ЕБОР и „Шпаркасе банка Македонија“ ќе го зголемат финансирањето на МСП


Скопје, 8 ноември, 2018 - 13:00 (META) 

„Шпаркасе банка Македонија“ е втората македонска банка која ќе и се приклучи на иницијативата на Европската банка за обнова и развој (ЕБОР) за поттикнување на кредитирањето на малите и средни претпријатија (МСП) во земјата.

ЕБПР обезбедува 10 милиони евра на „Шпаркасе банка Македонија“, од Програмата за поддршка на конкурентноста за Западен Балкан, која заедно со Европската унија (ЕУ), обезбедува среднорочно и долгорочно финансирање на малите и средни претпријатија (МСП) и им помага да ги достигнат ЕУ стандардите.

„Кредитот на ЕБОР е поддржан со 1,5 милиони евра грант од ЕУ, од Инструментот за пред-пристапна помош (ИПА). Финансирањето на ЕБОР за „Шпаркасе банка Македонија“ ќе биде насочено кон надградба на производните капацитети за подобрување на конкурентноста на локалните компании, а најмалку 60 проценти од фондовите ќе бидат насочени кон намалување на потрошувачката на енергија и ресурси, и поврзаните трошоци“, информираат од ЕБОР.

МСП, кои ќе користат кредити преку „Шпаркасе банка Македонија“, доколку успешно ги завршат проектите на модернизација до одредени ЕУ-стандарди, ќе добијат ИПА- грант финансиран од ЕУ.

МСП се главен двигател на македонската економија. Според податоците на ЕУ, тие придонесуваат со скоро 65 проценти во вкупната додадена вредност и околу 80 проценти во сите работни места во земјата, што е далеку над просекот во ЕУ каде овие проценти изнесуваат 57 проценти и 66 проценти соодветно. На почетокот на годинава, сличен финансиски пакет, од истата програма, беше доделен и на „Охридска банка“.

Програмата за поддршка на конкурентноста за Западен Балкан се стреми да обезбеди вкупно 30 милиони евра за кредитирање на македонските комерцијални банки, во наредниве години, придружувани од грант од ЕУ во вкупен износ од шест милиони евра.

Програмата е надградба на претходната поддршка на конкурентноста во износ од 20 милиони евра, која беше пласирана од 2010 до 2015 и беше поддржана од Европската унија која обезбеди четири милиони евра грант.

ЕБОР инвестира во Македонската економија од 1993 година и до денес банката има потпишано над 110 проекти во земјата, со нето кумулативен бизнис обем од над 1,75 милијарди евра.


Можна помош од Советот на Европа за истрагата во Македонија


Стразбур, 20 мај, 2015 - 21:42 (META) 

По изјавите на рускиот министер за надворешни работи, Сергеј Лавров, дека Торбјорн Јагланд, генералниот секретар на Советот на Европа, треба да оди во Македонија поради политичката криза, Јагланд во Брисел се огласи со кратка изјава, велејќи дека во Македонија „треба да има силна и непристрасна истрага за наводите во прислушуваните разговори, за враќање на довербата“, додавајќи дека Советот на Европа „има неодамнешно искуство“ во надгледувањето судски истраги.

Дипломатски извори блиски до генералниот секретар на Советот на Европа, за „Мета“ објаснија дека „неодамнешното искуство“ за кое говори Јагланд се однесува на надгледувањето на украинската истрага за насилствата на плоштадот Мајдан за време на немирите (од ноември 2013 до февруари 2014 година).

Заклучоците на истрагата беа објавени во март 2015 година.

Телото наречено Меѓународен советодавен панел (МСП) беше предводено од експертот Никола Браза, во соработката со двајца украински експерти, назначени од власта и од опозицијата.

Заклучоците на МСП беа многу критични кон украинската власт.

Надзорот на Меѓународниот советодавен панел, меѓу другото, заклучи дека истрагата за насилствата на Мајдан не ги задоволува европските стандарди за човекови права, дека немало искрена волја да се спроведе истрага, како и дека истрагата не почнала бргу, што само по себе било предизвик за последователните истраги.

Панелот упати остри критики кон украинското јавно обвинителство и за недостигот од финансиски и од човечки ресурси во текот на истрагата.

Работата на Меѓународниот советодавен панел беше поздравена од меѓународните организации и од Русија, но и од украинските власти кои се заложија за подобрување на состојбите.

Иако е нејасно дали ваква мисија е изводлива во Македонија и во каков формат, портпаролот на Торбјорн Јагланд, Даниел Холтген, за „Мета“ изјави: „Советот на Европа е отворен за секакви сугестии и барања од поранешната југословенска република Македонија и ќе помогне да се врати довербата“.

Иако Јагланд не кажа конкретно дека такво или слично тело би се испратило во Македонија, изјавите на Сергеј Лавров и повиците кон оваа организација, каде Русија е членка, се доказ дека Советот на Европа би можел да биде од помош во актуелната македонска криза.

Дипломатски извори во Стразбур, седиште на Советот на Европа, додаваат дека бидејќи транспарентна истрага за прислушувањето е неопходна, ова меѓународно тело би можело да одигра важна улога во враќањето на довербата помеѓу сите страни. Но, Советот на Европа не може да донесе никаква одлука додека тоа не биде побарано од Македонија.

Советот на Европа е меѓународна организација, одделна и постара од Европската унија, во која членуваат 47 земји-членки, меѓу кои Македонија и Русија. Таа се занимава, пред сè, со прашања од областа на човековите права и на демократијата.