменик-министер за одбрана, Петро Кочи, порача дека Албанија и Бугарија ќе бидат силни поборници Македонија што е можно поскоро да стане членка на НАТО и дека тоа не е важно само за народот на земјата, туку и за регионот во целина. Кочи беше на трилатерална средба во Охрид со македонската министерка за одбрана, Радмила Шекеринска, и со министерот за одбрана на Бугарија, Красимир Каракачанов.

– Денеска ја изразивме нашата политичка волја да ја зајакнеме соработката во поглед на одбраната на ова трилатерално ниво и нашите тимови веднаш ќе почнат да подготвуваат планови за 2018 година. Кога се разговара, се наоѓаат и решенија и убедени сме дека и оваа трилатерала ќе ги помогне иницијативите што ги прават нашите влади – рече министерката Шекеринска по средбата.

Бугарскиот министер за одбрана, Каракачанов, рече дека потесната соработка меѓу Бугарија, Македонија и Албанија не ја опфаќа само економската соработка во однос на коридорот 8, туку може да се прошири и во областа на одбраната.

– Соработката во областа на безбедноста и на одбраната меѓу Бугарија и Албанија, кои се членки на НАТО, и Македонија, која сè уште не е, би докажала пред другите земји членки на НАТО дека Македонија е подготвена за членство во Алијансата и дека тоа треба да се оствари без одложување односно Македонија да стане 30. земја членка. Оваа соработка е и од економски интерес, а исто така би придонела и за поголема сигурност и безбедност на Балканот – рече Каракачанов.


Димитров – Тилерсон: Огромна е нашата посветеност да станеме дел од НАТО


Вашингтон, 30 ноември, 2017 - 10:03 (META) 

Шефот на македонската дипломатија, Никола Димитров, вчера во Стејт департментот се сретнал со државниот секретар на САД, Рекс Тилерсон, со кој разговарал за актуелните политички состојби во Република Македонија и во регионот и го запознал со актуелностите во процесот на надминување на разликите околу спорот за името со Грција, информираат од кабинетот на министерот.

– Македонија е пријател и партнер на САД. Убедени сме дека со вашата помош и лидерство и со поддршката на европските сојузници, набргу ќе станеме дел од семејството на НАТО. Нашата посветеност и решителност се огромни, а целта е да ја искористиле можноста што ни се укажува – изјавил Димитров.

Информирајќи за реформите во Македонија, Димитров нагласил дека Владата сака да изгради силни и демократски институции и да го зацврсти владеењето на правото, за да Македонија да стане полноправна членка на евро-атлантската заедница.

Димитров ја реафирмирал цврстата определба на Владата на Република Македонија постепено да го зголемува буџетот во сферата на одбраната во согласност со барањата на Алијансата, за зачувување на меѓународната безбедност и за борбата против тероризмот.

Во контекст на односите со соседите и на состојбите во регионот, Димитров истакнал дека „нерешавањето на проблемите повлекува политичка одговорност“.

„Државниот секретар на САД, Рекс Тилерсон, истакна дека Македонија е на добар пат да биде успех и пример за регионот. Тој нагласи дека САД ќе продолжат да имаат позитивна улога за стабилноста и за напредокот на регионот и да бараат начини да помогнат. Тилерсон даде поддршка на реформската агенда, повикувајќи ја Владата да истрае во нејзиното спроведување“, соопштија од МНР.