!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ЈП „Енерго“ Штип треба да изработи проекти за гасифицирање на градот догодина


Штип, 12 јануари, 2018 - 13:33 (META) 

Јавното претпријатие „Енерго“ Штип, годинава треба да ги заврши сите проекти, односно да ја изработи документацијата за следната година да биде ставена мрежа за гасифицирање на градот, најави штипскиот градоначалник, Благој Бочварски по средбата со директорот на Македонски енергетски ресурси (МЕР), Благојче Котески.

ЈП „Енерго“ Штип било формирано од претходната власт, но седум години не ја вршело функцијата за кое било основано.

– Ќе продолжиме со ревидирање на физибилити студијата и со изработка на инфраструктурен и основен проект за гасификација на Штип. Годинава очекувам дека ќе ги завршиме сите проектни документации, и догодина, доколку се тече како што треба, граѓаните ќе можат да бидат сведоци на поставување на нова алтернативна инфраструктура во градот – изјави Бочварски.

Котески информираше дека Штип има можност да биде првиот град од регионот кој ќе може да се гасифицира, и е во предност од останатите општини.

– Општина Штип е во предност затоа што на само три километри се наоѓа главната гасоводна мрежа. Главната мерна регулациона станица е во состојба да дава гас за Штип – изјави Котески.

Во буџетот на Општина Штип предвидени се шест милиони денари за проектите кои треба да го реализира ЈП „Енерго“. Првично е предвидено да се гасифицираат индустриските објекти, кои се во непосредна близина на гасоводната мрежа на МЕР, а исто така да бидат и опфатени и општинските институции, градинки, училишта и  домаќинствата.

Котески потенцираше дека до сега само општините Штип и Битола се обратиле до МЕР за проектот гасификација и ова се општините, кои имаат обезбедено свои буџетски средства за оваа намена.


МЕПСО ќе гради нов далекувод од Штип до Пробиштип


Скопје, 28 декември, 2017 - 11:33 (META) 

МЕПСО ќе инвестира 2,45 милиони евра во изградба на нов 110-киловолтен далекувод што ќе ги поврзува Штип и Пробиштип, информираат од компанијата.

Генералниот директор на МЕПСО, Сашо Василевски и Ерион Муши, претставникот на конзорциумот изведувачи „Пинг гао груп“ од Кина и „Ндрекај“ од Албанија го потпишаа договорот за изградба на новиот далекувод.

„Далекувод што ќе ги поврзе трансформаторските станици „Штип“ и „Пробиштип“ ќе биде долг 27,2 километри. Овој линиски енергетски објект ќе се гради на истата траса на која сега поминува 110-киловолтен далекувод што ги поврзува двете трансформаторски станици и е во функција 45 години, од 1972 година. Изградбата на новиот далекувод ќе трае 12 месеци“, информираат од МЕПСО.

Во соопштението се додава дека, овој проект значајно ќе го зголеми капацитетот на преносната мрежа во источниот регион, а особено е значајно подобрувањето на условите за снабдување со квалитетна електрична енергија за Пробиштип, Злетово, Кратово и Крива Паланка.

Изградбата на нов далекувод меѓу Штип и Пробиштип е дел од проектот за ревитализација на преносната мрежа што опфаќа изградба на вкупно шест далекуводи од мрежата на МЕПСО.


„Оне-Вип“: Има проблеми поради прекин на главните оптички врски


Скопје, 14 декември, 2017 - 14:47 (META) 

Корисниците на телекомуникацискиот оператор „Оне-Вип“ претпладнево се жалат на прекин на мрежата и невозможност за остварување телефонски повици како и употреба на интернет.

Од „Оне-Вип“ велат дека се соочуваат со проблем поради прекин на главните оптички врски.

„Поради прекин на главни оптички врски во моментов се соочуваме со глобален проблем кој се манифестира со остварување на повици кон мрежата на ‘Оне-Вип’ и проблем со употреба на интернет сервисите. Нашите екипи веќе работат на отстранување на потешкотиите во најбрз можен рок. Ви благодариме на разбирањето“, велат од „Оне-Вип“.


Државните службеници во подрачните одделенија во Тетово два дена се без греење


Тетово, 13 јануари, 2017 - 15:34 (META) 

Државните институции сместени во зградата на Општина Тетово, од вчера се без греење. Работи само една фаза од електричната мрежа, на која не можат да се приклучат грејни тела. Административците од подрачните одделенија во Тетово, на министерствата за правда, земјоделство, финансии, работат со јакни, капи, шалови.

– Па, нема никакакви услови, многу е студено, работиме на температура под нулата, а не е првпат ова да ни се случува – изјави еден вработен во тетовското подрачно одделение на Министерството за финансии.

Од ЕВН велат дека поради замена на електричен кабел, вчера не работела една фаза во тој дел од градот каде се лоцирани и државните институции.

Денеска, како што ни изјави портпарол на ЕВН, Атанас Ковачевски, бил прегорен осигурувач, па затоа не работеле двете фази во просториите каде се сместени државните институции.

Оваа грејна сезона, зградата на Општина Тетово нема централно греење. Во октомври минатата година целосно изгоре котларницата. Сега административците се греат на разни печки на струја и поради преоптовареност на мрежата, честопати се појавуваат прекини во напојувањето со струја.

Од Општина Тетово велат дека се работи на реконструкцијата на котларницата, но поради ниската температура десетина дена градежните активности биле во мирување. Деновиве се очекува целосно да се обнови котларницата и зградата на Општина Тетово повторно да добие централно греење.


Македонскиот и бугарскиот Омбудсман разговараа за мрежа на правобранители


Софија, 16 октомври, 2016 - 10:50 (META) 

Идеа за креирање на мрежа на омбудсмани на Западен Балкан беше тема на разговорите помеѓу македонскиот народен правобранител, Иџет Мемети, и неговата бугарска колешка, Маја Манолова, за време на нивниот состанок во Софија.

Идејата e идната организација да им помага на граѓаните од земјите-членки во случај на проблем на територијата на странска земја.

Манолова се понуди да биде домаќин на првиот состанок на јавни правобранители од регионот.

Мемети и Манолова дискутираа и за борбата против монополите при што Мемети го истакнал одложениот процес на либерализација на пазарот на електрична енергија и дека една компанија има монопол на оваа услуга. Манолова му кажа за битката со „Топлификација Софија“.

Народните правобранители на двете земји се согласија околу идејата за мрежа на омбудсмани и да соработуваат околу борбата против монополите, бидејќи постојат ретки случаи каде исти компании или нивните подружници обезбедуваат исти јавни услуги во неколку соседни земји.

Манолова ја прифати поканата на Мемети наскоро да дојде во посета на Скопје.


Почна да се гради гасоводната мрежа Штип – Неготино


Неготино, 30 август, 2016 - 16:50 (META) 

Гасоводната мрежа Штип – Неготино во должина од 36 километри почна да се гради денеска. Инвестицијата чини околу 16 милиони евра, а ќе ја гради македонски конзорциум предводен од кумановски „Рапид билд“, заедно со уште четири компании „Ел-Те“, „Сектартермо“, „Чакар партнер“ и „Квалитет пром“.

Оваа мрежа се надоврзува на гасоводот Клечовце – Штип, чија изградба во должина од 61 километар заврши минатиот месец, а беа инвестирани 75 милиони долари.

Се очекува изградбата на делницата Штип – Неготино да заврши до крајот на следната година.

Паралелно со изградбата на оваа делница, во текот на следниот месец се очекува да почне и изградбата на гасоводните делници Неготино – Прилеп – Битола и Скопје – Тетово – Гостивар, со што ќе се заокружи првата фаза од изградбата на националната гасоводна мрежа.

Премиерот Емил Димитриев истакна дека до 2019 година се планира да бидат изградени 265 километри од гасоводниот систем.


„Оне-Вип“ почна со изградба на нова интегрирана мрежа


Скопје, 23 декември, 2015 - 14:45 (META) 

Компанијата „Оне-Вип“ ја почна изградбата на новата интегрирана мобилна мрежа. Создавањето нова мрежа почнува на крајот од 2015 година и ќе се одвива регион по регион. Придобивките ќе бидат достапни за поголемиот дел од корисниците кон крајот на 2016 година.

– Новата мобилна мрежа ќе има цел на сите корисници на „Оне-Вип“ да им обезбеди значително поголеми капацитети на технологијата 3Г, поголема мрежна покриеност на целата територија на земјата и 4Г ЛТЕ достапност низ цела Македонија, за да се обезбеди најдобро корисничко искуство и најнови светски технолошки достигнувања во мобилниот сегмент – соопштуваат од компанијата.

Со спојувањето на двете компании во октомври 2015 година, новоформираната компанија „Оне-Вип“ прерасна во еден од најголемите телекомуникациски оператори во Македонија, која опслужува повеќе од 1,3 милиони корисници со услуги на мобилна и на фиксна телефонија, интернет-комуникација и телевизија.


Од рибокрадци одземени рибарски мрежи, риба, опрема и риболовен алат


Охрид, 22 ноември, 2015 - 14:02 (META) 

Рибарски мрежи во вкупна должина од околу 2.000 метри, сто парчиња риба – охридска белвица, едно кајче и повеќе примероци од риболовен алат, прибор и друга опрема, се пронајдени и одземени при патроли на полициската станица за граничен надзор на Охридско Езеро.

Акциските контроли на езерската полиција се реализираа пред два дена, во соработка со инспектори од Државниот инспекторат за земјоделство, по целата должина на северо-западната езерска гранична линија, но и во другиот дел од територијалните води на езерскиот басен. Акциите беа координирани со полициски службеници од полициската станица за граничен надзор Франгово.

Во нелегален риболов затекнат е еден жител од струшкото крајезерско село Калишта, кој забележувајќи ја патролата, се обидел да побегне. Од неговиот чамец одземен е улов од риба – белвица и пастрмка, како и друга рибарска опрема.

Во водите на Охридско Езеро, во истиот регион, езерската патрола пронајде висечки рибарски мрежи кои се најстрого забранети за користење и за риболов.

За пронајдените риби и рибарска опрема, запознат е јавниот обвинител и подготвен е записник. Со потврда, целокупното количество риба и другите предмети се одземени.


Разбиена криминална група во рамки на акцијата „Мрежа“


Скопје, 26 јули, 2015 - 14:58 (META) 

На 23 овој месец, по спроведена повеќемесечна истрага, секторот за недозволена трговија со дрога при одделот за сузбивање организиран и сериозен криминал реализираше случај на недозволена трговија со наркотична дрога, при што во моментот од слобода се лишени пет лица, македонски државјани, сите членови на криминална група, соопштија од МВР.

Според досегашните документирани сознанија, оваа криминална група подолг временски период се занимавала со недозволена трговија и со препродажба на кокаин низ улиците на Скопје. Имено, кокаинот го препродавале како на дилери така и директно на зависници по цена од 60 до 70 евра за еден грам.

Во рамки на акцијата, која е дел од оперативната обработка „Mрежа“, запленети се 20 грама кокаин, вага, патничко моторно возило „голф 5“, пиштол со три рамки и со 15 куршуми, повеќе СИМ-картички и мобилни телефони, а од осомничените привремено се одземени и парични средства во износ од 40.000 евра.

Досега, во рамки на оперативната акција „Мрежа“ кривично се пријавени повече од 185 лица, а запленети се преку 525 најразлични видови наркотична дрога.


„Ербас“ ќе гради гигантска сателитска мрежа


Париз, 15 јуни, 2015 - 15:41 (META) 

Европскиот гигант „Ербас“ склучил договор за изградба на најголемата констелација на сателити во светот, пренесува „Би-Би-Си“.

Компанијата планира да произведе 900 сателити за концернот „Уан веб“ (OneWeb), кој има намера да го прошири интернет-пристапот низ целиот свет.

Договорот бил објавен на Париското аерошоу и, според плановите, првично ќе бидат лансираат повеќе од 600 сателити, додека другите ќе се чуваат како резерва.

Консталацијата на сатетили на „Уан веб“, која ќе чини неколку милијарди долари, ќе ги минимизира сите претходни комерцијални мрежи за десетпати.

Според очекувањата, секој сателит ќе биде тежок околу 150 килограми, а според информациите „Уан веб“, цената за една единица ќе биде околу половина милион долари.

Како што пренесува „Би-Би-Си“, од „Ербас“ изјавиле дека првите 10 ќе бидат произведени во фабруката во Тулуз, а потоа работата ќе се пресели во САД.

За транспортот на сателитите во орбитата, ќе бидат потребни голем број ракети, поради што, пренесува „Би-Би-Си“, во проектот најверојатно ќе биде вклучен и „Вирџин груп“ на Ричард Бренсон, кој, во меѓувреме, работи на развој на систем за лансирање сателити базиран на неговиот туристички „вселенски авион“.