МЗШВ: Промена во цената има само на еден тип на леб


Скопје, 5 декември, 2018 - 16:30 (META) 

Министерство за земјоделство, шумарство и водостопанство (МЗШВ) ја информира јавноста дека промената на цената на лебот се однесува на еден тип на леб и корекцијата ја имаат направено три компании производители на леб од Скопје и една компанија од Тетово, како поединечна одлука на фирмите. До овој момент големите фирми не ја имаат зголемено цената на лебот.

„Сите останати информации се груби манипулации со јавноста. Доколку дојде до драстично зголемување на цените и на другите типови на леб, што би влијаело врз поскапување на животниот стандард, МЗШВ веднаш ќе интервенира преку Агенцијата за стокови резери, која што по жетвата направи јавна набавка од 13.000 тони пченица. На тој начин ќе се интервенира на пазарот за стабилизирање на цената на лебот“, соопштуваат од МЗШВ.

Од таму додаваат дека пченицата е берзански производ и цената ја диктира светската берза.

„Лани и оваа година поради климатските промени имаше помали приноси, што во опкружувањето предизвика недостиг на пченица и зголемување на цената на пченицата и на брашното, што може да е една од причините поради која што неколку компании донесоа одлука за зголемување на цената на еден тип на леб од 15 на 18 денари“, се додава во соопштението.


МЗШВ: Земјоделците можат да поднесат барања за легализација на фармите до крајот на 2018


Скопје, 23 ноември, 2018 - 13:02 (META) 

Министерство за земјоделство, шумарство и водостопанство (МЗШВ) информираше дека до крајот на годинава, земјоделците можат да достават барања за легализација на изградените објекти, фарми на градежно земјиште.

„Барањата за легализација треба да се поднесат во општините на живеење. Продолжувањето на рокот е со цел да им се излезе во пресрет на големиот број на граѓани, вклучително и на земјоделците, кои досега не ја завршиле постапката за легализација“, се вели во соопштението на МЗШВ.

Од таму информираат дека, до сега бројот на земјоделските стопанства и чии што објекти се легализирани е исклучително мал, и поголем број од истите ја немаат искористено можноста која ја имаше понудено законот.

„Нерегулираниот статус на објектите за земјоделска намена на градежно земјиште негативно влијае на можноста за модернизација и реструктуирање на земјоделските стопанства кои се занимаваат со сточарство и ги оневозможува стопанствата во користење на државната финансиска помош за земјоделството. Можноста за легализација на фармите е од голема важност за земјоделците. Со стекнување имотни листови, самите фарми ќе добијат и финансиска вредност, која што земјоделците ќе можат да ја искористат за подигнување на кредити за реновирање и модернизација на фармите. Воедно, со легализацијата ќе можат да остварат право за аплицирање за мерките од ИПАРД-програмата и од Националните програми, што ќе влијае врз обемот и квалитетот на производството“, се додава во соопштението.


МЗШВ работи на интервентна мерка за откуп на јаболката


Скопје, 3 октомври, 2018 - 13:27 (META) 

Поради временските непогоди, оваа година забележана е поголема количина на индустриско јаболко, кое не може целосно да биде преработено во преработувачките капацитети, информираат од Министерство за земјоделство, шумарство и водостопанство.

Затоа, како што велат од МЗШВ, за регулирање на оваа состојба и постигнување рамнотежа на пазарот, била подготвена интервентна мерка која ќе биде дискутирана на следната владина седница и финализирана до крајот на оваа недела.

„Преку Програмата за рурален развој МЗШВ предвидува поддршка и за преработувачките капацитети, со цел да овозможи поголем простор за откуп на призводите и извоз од државата“, се вели во соопштението на МЗШВ.


МЗШВ: Нова субвенција од два денари за килограм откупени сливи


Скопје, 14 август, 2018 - 15:36 (META) 

Владата на денешната седница донесе одлука за воведување на нова мерка за стабилизирање и решавање на проблемот со откупот на сливи, информираше на прес-конференција министерот за земјоделство, шумарство и водостопанство Љупчо Николовски.

Сите правни лица откупувачи на сливи регистрирани за преработка на земјоделски производи и правни лица регистрирани за вршење на трговија со земјоделски производи, кои извршиле откуп на сливи од реколтата 2018 година од домашно производство, ќе добијат субвенција од два денари по килограм за откупени сливи. Одлука стапува на сила со објавување во Службен весник.

– Оваа нова мерка, ќе го поттикне договорениот откуп на произведената слива од родот 2018 и ќе ја подобри конкурентноста на домашната преработувачка индустрија. Субвенцијата ќе важи за количините на сливи кои ќе се откупат до 15 септември 2018 година, по откупна цена не пониска од пет денари за килограм индустриски сливи. Исто така, новата субвенција ќе ја добијат и оние откупувачи кои ќе откупат свежи сливи, со кои што на еден од состаноците што ги одржа тимот од МЗШВ, е договорено откупната цена за оваа слива да не биде пониска од осум денари за килограм – изјави Николовски.


МЗШВ: Жетвата заврши, пченицата се откупува по цена од 9 до 10,5 денари по килограм


Скопје, 6 август, 2018 - 10:01 (META) 

Жетвата на пченицата заврши на сите засеани 78.000 хектари, а просечениот принос е околу 3.500 килограми по хектар, информираат од Министерство за земјоделство, шумарство и водостопанство.

Од таму додаваат дека лебното зрно од овогодинешната реколата се откупува по цена од 9 до 10,5 денари по килограм, во зависност од квалитетот на пченица.

До 15 август е и рокот за доставување на барање за понуди за Јавна набавка на меркантилна пченица за потребите на Агенцијата за стоковни резерви. На јавниот оглас за прв пат се дозволени и помали лотови, со цел и земјоделците да можат директно да продадат пченица за стоковни резерви.

„Има 10 лота од по 100 тони и 3 лота по 4.000 тони пченица. На овој начин ќе се придонесе за зголемување на откупот на домашна пченица, како и за постигнување повисока откупна цена. Очекуваме сите овие мерки да дадат дополнителен стимул во овој сектор, како и да обезбедиме одржливо и конкурентно производство на полјоделските култури, особено на пченицата како најзначајна“, се вели во соопштението на МЗШВ.


МЗШВ очекува целосно повлекување на одлуката на Косово


Скопје, 26 јули, 2018 - 15:09 (META) 

Разговорите кои Владата и надлежните министерства ги водеа со Косово во изминатиот период вродија со плод, Приштина веќе ја повлече зголемената царина за дел од производите, информираат од Министерството за земјоделство, шумарство и водостопанство (МЗШВ).

„Утре, министерот за економија Крешник Бектеши, ќе се сретне со неговите колеги во Косово каде ќе се бара решение и надминување на проблемот. Сите досегашни преговори, ни даваат за право да очекуваме целосно укинување на зголемените царини. Затоа во овој момент, Македонија останува на ставот барем засега да не се воведуваат контрамерки. По утрешниот состанок ќе имаме и многу повеќе детали за наредните чекори. Приоритетна цел на министерството за земјоделство во моментов е утврдување на начин како да ги заштитиме земјоделците“, се вели во соопштението на МЗШВ.


Преговорите течат, Владата се уште не воведува реципрочни мерки кон Косово


Скопје, 23 јули, 2018 - 13:43 (META) 

Во насока на решавање на проблемот со воведените зголемени царини од страна на Косово, министерот за земјоделство, шумарство и водостопанство, Љупчо Николовски е во постојана комуникација со ресорните министри од Косово и од регионот, информираат од МЗШВ.

Од таму додаваат дека Владата прави се, за да не дојде во ситуација да воведува контрамерки како одговор на постапката на Косово и очекува, Владата на Косово да ја повлече донесената мерка со што ќе се надмине спорот.

„В среда ќе има и заедничка средба на сите ресорни министри од регионот на која како претставник од Македонија ќе биде министерот Николовски. На средбата ќе се бара заеднички модел како да се надмине овој проблем со Косово. Исто така, доколку не се надмине проблемот во среда, Николовски и министерот за економија Крешник Бектеши, ќе се сретнат и со косовските ресорни министри и ќе се бара начин за надминување на ситуацијата. Целта е Укинување на одлуката и овозможување на брз проток на стоки и услуги како и трговска размена помеѓу двете земји“, се вели во соопштението.

Минатата недела Министерството за земјоделство,шумарство и водостопанство и Министерството за економија, испратија допис до ЦЕФТА, Европската унија и до Владата на Косово, со кое се бара повлекување на одлуката на Косово за зголемување на царините за увозното овошје и зеленчук.

Доколку и покрај сите напори и средби кои престојат Косово не ја повлече одлуката, Владата ќе преземе мерки за заштита на домашното производство.


МЗШВ прави анализа на штетите од царината на земјоделските производи за извоз на Косово


Скопје, 18 јули, 2018 - 16:18 (META) 

Министерството за земјоделство, шумарство и водостопанство во овој период активно работи на заедничкиот Меморандум за соработка помеѓу македонското и косовското Министерство за земјоделство, кој што треба да придонесе за олеснување на трговската размена помеѓу двете земји, информираат од МЗШВ.

„Одлуката од страна на Владата на Косово за воведување времена мерка за воспоставување на зголемена царина од 30 отсто за одредени увозни земјоделски производи (овошје и зеленчук) не e во согласност со заеднички зацртаните цели, како што се брз проток на стока и отстранување на царинските бариери, дефинирани преку Берлинскиот процес. Дополнително, Косово е претседавач со ЦЕФТА оваа година каде што како три први приоритети во неговата програма како претседавач се наведени олеснувањето на трговијата со стоки, хармонизација на ЦЕФТА пазарите со ЕУ и креирање на регион без нетарифни бариери и мерки кои ја нарушуваат трговијата“, се вели во соопштението на МЗШВ.

Од таму велат дека од македонска страна сите ресорни министерства и Царинската управа работат на анализи на ефектите од мерката и многу брзо ќе излезат со реакција во однос на воведената мерка, за што ќе бидат известени и членките на ЦЕФТА.

„Наша обврска како ресорно министерство е да го заштитиме домашното производство и извозно оринетираните земјоделски производи. Очекуваме Владата на Косово да ги земе предвид придобивките од започнатиот Берлински процес и низ една заедничка дискусија преку разгледување на сите анализи и факти, да дојдеме до заедничко решение, кое што ќе подразбира олеснување на трговската размена во регионот“, се додава во соопштението.

Косово воведе времена мерка на зголемување на царината на земјоделските производи од 30 проценти кои се увезуваат на тој пазар. Вкупниот извоз на зеленчук и овошје од Македонија во Косово во периодот од јануари до јуни изнесува над 2,5 милијарди денари.


МЗШВ: Започнати се постапки за доделување на концесии за повеќе риболовни води


Скопје, 18 јули, 2018 - 12:41 (META) 

Владата на вчерашната седница донесе одлуки за започнување на постапки за доделување на рибите по пат на концесија за повеќе риболовни води, информираат од Министерство за земјоделство, шумарство и водостопанство (МЗШВ).

„Започнатите постапки за доделување концесии на рибите за органзирање рекреативен риболов се однесуваат на рекреативните зони на Охридското и Дојранското езеро, риболовните ревири Црна Река 1 – Демир Хисарски, Црн Дрим 2, Злетовска Река, Треска 1 – Кичевски и aкумулација Матка, а за вршење стопански риболов на риболовните подрачја Охридско и Дојранско езеро“, се вели во соопштението на МЗШВ.

Во него се додава дека риболовната основа за риболовнта вода Охридско Езеро во почетокот на 2018 година е изменета во правец на целосна заштита и одржливо користење на рибите во езерото.

„Конкретно, направени се измени во делот на утврдување на периодот на мрест и времето во кое е дозволен риболовот и детално се уредени специфичните локации на мрест на рибите, особено за охридската пастрмка, охридската белвица и крапот. Исто така, заради одржување на популацијата намалени се количините на дозволен улов на видот охридска белвица. Направени се измени кои ги задоволуваат потребите на рекреативните риболовци, а со тоа и развојот на риболовниот туризам“, велат од МЗШВ.


МЗШВ: Штетите на јаболковите насади во Преспанскиот регион се до 80 проценти


Ресен, 10 јули, 2018 - 16:30 (META) 

Според првичните проценки на претставници од Министерството за земјоделство, шумарство и водостопанство и локалните власти штетите од невремето во ресенскиот регион се 80 проценти, информираат од МЗШВ.

„Преспанскиот регион е дури шест пати опфатен од невреме од мај до денес. Токму затоа, Комисијата за проценка на штети е веќе формирана и активна. Според првичните информации поројниот дожд и град во регионот предизвикал најголеми штети во село Јанковец, Ресен, делови од селата Златари и Сопотско. Општината комисија веќе е излезена на терен и врши проценка на штетите предизвикани од невремето, а прецизни проценки на оштетените јаболка ќе можат точно да се соопштат следната недела. Сепак, според првичните проценки штетите врз насадите се од 70 до 80 отсто“, се вели во соопштението.

Во него се додава дека „штети од невремето се забележани и во прилепскиот регион, поточно во Големо и Мало Коњари“.

„Општината Прилеп и таму формираше Комисија за проценки на штети, која ќе биде задолжена за проценка на материјалните штети на објекти и приватни имоти, по што ќе следува постапка за обештетување“, информираат од МЗШВ.