По добиената чиста препорака, Хан и Могерини во официјална посета на Македонија


Скопје, 18 април, 2018 - 9:26 (META) 

Високата претставничка за надворешни работа и безбедносна политика на ЕУ Федерика Могерини и комесарот за соседска политика и проширување Јоханес Хан, еден ден по објавувањето на Извештајот за напредокот на Македонија и чистата препорака на Европската комисија за почеток на пристапните преговори, престојуваат во официјална посета на земјата.

Тие лично ќе му го предадат извештајот за напредокот на премиерот Зоран Заев, а ќе разговараат со него и претставници на Владата за претстојните реформи во Македонија, кои се нотирани во извештајот за напредокот на нашата земја кон ЕУ.

Според најавите, Могерини ќе се сретне со премиерот Заев, по што е предвидена нивна заедничка прес-конференција. Високата претставничка на ЕУ утре ќе има обраќање во Собрание.

Еврокомесарот Хан, пак, исто така, ќе оствари официјална средба со претседателот на Владата Заев по што ќе одржат заедничка прес-конференцијата. Хан ќе се сретне и со претседателот на Собранието на Република Македонија Талат Џафери, како и со лидерот на ДУИ Али Ахмети, а ќе учествува и на премиерскиот ручек на Дигиталниот самит што во наредните два дена ќе се одржи во Скопје.


Темелни промени во отворена политичка атмосфера, видел Брисел во Македонија


Брисел, 17 април, 2018 - 16:58 (META) 

Во извештајот на Европската Комисија (ЕК) објавен денеска во Брисел, заедно со неусловената препорака Европскиот Совет да почне преговори за зачленување со Македонија, се вели дека земјата конечно ја надмина најсилната политичка криза од 2001 година, со чекорите што од мај лани ги презема новата реформски ориентирана влада за справување со заробувањето на државата, преку постигнувањето баланси, зајакнувањето на демократијата и владеењето на правото.

„Земјата искусува темелни промени во поинклузивна и отворена политичка атмосфера. Локалните избори во октомври 2017 година ја потврдија поддршката на граѓаните за политиките на новата владина коалиција ориентирани кон ЕУ. Парламентот продолжи да функционира, при што опозициските партии претседаваат со главните комисии. Парламентот треба да ги засили своите надгледувачки и законодавни функции, вклучувајќи го тука и ограничувањето на обемного користење на скратените процедури“, се вели во Извештајот.

Во поглед на реформата на јавната администрација, се вели дека земјата е умерено подготвена, а е усвоена реформската стратегија за јавната администрација и реформската програма за управувањето со јавните финансии.

„Правосудниот систем постигна одредено ниво на подготвеност и добар напредок, посебно во последниот период на набљудување. Назадувањето од години наназад полека се „покрива“ со одлучни потези во последните месеци, посебно во поглед на враќање на независноста на судството. Земјата усвои кредибилна реформска стратегија која ги поставува основите за понатамошни реформи на ова поле. СЈО се соочува со помалку отпор од судовите, со што може да работи поефикасно“, се вели во извештајот за Македонија.

Според ЕК, во поглед на регионалната соработка, земјата одржувала добри односи со другите земји од Западен Балкан што се аспиранти за ЕУ и активно учествувала во регионалните иницијативи.

„Преземени беа одлучни чекори за подобрување на добрососедските односи, вклучувајќи го тука и стапување на сила на билатералната спогодба со Бугарија. Прашањето за името мора да се разреши во најитен рок. Преговорите за прашањето за името се интензивираа под покровителство на ОН.  Конструктивните дискусии на ниво на премиери и министри за надворешни работи позитивно го индицираат напредокот во спроведувањето на мерките за градење доверба“, се вели во извештајот на Европската Комисија.

Што се однесува до економските критериуми на ЕК, се вели дека ПЈРМ направила одреден напредок и е на солидно ниво на подготвеност за развој на функционална пазарна економија, но сепак опстојуваат клучните слабости на економијата.

„Тие вклучуваат пропусти во бизнис сферата, како слабото спроведување на договорите и големата неформална економија. Структурните проблеми на пазарот на трудот се одразуваат во слаба активност и висока стапка на невработеност. Макроекономската средина опадна во првата половина на 2017 година и долгата политичка криза го зеде својот данок од инвестициите“, се вели во извештајот.


Македонија доби чиста и неусловена препорака за почеток на преговорите со ЕУ


Брисел, 17 април, 2018 - 16:32 (META) 

Македонија доби чиста и неусловена препорака, за почеток на преговорите на земјата со ЕУ, појасни евроамбасадорот Самуел Жбогар на прес-конференцијата во ЕУ Инфо Центар во Скопје, откако заврши директниот пренос од Брисел на презентацијата на Извештајот на Европската Комисија за напредокот на Западен Балкан и Турција.

Високиот претставник на ЕУ за надворешни работи и безбедносна политика и потпретседателка на Европската Комисија, Федерика Могерини и еврокомесарот за европска добрососедска политика и проширување, Јоханес Хан, појаснија дека ЕК препорачува на Европскиот Совет да донесе одлука да отпочне преговори за приклучување со Македонија и Албанија, во светлина на постигнатиот напредок, притоа задржувајќи го и продлабочувајќи го актуелниот реформски замав.

За Македонија клучно за понатамошниот прогрес ќе биде исполнувањето на итните реформски приоритети, рече Могерини.

– Чекорот напред направен денеска за Поранешна Југословенска Република Македонија и за Албанија е чекор напред за целиот регион на Западен Балкан. Нашиот стратегиски фокус и ангажман ги донесуваат практичниот прогрес и придобивки за сите луѓе во регионот. Работата на реформите и модернизацијата сепак мора да продолжи, во интерес на партнерите и на Европската Унија – рече Могерини на презентацијата на Извештајот за напредокот.

Хан, пак, рече дека новиот извештај е признание за постигнатиот напредок.

– Нашата политика на зголемување продолжува да биде главниот мотор кој ги движи реформите во Западен Балкан. Тој ги модернизира економиите и општествата во регионот, правејќи го попросперитетно и постабилно место, што е суштински интерес и за ЕУ. Препораките за Поранешна Југословенска Република Македонија и Албанија што ги даваме денеска се признание на постигнатиот напредок. Тоа е важен чекор напред, но јасно е – а тоа се однесува на сите земји од Западен Балкан – нема кратенки на патот кон ЕУ. Остануваат неколку големи дупки. Треба да посведочиме дека реформите, посебно во поглед на владеењето на правото, се спроведуваат подинамично и дека даваат вистински резултат. Овие реформи не се „за Брисел“, односно ефикасното правосудство, ефикасната борба против корупцијата и организираниот криминал, ефикасната јавна администрација, посилната економија директно ќе придонесат за регионот и за неговите жители, како и за Европа во целост – рече Хан.


Османи ќе го презентира статусот на спроведувањето на Планот „3-6-9“


Скопје, 13 април, 2018 - 9:15 (META) 

Вицепремиерот за европски прашања Бујар Османи денеска на прес-конференција во Владата ќе го презентира статусот на имплементацијата на Планот „3-6-9“.

Презентацијата е во пресрет на објавувањето на Извештајот на Европската комисија за напредокот на Македонија на евроинтегративниот пат на 17 април.

Напредокот во имплементацијата на Планот „3-6-9“ Османи вчера во Брисел го презентираше пред високата претставничка на ЕУ за надворешни работи и безбедносна политика Федерика Могерини.

Тој ја информирал Могерини дека Македонија ги испорачала реформите во соодветниот период за извештајот на Комисијата позитивно да го оцени напредокот на државата.


Османи: Очекувам безусловна препорака од Советот на ЕУ за почеток на преговорите


Скопје, 13 март, 2018 - 13:27 (META) 

Валоризацијата на реформските напори на Македонија очекуваме да биде нотирана во претстојниот извештај на Европска комисија, од каде очекуваме и чиста и безусловна препорака од Советот на ЕУ за почеток на преговорите.

Ова денеска го истакнал вицепремиерот задолжен за европски прашања, Бујар Османи кој е во работна посета на Брисел каде што престојува заедно со советникот за европски интеграции во кабинетот на премиерот, Бојан Маричиќ.

Тие се сретнале со генералниот директор на Директоратот за европска и соседска политика и преговори за проширување (ДГНЕАР), Кристијан Даниелсон, а имале и брифинг со претставниците на Директоратот за напредокот на Македонија.

Османи посочил дека „очекува извештаите на Европската комисија да обезбедат јасна и прецизна проценка за севкупната подготвеност и напредокот не само на Македонија, туку и на сите земји од регионот, имајќи предвид дека европските интеграции на земјите од Западниот Балкан претставуваат европски предизвик, кој е во интерес на постабилна, побезбедна и обединета Европа.“

Тој додал дека „пред априлскиот извештај на Европската комисија, Владата е целосно фокусирана кон реформите, како и отстранувањето на сите останати политички пречки на евроинтегративниот пат на земјава.“

За време на работната посета на Брисел, Османи ќе одржи и брифинг во пресрет на објавувањето на Извештајот на Европската комисија за напредокот на Македонија и пред членовите на Работната група за земјите од Западен Балкан во рамките на Советот на Европската унија.


Софија: Од Западен Балкан до ЕУ ќе се трча индивидуално, нема да се чекаат другите


Софија, 6 февруари, 2018 - 17:17 (META) 

Напредокот на секоја од земја од Западен Балкан ќе се оценува според индивидуалните постигнувања и од ниту една држава, која е подготвена за членство во Европската Унија, нема да се бара да чека друга за влез во Унија, се наведува во соопштението на бугарското Министерство за надворешни работи, во кое ја поздравува Стратегијата за Западен Балкан на Европската комисија.

„Стратегијата се однесува на сите шест држави, кои треба да ги забрзаат реформите и да изградат добрососедски односи. Напредокот ќе продолжи да се базира на индивидуалните постигнувања на секоја земја одделно, односно ниту една држава, која е готова, нема да мора да чека друга“, стои во соопштението.

Државите од регионот, се додава во него, имаат јасна временска перспектива.

„2025 година е амбициозна цел, чие исполнување налага мобилизација за решителни реформи во клучните области на политичкиот, економскиот и социјалниот живот“, велат од МНР на Бугарија, која е актуелен претседавач со Советот на Европа.


Северна и Јужна Кореја постигнаа напредок во преговорите


Сеул, 9 јануари, 2018 - 18:56 (META) 

Северна и Јужна Кореја постигнаа договор во преговорите чија цел е смирување на тензиите, соопштија двете страни после првата средба на официјални лица по две години. Двете земји се сложиле да ги стивнат сегашните воени тензии и да одржат воени преговори.

После состанокот соопштија дека спортисти и севернокорејски официјални лица ќе отпатуваат на Зимските олимписки игри кои ќе се одржат во Јужна Кореја во февруари.

Северна Кореја ќе испрати во Јужна Кореја делегација која ќе биде составена од претставници на Националниот олимписки комитет, спортисти, навивачи и новинари.

До затоплување на односите дојде откако лидерот на Северна Кореја, Ким Џонг Ун на први јануари во новогодишното обраќање најави можност за учество на севернокорејските спортисти на олимписките игри во Јужна Кореја и покрај тензиите помеѓу двете тензии поради нуклеарната и балистичката програма на Пјонгјанг.

Јужна Кореја ќе биде домаќин на ЗОИ од 9 до 15 февруари, а Параолимписките игри почнуваат на 9 март.


Столтенберг ќе се обрати пред македонските пратеници на 18 јануари


Скопје, 5 јануари, 2018 - 12:27 (META) 

Генералниот секретар на НАТО, Јенс Столтенберг, кој месецов доаѓа во посета на Македонија, на 18 јануари на пленарана седница ќе им се обрати на пратениците во македонското Собрание.

Седницата, како што е наведено на официјалната веб-страницата на Собранието, е закажан за точно напладне и освен неа за овој ден не се закажани други седници на законодавниот дом.

Инаку, посетата на Столтенберг доаѓа во период на засилени активности и комуникација на властите во Скопје и Атина околу решевањето на деценискиот спор со името и очекувањата на Македонија за напредок во евроатлантските интеграции.


Шекеринска – Данкан: Продолжува поддршката од Велика Британија за eвроинтеграцијата


Лондон, 13 декември, 2017 - 19:00 (META) 

Министерката за одбрана, Радмила Шекеринска денеска се сретна со британскиот министер за Европа и Америка, Алан Данкан, во Министерството за надворешни работи и Комонвелт.

„Работиме на суштински внатрешни реформи како и на подобрување на односите со соседите. Тоа се сложени процеси, кои бараат политичка волја, време, но и постојана поддршка од нашите сојузници“, изјавила Шекеринска.

Данкан истакнал дека, Велика Британија продолжува да ја поддржува Македонија во нејзината интеграција во НАТО и Европската Унија, истакнувајќи дека, Самитот за Западен Балкан што ќе се одржи во 2018 во Обединетото Кралство, претставува одлична можност да се покаже напредокот на Македонија во повеќе области.


Владата на тематска седница ќе го разгледува европскиот прашалник за напредокот кон ЕУ


Скопје, 3 ноември, 2017 - 12:22 (META) 

Владата на Република Македонија денеска во 15 часот ќе одржи тематска седница, на која ќе биде разгледана информацијата за придонесот за остварениот напредок на Република Македонија, кој претставува основа за подготовка на годишниот извештај на Европската комисија за напредокот во процесот на пристапување во Европската Унија.

Седницата ќе ја води вицепремиерот задолжен за европски прашања, Бујар Османи.

„Придонесот за остварениот напредок на Република Македонија, во согласност со новата методологија на Европската комисија за подготовка на извештаите за напредокот на земјите – кандидатки за членство во Европската Унија, првпат оваа година се состои од прашалник со 1.175 прашања, кои се одговорени од  надлежните институции и ревидирани од Секретаријатот за европски прашања, во улога на координативна институција во процесот на европска интеграција на земјата“, информираат од Владата.