Срѓан Керим и Јана Станисављева на распит во СЈО за „МПМ“


Скопје, 13 септември, 2018 - 12:03 (META) 

Поранешните први луѓе на Медиа принт Македонија (МПМ), Срѓан Керим и Јана Станисављева, се повикани на распит во Специјалното јавно обвинителство (СЈО), јави „Сведок“.

Двајцата треба да дадат исказ во рамки на истрагата за бројни злоупотреби во МПМ, што ја води ова обвинителството откако предметот го презеде од Основното јавно обвинителство.

Компанијата беше издавач на згаснатите весници „Дневник“,„Вест“ и „Утрински весник“.

Обвинителката Лиле Стефанова за овој случај веќе распрашала и поранешни вработени во весниците, подносители на пријавата, а била одземена и документација за овој случај.

Во Основен суд Скопје 2, во тек е постапка за стечај врз МПМ.


СЈО го презема затворањето на весниците на МПМ


Скопје, 24 јули, 2018 - 13:51 (META) 

Специјалното јавно обвинителство (СЈО) комплетно ја презема надлежноста за случајот со затворањето на весниците на МПМ од скопското обвинителство, јави ТВ 24.

Се истражуваат наводи од една од „бомбите“, односно  злоупотреба на функциите на тогашните први луѓе Срѓан Керим и Јана Станисављева.

Се прават проверки за евентуален економски криминал, по поднесена кривична пријава од ССНМ. Се проверуваат финансиските  исплати во време кога весниците згаснуваа поради наводна финансиска криза.


ССНМ бара да се исплатат неисплатените плати на вработените во МПМ


Скопје, 23 ноември, 2017 - 11:32 (META) 

Самостојниот синдикат на новинарите и медиумските работници (ССНМ) го поддржува барањето на поранешните вработени во „Медија принт Македонија“ за исплаќање на неисплатените плати и хонорари, кои се уставно гарантирано право на секој работник.

Поради сомневањата за криминално работење, ССНМ во јуни годинава, поднесе кривични пријави против сопственикот и директорот на компанијата, Срѓан Керим, и управителката Јана Станисављева, за злоупотреба на службената положба и овластување, затоа што свесно и со умисла го разнебитувале имотот на компанијата за да ги згаснат медиумите во сопственост на МПМ.

„Дополнително за односот на менаџментот кон своите некогашни вработени говори и фактот што, додека во јавноста се презентираа информации дека компанијата кубури со пари и затоа платите на вработените доцнат со месеци, истовремено, на еден од управителите на фирмата била исплаќана месечна плата во висина од неколкугодишна просечна новинарска плата. За згаснувањето на весниците и на интернет-медиумите на компанијата, ССНМ смета дека главен виновник е менаџментот на компанијата кој наместо да дозволи на вработените, новинарите професионално да ја работат новинарската работа како во сите демократски општества, се одлучи да им слугува на политиката и на политичките афилијации на менаџментот“, велат од ССНМ.

Од Синдикатот ги повикаа надлежните институции да го решат случајот и да се исплатат заостанатите плати на речиси 400 вработени во изданијата на компанијата.


„Дневник“ згасна, денешниот е последниот број


Скопје, 13 јуни, 2017 - 12:55 (META) 

„Дневник“, првиот приватен дневен весник во Македонија што опстоја со децении на пазарот, денеска го испечати последниот број. Весникот излегуваше од 20 март 1996 година.

Од утре весникот нема да се печати, а на вработените ќе им биде исплатена плата за мај во следните 20 дена, кога ќе бидат на одмор.

Ова од менаџментот денеска им го соопштиле на околу 60 вработени во „Дневник“, со образложение дека фирмата не успеала да обезбеди кредит, неопходен за функционирање на весникот и за исплатата на обврските.

Пред еден и пол месец престанаа да излегуваат и дневните весници „Утрински весник“ и „Вест“, кои ги издаваше фирмата „Медиа принт Македонија“, заедно со „Дневник“.

Во „Дневник“ во изминатите 21 година продефилираа и се искалија видни новинарски имиња.


Трифун Костовски: Не се обидов да си го вратам „Утрински весник“


Скопје, 26 април, 2017 - 17:30 (META) 

Последниот број на „Утрински весник“ ќе излезе в сабота, на 29 април, тврдат новинарите кои се вработени во овој медиум. Официјален став од издавачот „Медија принт“ за затворањето на „Утрински весник“ сè уште нема.

Не е познато ниту дали весникот претходно бил понуден на продажба на друга компанија или лице.

Бизнисменот Трифун Костовски беше мнозински сопственик и заедно со уште неколку уредници го основа весникот.

На прашањето на „Мета“ дали се обидел да си го врати некогашното сопствеништво врз весникот, Костовски вели изрично „не“.

– Времињата се променија, поминаа многу години и сега еден таков обид за враќање на брендот би предизвикал бурни реакции, пред сè политички – вели Костовски.

Тој е запознаен со случувањата во овој медиум и жали за целата ситуација, бидејќи, како што вели, „Утрински весник“ го основале со чиста намера и со чисто срце.

Според новинарот Бранко Тричковски, кој е еден од основачите на „Утрински весник“, „смртта на „Утрински“ е тажен крај на еден голем новинарски, издавачки и културен проект“.

„Во својата агонија, весникот ја следеше агонијата на Македонија како национална и државна идеја. Тоа што ќе умре пред да умреме сите како заедница, можеби и не е толку лош редослед за еден весник“, вели Тричковски.

Според него, неколку фактори, кои биле меѓусебно поврзани, го одредиле драматичниот крај на „Утрински“.  Тој ја споменува „глобалната драма на пишаните медиуми како резултат на технолошките пробиви, односно развојот на новите медиуми“.

„Второ, тоа е општата културна деградација на македонското општество во политичкиот проект на ВМРО-ДПМНЕ. Трето, тоа е институционалната и правна деградација на општеството и на државата, повторно во режија на ВМРО-ДПМНЕ. Четврто, уништување на вредносните ориентири на општеството, односно моралната дезориентација, губитокот на знаковите што е добро и убаво, а што е лошо и грозно. Петто, разорувањето на редакциската структура и културната, информативна и општествена мисија на весникот. За таа работа не се без вина и многу колеги што продефилираа низ весникот, но главен виновник е еден монструм кого го оставив во посебна точка“, вели Тричковски.

Првичните сопственици во 2004 година својот дел му го продадоа на германскиот ВАЦ, кој во пакет со „Утрински весник“ ги купи и „Вест“ и „Дневник“.

Во 2012 година, весниците ги презеде „Орка холдинг“, а по низа промени на сопственичката структура, на 12 декември лани, компаниите „Орка Холдинг“ и „Интернет груп инвестмент“ ги продадоа своите удели.


ССНМ: Правосудните и истражните органи да ги испитаат случувањата во МПМ


Скопје, 20 април, 2017 - 19:06 (META) 

Шпекулациите за стечај на „Медиа принт Македонија“ (МПМ), проследени со конкурси за вработување на новинари во фирма со слично име во сопственост на еден од директорите на МПМ, се последниот чин од драматичното пропаѓање на оваа медимска куќа, која уште еднаш потврди дека нема чесни намери кон своите вработени, велат од Самостојниот синдикат на новинари и медиумски работници (ССНМ).

Оттаму велат дека доказ за тоа се промените што се случуваат тајно, без информирање на Синдикатот и тоа што бројот на работните позиции, според огласот, е драматично помал од актуелниот бројот на вработени во МПМ.

„Во клучни моменти во кои се решава судбината на вработените, тие се ставени пред избор ’земи или остави’, додека сопствениците се зафатени или се на пат. Условите за вработување се на определено време, со што новите работници ќе бидат лесно уценувани со губење на работата доколку на каков и да е начин бидат оценети како неподобни“, стои во соопштението на Синдикатот.

Од ССНМ ги повикуваат институциите, пред сè Министерството за труд и социјална политика, но и правосудните и истражните органи да се „позанимаваат со случајот во кој е очигледно дека законските прописи се користат на начин на кој единствени губитници од лошото менаџирање ќе бидат тие што се и најмалку одговорни – вработените“.

„На колегите од ’Медиа принт Македонија’, ССНМ јавно им порачува да не потпишуваат однапред никакви спогодбени откази затоа што така ќе ги загубат можностите да ги наплатат своите побарувања (неисплатените плати), како и поддршката што им следува од Агенцијата за вработување во случај на стечај“, нагласуваат од Синдикатот.


По еден месец штрајк, новинарите во МПМ се враќаат на работа


Скопје, 14 март, 2017 - 16:02 (META) 

Со префрлањето на платата за јануари, штрајкувачкиот одбор на „Дневник“, „Утрински весник“ и на „Вест“ донел одлука за прекин на штрајкот, информираат од Самостојниот синдикат на новинари и медиумски работници (ССНМ).

– ССНМ со жалење констатира дека и покрај префрлањето на платата, ситуацијата на вработените во МПМ и понатаму е критична и очекува од управата да извлече поуки од речиси четиринеделениот прекин на работата. Штрајкот е најнепосакуваното оружје на синдикалната борба, од која никој не може да излезе како победник. Затоа очекуваме дека одлуката за негов прекин ќе биде разбрана како израз на добра волја во интерес на сите и мотив за востпоставување сериозен социјален дијалог во интерес и на сопствениците и на вработените, кој ќе спречи сцените на протести и на штрајк да не се повторуваат и во иднина – велат од ССНМ.

Штрајкот на новинарите во МПМ почна на 17 февруари.


Поддршка за новинарите во МПМ од синдикатите на Црна Гора, Хрватска и на Србија


Скопје, 24 февруари, 2017 - 15:34 (META) 

Синдикатите на новинари на Црна Гора, Хрватска и на Србија изразија целосна солидарност и поддршка на Самостојниот синдикат на новинари и медиумски работници и на новинарите на „Утрински весник“, „Дневник“ и на „Вест“, трите дневни весници на фирмата „Медиа принт Македонија“, кои штрајкуваат од 17 февруари годинава поради неисплатени плати, придонеси и хонорари, како и поради избегнувањето на управата да им даде основни информации за состојбата и за плановите за опстанок на фирмата.

„Како и другите во регионов, и новинарите на МПМ се еден од примерите на искористување на медиумите во транзициските земји за остварување на економски и на политички цели на центрите на моќ, а сè под закрилата на ширењето на демократијата во земјите од Југоисточна Европа. Спрегата на сопствениците на медиумите и на политичката елита на локано, но и на пошироко европско ниво, повеќе се грижеше за својот профит и за наметнување на своите политички цели, а помалку за правото на јавноста во тие земји да биде информирана за битни теми. Медиумските сопственици од западните земји не ги донесоа очекуваните промени“, велат од синдикатите на новинари од Црна Гора, Хрватска и од Србија.

Со оглед на сличните транзициски искуства и состојбите во медиумите, синдикатите на новинарите на Црна Гора, Хрватска и на Србија велат дека во целост ја разбираат тешката положба на македонските колеги и колешки и ги поддржуваат во нивната борба за основно човеково право да бидат платени за својата работа и да го одбранат своето човечко и професионално достоинство.


Петти ден штрајк на новинарите во МПМ


Скопје, 21 февруари, 2017 - 12:52 (META) 

Со симболично делење на јубилејниот петилјадити број на весникот „Вест“ од страна на штрајкувачкиот одбор на „Вест“, „Утрински весник“ и на „Дневник“, денеска се одбележа петтиот ден од штрајкот на новинарите и на медиумските работници во редакциите на „Медиа принт Македонија“.

Од Самостојниот синдикат на новинари велат дека прекинот на работата заради неисполнетите барања за плата и за хонорари продолжува, но и дека продолжува и нивната подготвеност за конструктивна комуникација.

ССНМ и штрајкувачките одбори уште еднаш истакнуваат дека станува збор за легитимна акција која не е со цел да се наруши угледот на весниците ниту на МПМ.

„Во заеднички интерес на сите е опстанокот и успешно работење на брендовите во чие градење многумина кои денес штрајкуваат се вклучени со сиот свој професионален и човечки капацитет. Mенаџментот упорно одбива средба со претставниците на штрајкувачкиот одбор. Тензиите се зголемуваат. Со тоа и неизвесноста. Зголемувањето на времетраењето на штрајкот е директен резултат на однесувањето на менаџментот“, велат од ССНМ.

Новинарите и медиумските работници денеска добија поддршка и од прогреснивните синдикати на УПОЗ, СИЕР, АГРО и на СУДКОС.


ССНМ: Ќе се радикализира штрајкот на вработените во МПМ


Скопје, 20 февруари, 2017 - 13:10 (META) 

Штрајкувачките одбори на редакциите „Вест“, „Утрински“ и „Дневник“ решија да го зголемат времетраењето на штрајкот од четири на шест часа поради игнорантскиот однос на менаџментот, кој иако уредно информиран, со недели не покажа интерес за средба со синдикалните претставници, соопшти ССНМ.

„Утре, 21 февруари 2017 година, ќе излезе 5.000. број на дневниот весник „Вест“. Жално е што редакцијата ќе го подготвува ова јубилејно издание од позиција на штрајк. Во претходните денови наместо разговор за решавање на проблемите, се засилија притисоците врз медиумските работници со телефонски јавувања и со закани со отпуштања и со казнувања“, стои во соопштението.

Од ССНМ наведуваат дека за притисоците врз новинарите што штрајкуваат ќе бидат информирани сите релевантни меѓународни институции, потсетувајќи дека правото на штрајк е уставно гарантирано право и е дел од цивилизациските придобивки на демократскиот свет.

„Решителноста на новинарите и на медиумските работници во изданијата на МПМ не се намалува. Преку одбрана на нивните колективни права, тие застануваат во одбрана и на демократскиот интегритет на професијата“, стои во соопштението.