Делев: Тевдовски ја задолжи државата за 43,9 милиони евра за да покрие буџетски дупки


Скопје, 15 август, 2017 - 16:54 (META) 

Владата на СДСМ за овој период ниту еднаш не се обиде да го намали јавниот долг како што ветуваше туку напротив, се повеќе долгот се продлабочува, обвини Христијан Делев на партиска прес-конференција во седиштето на ВМРО-ДПМНЕ.

–  Владата на СДС и Тевдовски денес се задолжија за нови неверојатни 2,7 милијарди денари односно 43,9 милиони евра.  Заедно со денешната аукција за овие три месеци министерот Тевдовски има издадено државни хартии во вкупна вредност од 145 милиони евра. Средствата се собираат директно од македонските банки, кои наместо да се користат за кредитирање на македонското стопанство,  се користат за покривање на буџетската дупка – рече Делев.

Тој рече дека владата на СДСМ го покажала вистинското лице со ребалансот на буџетот, којшто предвидува дополнително задолжување од 150 милиони евра, а згора на тоа, почнале да ги намалуваат и девизните резерви.

– Владата на Заев мора да запре со неконтролираното задолжување и да одговори на македонската јавност каде парите ќе бидат искористени – порача Делев.


Апелацискиот суд Скопје им ги намали затворските казни на осудените во „Шпион“


Скопје, 14 октомври, 2016 - 12:38 (META) 

Апелацискиот суд Скопје донесе одлука со која им ги намали првостепено досудените затворски казни на обвинетите во случајот „Шпион“, а на дел им одреди условни казни. Второстепениот суд делумно ги прифатил жалбите на 17 од обвинетите во случајот и ја преиначил пресудата во делот на казните, додека за еден, Ѓеорги Хаџи-Мицев, Апелација го вратила предметот на повторно судење и одлучување.

Со ваквата одлука Апелацискиот суд го прифати и барањето на Специјалното јавно обвинителство, кое на јавната седница, што се одржа на почетокот на септември, како надлежно за случајот ги одби како неосновани најголем дел од жалбите на обвинетите, но му предложи на судот да им ги намали или ублажи затворските казни.

„Апелацискиот суд – Скопје до Основниот суд Скопје 1 ја достави пресудата со КОКЖ 35/15 со која првостепенета пресуда за предметот во јавноста познат како „Шпион“ се потврдува, со тоа што жалбите на обвинетите делумно се уважуваат и пресудата се преиначува во делот на одлуката за казната, додека жалбата на обвинетиот Ѓ.Х. се уважува и во овој дел пресудата се враќа на повторно судење и одлучување. Во останатиот дел, првостепената пресуда се потврдува во целост“, стои во соопштението од Основниот суд Скопје 1.

На првообвинетиот во случајот „Шпион“, Марјан Ефремов, со одлуката на Апелација затворската казна му е намалена за четири и пол години и наместо 15 години, колку што првично беше осуден, сега ќе издржува казна од 10 години и шест месеци затвор.

Најголемо намалување има на казната на генералот Горан Стојков. Тој, според првостепената пресуда, беше осуден на девет години затвор, а сега таа е преиначена на три години и три месеци. Со пресудата на Апелацискиот суд, Стојков е осуден за злосторничко здружување и за изнуда, додека во првостепената постапка тој се товареше и за недозволено изработување, држење и тргување со оружје или распрскувачки материи и за послужување во службата.

Во утврдените казни, додаваат од судот, се смета и времето кое обвинетите го минале во притвор или куќен притвор.


Апелација драстично им ги намали казните на осудените за кражбата на артефакти


Скопје, 18 март, 2016 - 17:24 (META) 

Апелацискиот суд Скопје донел одлука со која им ги намали затворските казни на седуммината осудени за кражбата на артефакти од Музејот на Македонија, соопшти денеска Основниот суд Скопје 1.

Како што информираат оттаму, Апелацискиот суд ги прифатил жалбите на осудените и по оддржаната седница на 18 јануари годинава, донел пресуда со која ја потврдил првостепената пресуда, но ја преиначил во однос на казните.

Според пресудата на Апелацискиот суд, на поранешниот директор на Музејот на Македонија, Перо Јосифовски, кого Кривичниот суд на 20 март минатата година го осуди на казна затвор од 8 години и 8 месеци, сега му е изречена казна од 2 години и 3 месеци затвор, во кои е вклучено и времето поминато во притвор од 27 февруари 2014 година до правосилноста на првостепената пресуда.

Златко Видевски, кој со првостепената пресуда доби 6 години и 8 месеци затвор, сега е осуден на 2 години и 6 месеци затвор, а златарот Часлав Кузмановиќ, наместо 7 години и 8 месеци, со одлуката на Апелацискиот суд е осуден на 2 години и 6 месеци.

Пониски казни за неколку месеци добија и другите обвинети во случајот што беа осудени на 3, односно на 1 година затвор.

Апелацискиот суд ја укинал и пресудата со која Видевски, Јосифовски и Кузмановиќ беа осудени за кривичното дело отуѓување на културно наследство и го вратил тој дел од предметот на повторно судење.


Цената на бензинот се намалува за половина денар, а на дизелот за 1,5 денар


Скопје, 29 јуни, 2015 - 13:46 (META) 

Продажните цени на бензините ноќеска на полноќ ќе се намалат за половина денар, додека цената на еден литар дизел ќе се продава по еден и пол денар пониска цена, одлучи Регулаторната комисија за енергетика.

Во согласност со одлуката, новата цена на еден литар „еуросупер БС-95“ изнесува 71 денар, а на „еуросупер БС-98“ изнесува 73  денари.

Малопродажната цена на „еуродизелот“ изнесува 55 денари, додека екстралесното масло за домаќинство ќе се продава по 43,50 денари за еден литар.

Цената на мазутот М-1 НС изнесува 27 денари за еден килограм.


Намалена невработеноста во САД


Вашингтон, 7 ноември, 2014 - 19:12 (META) 

Нови 214.000 работни места отвориле работодавците во САД, а стапката на невработеност се спушти на ново најниско ниво за шест години, од 5,8 отсто, објави во петокот американското министерство за труд.

Со тоа продолжи солидното темпо на вработување во најголемата светска економија, во која во изминатите девет месеци нето-бројот на отворени работни места редовно надминуваше 200.000.