Заев и Ципрас во Минхен ќе примат награда


Минхен, 15 февруари, 2019 - 13:47 (META) 

Премиерот Зоран Заев од денеска до недела заедно со владина делегација ќе присуствува на годинешната Минхенска конференција за безбедност.

На настанот ќе има заедничка дискусија за Република Северна Македонија и Република Грција на која како главни панелисти се предвидени премиерите Зоран Заев и Алексис Ципрас.

„Оваа панел дискусија на Минхенската конференција за безбедност традиционално им е посветена на добитниците на главната награда на конференцијата „Евалд Фон Клајст“, која оваа година свечено ќе им биде врачена на премиерите Зоран Заев и Алексис Ципрас на посебната церемонијална вечера чиј домаќин е премиерот на Федералната држава Баварија Флориан Херман“, се вели во соопштението од влада.

Предвидено е Заев да има билатерална средба со премиерката на Кралството Норвешка, Ерна Солберг, со претседателот на Црна Гора Мило Ѓукановиќ, со премиерот на Косово Рамуш Харадинај како и со сенаторот Џејмс Риш, претседавач на Комитетот за надворешни работи на Сенатот на САД и со поранешниот потпретседател на САД Џо Бајден.


Заев и Ципрас ќе примат награда на Минхенската безбедносна конференција


Минхен, 1 февруари, 2019 - 10:10 (META) 

Наградата „Ewald von Kleist“ на Минхенската безбедносна конференција, оваа година, ќе им биде доделена на Зоран Заев и Алексис Ципрас за Договорот од Преспа, објави „Дојче Веле“ на грчки јазик.

Претседателот на конференцијата, Волфганг Ишингер на неговиот официјален „Твитер“ профил на 25 јануари, кусо откако Договорот од Преспа беше ратификуван од грчкиот Парламент, напиша дека „ двајцата премиери ќе бидат поканети на 16 февруари во Минхен да ја примат престижната награда“ за време на 55-та конференција.

Портпаролот на Минхенската безбедносна конференција што ќе се одржи од 15 до 17 февруари, вчера за „Дојче веле“ потврдил дека и Заев и Ципрас ја прифатиле поканата.

Наградата се доделува од 2009, а меѓу досегашни добитници се Хавиер Солана, Јоаким Гаук и ОБСЕ.


Критики за потегот на Стојанче Стоилов што ја напуштил свеченоста поради албанскиот јазик


Скопје, 27 декември, 2018 - 16:36 (META) 

Користењето на албанскиот јазик на манифестацијата „Спортист на годината“ во организација на Агенцијата за млади и спорт вчеравечер го испровоцирало ракометниот репрезентативец Стојанче Стоилов демонстративно да си замине, пишува „Порталб.мк“. Неговиот потег го критикуваат спортисти и спортски работници, кои се прашуваат дали не треба да му се одземе наградата „Спортист на 2017 година“.

Директорот на Македонската кошаркарска федерација, Владимир Темелковски, го нарече потегот „срамен и низок и спротивен на светото спортско мото“.

„Во спортот нема место за политика, расна и полова дискриминација или национализам, но очигледно некои спортисти го заборавиле Најважното и светото спортско мото, дека во спортот нема раса, религија или националност. Во спортот сите се еднакви, а победуваат нај упорните и најпосветените, а за оние кои што предвремено се откажуваат и презентираат омраза и нетолеранција, не им е местото во спортот“, напиша, меѓу другото, Темелковски на својот Фејсбук профил.

Координаторот на Работната група за изработка на национална стратегија за едно општество за сите и интеркултурализам, Рубин Земон порача дека Стоилов со својот потег покажал дека не е спортист.

„Стојанче Стоилов покажа синоќа дека не е спортист, туку само играч во ракометот. За спортист треба да бидеш голем човек полн со толеранција надвор од теренот“, напиша Земон на својот Фејсбук профил.


Лазаревски и Костовски номинирани за наградата на ЕП за свиркачи на годината


Скопје, 21 мај, 2018 - 10:56 (META) 

Во Европскиот парламент во Стразбур на 29 мај ќе бидат соопштени имињата на добитниците на наградата „Новинари, укажување и бранители на правото на информирање“, која годинава се доделува во чест Дафне Каруана Галиција, малтешката новинарка, која беше убиена со бомба поставена во нејзиниот автомобил во октомври лани.

Меѓу номинираните се и Ѓорѓи Лазаревски и Звонко Костовски,  вработените во МВР кои го открија скандалот со масовното прислушување и придонесоа за промена на власта во Македонија.

Номинирани се и Јан Куцијак, словачки истражувачки новинар, кој истражуваше даночни измами меѓу бизнисмени и словачки политичари, потоа Џулијан Асанж, основачот на „Викиликс“, Марија Ефимова, укажувач, која откри корупција поврзана со малтешките политичари и Рафаел Халет, укажувачот за даночна евазвија во Луксембург, поврзан со „Луксембург Ликс“.


Светислав Басара добитник на наградата „Прозарт“


Скопје, 21 мај, 2018 - 10:51 (META) 

Српскиот писател Светислав Басара е годинашен добитник на „Прозарт“ – наградата што Интернационалниот литературен фестивал „ПРО-ЗА Балкан“ од Скопје ја доделува за авторски придонес кон развојот на книжевноста на Балканот.

Авторот на „Фама за велосипедистите“, кој според многу ранг-листи на критиката се смета за еден од најдобрите српски романи на 20 век, беше едногласно избран од одборот за доделување на наградата: Ермис Лафазановски, Александар Прокопиев и Дејан Трајкоски.

Басара ќе ја прими наградата во Даут-пашиниот амам, на затворањето на фестивалот, 29 мај, од 19.30 часот.

На тридневниот фестивал Басара ќе биде во друштво на петмина врвни автори од Балканот. Тоа се: Роберт Перишиќ од Хрватска, Фросина Пармаковска од Македонија, Ајфер Тунч од Турција, Јуриј Худолин од Словенија и Лејла Каламујиќ од Босна и Херцеговина.


Филмот „Исцелител“ по наградите во Бергамо и Софија, на фестивал во Обањ


Скопје, 21 март, 2018 - 14:20 (META) 

Филмот „Исцелител“, кој минатата недела освои две значајни награди на два престижни меѓународни филмски фестивали, утре ќе биде дел од  натпреварувачката програма на фестивалот во Обањ, Франција, каде е во конкуренција за награда со девет други филмови.

На филмскиот фестивал во Бергамо, Италија минатата недела „Исцелител“ на младиот режисер Ѓорче Ставрески беше избран за најдобар филм во главната натпреварувачка конкуренција, а на филмскиот фестивал во Софија доби специјална награда од жирито на Балканската програма.

Покрај овие два фестивала, „Исцелител“ истовремено беше прикажан и на „Франкофилм“ во Рим и на „Фебиофест“ во Прага, каде сите проекции беа целосно распродадени.

Филмскиот фестивал во Обањ е основан 2001 година како фестивал кој е посветен на промоција на нови кинематографски остварувања со посебен акцент на музиката во филмовите. „Исцелител“ досега учествуваше на 16 филмски фестивали и освои пет меѓународни награди, а во Македонија го гледаа околу 12.000 гледачи.


Пратеникот Артан Груби става свои лица да делат награди за новинарство


Скопје, 8 март, 2018 - 10:21 (META) 

На 1 март во Собранието е одлучено дел од Советот за доделување на државната награда „Мито Хаџи Василев Јасмин“ за областа на новинарство, да биде сопственикот на порталот „Тетова сот“, Рами Мислими, кој воедно е и вработен во Општина Тетово од времето кога градоначалник беше Сади Беџети, објави „Порталб“.

Именувањето на Мислими како член на Советот, на местото на Бујар Плоштани, е на предлог на пратеникот на ДУИ, Артан Груби. Мислими не беше предлог на Министерството за култура, но според процедурата, пратениците имаат право да ги тргнат предлозите на Министерството, а на нивни места да предложат други имиња.

– Јас не го знам Бујар Плоштани, никогаш не сум му ја слушнал гласот – изјави Груби, при предлогот да се отстрани Плоштани од листата на предложени имиња на Министерството за култура, и на негово место да дојде Мисими.

Пратеникот Груби, беше недостапен на телефонските повици на „Порталб“, за да се изјасни, врз основа на кои критериуми го предлага Мислими.

И Мисими, за порталот „Алмакос“, не сакал да го коментира својот избор.

Предлогот на Груби беше одобрен во Собранието со само еден глас против – на пратеникот на СДСМ, Мухамед Зекири.

– Јас гласав така затоа што сум против Мислими да биде член на Советот. Мислам дека има многу други новинари што би требало да бидат во тој Совет – истакна Зекири.

Подолу можат да се видат и предложените имиња од Министерството за култура.
Kom-1

kom-2

Од Министерството за култура објаснија дека тие не можат да се мешаат во изборот на членовите на Советот.

-Ние ги предлагаме имињата во Комисијата за избори и именувања каде тие треба да се гласат. Изборот на Мислини не е наш предлог и не можеме да се мешаме во личните избори на никого – велат Министерството за култура.


Македонскиот „Види ја ти неа“ најдобар интернационален краток филм на „Санденс“


Парк Сити, 24 јануари, 2018 - 12:25 (META) 

Краткиот филм „Види ја ти неа“ во режија на Горан Столевски и продукција на Скопје Филм Студио и Црна Мачка Продукција на 34-от Филмски фестивал Санденс, најголемиот американски фестивал на независен филм, ја освои наградата Најдобар интернационален игран филм во категоријата кратки филмови. Во конкуренција за наградата беа 17 наслови од целиот свет.

„Види ја ти неа“ е приказна за младата девојка Анета, која се обидува да ги реши проблемите во семејството и училиштето вклучувајќи се во еден исклучиво машки верски ритуал, скокање по крстот за Водици.

Улогите во филмот ги толкуваат Сара Климоска, Игор Ангелов, Пируника Киселички и други. Сценарист е режисерот Столевски, кинематографер е Наум Доксевски, сценограф Влатко Чачоровски а костимограф Жаклина Крстевска.

Филмот е финансиски поддржан од Агенцијата за филм на Република Македонија.

Горан Столевски е роден во Македонија, а живее и работи на релација Австралија – Велика Британија. Своето образование го стекнал на Универзитетот во Мелбурн и Викторијанскиот колеџ за уметности во Мелбурн. Столевски веќе има реализирано над дваесет кратки филмови, прикажани и наградувани на голем број фестивали низ целиот свет.


Новинарот Манасиев и фоторепортерот Личковски добитници на „Жан Моне“


Скопје, 13 декември, 2017 - 10:35 (META) 

Наградата „Жан Моне” за 2017 за најдобра новинарска сторија ја доби Александар Манасиев, новинар на „Топ тема на ваша страна“ на телевизија „Телма“, за текстот за фалсификуваните дипломи за англиски јазик на кандидатите за обвинители во Академијата за судии и јавни обвинители.

Фоторепортерот на „Сакам да кажам“ Ѓорѓи Личовски ја освои наградата за 2017 за најдобра фотографија, за снимката на рибарите на Дојранското Езеро.

За аматерска фотографија награда доби Дајана Лазаревска.

„Жан Моне“ годинава беше на тема „ЕУ за тебе“, а за признанието се доделува и парична награда од 1.000 евра. Наградите ги додели шефот на делегацијата на Европската Унија, Самуел Жбогар.


Андоновски, Тавитјан и Плевнеш, добитници на наградата „Св.Климент Охридски“


Скопје, 8 декември, 2017 - 16:45 (META) 

Во Собранието на Република Македонија денеска беше врачена државната награда „Св. Климент Охридски“ за 2017 година.

Во областа на воспитанието и образованието, добитници на наградата се професорот и писател Венко Андоновски и историчарот Наим Алими. Во областа на културата и уметноста, добитници на наградата се музичарот Гарабет Тавитјан, писателот Јордан Плевнеш и филмологот Илинденка Петрушева.

– Без филм, филмска критика и филмологија, без драма, театар, проза, без музика, без историја – нема стварност. Свети Климент е ученик и учител. Сите ние сме учеле од некого, значи сме биле ученици, а сме и учители – рече Андоновски.

На врачувањето на наградата присуствуваа премиерот Зоран Заев, министри, академици и  уметници.

Наградата „Св. Климент Охридски“ е највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес на Република Македонија.