!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Изборите во Србија ќе ги следи и Централната изборна комисија на Русија


Белград, 20 март, 2017 - 21:10 (META) 

Претседателските избори во Србија на 2 април ќе ги следи и Централната изборна комисија на Русија, која ќе има двајца набљудувачи, соопшти Републичката изборна комисија на Србија.

За разлика од нив, ОБСЕ/ОДИХР нема да имаат набљудувачи на изборите, туку само ќе испратат мисија со ограничен капацитет, која ќе следи посебни аспекти на изборниот процес, односно правната рамка и медиумското известување.

Од домашните организации, пријава за набљудување на изборите досега поднеле само Центарот за истражување, транспарентност и одговорност (ЦРТА), „Граѓани на стража“, Центар за слободни избори и демократија и Комитетот на правници за човекови права.

Рокот за пријава за странски набљудувачи на изборите истекува на 22 март, а за домашни набљудувачи на 27 март.


Градоначалникот на Алепо побара да се испратат набљудувачи од ЕУ


Брисел, 15 декември, 2016 - 14:08 (META) 

Градоначалникот на Алепо ги повика лидерите на ЕУ да испратат набљудувачи за извлекувањето цивили од градот да биде под контрола.

– Никогаш не сме побарале од која било дражва да влезе во војна. Само баравме да се спасат цивилите и да осигураат коридори за нивна евакуација –  изјави Брита Хаги Хасан од седиштето на ЕУ во Брисел.

Хасан истакна дека на повеќе од 800 ранети во источниот дел на Алепо им е потребна итна евакуација, но и повеќе од 5.000 други повредени бараат излез од овој регион. Тој предупреди дека околу 50.000 цивили во источен Алепо би можеле да станат жртви на општ масакр.


ОБСЕ: Изборите поминаа добро, но државата мора да ги зајакне институциите


Скопје, 12 декември, 2016 - 16:10 (META) 

Изборниот ден главно помина добро, а доколку има поплаки, инстутициите и државата треба да се справат со нив, изјави специјалниот претставник на ОБСЕ, Роберто Батели, при презентирањето на првичните наоди за текот на изборниот процес.

Во заедничкиот заклучок на меѓународните набљудувачи се истакнува дека граѓаните ја сфатиле важноста и улогата на изборите, а политичарите сега треба да ја искористат можноста за да се справат со политичката криза.

Странските претставници очекуваат новата влада да ги спроведе реформите во институциите и да продолжи да ги спроведува исправките на избирачкиот спиосок, кај кој се забележани недостатоци.

Во заклучоците од изборниот процес се наведува дека ДИК не успеала да ги запази сите рокови и да ги спроведе сите неопходни промени поради што се регистрирани случаи на лица кои се избришани од избирачкиот список.

Во извештајот се наведува загриженоста од случувањата од последната недела од изборниот процес, кога се регистрирани заплашувања и вршење притисоци врз граѓани и претставници на јавната администрација. Ваквата појава мора целосно да се искорени бидејќи е неприфатлива, сметаат набљудувачите.

– По изборите, Македонија се наоѓа на крстопат кој отвора можност за нормализирање на политичкиот живот. Политичарите мора да ги спроведат препораките од ЕУ за да се вратат на патот кон евроинтеграциите – изјави Штефан Шенан.

Тој истакна дека меѓуетничката поделба во изминатиот период е намалена, а тоа можело да се забележи од минатогодишните протести кои биле меѓуетнички и покажале што може да се постигне ако се работи заедно.

Во извештајот, исто така, се наведува дека новата влада ќе мора да продолжи да работи за реформи за независност на медиумите и на судството, како и за одвојување на центрите на моќта.

На новинарско прашање како реално ги оценуваат изборите поради различните извештаи на партиите, Батели рече дека изборите поминале добро, но дека државата мора да ги зајакне институциите и сама да ги решава проблемите, а не постојано да бара помош од странство во решавање на внатрешните кризи и проблеми.


„Мост“: Навреме се отворени гласачките места, забележано е фотографирање ливчиња


Скопје, 11 декември, 2016 - 9:57 (META) 

Граѓанската асоцијација „Мост“ информира дека навреме се отворени сите гласачки места на кои имаат распоредено свои набљудувачи, освен две места во Куманово и во Велес.

– Гласачкото место 1.036 во општина Куманово е отворено со 15-минутно задоцнување. Гласачкото место 2.210 во општина Велес е отворено со 30-минутно задоцнување поради тоа што немало електрична енергија – се додава во соопштението на „Мост“.

Оттаму информираат дека досега е забележано фотографирање гласачки ливчиња со мобилен телефон.

– На гласачкото место 1.580/1, во општина Радовиш, еден гласач го фотографирал гласачкото ливче со мобилен телефон. Избирачкиот одбор не забележал и не реагирал. На гласачкото место 2.556 во општина Ѓорче Петров, пак, еден гласач го фотографирал гласачкото ливче. Повикана е полиција – велат од „Мост“.

Во текот на денот, за граѓаните кои сакаат да пријават евентуални нерегуларности или да дадат информации поврзани со изборниот процес, отворена е бесплатната телефонска линија 080 080 080, а истото може да го сторат и преку интерактивната веб-платформа neregularnosti.most.org.mk.

Граѓанската асоцијација „Мост“ ги следи изборите со повеќе од 3.000 набљудувачи.

 


„Мост“: Гласајте по своја волја и пријавете нерегуларности


Скопје, 10 декември, 2016 - 11:50 (META) 

Граѓанската асоцијација „Мост“ ќе ги следи изборите утре со повеќе од 3.000 набљудувачи, со што ќе покријат 55 проценти од вкупниот број на избирачки места.

– Статичните набљудувачи (2.664) ќе го следат гласањето, процесот на затворање и на броење на гласовите и на финализирање на административните работи од страна на избирачките одбори. Логистика на статичните набљудувачи ќе им бидат 120 мобилни тимови, а 80 набљудувачи ќе ја следат работата на општинските изборни комисии, како и Државната изборна комисија – изјави престедателот на „Мост“, Дарко Алексов, на денешната прес-конференција.

Согласно упатството на ДИК, од „Мост“ потсетија дека се гласа со сино мастило и со заокружување. Ако се гласа со мастило во друга боја, ливчето ќе биде неважечко.

Алексов додаде дека „Мост“ го следи и денешното предвремено гласање на болните, внатрешно раселените лица и затворениците. Освен доцнење со предавање на материјалот за гласање, други неправилности засега нема, кои доколку бидат забележани, јавноста ќе биде известена денеска или во прелиминарните извештаи утре.

Оттаму ги повикаа граѓаните ако сакаат да пријават нерегуларности, тоа да го направат преку телефонскиот број 080 080 080, како и преку интерактивната платформа neregularnosti.most.org.mk

Од асоцијацијата „Мост“ апелираа за одржување на фер и демократски избори, а граѓаните да гласаат по сопствена волја, бидејќи гласањето е слободно, а тајноста на гласот загарантирана.

 


Коцијанчич: Одблиску ќе ги следиме изборите, тие се можност за нов почеток


Брисел, 9 декември, 2016 - 14:03 (META) 

Европската Унија одблиски ќе ги следи изборите в недела, а првата реакција околу исходот ЕУ очекува да ја има в понеделник, на 12 декември, попладне, изјави денеска портпаролката на Европската комисија, Маја Коцијанчич.­

– Во однос на тоа што ќе се случи како следен чекор, ние, се разбира, одблиску ќе ги следиме изборите, како што правевме и со целиот процес до изборите. Се разбира, ќе има и меѓународни набљудувачи на теренот и ние, исто така, ќе го чекаме нивниот извештај, по што очекувам дека ќе имаме реакција некаде попладнето в понеделник – рече Коцијанчич.

Таа истакна дека предвремените парламентарни избори во Македонија се можност земјата да направи нов почеток и да се врати на евроинтеграцискиот пат.

– Како што досега повеќепати сме кажале во однос на овие избори, тие се можност за земјата да направи нов почеток, да се обедини околу стратешките цели и да се врати на евроинтеграцискиот пат. Очигледно, ова е само еден чекор од еден многу подолг процес, како дел од процесот од Договорот од Пржино и јасно е дека ова што е договорено во рамки на овој договор, ќе треба да продолжи да се имплементира – истакна Коцијанчич.

­


ДИК го објави распоредот на прес-конференциите за изборите


Скопје, 9 декември, 2016 - 10:26 (META) 

Државната изборна комисија (ДИК) го објави распоредот на прес-конференциите што ќе се одржат утре и задутре (10 и 11 декември) во нивните простории.

За утре, 10 декември, ДИК закажа прес-конференција во 12 часот, на која ќе се говори за логистиката на денот на изборите.

За недела, на 11 декември, закажани се прес-конференции во 11, 14 и во 18 часот, на кои ќе се соопштува излезноста на граѓаните. Од 19 часот па натаму ќе бидат соопштувани резултатите од избирачките места во живо.

– Прес-конференциите се отворени за домашните медиуми, домашните и странските акредитирани набљудувачи, странските акредитирани новинари, како и за овластените претставници на подносителите на листи на кандидати – се вели во соопштението на ДИК.


„Мост“: Се прават притисоци за гласање и за присуство на администрација на митинзи


Скопје, 25 ноември, 2016 - 12:31 (META) 

За периодот од 15 октомври до 20 ноември, граѓанската асоцијација „Мост“, која го набљудува предизборниот период, забележала непочитување на одвојувањето на државата и на партијата, притисоци врз јавниот сектор, притисоци за гласање и злоупотреба на јавни ресурси.

– Во овој период забележавме присуство на функционери и вработени во јавниот сектор на партиски настани. Вакви се 43 случаи во 26 општини. Има 41 случај на притисоци врз вработените во јавниот сектор да посетуваат партиски митинзи на владејачката партија. Во седум случаи во пет општини има притисоци за гласање или обезбедување гласачи за владејачката партија, а во седум случаи во шест општини забележавме употреба на службени возила за партиски цели – вели директорот на „Мост“, Дарко Алексов.

Од „Мост“ велат дека овие случаи содржат индиции за сторени кривични дела и, доколку се докажат, според Кривичниот законик, за нив е предвидена казна затвор во траење од шест месеци до една година.

Граѓанската асоцијација овие докази ќе ги достави и до Комисијата за следење на изборни нерегуларности, која беше формирана од Јавното обвинителство на Република Македонија.

„Мост“ на терен има 80 долгорочни набљудувачи, а досега добиле 2.025 извештаи.


ОБСЕ/ОДИХР ќе ги следи изборите со повеќе од 300 набљудувачи


Скопје, 3 ноември, 2016 - 15:48 (META) 

Канцеларијата на мисијата на ОБСЕ за демократски институции и за човекови права (ОДИХР) денеска официјално ја почна набљудувачката мисија за предвремените парламентарни избори кои се закажани за 11 декември.

Мисијата се состои од главен тим на 14 експерти и од 20 долгорочни набљудувачи, кои ќе бидат распоредени низ целата земја во тимови по двајца, почнувајќи од 9 ноември.

ОДИХР ќе побара од земјите членки на ОБСЕ да обезбедат 300 краткорочни набљудувачи што ќе го надгледуваат процесот на денот на изборите.

Мисијата е предводена од Тана де Зулуета, која веќе се сретнала со членовите на Државната изборна комисија и со претставници на МНР. Во наредниот период претставници на ОБСЕ ќе се сретнат со политичките партии, цивилното општество и со медиумите.

– Мандатот ни е да вршиме набљудување и оценка на изборната кампања и на денот на изборите. Бројот на набљудувачи е висок и ни овозможува да имаме добра анализа за изборниот процес – рече Де Зулуета.

Таа додаде дека набљудувачите на ОБСЕ ќе бидат неутрални и дека доколку се случат сериозни безбедносни ситуации, тоа ќе го истакнат, но решавањето на вакви ситуации е работа на владата.

Де Зулуета заклучи дека политичката волја да се оди на избори се чини дека е едногласна.

На новинарско прашање дали може ОБСЕ/ОДИХР да сугерира непризнавање на резултатите од изборите, таа рече дека тие немаат мандат за тоа и ќе остават тоа да го одлучат надлежните органи.

ОБСЕ ќе го објави конечниот извештај следната година, околу осум недели по завршувањето на изборите.


Вељаноски упати покана за набљудување на изборите


Скопје, 19 октомври, 2016 - 13:01 (META) 

Претседателот на Собранието, Трајко Вељаноски, упати покана до претседателот на Европскиот парламент и до претседателите на парламентарните собранија на ОБСЕ, на Советот на Европа и на НАТО за набљудувањето на изборите да ја известат Државната изборна комисија.

„Претседателот Вељаноски упати покани до претседателот на Парламентарното собрание на ОБСЕ, Кристине Мутонен, претседателот на Европскиот парламент, Мартин Шулц, претседателот на Парламентарното собрание на Советот на Европа, Педро Аграмунт, и до претседателот на Парламентарното собрание на НАТО, Мајкл Р. Тарнер, за намерата да учествуваат во набљудувањето на предвремените избори на пратеници во Собранието на Република Македонија да ја известат Државната изборна комисија, која ја утврдува процедурата за вршење на набљудување на изборите“, соопштуваат од кабинетот на Вељаноски.

Во Изборниот законик, во членовите 161 и 162, е предвидено дека целиот изборен процес можат да го набљудуваат меѓународни организации и претставници на странски земји и регистрирани домашни и странски здруженија на граѓани, во чии статути е вклучено начелото на заштита на човековите права.