Недонесувањето на клучните законски измени го кочат реформскиот процес во медиумите


Скопје, 23 мај, 2018 - 15:08 (META) 

И покрај заложбите на Владата да гради партнерство со асоцијациите и со граѓанскиот сектор во сферата на медиумите, таа сфера сеуште не е ослободена од институционални или персонални влијанија поради бавноста со која Собранието ги носи потребните законски измени беше истакнато на презентацијата на третиот периодичен извештај во рамките на проектот „Опсерваторија на медиумските реформи“ (ОМР) денеска во Клубот на новинарите.

Притоа беше констатирано дека иако во некои од четирите столба со кои се цени слободата на изразување има значителен напредок, недонесувањето на клучните законски измени го кочат реформскиот процес.

Мониторингот го спроведуваат Фондацијата за интернет и општество „Метаморфозис“, Центарот за промовирање на граѓански вредности „Агора“ и Платформата за истражувачко новинарство и анализи (ПИНА), со финансиска поддршка од Фондацијата Отворено општество – Македонија.

ОМР овозможува увид на јавноста во извршувањето на реформските процеси во областа на слободата на изразување, а предмет на набљудувањето се четирите столба на Итните реформски приоритети – Јавниот радиодифузен сервис (МРТ), владиното рекламирање, пристапот до информации и клеветата и навредата.

OMR32

За изминатите 11 месеци нема никакви поместувања во делот на конкретни промени на законската регулатива со која би се забрзале процесите и која би служела како основа за независност деполитизација и департизација на јавните институции. До затворањето на овој мониторинг извештај (31 март 2018 година), Владејачката коалиција преку своите претставници во Собранитето не ги донесе и усвои потребните измени на законите  од приоритетите според Прибе, кои се однесуваат на сферата „медиуми: слобода на изразување“.

Дополнително, Владата не ги изготви мерките и придружните документи и правилници за допрецизирање на евентуалното владино рекламирање на социјалните мрежи, ниту е започната процедура за ревизија на постоечката законска регулатива која се однесува на случаите „клевета“ и „навреда“.

Поконкретно, во врска со јавниот радиодифузен сервис се вели дека “започнатите промени во медиумската легислатива не добија своја завршница во Собранието. Во законодавниот дом се уште не се изгласани потребните измени на предметниот закон. Програмскиот совет на МРТ, во чиј состав има членови кои се поранешни носители на јавни функции, го реизбраа актуелниот директор на МРТ. Програмските сервиси на телевизијата се во истиот формат и покрај законската обврска за четврт ТВ канал. Не се забележани никакви реформски зафати за унапредување на работата и на квалитетот на програмската/содржинската понуда во јавниот сервис“, па оттаму оценката „Започнато, но неисполнето“.

За владино рекламирање во извештајот се констатира дека „иако се укинати владините реклами на домашните медиуми Владата не обезбеди детални објаснувања за низа специфики за обезбедување целосна транспарентност и отчетност, преку објава на правилници, процедури или протоколи“, па останува оценката „Делумно исполнето“.

Истата оценка „Делумно исполнето“ е и за третиот столб од реформите во медиумската сфера – пристап до информации, бидејќи како што е нагласено „Покрај донесените мерки од страна на Владата за отворање на јавните бази за новинарите, а некои и за пошироката јавност, останува непроменета состојбата врзана за измени и дополнувања на Законот за пристап до информации од јавен карактер.

Најлоша е состојбата во сферата на клеветата и навредата – иако е евидентирано дека во последните 24 месеци се намалени тужбите и споровите против новинари за клевета и навреда, во оваа област нема никакви промени и поместувања во периодот на следење и известување: не преземена иницијатива за ревидирање на Законот за граѓанската одговорност за клевета и навреда и Владата не започнала координација со стручната јавност во оваа насока. Оттаму и оценката „Целосно неисполето“.

Проектот ОМР ќе продолжи со следењето на реформите до 30 јуни по што ќе биде објавен и финалниот извештај.

Сите резултати од следењето се достапни на македонски и албански јазик на MediaObservatorium.mk.

 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Заев и Мицковски утревечер на прв ТВ дуел на МТВ


Скопје, 22 мај, 2018 - 12:58 (META) 

Македонската телевизија утревечер во 20 часот, ќе го организира првиот ТВ дуел меѓу премиерот и лидер на СДСМ, Зоран Заев, и претседателот на најголемата опозициска партија ВМРО-ДПМНЕ Христијан Мицкоски, јави МИА.

ТВ дуелот минатата недела го побара лидерот на опозициската партија, а фрлената ракавица беше прифатена од премиерот. За организатори на овој прв ТВ дуел меѓу првите луѓе од власта и опозицијата по повеќе години, првично се пријавија три телевизии.

Стојан Трпчевски, уредникот на Информативната редакција на МТВ, ќе биде домаќин и водител на ТВ дуелот.


ВМРО-ДПМНЕ бара невладините да не издаваат препораки за членовите на Советите на ААВМУ и МРТ


Скопје, 17 мај, 2018 - 17:17 (META) 

Во собраниската Комисија за транспорт, врски и екологија денеска се одржа четвртото продолжение на амандманската расправа за Предлог-законот за изменување и дополнување на Законот за аудио и аудиовизуелни медиумски услуги, во второ читање. Се дискутираше за 5-от амандман на ВМРО-ДПМНЕ, со кој се бара да се избрише ставот од предложениот закон со кој се предвидува кандидатите за членови во Советот на Агенцијата за аудио и аудиовизуелни медиумски услуги (ААВМУ) и на Македонска радио телевизија (МРТ) да достават писмо за поддршка од две невладини организации.

Според Благоја Деспотовски од ВМРО-ДПМНЕ, нема независни граѓански организации, бидејќи се или со едната или со другата политичка опција.

Со ова темпо на долги дискусии  опозицијата го блокира носењето на законот со цел да ги задржат партиските членови во советите, порача министерот за информатичко општество и администрација, Дамјан Манчевски, кој беше на седницата како претставник на предлагачот на законот, односно на Владата.

Во четирите досегашни продолженија на седницата на собраниската комисија се дискутираше за пет амандмани, а остануваат уште 70.

За помалку од еден месец, на четирите  амандмански продолженија на седниците на Комисијата за транспорт и врски, пратениците поминаа едвај 5  амандмани од над седумдесетина кои ги поднесе ВМРО-ДПМНЕ.

 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Манчевски: Владата сака независна МРТ и професионални регулаторни тела


Скопје, 11 мај, 2018 - 15:24 (META) 

Владата се залага за создавање медиумски простор за непристрасно и објективно информирање на граѓаните. Наша цел е МРТ да биде целосно непристрасен и независен медиум, а регулаторните тела да бидат транспарентни, професионални и компетентни. Особено е важно во регулаторните тела и националниот радиодифузер да не членуваат високи партиски функционери, поранешни пратеници, кандидати за градоначалници и роднини на партиски функционери, како што е тоа сега. Регулаторните тела и МРТ треба да се остават на медиумските работници. Медиумите треба да се остават на медиумските работници, порача денеска министерот за информатичко општество и администрација Дамјан Манчевски.

Тој се обрати на завршниот панел на Петтата конференција за медиуми на Југоисточна Европа, што изминатите два дена се одржуваше во Струга, во организација на Канцеларијата на претставникот за слобода на медиумите на ОБСЕ, Арлем Дезир со поддршка на теренските операции на ОБСЕ во Југоисточна Европа.

Манчевски се осврна на измените на Законот за АВМУ, за кој рече дека дава шанса политичарите да ги тргнат рацете од медиумите и ја повика опозицијата да овозможи чистење на сферата од партиските влијанија.

– Во моментот Законот е во Собраниска процедура. Јас се уште искрено сакам да верувам дека колегите од опозицијата ќе ја увидат потребата од што поскоро носење на овој закон. Но, за жал тоа по се изгледа не е така. Токму вчера бевме сведоци на амандманска расправа во Комисијата за транспорт и врски во Собранието, каде пратениците од опозицијата беа против јавно претставување на кандидатите за членови на Советот на АВМУ и Програмскиот совет на МРТВ. Да се биде против транспарентност и јавност во изборот на независни регулаторни тела, е да се биде против демократските вредности и слободата на медиуми. Тоа нема да го дозволиме. Никогаш повеќе нема да дозволиме политичарите да се пазарат зад затворени врати, а граѓаните да дознаваат за одлуките, откако тие веќе ќе бидат донесени. Се надевам дека и опозицијата ќе го сфати тоа – информираше министерот Манчевски.

Во својот завршен говор министерот Манчевски, даде осврт на дигитализацијата и слободата на говор, како и на глобалниот проблем со „лажните вести“. Како што рече тој, не смее повеќе да се дозволи меѓународната заедница да ги исправа работите, туку треба медиумската дејност да се остави на професионалците.

– Медиумите и медиумските работници се тие кои треба да бидат мотор на промените. Не смееме да се доведеме во состојба каде поради нарушените медиумски слободи, политичарите, партиите или меѓународната заедница да интервенира, како што беше тоа случај изминатите 2-3 години. Доброто владеење и слободата на медиумите се меѓусебно зависни. Само кога новинарите ќе добијат простор да работат слободно, да набљудуваат, да поставуваат прашања и да известуваат, без страв од притисоци и закани, само тогаш сите граѓани можат да бидат сигурни дека носителите на одлуки ќе се придржуваат до највисоките стандарди – заклучи министерот за информатичко општество и администрација.
 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Медиумските закони денеска на собраниска комисија


Скопје, 2 мај, 2018 - 13:40 (META) 

Во Комисијата за транспорт, врски и екологија во Собранието денеска ќе се расправа за предлог – закон за изменување и дополнување на Законот за аудио и аудиовизуелни медиумски услуги и за предлог – закон за изменување и дополнување на Законот за основање на Јавно претпријатие Македонска радиодифузија, и двата во второ читање. Со законите се овозможува, според Владата, која ги предлага законите, професионализација и независност на Советите на Агенцијата за аудио и аудиовизуелни медиумски услуги (ААВМУ) и на јавниот радиодифузер Македонска радио телевизија (МРТ).

Освен тоа, во Собранието, членовите на Комисијата за надворешна политика ќе расправаат по предлог-законите за ратификација на Спогодбата меѓу Република Македонија и Република Бугарија за соработка во случај на катастрофи и за ратификација на изменувањата на протоколот 2 кон договорот за слободна трговија меѓу Република Македонија и Република Турција.

Овие точки се на дневен ред и на Законодавно-правната комисија.

На седницата на собраниската Комисија за еднакви можности на жените и мажите ќе се одржи јавна расправа на тема „Извештај за напредокот на Република Македонија од страна на Европската комисија за 2018 година, со посебен осврт на делот за родова рамноправност“.


На собраниски комисии извештајот на СЈО и предлог-законот за АВМУ


Скопје, 23 април, 2018 - 10:01 (META) 

Во Собранието денеска седници ќе имаат комисиите за одбрана и безбедност, за надзор над работата на УБК и Агенцијата за разузнавање, комисијата за труд и социјална политика и Законодавно-правната комисија.

Извештај за сработеното во периодот од 15 септември 2017 до 15 март 2018 година ќе поднесе Специјалното јавно обвинителство (СЈО), пред Комисијата за политички систем и односи меѓу заедниците. Ова е петтиот шетмесечен извештај за работата на СЈО.

Законодавно-правната комисија ќе одржи три седници. Ќе се разгледуваат и предлог – законот за изменување и дополнување на Законот за аудио и аудиовизуелни медиумски услуги и предлог – закон за изменување и дополнување на Законот за основање на Јавно претпријатие Македонска радиодифузија, во второ читање.

Членовите на Комисијата за надзор над работата на УБК и Агенцијата за разузнавање ќе ги разгледаат извештаите на двете институции за работата во 2017 година, како и програмата за работата на УБК за оваа година.

Предлог – законот за изменување и дополнување на законот за оружјето во второ читање, како и предлог – законот за странци се во прво читање пред Комисијата за одбрана и безбедност.

Пратениците од Комисијата за труд и социјална политика ќе расправат за предлог – законот за изменување и дополнување на Законот за вработување инвалидни лица во прво читање.


ЕК: Има напредок во слободата на изразување, намален е притисокот врз новинарите


Скопје, 18 април, 2018 - 14:16 (META) 

Климата за слободата на медиумите и слободата на изразување е подобрена, со поотворена политичка дебата и покритичко известување во медиумите. Забележан е пад во притисокот врз новинарите. Известувањето од изборните кампањи и поизбалансирано од порано. Владиното рекламирање е прекинато. Клучно е власта да практикува нулта толеранција кон сите инциденти на физички и вербални напади или закани врз новинарите, се вели во Извештајот на Европската Комисија за напредокот на Македонија, кој беше објавен вчера.

Според делот за слободата на говорот, Македонија е на одредено ниво на подготвеност во областа на слободата на изразувањето и постигнала значителен напредок од средината на 2017 година.

„Законодавната рамка во голем дел е усогласена и со acquis и со меѓународните стандарди. Измените на Законот за аудио и аудиовизуелни медиумски услуги се подготвени во консултации со релевантните заинтересирани страни. Постои подобрена клима за медиумите и новинарите се поподготвени да ги критикуваат злоупотребите на јавните личности и цензурата. Сепак, опстануваат предизвици и мора да се спроведува нулта толеранција за физичкото и вербалното малтретирање или заканите кон новинарите. Јавниот радиодифузен сервис треба да се реформи и да се зајакне неговата независност. Земјата делумно ги спроведе препораките од извештајот за 2016 година, пред сè со укинување на владиното рекламирање и намалување на притисокот врз новинарите и медиумите, што овозможи побалансирано известување“, се наведува во извештајот.

Европската Комисија препорачува продолжување на реформите на јавниот радиодифузен сервис и засилување на неговата независност. Се посочува и на преземање мерки за да се поттикне објективното известување и разноликост на гледиштата во медиумите, како и да се охрабрува професионалното однесување од страна на сите медиумски чинители.

Се посочува и на соодветно постапување на органите на редот и на судските власти за случаите на насилство врз новинарите.

Европската Комисија наведува дека Владата направила напори да биде потранспарентна и новинарите сега бесплатно добиваат достап до информации и документи, што е зацртано во Итните реформски приоритети.

Во поглед на заканите кон новинарите, се одбележува дека се јавува пад на притисокот врз новинарите, како резултат на подобрената политичка клима. Се одбележува договорот на власта со Здружението на новинарите од декември минатата година за истрага за случаите на нападнатите новинари. Сепак, како што се наведува во Извештајот за напредокот на Македонија, регистрирањето на напади врз новинари е несоодветно и покренати се многу малку истраги.

„Клучно е властите да спроведуваат нулта толеранција кон сите инциденти на физичко и вербално насилство или закани кон новинарите и тие соодвено да бидат третирани  од страна на полицијата и Јавното обвинителство. Има 21 новопријавен случај на заплашување на новинари и 13 судски процеси во кои се вклучени новинари. Неколку новинари беа меѓу повредените во насилставата во Парламентот на 27 април. Агенцијата за аудио и аудиовизуелни медиумски услуги забележа непрофесинално известување од страна на јавниот радиодифузен сервис и приватна телевизија во врска со овие настани“, вели Европската Комисија.

Во поглед на измените на законот за аудио и аудиовизуелни медиумски услуги кои владата во февруари годинава ги одобри и сега предлог-законот е во Собраниска процедура, се напоменува дека некои вклучени страни го изразиле своето несогласување со некои измени, посебно во поглед на финансирањето од државниот буџет. Законската рамка за говорот на омраза според ЕК е генерално усогласена со меѓународните стандарди, но нивното спроведување треба да биде подобрено. Говорот на омраза онлајн и понатаму е нерегулиран.

За Агенцијата за аудио и аудиовизуелни медиумски услуги (ААВМУ) се вели дека својата надгледна улога ја врши поефикасно, вклучувајќи го тука и периодот на изборите. Се напоменува дека ААВМУ почнала процедури за небалансираното известување и прекршување на ограничувањата за платено политичко рекламирање.

Во поглед на известувањето на некои приватни телевизии се вели дека квалитетот напреднал, но сепак во некои медиуми се уште има лошо ниво на професионалните стандарди, со што се нарушува објективноста на информирањето.

„Набљудувањето на Советот за етика во медиумите на Македонија покажува дека е потребна понатамошна работа за подобрување на етичките стандарди. ЕК одбележува дека истражувачкото новинарство е уште во ограничени рамки, како и дека се јавува пад на случаите на навреди и клевета против новинари, со 13 нови случаи во 2017“, стои во Извештајот.

Известувањето на јавниот радиодифузер МРТ било поизбалансирано во последните изборни кампањи споредено со минатото, а се одбележува и дека куќата усвоила Етички кодекс. Сепак, потребни се дополнителни напори и долгорочна стратегија за да се засилат независноста и објективноста во информирањето, како и финансиската одржливост на МРТ.

Во поглед на нејзините финансии, во контекст на финансирањето на буџетот, се вели дека мора постојано да се следи спроведувањето на реформите за да се спречи директно или индиректно политички влијание што би ја поткопало независноста на куќата и би обеззбедило стабилно, предвидливо и достаточно обезбедување средства.

За ААВМУ и другите институции се вели дека немаат капацитети да ги идентификуваат и спречат соработките меѓу медиумските сопственици и политичарите, што пак влијае на уредувачката политика.

Одбележувајќи дека новата влада го сопре владиното рекламирање на комерцијалните медиуми, се вели и дека се намалил бројот на медиуми, со затворањето на МПМ.

Во поглед на професионалните организации, се вели дека нема напредок во заштитата од страна на синдикатот за работните услови на новинарите, поради што, новинарите практикуваат самоцензура и работат со договори на одредено време.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Со серија забелешки, законот за АВМУ следната недела оди на пленарка во Собранието


Скопје, 27 март, 2018 - 14:59 (META) 

Потребни се повеќе пари за Македонската радио телевизија (МРТ) како јавен радиодифузен сервис, но и давање поголеми ингеренции за регулација и улога на предлагач на решенија на Советот на Агенцијата за аудио и аудиовизуелни медиумски услуги (ААВМУ) за да се овозможат суштински медиумски реформи. За да не се предизвика големо нарушување на рекламниот пазар, пак, неопходно е да се оневозможи МРТ да емитува реклами и така да земе голем дел од рекламниот колач.

Тоа беа главните и најчестите забелешки на денешната јавна расправа за Предлог- законот за изменување и дополнување на Законот за аудио и аудиовизуелни медиумски услуги, којшто Владата го испрати до Собранието минатиот месец. Денешната расправа во организација на Комисијата за европски прашања е четврта по ред.

Како што рече министерот за информатичко општество и администрација, Дамјан Манчевски, процесот уште не е завршен, односно, постои можност текстот да се доработува, иако, како што рече, се очекува предлог-законот следната седмица да се најде на собраниска седница.

Можноста за подобрување на сегашниот текст Мачевски ја насочи кон амандманската расправа во Собранието. Според него изборот на членовите на Советот на ААВМУ и на Програмскиот совет на МРТ, кој ќе се врши со двотретинско мнозинство во Собранието, ќе овозможи во нив да влезат професионалци со што ќе се минимизира можноста политичките структури да влијаат врз медиумите и да ја загрозуваат нивната слобода.

Според Климе Бабунски од ПРО МЕДИА и Дејан Георгиевски од Центарот за развој на медиумите голем проблем е финансирањето на МРТ, односно предвидените средства од 0,7 отсто од државниот буџет за годинава, кои треба да пораснат до 1 отсто од буџетот за 2020 година се недоволни за вистинско вршење на сите функции на јавниот радиодифузен сервис. Дел од учесниците во расправата предложија да се предвиди и развој на дописничката мрежа за вистинско објективно информирање на сите нивоа.

Насер Селмани и Драган Секуловски од Здружението на новинарите излегоа со истите забелешки, но се осврнаа и на одредбите од функционирањето на Агенцијата за АВМУ. Побараа и интервенции во текстот за да се спречи каква било можност во иднина Владата да го наруши пазарот со свои реклами.

Според Иван Мирчевски, директор на телевизијата „Канал 5“, предвидени се многу строги казни за телевизиите и директорите и предложи нивно укинување или ублажување, исто како и Благој Христов од Стопанска комора како претставник на кабелските оператори, кој побара измени од сферата на пренесувањето на програмите.

И Мирчевски и претставниците на другите телевизии – Мишко Иванов од „24 вести“, Славица Арсова од „Сител“ – побараа да се избрише членот од предлог-законот кој ќе овозможи комерцијални реклами на МРТ.

Пратеничката Маја Морачанин побара во казнените одредби за дискриминација во медиумските содржини задолжително да бидат вклучени и казни за дискриминација поради сексуалната ориентација и родовиот идентитет.

Во расправата учествуваше и министерот за комуникации, транспарентност и отчетност, Роберт Поповски, а во салата покрај нивните колеги од владејачката коалиција, беа и пратениците Зоран Илиоски, Лилјана Кузмановска и Лилјана Затуроска од ВМРО-ДПМНЕ.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Во Собранието денеска предлог-законот за АВМУ


Скопје, 19 март, 2018 - 11:15 (META) 

На 38-та седница во Собранието на Република Македонија денеска, покрај другите точки, пратениците треба да расправаат и за предлог-законот за аудио и аудиовизуелни медиумски услуги (АВМУ).

По девет месеци од првите активности за донесување нов закон, кој треба да донесе департизација и професионализација на јавниот радиодифузен сервис, односно Македонската радиотелевизија (МРТ), и регулаторното тело – Агенцијата за аудио и аудиовизуелни медиумски услуги (ААВМУ) и неколку измени на текстот, постапката влегува во завршница. Досега беа одржани две јавни расправи и неколку консултации во организација на Министерството за информатичко општество и администрација (МИОА).

Меѓу побитните измени се тие што членовите на Советот на ААВМУ,  за разлика од досега, ќе бидат професионално ангажирани во Агенцијата и ќе добиваат месечен надоместок во висина од најмногу четири просечни месечни плати исплатени во Македонија. Притоа ќе имаат петгодишен мандат, со право за избор во уште еден мандат, наспроти сегашното решение за седумгодишен мандат. Советот ќе може да покренува прекршочна постапка против медиуми или оператори на јавни електронски комуникациски мрежи.

Предлог-законот забранува и емитување програми кои, освен загрозување националната безбедност или поттикнување на насилно уривање на уставниот поредок или на оружен конфликт, содржат дискриминација или шират нетрпеливост и омраза по која било основа.

Исто така, програмата на радијата и телевизиите во текот на еден ден ќе мора да вклучува 30 отсто програма изворно создадена како македонско дело, а за МРТ тој процент ќе изнесува 40 отсто.

Законот го поставува финансирањето на МРТ, ААВМУ и ЈП Македонска радиодифузија на од 0,7 до еден отсто од државниот буџет. Нивото од еден отсто ќе стане правило од 2021 година.

Од државните пари, 74,5 отсто ќе одат за МРТ, 19,5 за Македонска радиодифузија, а шест отсто за агенцијата. МРТ и понатаму ќе може да емитува платени комерцијални реклами.

Со предлог-законот се укинува можноста за реклами од државните тела по пат на нетранспарентни постапки и постапки со исклучоци и се оневозможува појавата Владата да биде доминантен огласувач во медиумите.

Телевизијата од јавниот радиодифузен сервис ќе има најмалку еден канал на македонски јазик, еден канал на албански јазик и еден канал за останатите националности, додека Радиото ќе мора да има два канала на македонски јазик и еден на албански јазик и на јазиците на останатите етнички заедници.


Шест години не се мешам во политиката, вели старо-новиот директор на МРТ, Цветковски


Скопје, 15 февруари, 2018 - 11:26 (META) 

Марјан Цветковски, кој во вторникот беше избран за уште еден мандат за директор на Македонска радио телевизија (МРТ), за „Мета“ вели дека не сака да ја коментира изјавата на владиниот портпарол Миле Бошњаковски.

Изборот на Цветковски, кому ова му е трет мандат на чело на МРТ, предизвика серија негативни рекации од политичари, новинари и новинарски здруженија.

– Видете, јас шест години не се мешам во дневна политика, нема ни сега. Не би коментирал ништо повеќе – ни рече Цветковски.

На прес-конференцијата во Владата, Бошњаковски рече дека новиот избор на Цветковски е „одлука на Програмскиот совет на МРТ кој сè уште функционира во стариот состав, а граѓаните на Република Македонија добро знаат кој членува во тој стар состав, на кој начин работеше и под чии влијанија и како е направен овој избор“.

– Веднаш по усвојувањето на новиот Закон за аудио аудиовизуелни услуги ќе се овозможи професионално непартиски нови раководни позиции и во Македонската радио телевизија и во Агенцијата за аудио и аудиовизуелни услуги (ААВМУ). Тоа значи дека овој избор е на важност сè додека не го усвоиме законот. Ќе го усвоиме наскоро, и со ова законско решение, оваа Влада ќе ја прекине оваа практика на нетранспарентност, ќе овозможи целосна професионализација и департизација на МРТ и на Агенцијата – рече владиниот портпарол.

 

Цветковски во писменото обраќање по неговиот реизбор, рече дека се заблагодарува за укажаната доверба и можноста и рече дека ќе ги слуша и критичарите.

„Им благодарам на сите оние кои ми даваат поддршка, но и на оние кои критички ја опсервираат мојата работа или пак имаат дилеми околу мојот избор. Сакам да истакнам дека ќе продолжам да бидам отворен за секоја добра идеја и за секоја конструктивна критика. Со внимателност ги следам сите перцепции и ставови и ќе продолжам да се трудам да ја извлечам секоја аргументирана поента која е присутна во јавниот дискурс и да ја применам во интерес на националниот сервис“, напиша Цветковски.
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.