МЗШВ прави анализа на штетите од царината на земјоделските производи за извоз на Косово


Скопје, 18 јули, 2018 - 16:18 (META) 

Министерството за земјоделство, шумарство и водостопанство во овој период активно работи на заедничкиот Меморандум за соработка помеѓу македонското и косовското Министерство за земјоделство, кој што треба да придонесе за олеснување на трговската размена помеѓу двете земји, информираат од МЗШВ.

„Одлуката од страна на Владата на Косово за воведување времена мерка за воспоставување на зголемена царина од 30 отсто за одредени увозни земјоделски производи (овошје и зеленчук) не e во согласност со заеднички зацртаните цели, како што се брз проток на стока и отстранување на царинските бариери, дефинирани преку Берлинскиот процес. Дополнително, Косово е претседавач со ЦЕФТА оваа година каде што како три први приоритети во неговата програма како претседавач се наведени олеснувањето на трговијата со стоки, хармонизација на ЦЕФТА пазарите со ЕУ и креирање на регион без нетарифни бариери и мерки кои ја нарушуваат трговијата“, се вели во соопштението на МЗШВ.

Од таму велат дека од македонска страна сите ресорни министерства и Царинската управа работат на анализи на ефектите од мерката и многу брзо ќе излезат со реакција во однос на воведената мерка, за што ќе бидат известени и членките на ЦЕФТА.

„Наша обврска како ресорно министерство е да го заштитиме домашното производство и извозно оринетираните земјоделски производи. Очекуваме Владата на Косово да ги земе предвид придобивките од започнатиот Берлински процес и низ една заедничка дискусија преку разгледување на сите анализи и факти, да дојдеме до заедничко решение, кое што ќе подразбира олеснување на трговската размена во регионот“, се додава во соопштението.

Косово воведе времена мерка на зголемување на царината на земјоделските производи од 30 проценти кои се увезуваат на тој пазар. Вкупниот извоз на зеленчук и овошје од Македонија во Косово во периодот од јануари до јуни изнесува над 2,5 милијарди денари.


МЗШВ: Започнати се постапки за доделување на концесии за повеќе риболовни води


Скопје, 18 јули, 2018 - 12:41 (META) 

Владата на вчерашната седница донесе одлуки за започнување на постапки за доделување на рибите по пат на концесија за повеќе риболовни води, информираат од Министерство за земјоделство, шумарство и водостопанство (МЗШВ).

„Започнатите постапки за доделување концесии на рибите за органзирање рекреативен риболов се однесуваат на рекреативните зони на Охридското и Дојранското езеро, риболовните ревири Црна Река 1 – Демир Хисарски, Црн Дрим 2, Злетовска Река, Треска 1 – Кичевски и aкумулација Матка, а за вршење стопански риболов на риболовните подрачја Охридско и Дојранско езеро“, се вели во соопштението на МЗШВ.

Во него се додава дека риболовната основа за риболовнта вода Охридско Езеро во почетокот на 2018 година е изменета во правец на целосна заштита и одржливо користење на рибите во езерото.

„Конкретно, направени се измени во делот на утврдување на периодот на мрест и времето во кое е дозволен риболовот и детално се уредени специфичните локации на мрест на рибите, особено за охридската пастрмка, охридската белвица и крапот. Исто така, заради одржување на популацијата намалени се количините на дозволен улов на видот охридска белвица. Направени се измени кои ги задоволуваат потребите на рекреативните риболовци, а со тоа и развојот на риболовниот туризам“, велат од МЗШВ.


МЗШВ: Штетите на јаболковите насади во Преспанскиот регион се до 80 проценти


Ресен, 10 јули, 2018 - 16:30 (META) 

Според првичните проценки на претставници од Министерството за земјоделство, шумарство и водостопанство и локалните власти штетите од невремето во ресенскиот регион се 80 проценти, информираат од МЗШВ.

„Преспанскиот регион е дури шест пати опфатен од невреме од мај до денес. Токму затоа, Комисијата за проценка на штети е веќе формирана и активна. Според првичните информации поројниот дожд и град во регионот предизвикал најголеми штети во село Јанковец, Ресен, делови од селата Златари и Сопотско. Општината комисија веќе е излезена на терен и врши проценка на штетите предизвикани од невремето, а прецизни проценки на оштетените јаболка ќе можат точно да се соопштат следната недела. Сепак, според првичните проценки штетите врз насадите се од 70 до 80 отсто“, се вели во соопштението.

Во него се додава дека „штети од невремето се забележани и во прилепскиот регион, поточно во Големо и Мало Коњари“.

„Општината Прилеп и таму формираше Комисија за проценки на штети, која ќе биде задолжена за проценка на материјалните штети на објекти и приватни имоти, по што ќе следува постапка за обештетување“, информираат од МЗШВ.


МЗШВ: Откупот на лубеници се одвива непречено, земјоделците се манипулираат


Скопје, 6 јули, 2018 - 14:39 (META) 

Во последните седум дена се откупени 800 тони лубеница, а само за денеска се планира откуп од околу 130 тони лубеница, реагираат од Министерството за земјоделство, шумарство и водостопанство на информациите дека земјоделците протестираат и дека лубениците чекаат да бидат откупени.

„Според Подрачната единица во Струмица, во следните денови се планира откуп уште на 200 тони. Откупната цена е задоволителна и се движи од три до четири денари по килограм. Сите земјоделците кои имаат било каков проблем, слободно можат да ги контактираат подрачните единици на МЗШВ или директно МЗШВ“, се вели во соопштението.


Николовски: Нема застој во откупот на лубениците и другите земјоделски производи


Скопје, 4 јули, 2018 - 16:00 (META) 

Министерот за земјоделство, шумарство и водостопанство, Љупчо Николовски рече дека дневно се откупуваат по околу 500 тони лубеници, и доколку се процени дека има потреба, Владата ќе преземе соодветни мерки, како што бил случајот со доматите.

Тој потсети дека лани, МЗШВ воведе дополнителна субвенција од два денари за килограм за лубениците и шест денари за килограм праски, дополнителни мерки за пченицата, како и за грозјето.

„Оваа година, се зголеми на субвенцијата за предадени домати од три на седум денари за килограм, и се постигна договор вишокот домати да го откупат преработувачките капацитети, а се со цел стабилизирање на откупот“, изјави Николовски.

На новинарско прашање во врска со годинешната жетва на пченица, тој потенцираше дека пред почетокот на жетвата се одржале неколку состаноци со земјоделците и мелничарите, но и дека во тек е процедурата која што ја започнала Агенцијата за стокови резерви, со која што е планирано откуп на 12.000 тони домашна пченица.


МЗШВ ќе го откупува вишокот на домати, отежнат пласманот на странски пазари


Скопје, 21 јуни, 2018 - 15:12 (META) 

Откупот на македонските домати е отежнат и затоа Министерството за земјоделство, шумарство и водостопанство договара вишокот на домати да го откупат домашните преработувачките капацитети, информираат од таму.

„Почетната откупна цена на доматите беше 25 до 30 денари за килограм, а сега е 10 до 15 денари за килограм. Точно е дека во моментов е отежнат откупот, заради тоа што расте понудата на нашите традиоционални пазари од тамошни домашни производители, што влијае врз отежнување на откупот на македонските домати“, се вели во соопштението на МЗШВ.

Од таму исто така велат дека доколку се увиди дека земјоделците остваруваат загуби од производната и продажната цена, министерството може да излезе со дополнителни мерки за производителите на раниот домат.


МЗШВ: Невремето предизвика штета на 5.000 хектари земјоделска површина во Овчеполието


Свети Николе, 14 јуни, 2018 - 15:19 (META) 

Претставници од Министерството за земјоделство, шумарство и водостопанство заедно со локалните власти, излегоа на терен, во увид на штетите врз земјоделските посеви, по вчерашното невреме во овчеполскиот регион.

Според првичините проценки во регионите на општините Лозово и Свети Николе,  од невремето е предизвикана штета на површина од околу 5.000 хектари.

„Претставниците од МЗШВ реализираа средби со градоначалниците на овие општини. Бидејќи освен штети врз земјоделските посеви, невремето предизвика и материјални штети, локалните власти денеска организираа итни состаноци на Советите и денеска формираат Комисии за проценка на штетите, кои ќе извршат проценка на предизвиканите штети од невремето проследено со силен дожд, град и ветер. Засега е утврдено дека има штета на земјоделските површини како лозови насади, површини со житни култури и зеленчук, но и материјална штета на објекти и приватни имоти. Селото Црниште од вчера е без струја и вода“, се вели во соопштението на МЗШВ.


Субвенции за тутунот од реколтата 2017 ќе се исплаќаат од следната недела


Скопје, 8 мај, 2018 - 14:13 (META) 

Денеска во Службен весник се објавија измените и дополнувањата на Законот за земјоделство и рурален развој, со што, се создадоа законски услови за навремена исплата на субвенциите, меѓу кои е и исплатата на субвенциите за тутунот од реколтата 2017, информираат од Министерство за земјоделство, шумарство и водостопанство (МЗШВ).

„Дел од измените на овој закон предвидуваат одложување на важноста на условите за подмирени обврски кон Управата за јавни приходи, што изминатите години беше пречка за исплата на субвенциите. Од денеска до крајот на оваа недела, Платежната агенција ќе ги спроведе законските контроли во откупните претпријатија, по што ќе следува обработка на решенијата за исплата на субвенциите за тутунот“, се вели во соопштението.

Според податоците, зголемени субвенции за тутунот од реколтата 2017 ќе добијат над 23.400 тутунари.

„Со новиот начин на зголемено субвенционирање во три нивоа кој започнува со реколтата 2017, субвенцијата за прва класа тутун е 80 денари, за втора класа 70 денари и 60 денари е третото ниво за трета и четврта класа како и за дополнителни класи. Целта на новиот модел на субвенционирање е да се поттикнат тутунарите да произведуваат поквалитетен тутун за да добијат повисока субвенција“, додаваат од МЗШВ.

Тутуно-производството е значајна гранка за македонското земјоделство, која што носи девизен прилив од околу 100 милиони евра годишно.


Исплатени 104,7 милиони денари субвенции за грозје


Скопје, 24 април, 2018 - 10:52 (META) 

Агенцијата за финансиска поддршка во земјоделството и руралниот развој исплати 104,7 милиони денари субвенции за грозје, информираат од Министерство за земјоделство, шумарство и водостопанство (МЗШВ).

„Исплатата е за дополнителната субвенција од два денари за килограм грозје предадено во домашни винарски визби. Мерката беше донесена лани со измени на Програмата за финансиска поддршка во земјоделството 2017, со цел да им се помогне на лозарите, поради лошите временски услови кои негативно влијаеја врз родот“, информираат од МЗШВ.

Во соопштението се додава дека „со цел навремено извршување на сите агротехнички мерки, пред почетокот на годинешната производствена сезона, на лозарите им се исплатија субвенциите за одржување на лозовите насади или вкупно над 608 милиони денари.“

„Исплатата на субвенциите за преостанатите мерки за 2017 се одвива континуирано со цел да се запази законскиот рок за комплетно расчистување на 2017 година, односно 30 јуни“, додаваат од МЗШВ.


МЗШВ издаде забрана за вршење на риболов, поради природен мрест на рибите


Скопје, 17 април, 2018 - 12:30 (META) 

Министерството за земјоделство, шумарство и водостопанство (МЗШВ) донесе решение за забрана за риболов во риболовните води во периодот на природен мрест на рибите за оваа година, информираат од таму.

„Забраната се однесува на риболовните подрачја, риболовните ревири и рекреативните зони, а периодот на забрана е различн за секој вид на риба. Забраната за вршење риболов во период на мрест, е предложена од концесионерите, со цел да се овозможи природен мрест на рибите“, се вели во соопштението на МЗШВ.

Со стапување на решението на сила, концесионерите треба да ги известат рекреативните риболовци за забраната.