!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Тевдовски: Преку софтвер ќе се следат обврските на буџетските корисници


Скопје, 4 јануари, 2018 - 11:41 (META) 

Министерството за финансии изработи софтвер, преку кој, сите буџетски корисници ќе мора да ги пополнуваат своите неплатени обврски, изјави министерот за финансии Драган Тевдовски во интервју за Македонска радио-телевизија (МРТВ).

Тевдовски рече дека е изготвено законско решение кое ќе овозможи, да се има постојан увид на обврските во реално време.

Тевдовски на 20 јули лани, информираше дека долгот на државните инстутиции заклучно со 31 мај годинава изнесува 363 милиони евра. Според него, ова е сериозна бројка на натрупани обврски, ако се има предвид дека дефицитот на Македонија е околу 300 милиони евра.

Уште тогаш Тевдовски најави дека, Министерството за финансии планира надоградба на софтверот за неплатените обврски да бидат системски евидентирани и да се гледаат во реално време.


Тевдовски: Со буџетот за 2018 се фокусиравме на ефикасно трошење на парите


Париз, 14 декември, 2017 - 14:33 (META) 

Министерството за финансии се фокусираше на ефикасност во трошењето на средствата во буџетот за 2018 година, рече министерот за финансии, Драган Тевдовски на министерската конференција во Париз на тема „Доброто деловно јавно управување-сервис за граѓаните и бизнисите“, организарана од Организацијата за економска соработка и развој (ОЕЦД).

Тој додаде дека важно е да има инвестиции и трошење, но уште поважно е за што парите ќе бидат потрошени.

„Ние не се фокусиравме толку на расходната страна и намалувањето на расходите, колку на тоа, за што се трошат средствата. Наш приоритет како министерство и влада е да ја зајакнеме ефикасноста при трошењето на јавните средства, притоа обезбедувајќи, расходите ефективно да се користат за вистинските цели, а јавноста да добие вредност за парите“, рече Тевдовски.

Тој додаде дека за социјалните трансфери и земјоделски субвенции, Владата многу повеќе се фокусира на нивната правилна употреба.

Во однос на транспарентноста на трошењето, Тевдовски истакна дека, „доколку јавноста е запознаена како се управува со средствата и како тие се трошат, тогаш би можела да врши постојан притисок врз функционерите кога тие не управуваат добро со средствата.“

За Стратегијата за управување со јавни финансии потенцираше дека треба да биде усвоена до крајот на годината, и спроведена во наредните години.


Тевдовски: Зголемена е наплатата на даноците и забрзан е повратот на ДДВ


Скопје, 1 декември, 2017 - 14:12 (META) 

„Вкупните даночни приходи наплатени во 2017 година, заклучно со ноември, изнесуваат 95 милијарди денари и се за четири отсто повисоки споредено со истиот период од минатата година, што укажува на поволни движења во стопанството. Притоа, во периодот јануари-ноември се забележува повисока наплата на сите главни категории на даночни приходи, односно има годишен пораст кај персоналниот данок на доход од 7 отсто, кај данокот на добивка од 8,9 отсто, кај акцизите од 5,3 отсто и кај увозните давачки од 9,1 отсто“, соопшти министерот за финансии Драган Тевдовски.

„Приходите од ДДВ на бруто-основа во периодот јануари-ноември се повисоки за 6,6 отсто во однос на истиот период од претходната година. Притоа, наплатата на приходите од ДДВ е особено зголемена во периодот од септември до ноември 2017 година, кога бележи пораст од 9,7 отсто. Повратот на ДДВ во периодот јануари-ноември е за 3,3 милијарди денари, односно за 22,2 отсто повисок отколку истиот период во 2016 година. Соодветно, приходите од ДДВ на нето-основа во првите 11 месеци се за 1,3 отсто повисоки од соодветниот период претходната година“, се вели во соопштението од министерот Тевдовски.

Тој вели дека Управата за јавни приходи и Министерството за финансии во последните месеци реализираат побрз и повисок поврат на ДДВ во однос на минатата година. Поточно, во периодот септември-ноември 2017 година, повратот на ДДВ во стопанството изнесува 5,9 милијарди денари, односно е за 26 отсто повисок отколку истиот период претходната година.

Според соопштението, во последните неколку месеци значително е забрзана и динамиката на реализацијата на повратот на ДДВ во насока на редовно, неселективно и навремено враќање на ДДВ до фирмите во рамките на законскиот рок.


Град Скопје ќе доставува решенија за присилна наплата на данок на имот


Скопје, 17 јули, 2017 - 14:19 (META) 

Град Скопје во претстојниот период ќе доставува решенија за присилна наплата на долг за данок на имот и за фирмарина, од физички и од правни лица кои во согласност со законот во предвидените рокови ја немаат намерено својата обврска за 2016 година.

„Се известуваат сите даночни обврзници, физички и правни лица, кои во наредниот период на своја адреса ќе добијат решение за присилна наплата за 2016 година, веднаш да пристапат кон плаќањето на наведениот долг во согласност со решенијата за присилна наплата, со што би се избегнала непопуларната мерка за блокада на сметки во деловните банки“, се вели во соопштението од Град Скопје.

Доколку даночните обврзници се опоменати за неплатен долг, а во меѓувреме го платиле, треба да се обратат во Град Скопје, барака 16, со доставување доказ за уплата на долгот за 2016 година.


Царинската управа лани инкасирала 1,1 милијарда евра од давачки и акцизи


Скопје, 16 јануари, 2017 - 14:56 (META) 

Царинската управа на Република Македонија ја завршила 2016 година со вкупно остварени приходи од 72,9 милијарди денари (околу 1,1 милијарди евра, н.з.), што е за 8,5 отсто, односно за 5,7 милијарди денари (92 милиони евра, н.з.) повеќе од приходите во 2015 година.

„Ова претставува значителен успех при наплата на давачките во надлежност на Царинската управа, а тоа се давачки при увоз (царина, данок на додадена вредност, акцизи и надоместоци) и наплата на акциза не само при увоз, туку и во внатрешен промет“, стои во соопштението од Царинската управа.

Како што информираат оттаму, во 2016 година Царинската управа наплатила за 5,5 отсто, односно за 3,8 милијарди денари (61,7 милиони евра) повеќе од планираното.

„За 2016 година беше планирано да се наплати 69,5 отсто од даночните приходи во буџетот на Република Македонија, а наплатени се 73,3 отсто од нив. Во однос на реализираните приходи во 2015 година, во 2016 година остварено е значително зголемување на наплата на сите видови давачки. Ова зголемување е остварено при зголемување на вредноста на увозот од само 1,8 отсто“, велат од Царината.

Според Царинската упарава, во 2016 година таа наплатила:

  • 42,1 милијарда денари од ДДВ, што претставува за 6,5 осто, односно за 2,56 милијарди денари, повеќе од наплатата во 2015 година;
  • 4,76 милијарди денари од царинење, што претставува за 9,9 отсто, односно за 0,4 милијарда денари повеќе од наплатата во 2015 година;
  • 25,4 милијарда денари од акцизи, што претставува за 11,7 отсто, односно за 2,67 милијарди денари повеќе од наплатата во 2015 година;
  • 0,68 милијарда денари од надоместоци, што претставува за 8,4 отсто, односно за 0,53 милијарда денари повеќе од наплатата во 2015 година.

Зголемената наплата на приходите, како што информираат од Царинската управа, се должи на повеќе фактори, односно на зголемена финансиска дисциплина на сите учесници во трговијата, подобрување на системот за управување со ризик на Царинската управа при увоз, контролите кај компаниите по завршена постапка, односно постконтроли и подобрувањето на интерните контролни системи.


Од следната недела возење во ЈСП само со електронска картичка


Скопје, 26 декември, 2016 - 10:41 (META) 

Eлектронската наплата во автобусите на Јавното сообраќајно претпријатие (ЈСП) и приватните превозници ќе почне задолжително да се применува од следната недела. Првичната цена на електронска картичка ќе изнесува 150 денари.

Покрај во возилата, картичките ќе може да се купат и во сите 26 билетарници на ЈСП, во инфо-центрите, како и во продавниците кои имаат склучено договор со ЈСП, информираат од ова претпријатие.

Секој патник во јавниот градски превоз ќе биде должен да поседува ваква карта, персонализирана или неперсонализирана за лица кои поретко користат јавен градски превоз и на која нема да има фотографија.

Возењето и понатаму ќе чини 35 денари, а кредитот на картичките ќе може да се дополнува со најмалку 100 денари. Ќе постои и опција за плаќање со помош на мобилен телефон, но истото ќе чини 40 денари.

За официјалниот почеток на новиот начин на наплата граѓаните дополнително ќе бидат информирани преку плакати во возилата.


Извршителите нема да наплаќаат од должниците без претходно да ги известат


Скопје, 20 ноември, 2016 - 14:42 (META) 

Извршителите нема да можат да повлекуваат пари од сметките на должниците без претходно да ги информираат, предвидуваат измените на Законот за извршување кои стапуваат на сила од 1 јанури 2017 година.

Со новите измени, должникот мора да биде информиран каде и колку должи, па потоа добива рок од три дена да го намири долгот и доколку не го направи тоа, тогаш му се блокира сметката.

Вкупниот изноз на наплата од извршување годинава изнесува повеќе од 76 милиони евра, два милиони евра помалку од лани.


УЈП присилно ќе ја наплаќа радиодифузната такса од граѓаните


Скопје, 7 септември, 2016 - 15:15 (META) 

Управата за јавни приходи (УЈП) најави дека присилно ќе ја наплаќа радиодифузна такса од граѓаните кои се најдоа на листата на должници.

Станува збор за 85.790 граѓани кои УЈП ги повикува најдоцна до 13 септември да си ги подигнат решенијата за присилна наплата.

Имињата на граѓаните кои нема да ги подигнат решенијата, ќе бидат објавени во Службен весник, по што ќе следува присилна наплата.


Кога се работи за поголема сума на ДДВ, државата потешко го враќа на компаниите


Скопје, 5 септември, 2016 - 12:39 (META) 

Компаниите на кои државата треба да им врати данок на додадена вредноста (ДДВ) во износ поголем од два милиони денари месечно, многу потешко ги добиваат тие пари, покажува најновата анкета на 800 компании, што ја спроведе Стопанска комора на Македонија во август.

Доцнењата во исплатата подолго од предвидениот рок им задаваат тешкотии во работењето. За фирмите кои имаат помала сума на повраток на ДДВ. пак, законскиот рок од еден до три месеци е прифатлив период и не им задава проблеми во работењето.

– Компаниите што поднесуваат барања за повраток на ДДВ за поголема сума на месечно ниво, имаат проблем со ликвидноста и тие средства не можат да ги искористат за други намени – истакна директорката на Дирекцијата на здруженија според дејности при Стопанската комора, Билјана Пеева-Ѓуриќ.

40 проценти од компаниите алармирале за проблеми со наплатата на побарувањата од јавниот сектор. Кога исплатата доцнела подолго од предвидениот законски рок, компаниите биле принудени да земаат нови кредити и биле изложени на дополнителни трошоци и загуби во работењето.

Посебен проблем на компаниите им претставувала и наплатата од јавните претпријатија, со кои, на пример, добиле судски спор. Според членот 211 од Законот за извршување, претседателот на општинскиот суд може да одлучи дека парите на сметката на јавното претпријатие се за извршување на тековните обврски, што практично значи ставање вето на исплата на долгот кон компаниите.


УЈП присилно ќе ги наплаќа заостанатите долгови за радиодифузна такса


Скопје, 8 јуни, 2016 - 11:51 (META) 

Управата за јавни приходи (УЈП) ќе почне со присилна наплата на заостанатите долгови на граѓаните за радиодифузна такса (РДТ). Од УЈП апелираат граѓаните во најкус рок да ги намират тие долгови.

– За даночните обврзници да не се изложуваат на блокирање сметки и на дополнителни трошоци, препорачуваме навремено да проверат дали имаат заостанати долгови и доброволно да ги платат – се вели во соопштението на  УЈП.

За брзо плаќање, без чекање на шалтери и со помали трошоци, УЈП препорачува да се користат безготовинските картички, односно електронската услуга „е-радиодифузна такса“.

Уплата, увид во евиденцијата за РДТ и преглед на платени и неплатени решенија може да се врши и со апликацијата „м-даночни сервиси“ преку паметните телефони.