Саемот на книга го посетиле 44.300 посетители


Скопје, 9 мај, 2018 - 12:13 (META) 

Саемот на книга 2018 завршува денеска, а манифестацијата до вчера ја посетиле 44.300 посетители, информираа организаторите. На 30. јубилејно издание се претставиле 70-на издавачки куќи од Македонија, Србија, Црна Гора, Косово, Албанија.

„Соработката со Министерството за култура, како покровител на манифестацијата, Владата, Град Скопје заедно со ЈСП, со воведувањето на двете вонредни линии специјално за најголемата културна манифестација, придонесоа, покрај промената на локацијата, овој Саем уште повеќе да го зацврсне неговото постоење. Ова е голем напредок кој резултираше со инзвонредна бројка од 44.300 посетители, а Саемот уште не е завршен“, изјави проект-менаџерот на Саемот на книгата, Сања Кондарко.

Во рамките на програмата на Промотивниот центар, се доделија наградите во организација на Македонската асоцијација на издавачи (МАИ), а се доделија и наградите од страна на Здружението на издавачите и книжарите на Македонија (ЗИКМ).


Атанасова Точи добитник на наградата „Никола Младенов“


Скопје, 20 март, 2018 - 13:56 (META) 

Новинарката Менче Атанасова Точи е добитник на првата награда „Никола Младенов“ за најдобра истражувачка сторија за 2017 година, што денеска ја додели Македонскиот институт за медиуми (МИМ).

Точи е добитник на првата награда за серијалот текстови за домашниот паралелен увоз на лекови, со кои се откри фалсификувањето на лековите и злоупотребите на власта за манипулирање на граѓаните со квалитетот и цената на лековите.

Втората награда за најдобра истражувачка сторија ја доби тимот новинари на БИРН објавени за истражувачката сторија „Странските инвестиции под лупа“ објавени на „Призма“.

Третата награда ја добија Петар Клинчарски за сторијата „Илјада преводи“ и Лиридона Вејсели за сторијата „Каде е штабот на џихадистите“.

МИМ и додели пофалница и на Славица Филиповска за сторијата „Колку време ни треба да го уништиме најстарото езеро во Европа“ исто така објавена во емисијата „360 степени“ на „Алсат“.

На годинешниот 17. конкурс на МИМ се пријавиле 38 автори од вкупно 60 стории обработени во 154 текстови – прилози објавени на интернет портали, телевизии, дневни весници и во неделници.


Атанасова Точи и Лупевска Созен ги добија наградите за истражувачко новинарство на ЗНМ


Скопје, 28 февруари, 2018 - 16:52 (META) 

Здружението на новинари на Македонија денеска ги додели годишните новинарски награди за животно дело и за истражувачка сторија, по повод 72-годишнината од формирањето на ЗНМ.

Добитнички на наградата за истражувачко новинарство се новинарките Менче Атанасова Точи и Снежана Лупевска Созен, а наградата за животно дело му беше доделена на новинарот Љубомир Гајдов.

Лупевска Созен е наградена за емисијата „Код“, односно за настаните од 27 април во Собранието обработени во оваа емисија, а Атанасова Точи за сторијата за гинеколгот кој девет месеци лажел жена дека е бремена.

Претседателот на ЗНМ, Насер Селмани, рече дека тие се пример за тоа како треба да изгледа еден новинар во слободна и демократска земја. Потенцираше дека новинарите се уште се соочуваат со сериозни проблеми, како што е неказнивoста на насилството и реформата во медиумската законодавство.

„И покрај декларативната заложба на новата власт да се бори против практиката на неказнивост на насилството против новинари, сепак ниту еден напаѓач на новинар не е изваден пред лицето на правдата“, истакна Селмани.

Тој додаде дека во меѓувреме новинарите се соочуваат со нови форми на притисок, како што е обидот да им се врзат рацете на новинарите доделувајќи им безбедносни сертификати и практиката на големите компании да ги користат рекламите за притисок врз медиумите.

„Обединети и сплотени сме посилни и поиздржливи до денот кога слободата на говорот во Македонија нема да биде само мртво слово на хартија, туку ќе биде дел од нашиот живот“, порача претседателот на ЗНМ.

Годинава за наградата за истражувачки стории беа пријавени 25 новинари.


Бектеши: Финансиска поддршка за малите претпријатија ќе има и догодина


Скопје, 19 декември, 2017 - 14:58 (META) 

Министерството за економија, во рамки на годишната Програма за конкурентност, иновации и претприемништво, годинава поддржало 89 претпријатија, 23 занаетчии и 30 проекти на фондации, кои ги исполниле условите.

На манифестацијата „Претприемач на годината“, министерот за економија Крешник Бектеши информираше дека и догодина претприемачите ќе може да добијат поголем финансиски стимул за реализација на своите бизнис активности.

– Значењето на малите и средните претпријатија (МСП) и нивната значајна улога во генерирањето на економски раст и креирањето на нови работни места е широко препознаена и призната, па во ЕУ-стратегијата за пораст „Европа 2020“, како посебна иницијатива се издвојува поддршката на претприемништвото – рече Бектеши.

Претседателот на Сојузот на стопански комори на Северозападна Македонија, Неби Хоџа во своето обраќање истакна дека, младите во земјава се соочуваат со административни и професионални бариери при регистирањето на компании.

– Тоа резултира со помал број барања за отворање биниси. Затоа треба да се промени перцепцијата дека бизнисот е тежок и проблематичен –  рече Хоџа.

Помеѓу наградените компании на манифестацијата „Претприемач на годината“ која се одржува по 11. пат, се  „Линк шпед“ од Тетово, „Аерус“ од Пробиштип, „Силотер“ од Струмица.


Свечено врачени наградите „13 Ноември“ за 2017 година


Скопје, 14 ноември, 2017 - 11:37 (META) 

Синоќа, во Македонската опера и балет, се одржа свеченоста по повод одбележување на 13 Ноември – Денот на ослободувањето на Скопје, на која градоначалникот на Град Скопје, Петре Шилегов, на годинешните добитници им ги врачи наградите „13 Ноември“ за 2017 година.

– Денеска одбележуваме 73 години од ослободувањето на градот од фашистичките окупатори, победа којашто со пожртвувана борба ја извојуваа врз посупериорниот противник, генерациите коишто го почнаа градењето на самостојната држава во која нејзините граѓани ќе ги остваруваат своите идеали. Знам дека граѓаните на Скопје избраа живот во модерна Европа, но знам дека овој град е со многу предизвици и јас сум свесен за предизвикот кој го имам пред мене, загадувањето е секако најголемиот, но има и многу други проблеми и во инфраструктурата, урбанизмот, зеленилото…Но, заедно со мојата администрација сме подготвени да инвестираме во заедничката иднина на Скопје и да го направиме функционален град – рече Шилегов.

Добитници на Наградата „13 Ноември“ на Град Скопје, за 2017 година се Хаки Имери и Горан Кондов за наука, Јадранка Клисарова за образование и воспитание, Димитар Башевски и Пунторие Муча Зиба за култура и публицистика, Васил Атанасов и Стефан Хаџи-Николов за уметност, Раде Илиевски и Жан Митрев за здравствена заштита и хуманитарната активност и Чедомир Јаневски и Атанас Николовски за спорт.


Доделени наградите на Советот за етика во медиумите за најдобри новинарски стории


Советот за етика во медиумите денеска ги соопшти имињата на наградените новинари на конкурсот за најдобри новинарски стории од сферата на општествено-социјалниот живот, со фокус на унапредувањето на човековите права и промовирањето на правата на социјално ранливите и маргинализирани групи.

Според едногласната одлука на тричленото жири, првото место го освоила сторијата на новинарката Ирена Мулачка од „Фокус“, за скандалот на скопската Клиника за гинекологија, во кој разоткри дека околу 80 новороденчиња починале за шест месеци. Второнаградената сторија на годинешниот конурс на СЕММ е на авторот Никола Здравковиќ, насловена „Семејна трагедија ја остави без парче леб Гордана Славковиќ“, објавен во рамките на емисијата „360 степени“, на Телевизија „Алсат-М“.

Третата награда ја делат два новинарски труда. Првиот е на новинарката Мирјана Мирчевска-Јовановиќ за серијалот прилози за „Малиот Иван и неговата баба“, објавен на „Канал 5“, а вториот е трудот на новинарот Марјан Николовски за прилогот со наслов „Можат ли верските заедници да ги тргнат сите бариери за непречена молитва“, објавен на телевизија „Сител“, во рамките на емисијата „На иста страна“.

Освен награди за најдобрите стории, жирито одлучило да додели и две пофалници. Првата е за новинарската сторија на авторката Маја Раванска, со наслов „Македонскиот Стивен Хокинг задушен во стегите на неинклузивно општество“, објавена во весникот „Лице в лице“, а втората пофалница е за телевизискиот прилог „Да прогледаат тие што треба да видат“ на авторот Зоран Јованоски, од проектот „360 степени“ на „Алсат-М“.

За најдобрите трудови решавало жирито во состав Бардуљ Заими, Жанета Трајкоска и Зоран Иванов. Наградите се доделуваат со финансиска поддршка од УНЕСКО и од ЕУ.


Изложба на графичарката Андријана Мациев во Прилеп


Прилеп, 27 јули, 2017 - 10:56 (META) 

Во галеријата „Борко Лазески“ во Центарот за култура „Марко Цепенков“ во Прилеп, утре во 20 часот ќе биде отворена изложбата на дела „Живот во бои 2“ од уметницата Андријана Мациев, која пред прилепчани ќе се претстави со 15 дела.

Андријана Мациев дипломирала на Факултетот за ликовни уметности при Универзитетот „Свети Кирил и Методиј“ во Скопје, во одделот графика, во класата на професор Димитар Малиданов. Член е на Друштвото на ликовни уметници на Македонија.

Зад себе има бројни самостојни и групни изложи и награди стекнати во Европа и во Македонија.


Таравари: Од утре ќе се разгледува проектот „Мој термин“


Скопје, 5 јуни, 2017 - 15:32 (META) 

Промени во проектот „Мој термин“ на Министерството за здравство, односно отфрлање на казните за докторите, најави денеска министерот за здравство, Арбен Таравари, на одбележувањето на 25-годишнината на Лекарската комора на Македонија.

– Јас сум за промени во „Мој термин“, а веќе утре ќе имам состанок со претставниците на овој проект. Учинокот ќе остане, но нема да има негативен учинок. Платата ќе си биде 100 проценти, а ќе има и наградени доктори, односно тие што ќе бидат најуспешни – најави Таравари.

Наградите за докторите, според него, треба да се обезбедат од средствата за платите за економските директори на здравствените установи, кои треба да се укинат.


Саемот за мебел почнува утре, ќе има 400 домашни и странски изложувачи


Скопјхе, 20 март, 2017 - 11:12 (META) 

Меѓународниот саем на мебел почнува утре и ќе трае до 26 март. На саемот ќе учествуваат 400 домашни и странски изложувачи, а се очекува да го посетат повеќе од 50.000 лица.

Во 11 хали ќе бидат претставени мебел и опрема за домаќинства, а една хала е наменета за машини и за репроматеријали за индустријата за производство на мебел.

Традиционално ќе се организира стручно оценување на пријавени експонати и ќе бидат доделени признанија на најдобрите учесници на саемот, во две категории, производители и трговци.

Има учесници од Србија, Хрватска, Грција, Италија, Босна и Херцеговина  и од Словенија.

Саемот ќе биде отворен од 10 до 20 часот, цената на влезницата е 100 денари, а за групни посети и за студенти чини 50 денари.


Четири компании се наградени за најуспешни претприемачи на годината


Скопје, 28 декември, 2016 - 12:08 (META) 

Традиционално и годинава, на јубилејното 10. издание на престижната манифестација „Претприемач на годината“ беа доделени наградите на најуспешните претприемачи на мали и микропретпријатија во Македонија.

Во категоријата мали претпријатија првата награда му припадна на Деан Бадаревски од „Софа студио“ од Скопје, додека втората награда му припадна на Васко Брдаровски од „Евросуровина ПА“ од Битола.

Во категоријата на микропретпријатија, добитник на првата награда е Хашим Хасани од „Хотел Скардус“ од Тетово, додека втората награда ѝ припадна на Биљана Кукловски од „Чоко авијаторс“ од Скопје.

Претселекцијата за избор на „Претприемач на годината – 2016“ беше направена врз основа на податоците од Централниот регистар.

Имено, 56 мали и микропретпријатија, во периодот од 2013 до 2015 година, имаат реализирано пораст врз основа на број на вработени, вкупни приходи, добивка и инвестиции.

Наградите ги доделија претседателот на Сојуз на стопански комори на Македонија (ССК), Данела Арсовска, извршниот директор на Македонска развојна фондација на претпријатијата (МРФП), Тетјана Лазаревска, претседателот на Стопанска комора на Северозападна Македонија (СКСЗМ), Неби Хоџа, како и Бојан Јовановски од Националниот центар за развој на иновации и претприемачко учење.