Села бара оштета од половина милион евра


Скопје, 8 февруари, 2018 - 11:18 (META) 

Адвокатот на Зијадин Села, Абедин Абдули на денешното судење за обидот за убиство на лидерот на Алијансата за Албанците, истакна дека Села бара отштета од 30 милиони денари или половина милион евра.

Села, како што рече адвокатот, бара 30 милиони денари отштета поради материјалните трошоци за неговото лекување, поради претрпена физичка и душевна болка, претрпениот страв и повреда на личниот интегритет.

Поради промена на двајца поротници, главната расправа почна од почеток. Обвинителот Дарко Јакимовски и адвокатите на десетмината обвинети пред судечкиот совет со кој претседава судијката Славица Андревска рекоа дека остануваат на воведните зборови дадени на претходното рочиште.

Во случајот обвинети се Кире и Цане Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра.

Денешното рочиште продолжува со распит на сведоци. Прв сведок е Орданче Соколовски. Села, кој треба да сведочи трет, се уште не е пристигнат во судницата иако адвокатот Абдули рече дека се очекува неговото присуство.


Обвинителството смета дека Села не бил убиен затоа што напаѓачите мислеле дека е мртов


Скопје, 26 јануари, 2018 - 13:49 (META) 

Дарко Јакимовски, јавниот обвинител кој го води случајот за обидот за убиство на пратеникот Зијадин Села при упадот во Собранието на 27 април минатата година, рече дека единствената причина поради која Села не е убиен е тоа што сите мислеле дека е мртов.

– Доказите ќе покажат дека во моментите кога нападот и тепањето го достигнале екстремот, единствена околност за спас на оштетениот Зијадин Села не е колебањето на тепачите, туку фактот дека не давал знаци на живот и сите мислеле дека е мртов. Сите повреди на оштетениот му се нанесени на главата и најмалку две се животно загрозувачки – рече Јакимовски и додаде дека како докази за кривичното дело има фотографии, видео снимки и искази на сведоци.

Во овој случај обвинети се Кире и Цане Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра.

Адвокатите на обвинетите, пак, во името на обвинетите се изјаснија дека тие не се виновни. Според дел од адвокатите, тие не нанеле повреди кои се животно загрозувачки, а за дел од обвинетите, како Коста Делов, рекоа дека воопшто не учествувале во нападот на Села, туку само „сакал да се пофали на „Фејсбук“ дека на 27 април бил во Собранието“ и дека врз основа на тоа е покрената истрага.

Адвокатот на обвинетиот, Александар Јаневски, кажа дека неговиот клиент бил тој кој го заштитувал и му помагал на Села.

Лидерот на Алијансата на Албанците Зијадин Села не дојде на судењето, а неговиот адвокат најави дека ќе бара отштета за материјална и нематеријална штета.

Претседателот на Собранието Талат Џафери утрово го известил судот дека поради работни обврски е спречен да дојде во својство на сведок на судењето.

Судијката Славица Андреевска рече дека наредното рочиште е закажано за 8 февруари кога како сведоци се повикани Села, вештаци од Институтот за судска медицина и двајца сведоци кои биле присутни во Собранието на 27 април.


ЗНМ и ОЈО се договориле пак да се разгледаат пријавите за говор на омраза против новинари


Скопје, 23 јануари, 2018 - 16:36 (META) 

Претставници на Здружението на новинарите на Македонија денеска имаа средба со Републичкиот јавен обвинител Љубомир Јовески, на која се разговарало за подобрување на меѓусебната соработка за прашања од заеднички интерес.

Од Обвинителството информираат дека претседателот на ЗНМ Насер Селмани изразил загриженост дека во Македонија постои политика на неказнивост на насилството на новинари. Селмани побарал од Јовески обвинителството побрзо да ги процесира овие предмети со цел насилниците да се изведат пред лицето на правдата.

Тој се пожалил дека во изминатиот период, Обвинителството ги има одбиено пријавите за говор на омраза против новинари, без сериозна аргументација. Селмани побарал Обвинителството повторно да ги разгледаат овие пријави и да види дали обвинителите постапиле одговорно.

„Беше договорено да се организираат заеднички обуки за новинари и обвинители со цел да се подобри известувањето на новинарите и постапувањето на обвинителите за случаи поврзани со слобода на говорот. Јавниот обвинител Јовески вети дека ќе даде динамика на предметите за насилство против новинари и ќе ги разгледа одбиените пријави за говор на омраза против новинари. Според него соработката на обвинителството и Здружението на новинари на Македонија е од взаемен интерес“, стои во соопштението од ОЈО.

Вчера ЗНМ го презенитраше Извештајот за слободата на медиумите и безбедноста на новинарите во Македонија за 2017 година во кој се вели дека минатата година во Македонија вкупно се регистрирани 18 напади на новинари, од кои 13 физички и вербални напади, додека другите се навреди, попречување во работа и уништување на имотот.

Според вчерашното соопштение на ЗНМ загрижува што и по промената на власта обвинителство не покажува поголем интерес за процесуирање на овие напади.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


ЗНМ: Лани биле нападнати 18 новинари, никој не е повикан на одговорност


Скопје, 22 јануари, 2018 - 14:17 (META) 

Минатата година во Македонија вкупно се регистрирани 18 напади на новинари, од кои 13 физички и вербални напади, додека останатите се навреди, попречување во работа и уништување на имотот, се вели во Извештајот за слободата на медиумите и безбедноста на новинарите во Македонија за 2017 година кој денеска го презентираше Здружението на новинари.

– Минатата година во Македонија новинарите беа уценувани, прогонувани, тепани, добиваа смртни закани, се прогласуваа за предавници. Насилниците физички и вербално ги напаѓаат новинарите затоа што сакаат да ги заплашат и замолкнат со цел јавноста да не дознае за злоупотребите на власта – рече претседателот на ЗНМ, Насер Селмани.

Тој изрази загриженост што Обвинителството досега не покренало ниту едно обвинение пред судовите за насилство против новинарите и говор на омраза.

Селмани посочува дека најбрутален физички напад врз новинарите беше извршен за време на насилствата во Собранието на 27 април.

– Овие насилници физички ги нападнаа новинарите и снимателите и ги спречија да известуваат од Собранието. Притоа им ги одземаа и им ги оштетија камерите и мобилните телефони. Освен тоа, некои од нив, под закана и со оружје, беа со часови држени како заложници, а притоа полицијата не им пружи никаква заштита – вели Селмани.

Како извор на насилствата во 2017, Селмани посочува дека во 95 отсто од нападите се извршени или мотивирани од претходната власт предводена од ВМРО-ДПМНЕ. Според него загрижува што и по промената на власта обвинителство не покажува поголем интерес за процесуирање на овие напади.

Во периодичниот извештај на експертот Прибе од септември 2017 година на оваа тема се вели дека „Иако има извештаи за малтретирања, закани и насилства врз новинарите, се тврди дека надлежните не истражуваат, обвинуваат или ги казнуваат извршителите со што се остава впечаток на неказнивост. Заштитата на новинарите од неказнивоста на извршителите треба да биде приоритет, бидејќи нападите против новинарите кои се ја вршат работата се во суштина напад врз основните вредности на демократската држава“.

Во извештајот на ЗНМ се констатира дека покрај недостигот на безбедност во работата, новинарите во Македонија работат под исклучително лоши економски услови. Тие имаат мали и нередовни плати, а немаат ниту договори за трајно вработување кое негативно влијае на нивната професионална независност.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Истепани кошаркари и полицајци на натпревар во Чаир


Скопје, 14 јануари, 2018 - 12:19 (META) 

Навивачи на кошаркарскиот клуб „Шкупи“, вчеравечер во салата „Шабан Трстена“ во скопската населба Чаир повредиле двајца полицајци, еден кошаркар и технички раководител на клуб, а удирале и други играчи.

Според СВР Скопје, инцидентот почнал во 19.20 часот, по завршување на натпреварот помеѓу кошаркарскиот клуб „Шкупи“ и кошаркарскиот клуб „Пелистер“. Од трибината каде што била навивачката група на „Шкупи“ била фрлена една петарда на клупата каде што седеле кошаркарите на „Пелистер“. Тие потоа возвратиле со фрлање пластично шише полно со вода кон навивачите.

Потоа навивачите на кошаркарскиот клуб „Шкупи“ ја прескокнале оградата од трибината и нападнале неколку кошаркари на „Пелистер“, при што со повреди се здобиле техничкиот раководител на клубот и еден од играчите, како и двајца униформирани полицајци.

За случајот веднаш бил известен и јавен обвинител, а полицијата работи на расчистување на случајот.


Пијан полицаец од Кочани ја тепал сопругата и дивеел дома


Кочани, 13 јануари, 2018 - 12:30 (META) 

Психичко и физичко малтретирање од нејзиниот сопруг пријавила вчера 38-годишната К.А.К. од Кочани. Таа во Полициската станица во градот кажала дека нејзиниот сопруг М.К. (39) вработен во МВР, под дејство на алкохол почнал да и се заканува дека ќе ја убие и барал да замине од дома и да го остави нивното седумесечно бебе.

Жената пријавила и дека нејзиниот сопруг секој ден бил пијан и во повеќе наврати на сличен начин ја малтретирал психички и физички. На 3 декември лани, според пријавата, тој под дејство на алкохол го извадил службениот пиштол и испукал неколку куршуми во дневната соба.

По наредба на Основното јавно обвинителство Кочани на М.К. му е одземен пиштолот. Во расчистување на случајот е вклучен и Одделот за внатрешна контрола, криминалистички истраги и професионални стандарди.


Адвокатите на Дурловски сметаат дека и куќниот притвор е престрога мерка


Скопје, 11 јануари, 2018 - 15:38 (META) 

На денешното рочиште во Апелацискиот суд, адвокатите на оперскиот пејач Игор Дурловски, побараа укинување на притворот и негова замена со куќен притвор или друга поблага алтернативна мерка за неговото учество во насилството во Собранието на 27 април минатата година.

Неговиот бранител Ставре Џиков наведе дека, „со укинувањето на притворот ќе се постигне правичност“. Тој истакна дека со притворот не само што му се ограничува слободата туку се влијае и на неговиот интегритет и на неговото семејство.

Адвокатот Еленко Миланов рече дека „станува збор за решенија по урнек во кои нема посебни околности зошто на Дурловски да му биде продолжен притворот.“

– Во ниту еден од овие наводни докази кои што ОЈО се уште не ги прибавило, Дурловски не може да има влијание. Степенот на кривична одговорност според европскиот суд не може да биде основ за притвор – рече Миланов пред Судот.

Според него и куќниот притвор во случајот би бил престрог и додаде дека „во секое време се подготвени да го депонираат пасошот на Дурловски во суд.“

Двајцата адвокати посочија дека Дурловски е уметник и дека тој заедно со неговата сопруга ја претставува земјава во светот.

Претставникот на Вишото јавно обвинителство рече дека жалбата на Дурловски треба да биде одбиена како неоснована и да се потврди притворот.

Дурловски само кратко рече дека останува на ставовите на неговите адвокати, без да додаде ништо повеќе. На седницата беше присутна и сопругата на Дурловски, Ана Дурловска која носеше маичка со ликот на Дурловски и натпис „правда за Игор“ на англиски (justice for Igor).


Спасовски: Ноќеска помалку кривични дела и прекршоци во однос на претходните дочеци


Скопје, 1 јануари, 2018 - 16:44 (META) 

Изминатата новогодишна ноќ во Скопје се издвојува од неколкуте претходни по тоа што се забележани помалку кривични дела отколку во изминатите години, рече министерот за внатрешни работи Оливер Спасовски при денешната посета на СВР Скопје.

– Навистина имаме големо намалување на кривичните дела и прекршоци што се случиле во новогодишната ноќ во споредбено со 2016, односно 2017 година, при што имаме еден тренд на намалување – рече Спасовски, кој заедно со директорот на Бирото за јавна безбедност при МВР, Лазе Велковски имаа средба со раководството на СВР Скопје.

Според Спасовски, во споредба со 37 кривични и десетте прекршочни дела евидентирани при пречекот на 2017 година, синоќа од 21 часот вечерта до 8 часот утрово се евидентирани девет кривични дела и осум прекршочни дела, притоа нагласувајќи дека веројатно таа бројка за малку ќе биде зголемена со оглед дека дополнително се пријавени уште неколку настани на чие што расчистување се работи.


Иранските власти се заканија со „железна тупаница“ доколку протестите продолжат


Техеран, 31 декември, 2017 - 12:29 (META) 

Револуционерната гарда на Иран ги предупреди демонстрантите, кои изминатите три дена протестираат поради лошиот животен стандард во земјата, дека ќе се соочат со „железна тупаница“ доколку немирите продолжат, пренесува „Би-би-си“.

Командирот на Револуционерната гарда изјавил дека протестите се претвориле во политички собори, а демонстрантите палат и уништуваат јавен имот.

Според наводите што ги пренесува „Би-би-си“, на протестите во градовите Хорамабад, Занјен и Ахваз имало повици за рушење или смрт на иранскиот врховен лидер Ајатолахот Али Хамнеи.

– Ако луѓето излегле на улиците поради високите цени, тогаш не би требало да извикуваат такви пароли и да палат јавен имот и автомобили – изјавил генералот Есмаил Ковсари за новинската агенција ИСНА.

Инаку, моќната Револуционерната гарда е поврзана со врховниот лидер на Иран и нејзината задача е да го чува и заштитува исламскиот систем во земјата.

Предупредување до демонстрантите дека ќе сносат одговорност упати и министерот за внатрешни работи на Иран, Абдолреза Рахмани Фазли, кој порача дека „оние кои што го уништуваат јавниот имот, го нарушуваат редот и ги кршат законите ќе мора да одговараат за своите постапки и да ја платат цената за тоа“

Протестите поради лошиот животен стандард почнаа во четвртокот, оваа недела, во градот Машад, на североистокот на Иран, а потоа се проширија и во другите градови.

Бранот протести вчера стигна и во главниот град на земјата, Техеран, каде студенти и други учесници извикувале антивладини пораки, неколку часа по собирот организиран за поддршка на властите.

Светските медиумите пренесуваат дека на вчерашните протести најмалку две лица загинале во судирите меѓу полицијата и демонстратните во градот Доруд во западен Иран, каде протестите биле проследени со силно насилство.

Некои од демонстрантите се снимени со повреди од огнено оружје, додека други на снимките се гледаат како палат полициски возила. Има извештаи и за напади на владини згради, пренесуваат медиумите. Информациите за протестите во Иран претежно се пренесуваат преку социјалните мрежи и за дел од нив нема официјална потврда.

Ова се најголемите протести во Иран од прореформските демонстрации кои беа одржани во 2009 година.


Груевски: Заев ми се одмаздува за 11 години порази


Скопје, 27 декември, 2017 - 13:31 (META) 

Поранешниот претседател на ВМРО-ДПМНЕ, Никола Груевски, во изјава пред Кривичниот суд каде што за следната година беше одложено судењето за насилството во Општина Центар, рече дека предметите на СЈО се без докази и дека со тоа Заев му се одмаздува за 11 години порази.

– Ништо ново во однос на овие предмети кои Власта и СЈО ги туркаат. Ова е непринципиелна хајка и политичка одмазда. Се измислија обвиненија без докази. Потоа нелегално стекнатите материјали станаа докази. Последниот чин беше да ги сменат и судиите. За разлика од овие судења, видовте што се случува со судењето на Заев каде што судијката му се извинува. Заев ми се одмаздува за 11 години порази – изјави Груевски.

Поради прераспределувањето на судијката Татјана Михајлова, судењето за случајот насилство во Општина Центар во јуни 2013 година покренат од Специјалното јавно обвинителство (СЈО) денеска беше одложено за 2 февруари во 10 часот.

Обвинителот на СЈО, Гаврли Бубевски, рече дека нема пречки судењето да почне од почеток.

– Ова судење си имаше две признанија на вина, кои имаат правосилни одлуки. Вкрстеното испрашување на господинот Жерновски е специфичен процес што не би требало да се повторува уште еднаш, заради одговорите, и затоа е поцелисходно да се одложи сега, затоа што предметот ќе го преземе друг судија -изјави Бубевски.