!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„МЖ – Инфраструктура“ го осудува штрајкот на машиновозачите и бара либерaлизација на пазарот


Скопје, 6 јуни, 2017 - 15:41 (META) 

Јавното претпријатие „МЖ – Инфраструктура“ најостро го осудува штрајкот на машинскиот персонал во „МЖ – Транспорт“, се вели во соопштението на компанијата.

„Во целата оваа ситуација „МЖ – Инфраструктура“ и „МЖ – Транспорт“ се заложници на една група работници – машиновозачи, бидејќи не постои друг оператор кој врши превоз на патници и на стока. Поради тоа и двете компании, а особено „МЖ – Инфраструктура“, трпат огромни дневни загуби, бидејќи компаниите го вршат превозот на своите производи на друг начин“, велат од компанијата.

Оттаму додаваат дека проблемите во железничкиот систем настанале со измените на законот за железнички систем во ноември 2011 година, со кој спротивно на ЕУ-директивите се забрани либерализација на пазарот. Како резултат на ова, од компанијата велат дека загубите на двете компании се зголемиле, а особено на „МЖ – Инфраструктура“.

„Како резултат на оваа погрешна политика, искористеноста на капацитетот на железничката инфраструктура не е повеќе од пет до седум проценти, иако „МЖ – Инфраструктура“ е подготвена во целост да ги задоволи потребите на многу повеќе оператори. Затоа од новата реформска влада бараме да се врати законот и да се дозволи либерализација на пазарот на железнички услуги во согласнот со европските директиви“, велат од „МЖ – Инфраструктура“.


Дел од вработените на „МЖ – Транспорт“ го прекинаа штрајкот, возовите не сообраќаат


Скопје, 2 март, 2017 - 12:07 (META) 

Вработените од работилницата за оспособување на локомотивите на „Македонски железници – Транспорт“ одлучија да го прекинат протестот поради кој повеќе од две недели е блокиран железничкиот сообраќај, информираше претставникот на иницијативниот одбор за протестот, Ѓоко Илиески.

Вработените се сретнале со в.д. директорот на „МЖ – Транспорт“, Игор Коруноски, и било договорено по вчерашната исплата на половина од јануарската плата, втората половина да биде исплатена во текот на следната недела, а платата за февруари да се исплати целосно до крајот на овој месец.

Иако дел од вработените го прекинаа штрајкот, сè уште не се знае кога ќе се воспостави нормален возен ред на патничките и на товарните возови.


Игор Коруноски е нов директор на „МЖ-Транспорт“


Скопје, 26 февруари, 2017 - 17:16 (META) 

Директорот за одржување влечни средства, Игор Коруноски, е новиот директор на „Македонски железници-Транспорт“. Владата го назначи на местото на Никола Костов кој пред неколку дена си поднесе оставка.

Состојбата во железничкиот сообраќај сè уште не е решена, па патничките и товарните возови веќе една недела не сообраќаат поради штрајкот на вработените кои си ги бараат заостанатите плати.

Владата обезбеди 70 милиони денари за „МЖ – Транспорт“, но според претставниците на синдикатот, тие не се доволни за исплата на заостанатите плати.

Затоа, како што велат, размислуваат за радикализација на штрајкот и да продолжат да штрајкуваат низ улиците и пред зградата на Владата.


Трет ден возовите не сообраќаат поради штрајк на вработените


Скопје, 20 февруари, 2017 - 10:18 (META) 

Патничките и товарните возови веќе трет ден не сообраќаат, бидејќи вработените на „Македонски железници – Инфраструктура“ бараат да им се исплатат заостанатите плати.

Од „Македонски железници – Транспорт“ информираа дека пред почетокот на викендот на вработените ќе им биде исплатен вториот дел од платата за декември 2016 година, а до крајот на месецов и платата за јануари 2017 година.

– Поради огромните проблеми со кои се соочи целокупниот железнички систем во минатата 2016 година, поради блокадите на железничката пруга кај нашиот јужен сосед, „Македонски железници – Транспорт“ АД Скопје претрпе директна загуба од 5 милиони евра. Доколку на таа сума се додадат и вратените долгови во износ од 15 милиони евра и исплатените заостанати четири и пол плати, на почетокот од оваа година претпријатието повторно се соочува со одредени финансиски предизвици – соопштија од „МЖ Транспорт“.

Оттаму додаваат дека неделава во соработка со Владата треба да се финализира решението за подолгорочно решавање на состојбите во железниците во Македонија.

Протестот на вработените е во организација на Независниот синдикат на МЖ, СЖМ – Инфраструктура и на АНС – Железничари.


Четири нови електрични локомотиви за обнова на возниот парк


Скопје, 10 јануари, 2017 - 14:22 (META) 

МЖ „Транспорт“ и кинеската компанија „ЦРРЦ Џуџоу“ потпишаа договор за набавка на четири нови електрични локомотиви за обнова на возниот парк. Инвестицијата од осум милиони евра е обезбедена од Европската банка за обнова и развој (ЕБОР).

– Набавката на четирите нови електрични локомотиви практично значи обнова на возниот парк по 40 години и доближување до европските и до светските стандарди. Ќе се обезбеди поголема безбедност и сигурност во железничкиот сообраќај, поголем број патници, поголема брзина, енергетска заштеда, заштита на животната средина, ефикасно работење и поквалитетни услуги – истакна генералниот директор на МЖ „Транспорт“, Никола Костов, по потпишувањето на договорот.

Набавката на електричните локомотиви е втор проект за обнова на возниот парк, по набавката на шест нови возови.