Ангеловски: Напаѓачите на починатото момче се во притвор и ќе одговараат


Скопје, 9 јули, 2018 - 14:28 (META) 

Насилникот е насилник, без разлика на неговата етничка припадност, во државата постојат закони, функционира правната државата и одговорните за нападот врз Н.С. (21), кој изутрината почина во комплекс клиниките „Мајка Тереза“ ќе одговараат пред законот, изјави денеска портпаролот на МВР, Тони Ангеловски.

Нагласи дека МВР експресно го расчистило случајот и сторителите се приведени и одредена им е мерка притвор. Тој додаде дека целокупниот материјал и сите докази се доставени до надлежното јавно обвинителство, ОЈО-Скопје.

Ангеловски посочи дека МВР не е надлежно да одговара дали постои можност случајот да се преквалификува од „насилство“ во „убиство“ и оти за тоа е надлежно обвинителството.

На 29 јуни на автобуска постојка на булеварот „Александар Македонски“ три лица на возраст од 19, 20 и 21 година го нападнале Н.С., по што тој е пренесен во Ургентниот центар во Скопје.

На 2 јули, Секторот за внатрешни работи Скопје поднесе кривична пријава против Б.Б.(20), С.Д.(21) и Ј.Љ.(19), сите од Скопје за сторено кривично дело „насилство“. По преземени мерки, од страна на полициски службеници, прво и второпријавениот се лишени од слобода.

Ангеловски појасни дека по третопријавениот се трага.


На 6 јуни завршни зборови во судењето за нападот на Села


Скопје, 31 мај, 2018 - 15:57 (META) 

Со изнесување докази, меѓу кои една досега неприкажана снимка од нападот на пратеникот Зијадин Села при насилствата во Собранието на 27 април минатата година, денеска се одржа уште едно рочиште, а в среда судењето продолжува со изнесување завршни зборови.

Обвинителот Дарко Јакимовски од судот побара повеќе време за да ги подготви завршните зборови со цел да може да ги вклучи и деловите нотирани на денешното рочиште, поради, како што рече, можност за измена на обвинение. Неговиот колега Абидин Абдули по завршувањето на денешното рочиште рече дека денешниот видео запис претставен пред судот е нешто што им недостасувало на обвинителството и на судот за точно да се утврдат дејствијата и вината на обвинетите.

Адвокатите од одбраната по паузата од денешното рочиште реагираа на нотирањето на случувањата од видео снимката од страна на судечкиот Совет и побараа видео записот да биде повторно прегледан и да бидат забележани и констатирани точно сите моменти.

На видеото се гледа настанот во прес-центарот во аголот каде се пратениците и на него тие веќе имаат видливи повреди. Се гледа нападот на лицата кои се влезени во Собранието и како тие ги напаѓаат пратениците и фрлаат предмети кон нив. Се гледа присуството на обвинетиот Александар Јаневски Тошта, Сашко Сенков, Никола Ошавковски, Цејо и Кире Георгиевски, лицето во црно со фантомка на глава, Николче Димитриевски. Се гледа оштетениот Села во аголот од прес центарот и се слуша како некој вика „Дај го ваму“, „Држи го“, „Дај го ваму! копиле!“ Потоа се гледа како некој го извлекува Села од групата пратеници кон средината на прес центарот. Се забележува поголема група луѓе како го удираат Села, прво во исправена состојба и потоа додека е на земја. Иако Села е легнат на подот и веќе не реагира, ударите продолжуваат.

Обвинителот на крајот од рочиштето до судот поднесе изготвено вештачење од Институтот за судска медицина на Медицинскиот факултет при УКИМ.

За ова дело обвинети се Кире и Цане Ѓорѓиевски, Оливер Ошавковски, Саша Ценков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра.

Судењето почна на крајот на јануари годинава.


Манчевски: Прославија дека Села е мртов, па тргнаа кон нас


Скопје, 10 април, 2018 - 14:56 (META) 

Министерот за информатичко општество и администрација, Дамјан Манчевски во своето сведочење пред судот препозна двајца обвинети кои го удирале Села, а за останатите рече дека биле на различни страни во собраниската прес-сала за време на упадот на 27 април.

За обвинетите Никола Војминовски и Кире Ѓорѓиевски, Манчевски посочи дека биле меѓу десеттемина кои го удирале Села на средина од салата, а во дел од обвинетите препозна и напаѓачи кои него го удирале.

Манчевски пред судот рече дека кога некој извикал дека Села е мртов, дел од толпата почнала да слави.

-Прославија дека Села е мртов, па тргнаа кон Заев и кон нас. Врзуваа кабли околу вратот за да ни испратат порака дека ќе ни се случи истото. Не се сеќавам на активностите врз Села, но се сеќавам на тоа дека дел од присутните овде ме удираа мене – сведочеше Манчевски.

Тој пред судот појасни дека биле предмет на напади и закани на агресивната толпа. Толпата удирала со боксови, и Манчевски завршил со скршен нос. Манчевски рече дека се труделе да не ги гледаат насилниците во очи оти ако ги гледале веднаш се насочувале кон нив и ги напаѓале.

-Удираа со што ќе стигнат, со раце, столици, камери, монитори и тоа траеше околу два и пол часа. Ако го дофатеа Села, го удираа со боксови ако не, со што ќе стигнат – вели Манчевски.

Манчевски рече дека го видел Села повреден и со крв, а слушнал закани за Заев и за Села.

-Имаше закани по живот, за бесење, за убивање, извикуваа „убиј го Села, убиј го Заев, убиј ги предавниците“. Во еден момент видов дека Села го нема, а потоа на отприлика десетина метри од мене, на средина на прес-салата видов како некој е легнат на земја, а луѓе го маваат. Забележав како лежи човек, а неговото тело се помрднува од ударите на десетина луѓе кои маваа со клоци и туапници – рече Манчевски.


Запален автомобилот на пратеничката на СДСМ, Шуманска – Митева


Виница, 15 март, 2018 - 10:50 (META) 

Во Виница ноќеска бил опожарен автомобилот на пратеничката на СДСМ, Славица Шуманска – Митева, неколку часа откако во Собранието беше изгласан Законот за јазиците.

Како што извести МВР, ноќеска околу 1.30 часот на улицата „Славчо Стојменски“ во Виница, непознати сторители скршиле стакло на автомобил „сеат леон“ со винички таблички, сопственост на С.Ш.М., ја полеале внатрешноста на возилото со запалива течност, која потоа ја запалиле.

Полицијата известува дека е направен увид и се врши истрага.


Судењето на напаѓачите на Села во Собранието закажано за 26 јануари


Скопје, 11 јануари, 2018 - 11:41 (META) 

На 26 јанаури Кривичниот суд го закажа почетокот на судењето на напаѓачите на лидерот на Алијанса за Албанците, Зијадин Села, кои се товарат за обид за убиство.

Села беше еден од најтешко повредените за време на насилствата во Собранието од 27 април.

Судењето, како што јавува „Телевизија 24“ ќе го води судијката Славица Андреевска.

За обидот за убиство на Села се обвинети 10 лица – Кире Ѓоргиевски, неговиот татко Цане Ѓоргиевски, Оливер Ошавковски, Сашо Сенков, Николче Димитриевски, Александар Јаневски-Тошта, Андреј Мицов, Никола Војминовски, Коста Делов и Стојан Павлески – Кобра.

Дел од напаѓачите беа идентификувани со помош на граѓаните, откако МВР на својата веб-страница објави кадри од снимки од настаните во Собранието на кои беа обвинетите.

Ова е трет предмет за насилставата од 27 април кој влегува во суд. Претходно, девет лица дбоја условни затворски казни поради учество во толпа што ќе спречи службено лице во вршење на службено дејствие. Другиот случај беше против напаѓачот на актуеланата министерка за одбрана, Радмила Шекеринска, кој беше осуден на четири години затвор.


OJO идентификувало еден од убиените напаѓачи во менувачницата во Кисела Вода


Скопје, 27 ноември, 2017 - 22:47 (META) 

Основното јавно обвинителство Скопје извршило увид во менувачницата во Кисела Вода каде попладнево при обид за разбојништво две лица беа убиени. Од ОЈО информираат дека познат е идентитетот на едно од починатите лица.

Надлежен јавен обвинител издал наредба за обдукција на починатите и за вештачење на прибраниот доказен материјал.

„Обезбедени се траги од местото на настанот, како и видеонадзорот од менувачницата. Идентитетот на едно од починатите лица е утврден. Во моментов се преземат дејства за идентификација на второто починато лице“, велат од ОЈО.

Двојното убиство се случи попладнево кога две вооружени лица се обиделе да ограбат менувачница на улицата Борис Трајковски во скопската населба Кисела Вода. Сопственикот на менувачницата по физичка пресметка со напаѓачите, пукал во нив и ги убил. Од ОЈО информираат дека му е укажана медицинска помош, поради добиени телесни повреди.


Најмладата жртва во Барселона е тригодишно девојче


Барселона, 18 август, 2017 - 10:18 (META) 

Меѓу загинатите и повредените во терористичкиот напад во Барселона има државјани од најмалку 24 земји, а најмладата жртва е тригодишно девојче.

Шпанската полиција потврдила дека меѓу убиените во Барселона, тројца се Германци и еден Белгиец.
Повредените се државјани на Франција, Германија, Холандија, Аргентина, Венецуела, Белгија, Австралија, Унгарија, Перу, Романија, Ирска, Грција, Куба, Македонија, Кина, Италија и Алжир, соопшти шпанската агенција за цивилна заштита.

Македонското Министерство за надворешни работи соопшти дека македонски државјанин е пореден при нападот во Барселона, но е вон животна опасност. Тој е хоспитализиран со скршеница на зглобот, а претставник на македонската амбасада веднаш по добиената информација заминал во болницата каде се наоѓа повредениот македонски државјанин.

Во нападот, извршен со комби, кое влетало во пешаци во близина на плоштадот „Каталуња“, во центарот на Барселона, загинаа 13 лица, а повеќе од 100 се повредени. Одговорноста за нападот ја презеде терористичката група Исламска држава.

Шефот на каталонската полиција, Луис Траперо, соопшти дека две лица се приведени за учество во нападот во Барселона, а интензивно се трага по трето лице за кое се претпоставува дека е возачот на комбито. Еден од напаѓачите е идентификуван. Станува збор за Мароканецот Дриш Оукабир.

Шпанскиот премиер Мариано Рахој синоќа прогласи тридневна жалост во Шпанија и рече Каталонија била цел на напад на џихадистичкиот тероризам, како и други градови во светот.

Ова е најкрвавиот напад во Шпанија, после оној од 2004 година кога напаѓачи инспирирани од Ал каеда извршија координирани напади врз патнички возови во Мадрид, во кои загинаа 192 лица.


Седум загинати во нападот во Лондон, тројцата осомничени убиени во судир со полицијата


Лондон, 4 јуни, 2017 - 10:41 (META) 

Седум лица загинаа, а 48 се повредени во терористичкиот напад што синоќа се случи на две локации во Лондон – на маркетот Бороу и на Лондонскиот мост, пренесува „Би-би-си“. Како што е соопштено на брифингот рано утрово, полицијата при интервенцијата застрелала и убила тројца мажи, осомничени дека го извршиле нападот.

Според полицијата, осомничените доше во судир со полицијата и биле убиени 8 минути откако безбедносните служби го добиле првиот повик, кој бил во 22.08 часот.

Марк Роули, помошник комесар на Метрополитен полицијата, соопштил дека „осомничените носеле нешто што личело на појаси со експлозив, но дополнително било утврдено дека тие биле лажни“.

Повеќе од 30 луѓе, по нападот на Лондонскиот мост и на Бороу биле пренесени во шест болници. Од лондонската итна медицинска служба соопштиле дека меѓу тешко повредените е и еден полицаец на сообраќајната полиција, но дека не е во животна опасност.

Полицијата соопштила дека бројот на повредени би можел да се зголеми. Истрагата за нападот продолжува, а ја спроведува антитерористичката полиција, рекол Марк Роули.

Матрополитен полицијата во детално соопштение навела дека околу 22 часот полицијата реагирала на пријава за автомобил кој се качил на тротоар и удирал во луѓето на Лондонскиот мост, а потоа полициски екипи одговориле на повик за напад на Бороу, каде две лица влегле во ресторан и со нож изболе две лица. Полицијата интервенирала и на инцидент во лондонската област Ваухол, но соопштено е дека овој случај не бил поврзан со првите два.

Половина час по полноќ двата напади на Лондонскиот мост и на Бороу, кој е популарно место на кое се сообираат луѓето во сабота навечер, се прогласени за терористички.

Британската влада утрово одржува итен состанок со службите за безбедност т.н. „Кобра“. Премиерката на Велика Британија, Тереза Меј, претходно соопштила дека инцидентот се третира како „потенцијален акт на тероризам“ и дека „истрагата се одвива брзо“.

Градоначалникот на Лондон, Садик Кан, порачал дека „неговите мисли се со оние кои се погодени од случувањата и се заблагодарил на службите за безбедност и на итната помош, кои брзо одговориле на повиците.

Белата куќа соопшти дека претседателот на САД, Доналд Трамп, е известен за случувањата во Лондон. Тој во меѓувреме на „Твитер“ напиша дека САД ќе направат сè што можат да му помогнат на Лондон и на Велика Британија, а подоцна имал и телефонски разговор со премиерката Тереза Меј.

Со соопштение се огласи и американскиот Стејт департмент, во кое се вели дека САД ги осудуваат кукавичките напади чија цел се невини цивили во Лондон.

„САД се подготвени да обезбедат каква било помош на властите во Обединетото Кралство. Нашите срца се со семејствата на жртвите. Цела Америка се солидаризира со народот на Велика Британија“, стои во соопштението на Стејт департментот.

Пораки со осуда за нападот во Лондон и за помош на Велика Британија упатија и францускиот претседател, Емануел Макрон, премиерот на Канада, Џастин Трудо, како и австралисткиот премиер, Малком Трнбул, и неговата министерка за надворешни работи, Џули Бишоп, и претседателот на Европската комисија, Жан-Клод Јункер.

Засега никој не ја презел одговорноста за терористичкиот напад во Лондон.


ОЈО ги гони двајцата напаѓачи на Села за обид за убиство и побара притвор


Скопје, 10 мај, 2017 - 20:14 (META) 

Основното јавно обвинителство – Скопје информираше дека до овој момент биле идентификувани двајца напаѓачи на пратеникот З.С. за време на настаните во Собранието на 27 април.

Оттаму додаваат дека од досега прибавените докази, обвинителството оценило дека постои основано сомневање дека овие две лица, заедно со други, кои во овој момент не се идентификувани, го извршиле кривичното дело, обид за убиство.

„Надлежниот јавен обвинител донесе наредба за спроведување истражна постапка против двете лица за наведеното кривично дело. Истовремено, по оценка на Јавното обвинителство, против осомничените неопходно е да биде изречена мерка за нивно обезбедување, поради што јавниот обвинител до судија на претходна постапка поднесе предлог за одредување притвор, бидејќи постојат сите законски основи за тоа“, информираат од обвинителството.

Полицијата рано утринава извршила претрес во домот на К.Ѓ. (39), а потоа го привела заедно со неговиот татко Ц.Ѓ. (68), под сомневање дека се едни од напаѓачите на пратеникот Зијадин Села во Собранието за време на насилното влегување на група граѓани во законодавниот дом.


Полицијата приведе двајца од напаѓачите на Села, кривична пријава доби напаѓачот на Заев


Скопје, 10 мај, 2017 - 11:06 (META) 

Полицијата рано утринава извршила претрес во домот на К.Ѓ. (39), а потоа го привела заедно со неговиот татко Ц.Ѓ. (68), под сомневање дека се едни од напаѓачите на пратеникот Зијадин Села во Собранието за време на насилното влегување на група граѓани во законодавниот дом.

Од МВР соопштуваат дека при претресот во 6 часот утринава биле пронајдени и подигнати патики со траги слични на крв, облека и три мобилни телефони кои се одземени, по што осомничените биле приведени во полициската станица во Кисела Вода за учество во толпа што ќе изврши кривично дело.

„При преземањето на мерките и активностите било утврдено дека во салата 3, каде се одржувала прес-конференција, Ц.Ѓ. најпрвин фрлил стол, а К.Ѓ. фрлал разни предмети кон присутните пратеници, по што двајцата заедно физички го нападнале и го влечеле пратеникот З.С.“, информираат од МВР.

Вчера полицијата на информативен разговор повикала еден од напаѓачите на лидерот на СДСМ, Зоран Заев, по што го ослободила и за него е поднесена кривична пријава за учество во толпа што ќе спречи службено лице во вршење службено дејство.

Од МВР додаваат дека во соработка со ОЈО и понатаму преземаат мерки и активности за идентификување и за документирање на лица за нападите во Собранието.