Свилановиќ: Кибернетичкиот простор, безбедносно жариште на Западен Балкан


Истанбул, 6 декември, 2018 - 13:48 (META) 

Новото безбедносно жариште и сериозен предизвик на глобално, регионално и локално ниво е кибернетичката сигурност, изјави денеска генералниот секретар на Регионалниот совет за соработка (РСС) Горан Свилановиќ на Третата регионална конференција за координација во борбата против тероризмот и насилниот екстремизам во Истанбул.

Тој додаде дека показател за тоа е и податокот дека само во 2017 година во шесте земји од Западен Балкан биле реализирани преку 400 кибернетички напади на институции.

Свилановиќ додаде дека Интернетот истовремено станал една од главните алатки на современите терористички организации за пронаoѓање, регрутирање и обука на новите членови, соопшти РСС

На конференцијата е претставена и Студијата „Ново виртуелно бојно поле – како да се спречи радикализацијата во рамките на кибернетичката безбедност на Западен Балкан“.

Студијата ја порача РСС, а ја финансираше Европската унија и таа е всушност сеопфатен пресек и анализа на кибернетичката безбедност и радикализација на интернетот во Албанија, БиХ, Косово, Македонија, Србија и Црна Гора.

Покрај Студијата е претставена и брошура и на македонски јазик, во која е направено визуелизирано резиме на наодите и препораките за унапредување на безбедноста во областа на кибернетичкиот простор.

На Конференцијата што ја организира РСС во соработка со домаќинот Турција, се зборува и за спречување на насилниот екстремизам и контрола на малокалибарското оружје.

РСС е меѓувладино извршно тело на земјите членки на Процесот за соработка во Југоисточна Европа, чиј основач и полноправен член е и Македонија.


Уапсени 14 лица во Турција, осомничени за подготовка на напади на изборите во недела


Анкара, 22 јуни, 2018 - 10:14 (META) 

Турската полиција денеска во Анкара уапсеи 14 лица за кои се верува дека се членови на т.н Исламска држава осомничени дека се подготвуваат за напад за време на претседателските и парламентарните избори кои ќе се одржат во недела.

Овие 14 лица, странски државјани, биле уапсени во низа полициски рации во нивните станови во Анкара, јавуваат туските медиуми.

Анкара, после низа на терористички напади на својата територија, ги затвори границите со Сирија, апсеше и протеруваше осомничени екстремисти, а се придружи и на меѓунардната коалиција за броба против Исламска држава.


Селмани: Полицијата да научи дека новинарите не се непријатели


Скопје, 12 јуни, 2018 - 14:25 (META) 

Полицијата треба да научи дека новинарите, кои известуваат од протести не и се непријатели, туку исто така професионалци на службена должност, кои треба да се заштитат ако бидат нападнати од учесниците во протестот. Таа заштита ја заслужуваат согласно домашното и меѓународното право, порача претседателот на Здружението на новинарите на Македонија (ЗНМ), Насер Селмани, на работилницата во Скопје за подобрување на безбедноста на новинарите за време на критични настани, во организација на ЗНМ, МВР, со поддршка на ОБСЕ.

– Едногласни сме дека насилството врз медиумските работници е неприфатлива практика за една демократска земја. Како важен елемент во функционирање на демократските процеси тие имаат право да работат во амбиент без закани и притисоци. Нивната мисија за информирање на граѓаните и барање отченост од секоја влада нема да се исполни ако работат во услови на страв и несигурност – рече Селмани.

Работилницата е дел од напорите за подобрување на соработката меѓу новинарите и полицијата, откако МВР и ЗНМ во декември минатата година потпишаа меморандум за соработка.

Министерот за внатрешни работи, Оливер Спасовски, рече дека не смее да има толеранција за нападите врз новинарите.

– За жал во последните неколку години бевме сведоци на бројни напади и притисоци врз новинари. Нема никакво оправдување за ваквите напади. Ставот на владата е јасен и постојано го повторуваме – нула толеранција за каков било обид за загрозување на слободата на говорот и изразувањето – рече Спасовски.

Џеф Голдстајн, в.д. амбасадорот на ОБСЕ,  на отворањето на настанот рече дека насилството врз новинари не се само вербални и физички напади, туку и незаконски притворања, уништување имот, произволни рации во редакциите или во домот на новинарите, говорот на омраза, напади на социјалните мрежи и закани за сексуални напади врз новинарки.


Спасовски: Не се расчистени 15 случаи на напади врз новинари


Скопје, 29 мај, 2018 - 16:07 (META) 

Петнаесет случаи за напади врз новинари сѐ уште не расчистени, соопшти министерот за внатрешни работи Оливер Спасовски денеска на прес-конференција во владата.

– Во последните неколку години имавме бројни напади на новинари. МВР направи анализа за да се утврди на кое ниво се истрагите досега. Се утврди дека во одредени постапки пропуштени се дејствија кои требало да бидат направени во краток рок, во некои постапки недостасуваат докази. Од 2013 до јуни 2017 до МВР се поднесени 47 пријави кои се однесуваат на физички напад на новинари или говор на омраза. Во Скопје се 29, во Охрид 14, две во Струмица, и во Штип и во Битола по еден – рече Спасовски.

Во периодот од 2017 до денес, до МВР се поднесени 12 пријави за напади врз новинари, од кои пет се во Охрид, четири се во Скопје, два во Велес и еден во Штип.

– Постапувано е во сите случаи и за две лица веќе се поднесени кривични пријави за сторени кривични дела насилство и загрозување на сигурноста, во три случаи се покренати прекршочни постапки против шест лица за констатирани три прекршоци – рече Спасовски.

Тој истакна дека сега заживува функционирањето на внатрешната контрола на МВР, која претходно прогледувала низ прсти.

– Апелирам до сите што доживеале објективен напад, како омаловажување или навреда да го пријават во полиција на 192 каде сѐ се снима и има траг. Не се пријавува на „Фејсбук“ – рече Спасовски.

Министерот за транспарентност, отчетност и комуникација, Роберт Поповски потенцираше дека ќе има нула толеранција за загрозување на слободата на изразување.

– Нула толеранција за каков било обид за загрозување на слободата на изразување. Секој напад врз медиумските претставници, физички или вербален, ќе биде најостро санкциониран – порача Поповски.


Советот за безбедност на ОН повика на спречување на ескалацијата на судирите во Сирија


Њујорк, 10 април, 2018 - 10:25 (META) 

Специјалниот пратеник на Обединетите нации за Сирија, Стефан де Мистура за време на заседувањето на Советот за безбеденост на Обединетите нации рече дека во смртоносните напади на Сирија, прв приоритет мора да биде заштита на цивили.

Тој повика на потполно почитување на Резолуцијата на Советот за безбедност 2401 со која се бара прекин на војната и обезбедување на услови кои би овозможиле испорака на хуманитарна помош и медицинска евакуација на оние на кои им е најпотребна.

Американската амбасадорка во ОН, Ники Хејли изјавила дека САД ќе одговорат на наводниот хемиски напад.

„Хемиското оружје се користи против сириските мажи, жени и деца. Историјата ќе забележи дали Советот за безбедност ќе ја изврши својата должност или ќе покаже потполн неуспех да ги заштити луѓето во Сирија“, изјавила Хејли.


Хуманитарна катастрофа во Доума, поради голем број на бегалци и недостаток на храна


Доума, 12 март, 2018 - 11:28 (META) 

Сирискиот град Доума се соочува со хуманитарна катастрофа, откако стана единствено прибежиште за илјадници луѓе кои бегаат од владините сили кои се во офанзива на Источна Гута, регион кој го контролира опозицијата.

Илјадници семејства бараат засолништа по улиците и парковите, имајќи предвид дека засолништата се преполни, а има и недостаток на храна.

Силите на сирискиот претседател Башар ал Асад напредуваат во офанзивата против енклавата недалеку од Дамаск, која ја држат опозициските сили.

Поради честите бомбардирања, стотиците загинати не можат достојно да бидат погребани.


Талибанците повикуваат на директни разговори со САД за Авганистан


Кабул, 27 февруари, 2018 - 14:25 (META) 

Талибанците повикаа на директни преговори со Соединетите Американски Држави за пронаоѓање на мирно решение за судирите во Авганистан, што претставува пресврт во политиката по неколкумесечните крвави напади, јавуваат светските агенции.

Бројот на цивилни жртви се зголеми во последните неколку месеци, по низата крвопролевања што ги предизвикаа талибанците и милитантите на Исламска држава при нападите на урбани подрачја и на припадниците на безбедносните сили, како одговор на новата воена политика на претседателот на САД, Доналд Трамп.

Во соопштението, издадено синоќа, талибанците ги повикуваат американските официјални претставници на директни преговори за мирно решение во Авганистан.

Засега нема одговор од амерканската страна, која претходно инсистираше дека во било какви разговори мора да биде вклучена и авганистанската влада во Кабул.

Трамп во јануари, годинава отфрли одржување на разговори со талибанците, по низата напади во Кабул, кои што беа изврпени во хотелот „Интерконтинентал“, на улица во авганистанската престолнина и на воена единица, во кои загинаа повеќе од 130 лица.

Авганистанскиот претседател Ашрав Гани изјави дека авганистанските власти ќе претстават соепфатен план за мир со талибанците и Пакистан за време на конференцијата во Кабул.


Авганистанската влада ги засилува мерките за безбедност во Кабул


Кабул, 7 февруари, 2018 - 19:33 (META) 

Авганистанската влада одобри нов безбедносен план за Кабул по низата напади на милитантите на главниот град, јавуваат светските агенции.

Портпаролот на министерството за внатрешни работи, Нусрат Рахими изјавил дека планот ќе биде имплементиран во следните две недели.

Тој изјавил дека повеќе од 100 улици кои водат кон центарот на Кабул ќе бидат под строг надзор.

Планот содржи 52 мерки и ќе биде спроведен во три фази.

Прозападната влада на Авганистан е под се поголем притисок од јавноста по низата напади во кои загинаа повеќе од 130 лица. Одговорноста за нападите ја презедоа талибанците и екстремистите на Исламска држава.


ЗНМ: Лани биле нападнати 18 новинари, никој не е повикан на одговорност


Скопје, 22 јануари, 2018 - 14:17 (META) 

Минатата година во Македонија вкупно се регистрирани 18 напади на новинари, од кои 13 физички и вербални напади, додека останатите се навреди, попречување во работа и уништување на имотот, се вели во Извештајот за слободата на медиумите и безбедноста на новинарите во Македонија за 2017 година кој денеска го презентираше Здружението на новинари.

– Минатата година во Македонија новинарите беа уценувани, прогонувани, тепани, добиваа смртни закани, се прогласуваа за предавници. Насилниците физички и вербално ги напаѓаат новинарите затоа што сакаат да ги заплашат и замолкнат со цел јавноста да не дознае за злоупотребите на власта – рече претседателот на ЗНМ, Насер Селмани.

Тој изрази загриженост што Обвинителството досега не покренало ниту едно обвинение пред судовите за насилство против новинарите и говор на омраза.

Селмани посочува дека најбрутален физички напад врз новинарите беше извршен за време на насилствата во Собранието на 27 април.

– Овие насилници физички ги нападнаа новинарите и снимателите и ги спречија да известуваат од Собранието. Притоа им ги одземаа и им ги оштетија камерите и мобилните телефони. Освен тоа, некои од нив, под закана и со оружје, беа со часови држени како заложници, а притоа полицијата не им пружи никаква заштита – вели Селмани.

Како извор на насилствата во 2017, Селмани посочува дека во 95 отсто од нападите се извршени или мотивирани од претходната власт предводена од ВМРО-ДПМНЕ. Според него загрижува што и по промената на власта обвинителство не покажува поголем интерес за процесуирање на овие напади.

Во периодичниот извештај на експертот Прибе од септември 2017 година на оваа тема се вели дека „Иако има извештаи за малтретирања, закани и насилства врз новинарите, се тврди дека надлежните не истражуваат, обвинуваат или ги казнуваат извршителите со што се остава впечаток на неказнивост. Заштитата на новинарите од неказнивоста на извршителите треба да биде приоритет, бидејќи нападите против новинарите кои се ја вршат работата се во суштина напад врз основните вредности на демократската држава“.

Во извештајот на ЗНМ се констатира дека покрај недостигот на безбедност во работата, новинарите во Македонија работат под исклучително лоши економски услови. Тие имаат мали и нередовни плати, а немаат ниту договори за трајно вработување кое негативно влијае на нивната професионална независност.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


ИД не е скршена, планира напади во Европа, тврди уапсен џихадист


Лондон, 13 декември, 2017 - 12:09 (META) 

Борец на Исламска држава, уапсен на границата со Турција, изјавил дека ИД не е се распаднала туку дека нејзините борци се префрлени во Европа за да извршат напади.

Британскиот весник „Дејли мејл“ наведува дека турските безбедносни служби минатиот месеци го уапсиле дваесет и шестгодишниот Садам ал-Хамади на турско-сириската граница. Тој тврди дека ИД не се распаднала, туку дека нејзините борци го искористиле хаосот кој настанал при ослободувањето на Рака и побегнале кон европските држави во кои планираат напади.

Ал Хамади соопштил дека терористите преку Турција ќе влезат во Европа и ќе изведат терористички напади. Весникот наведува дека уапсениот признал дека помогнал при шверцување терористи во Рака, која се сметаше за главно упориште на ИД.

Уапсениот 18 месеци бил во редовите на ИД, а тврди дека регрутирал и многу борци од повеќе држави, вклучувајќи ја и Британија.