!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Мост“: Вториот круг од изборите помина во мирна и демократска атмосфера


Скопје, 30 октомври, 2017 - 15:27 (META) 

Прелиминарната оценка на граѓанската асоцијација „Мост“ за вториот круг од локалните избори е дека гласањето се спровело во фер и демократска атмосфера.

Според „Мост“, институциите имале брза и ефикасна реакција во текот на гласањето во однос на забележаните неправилности во и надвор од гласачките места.

„Во овој изборен круг, исто така беа отстранети техничките предизвици при спроведувањето на гласањето кои беа забележани во првиот круг. Во текот на денот, набљудувачите најчесто јавуваа за случаи на групно, односно семејно гласање и за фотографирање на гласачките ливчиња, но мора да се истакне дека фреквенцијата на сите видови забележани неправилности беше намалена, споредено со првиот изборен круг“, велат од „Мост“.

Според извештајот на невладината организација, гласањето на болните и немоќни лица пред денот на изборите генерално било спроведено во согласност со процедурите, освен што еден избирачки одбор не ја носел со себе гласачката кутија, а во неколку случаи не била запазена тајноста на гласањето. Поголем број од лицата кои гласаат во затвор не биле пронајдени на избирачкиот список.

„Мост“ вториот круг на гласањето го следеше со повеќе од 1.000 набљудувачи на 50 отсто од гласачките места во секоја општина.


„Мост“: Забележано e групно гласање и фотографирање гласачки ливчиња


Скопје, 29 октомври, 2017 - 13:45 (META) 

Семејно и групно гласање, проблеми предизвикани од неовластени лица, фотографирање гласачки ливчиња биле забележани на неколку избирачки места до 13 часот, од страна на набљудувачите на граѓанската асоцијација „Мост“.

„На гласачко место 1471, село Дебреште, општина Долнени, забележани се девет случаи на семејно гласање, при што се злоупотребени 27 гласа. Дополнително, на ова место се забележани два случаи во кои лицата кои им асистирале на гласачите, кои не можеле да гласаат сами, не биле заведени во дневникот од избирачкото место. Во истата општина, но на гласачко место 1472, забележани се девет случаи на групно гласање, во кои се злоупотребени 20 гласови“, известија од „Мост“.

Во општина Шуто Оризари, неовластено лице агитирало на гласачко место, а имало и фотографирање на гласачко ливче.


„Мост“: Нема неправилности на гласачките места, гласањето почна навреме


Скопје, 29 октомври, 2017 - 10:21 (META) 

Гласањето се одвива тековно и досега нема информации за какви било неправилности на гласачките места, информираа од граѓанската асоцијација „Мост“.

Според информациите од нивните набљудувачи и од регионалните координатори, отворени се сите гласачки места на кои „Мост“ има распоредено свои набљудувачи.

Во текот на денот, за граѓаните кои сакаат да пријават евентуални нерегуларности или да дадат информации поврзани со изборниот процес, отворена е бесплатната телефонска линија 080 080 080, а истото може да го сторат и преку интерактивната веб-платформа neregularnosti.most.org.mk.

Граѓанската асоцијација „Мост“ изборите ги следи со повеќе од 1.000 набљудувачи.


„Мост“ ќе го следи вториот круг од изборите со повеќе од 1.000 набљудувачи


Скопје, 28 октомври, 2017 - 13:37 (META) 

Граѓанската асоцијација „Мост“ ќе го следи вториот круг од локалните избори со повеќе од 1.000 набљудувачи. На гласачките места ќе бидат распоредени 910 набљудувачи, кои ќе покријат околу 50 отсто од гласачките места во рамките на секоја од општините во кои утре ќе се гласа.

„Набљудувачите на „Мост“ ќе бидат статични и во текот на целиот ден ќе го следат процесот на гласање на гласачките места. Покрај тоа, ќе има и 45 мобилни тимови, составени од двајца набљудувачи, кои ќе служат за логистичка поддршка на статичните набљудувачи и повремено ќе ги набљудуваат оние места на кои „Мост“ нема да распореди статични набљудувачи. Дополнително, работата на општинските изборни комисии ќе биде набљудувана од 35 набљудувачи, а ќе се набљудува и работата на Државната изборна комисија“, се вели во соопштението.

Покрај утрешното гласање, „Мост“ денеска го набљудува и предвременото гласање на болните и немоќни лица, внатрешно раселените и на лицата во затвор или притвор. Оттаму апелираат за одржување на фер, демократски и мирен изборен процес.


„Цивил“: Засилено дејство на партиски активисти и нарушување на изборниот молк


Скопје, 28 октомври, 2017 - 13:10 (META) 

Тимовите на невладината организација „Цивил“, кои ги надгледуваат изборите, денеска забележале засилено дејство на партиските активисти во општините, каде што утре треба да се гласа во вториот круг на локалните избори, се вели во нивното соопштение.

„Изборниот молк се крши во текот на ноќта и во текот на предизборниот молк. „Цивил“ доби неколку извештаи од изборните набљудувачи и едно аудиосведоштво за изборен поткуп во Штип. Социјалните мрежи се вистински воени зони. Се користи говор на омраза кон политичките противници, но забележливо е што се користат стравот, омразата и поделбите. Етничката и верската омраза, хомофобијата и ксенофобијата се основни алатки на дел од политичките субјекти кои се во изборната трка, како на теренот, така и на интернет“, се вели во соопштението на „Цивил“.

Во пресрет на изборниот ден утре, „Цивил“ апелира до избирачките одбори во општините да ги извршуваат своите задачи совесно и професионално.

„Бараме од избирачките одбори да бидат кооперативни со нашите набљудувачи и да не се обидуваат да ја опструираат нивната работа“, се додава во соопштението.


„Цивил“: Нема потврда за наводите на ВМРО-ДПМНЕ за поткуп на гласачи


Скопје, 27 октомври, 2017 - 13:11 (META) 

Набљудувачите на „Цивил“ не откриле ниту еден случај што би ги потврдил како основани наводите на ВМРО-ДПМНЕ за поткуп на гласачи, изнесени пред првиот круг од локалните избори, што се одржа на 15 октомври.

Како што пишува „Цивил медиа“, ваквите наводи на ВМРО-ДПМНЕ, со навестувања за поткуп на гласачи, биле дел од документ што лидерот на партијата, Никола Груевски, им го доставил на претставници на меѓународната заедница, во деновите пред првиот круг од локалните избори.

„Цивил“, поради тоа, го доставил документот и до своите набљудувачи, од кои било побарано да посветат особено внимание на овие наводи и да побараат потврда за каков било случај што би можел да ја потврди вистинитоста на овој документ.

„Заклучокот од оваа активност на набљудувачите е дека тие не открија ниедна потврда за наводите на ВМРО-ДПМНЕ за поткуп на гласачите“, пишува „Цивил медиа“.

Според документот на ВМРО-ДПМНЕ, станувало збор за поткуп на гласачи во повеќе градови во земјава, а во него биле наведени и лица кои, наводно, ги вршеле незаконските активности.

Многу од наведените случаи на поткуп на гласачи во документот на ВМРО-ДПМНЕ, според извештаите на набљудувачите на „Цивил“, се неосновани бидејќи дел од споменатите лица не постојат, а за другите се утврдило дека се далеку од тоа да ги извршат изборните нерегуларности за кои се говори во документот.

Според извештаите на „Цивил“ од локалните избори на 15 октомври, а во пресрет на вториот круг на 29 октомври, регистрирани се четири обиди за поткуп на гласачи. Ниеден од тие случаи не е во релација со локациите или лицата наведени во документот на ВМРО-ДПМНЕ.


„Мост“ ќе ги следи изборите со 2.500 набљудувачи


Скопје, 14 октомври, 2017 - 12:27 (META) 

Граѓанската асоцијација „Мост“ утрешните локални избори ќе ги следи со повеќе од 2.500 набљудувачи, од кои 2.100 ќе бидат статични, информираше невладината организација на денешната прес-конференција.

– Статичните набљудувачи ќе покријат околу 50 отсто од гласачките места во Република Македонија и во текот на целиот ден ќе го следат процесот на гласање, од отворање на гласачките места, преку текот на гласањето, затворање на гласачките места, па сè до пребројување на гласовите – рече директорот на „Мост“, Дарко Алексов.

„Мост“ ќе има и 120 мобилни тимови од двајца набљудувачи, кои ќе служат за логистичка поддршка на статичните набљудувачи и ќе ги набљудуваат повремено оние гласачки места во кои „Мост“ нема статични набљудувачи. Дополнително, 81 набљудувач ќе ја набљудуваат работата на општинските изборни комисии и на изборната комисија на Град Скопје, а еден ќе ја набљудува работата на Државната изборна комисија.

Покрај гласањето на 15 октомври, „Мост“ го набљудува и денешното предвремено гласање на болните и на немоќните лица, внатрешно раселените и на лицата во затвор и во притвор.

– Во текот на изборниот ден, граѓаните кои сакаат да пријават евентуални нерегуларности или да дадат информации поврзани со изборниот процес, ќе може да го направат тоа на бесплатната телефонска линија 080 080 080 или преку интерактивната веб-платформа neregularnosti.most.org.mk – рече Алексов и апелираше за одржување фер, демократски и мирен изборен процес.

„Мост“ сите информации од денот на гласањето ќе го соопшти на четири прес-конференции што ќе се одржат утре во 9.30, 13.30, 17.30 и во 20.30 часот.


Заев – Гловер: Ќе има строги санкции за секој што ќе ја наруши регуларноста на изборите


Скопје, 26 септември, 2017 - 16:22 (META) 

Не смееме да дозволиме поради изборни нерегуларности да ги доведеме во прашање нашите евроатлантски аспирации, на кои работевме многу во изминатите неколку месеци, рекол премиерот Зоран Заев на денешната средба со шефицата на мисијата на ОБСЕ/ОДИХР за набљудување на локалните избори, Одри Гловер.

Заев посочил дека ќе има строги санкции за секој поединец или организација што ќе се осмелат да се впуштат во прекршување на регуларноста на изборниот процес, како во предизборниот период, така и на денот на изборите.

Тој, како што се наведува во соопштението од владината прес-служба, ја замолил шефицата на мисијата на ОБСЕ/ОДИХР навремено да го информира за сите обиди за нарушување на регуларноста на избирачкиот процес, за да не се дозволи никаков пропуст што ќе предизвика оспорување на легитимноста на изборите.

– Би сакал да сугерирам, да се посвети повеќе внимание на забелешките на опозицијата, не само на ВМРО-ДПМНЕ, туку на сите опозициски партии. На овие избори Македонци ќе гласаат за Албанци, и Албанци ќе гласаат за Македонци, тоа е една солидна гаранција за заедничка иднина, која цврсто верувам дека ќе ферментира во една позитивна практика во иднина – рекол Заев.

Гловер на средбата го информирала премиерот со претстојните активности на ОБСЕ/ОДИХР поврзани со изборниот процес, за бројот на краткорочни и долгорочни набљудувачи на мисијата, кои веќе се на терен и го набљудуваат предизборниот процес. Таа инфрормирала дека пред денот на изборите мисијата ќе го засили надзорот со дополнителни 200 краткорочни набљудувачи.


Гловер: Избирачкиот список не е финализиран, ќе набљудуваме сè што е поврзано со него


Скопје, 24 септември, 2017 - 10:57 (META) 

„За изборите да бидат регуларни, постои сеопфатна законска рамка, но се разбира дека зависи и од луѓето кои учествуваат во изборите, властите, општините и од Државната изборна комисија. Ние ќе набљудуваме како ќе ја спроведуваат таа рамка“, вели шефицата на мисијата на ОБСЕ/ОДИХР во Македонија, Одри Гловер, во неделното интервју на „Радио Слободна Европа“.

На прашањето дали избирачкиот список е доволно прочистен, таа вели дека тој е важен, бидејќи ОБСЕ/ОДИХР веруваат во еднаквото и универзално право на глас и тоа е нешто што внимателно го набљудуваат.

„Избирачкиот список сè уште не е финализиран и, како што кажав, и тоа ќе го набљудуваме бидејќи за избирачкиот список имавме забелешки во минатото. Затоа многу внимателно ќе следиме сè што е поврзано со ова прашање“, изјави Гловер.

Таа информираше дека во тимот на ОБСЕ/ОДИХР имаат 16 луѓе кои ќе останат во главниот град, а ќе имаат и набљудувачи кои ќе дојдат пред изборите.

Изборната кампања за локалните избори на 15 октомври почнува утре.


ОБСЕ/ОДИХР со 336 набљудувачи ќе ги следи локалните избори


Скопје, 13 септември, 2017 - 16:51 (META) 

Локалните избори на 15 октомври ќе ги следат 336 набљудувачи на ОБСЕ/ОДИХР. Шефицата на Мисијата на ОБСЕ/ОДИХР, амбасадорката Одри Гловер, денеска на прес-конференција соопшти дека 16 експерти на ОБСЕ/ОДИХР се веќе во земјава, а ним оваа недела ќе им се придружат уште 20 долгорочни набљудувачи, кои ќе бидат распоредени низ целата земја, во тимови по двајца, почнувајќи од 18 септември.

Пред локалните избори во Македонија ќе допатуваат уште 300 краткорочни набљудувачи, кои ќе ги следат изборите во сите 80 општини и во Градот Скопје.

Набљудувачите, како што истакна Гловер, внимателно ќе го следат процесот на регистрација на кандидатите и на гласачите, кампањите, работата на изборната администрација и на владините институции, изборната регулатива, нејзиното спроведување и решавањето на изборните спорови.

Како дел од процесот на набљудување, Мисијата на ОБСЕ/ОДИХР ќе го следи и известувањето на медиумите за кампањите на партиите и на кандидатите за градоначалници.