Ангеловска Бежоска: Останува предизвикот за градење на независна монетарна политика


Скопје, 22 мај, 2018 - 12:21 (META) 

Анита Ангеловска – Бежоска денеска ја презеде должноста гувенерка на Народната банка од досегашниот гувернер Димитар Богов, на кој мандатот му истече вчера.

Во изјавата за медиумите таа се заблагодари на претседателот Ѓорге Иванов за нејзината номинација и на политичките партии кои што со широк консензус ја избраа за гувернерка.

Како што рече, оваа поддршка за неа е многу значајна, но и за целото општество бидејќи била поддржана професионалноста која е клучна за градење на прогресивно општество.

-Би сакала да му се заблагодарам на досегашниот гувернер Богов кој успешно ја водеше банката во критичните моменти. Бев дел од тимот кога ги поминувавме тие моменти, но благодарејќи на силниот институционален капацитет на централната банка, успешно ги поминавме – рече Ангеловска – Бежоска.

Таа потенцираше дека пред неа останува предизвикот за одржување на независна монетарна политика, но и макроекономска стабилност. Но како и досегашните раководни структури на банката, таа потенцираше дека ќе продолжи со градење на силен институционален капацитет на Централната банка, бидејќи го смета за клучен во извршувањето на задачите.

Претходно, Богов даде отчет за сработеното и рече дека двете клучни цели на банката се постигнати, односно постигната е ценовна и стабилност на банкарскиот сектор.

-Девизниот курс на денарот во однос на еврото беше одржан на стабилно ниво. Денарот не изгуби од конкурентност во однос на еврото, бидејќи инфлацијата за овие седум години од 1,5 проценти беше на слично ниво како во ЕУ од 1,2 проценти. Банкарскиот систем успешно се развиваше и растеше, така што активата и депозитите се зголемени за 50 проценти во однос на пред седум години – рече Богов.

Тој додаде дека за овие седум години, Народната банка успешно се справила со два силни, неповолни шокови како што беа грчката должничка криза во 2015 година и шпекулативниот напад врз монетарната стабилност во април и мај 2016 година. Имено, од 19 април до 23 мај 2016 година НБРМ интервенираше на девизниот пазар со продажба од 129 милиони евра, со што го затвори јазот помеѓу побарувачката и понудата на девизи и ја одржа стабилноста на девизниот курс.

Тој период, како што истакна Богов, во комбинација со политичката криза му бил најлошиот период за време на извршување на функцијата гувернер.

– Каматната стапка е на историско најниско ниво од 3 проценти. Секогаш постои дискусија дали може пониска, можеби и ќе можеше ако немаше политичка криза, но и дисциплинирана фискална политика – додаде Богов.

На прашањето на „Мета“ каде ќе ја продолжи кариерата, Богов рече дека сето ова набрзина му се случувало и дека ќе земе одмор па потоа ќе размисли што понатаму.

Неговата разделба со вработените беше прилично емотивна, бидејќи како што рече, таму поминал многу убави моменти и соработката со нив ја оцени како добра страна во работењето како гувернер.


Гувернерите на банките од регионот и ЕУ ќе се обратат на конференцијата во Охрид


Охрид, 13 април, 2018 - 10:00 (META) 

Гувернерот на Централната банка на Белгија, Јан Сметс денеска ќе има воведно предавање на седматa годишна истражувачка конференција на Народна банка, која вчера почна во Охрид. Конференцијатa е насловена „Речиси една деценија по кризата: На патот кон новиот глобален циклус и нормализирање на монетарната политика“.

Излагачи на првата панел-дискусија на вториот ден од конференцијата, исто така ќе бидат и гувернерите на централните банки од Македонија, Белгија, Хрватска, Албанија и Косово. Темата на панел-дискусијата на гувернерите е новиот глобален циклус и нормализирањето на монетарната политика.

Во втората панел-дискусија на која тема е „Капиталните текови-изгледите и ризиците на регионот“, ќе учествуваат регионалниот резидентен претставник на ММФ за Централна и Источна Европа, директорот на Здружениот институт од Виена, заменик-директорот на Секторот за економија и политики на Европската банка за обнова и развој (ЕБРД) и вицегувернерот од банката на Словенија.

На конференцијата исто така учествуваат и претставници на повеќе централни банки од регионот и ЕУ.

„Оваа конференција претставува можност за размена на искуства со претставниците на пошироката меѓународна заедница за клучни прашања од областа на макроекономијата, монетарната политика и финансиската стабилност, како за претставниците на НБРМ, така и за домашните банки и другите финансиски институции“, се вели во соопштението на Народна банка.


Народна банка ја намали каматната стапка од 3,25 на 3 проценти


Скопје, 14 март, 2018 - 15:00 (META) 

Народна банка ја намали каматната стапка на благајничките записи, како основна каматна стапка, од 3,25 на 3 проценти.

Комитетот за оперативна монетарна политика на НБРМ ги разгледал најновите остварувања во домашната економија и оценил дека има простор за олабавување на монетарната политика.

„Воедно, беше утврдено понатамошно стабилизирање на довербата и очекувањата на економските субјекти, видливо преку поволните движења на девизниот пазар и постепеното забрзување на депозитниот раст. Истовремено, последните оцени за растот на клучните трговски партнери посочуваат на подобро надворешно окружување од очекуваното досега и со тоа подобар амбиент и помали ризици за домашната економија“, се вели во соопштението на НБРМ.

Имајќи го предвид релативно високото ниво на слободни парични средства на банките, се очекува тие да ги насочат своите слободни ликвидни средства во приватниот сектор и со тоа ќе овозможат посилна кредитна поддршка на економијата во 2018 година.

Во однос на домашната економија, за првиот квартал од годината, податоците за индустријата и трговијата сигнализираат подобрување на состојбата, велат од НБРМ.


НБРМ: Се зголемуваат заштедите на населението, девизните резерви се на адекватно ниво


Скопје, 15 март, 2017 - 14:36 (META) 

Податоците за штедењето на населението и склоноста за располагање со девизи покажуваат дека домашната економија се стабилизира, велат од Народна банка по одржувањето на редовната седница на комитетот за оперативна монетарна политика, на која биле разгледани состојбите во домашната економија, движењата на меѓународните и на домашните финансиски пазари и показателите за домашната економија во контекст на поставеноста на монетарната политика.

Првичните февруарски податоци упатуваат на понатамошен пораст на штедењето на населението во банкарскиот систем, со што тие се зголемуваат девет месеци последователно.

– На девизниот пазар се задржани поволните движења, при што во првите два месеца од годината, збирно, НБРМ интервенира со нето-откуп на девизи. Девизните резерви и понатаму се на адекватно ниво. Поволните остварувања се во услови кога остварувањата и оцените за стабилноста на економските фундаменти и понатаму се позитивни – велат од Народна банка.

Домашниот бруто-производ (БДП) за четвртиот квартал покажува посилен пораст на економијата во однос на претходниот квартал (2,4 отсто наспроти 2 отсто, соодветно).

Реалниот пораст на БДП за целата 2016 година изнесува 2,4 проценти и речиси и не отстапува од проекцијата на НБРМ од 2,3 проценти за 2016 година.


Народна банка ја намали основната каматна стапка од 3,75 на 3,5 проценти


Скопје, 11 јануари, 2017 - 14:43 (META) 

Народна банка ја намали каматната стапка на благајничките записи, како основна каматна стапка, од 3,75 на 3,5 проценти.

Ова било одлучено на 10 јануари кога се одржала редовна седница на Комитетот за оперативна монетарна политика, на која биле разгледани состојбите во домашната економија, движењата на меѓународните и на домашните финансиски пазари и показателите за домашната економија во контекст на поставеноста на монетарната политика.

По намалувањето во декември, ова е второ дополнително намалување за 0,25 процентни поени.

– Ваквата реакција на монетарната политика е одраз на понатамошното стабилизирање на очекувањата на економските субјекти и на порастот на структурната ликвидност на банкарскиот сектор – се вели во соопштението на Народна банка.

Каматната стапка на благајничките записи беше зголемена за 0,75 процентни поени, од 3,25 на 4 проценти на 4 мај минатата година, како реакција на Народна банка на зголемената побарувачка на девизи и на притисоците врз депозитната база на банките.

Народна банка и во текот на декември минатата година интервенира со откуп на девизи, шест месеци последователно, со релативно голем износ.

Според податоците од декември, има зголемување на штедењето на населението во банкарскиот систем.


ЕУ нема да ја преживее следната економска криза, предупредуваат стручњаците


Париз, 22 септември, 2016 - 12:29 (META) 

Доколку креаторите на европските политики не спроведат клучни измени во монетарната политика на Европската Унија, еврото веројатно нема да ја преживее следната голема криза, предупредуваат од францускиот институт „Жак Делор“.

„Европа ќе биде погодена од следна економска криза. Не знаеме кога точно ќе се случи таа, но стравуваме дека Европската монетарна унија ќе биде лошо подготвена за една таква криза“, се наведува во извештајот на тој институт, а го пренесуваат светските агенции.

Авторите на истражувањето признаваат дека реформата на еврото можеби нема да биде популарна, но, како што истакнуваат, таа е од клучно значење и итно е потребна.

Стручњаците од институтот предлагаат зајакнување на европскиот стабилизационен механизам (ЕСМ), банкарската унија и координирање на економските политики.


Богов: За предлог-буџетот за 2017 година најдобро си знае Владата


Скопје, 20 септември, 2016 - 12:16 (META) 

За предлог-буџетот за 2017 година најдобро знае Владата, ние како Народна банка ќе ја прилагодиме монетарната политика за да се оствари монетарна и стабилност на банкарскиот сектор, одговори гувернерот на Народна банка, Димитар Богов, на новинарско прашање за предлог-буџетот за 2017 година.

Во однос на остварливоста на проектираниот пораст и дефицит од 3 проценти, Богов додаде дека Народна банка почнува со своја рунда проекции и во ноември ќе направи ревидирање на претходните видувања за порастот за следната година.

Владата на вчерашната седница го одобри предлог-буџетот за 2017 година и тој е доставен до Собранието.


Банките ги заоструваат условите за одобрување на потрошувачки и станбени кредити


Скопје, 17 август, 2016 - 9:34 (META) 

Околу 11 проценти од банките ги заостриле кредитните услови кај потрошувачките, но и кај станбените кредити, покажува најновата анкета на Народна банка за кредитната активност, што не беше случај во претходната анкета.

„За наредниот период, банките очекуваат понатамошно умерено нето-олеснување на вкупните кредитни услови. Од аспект на поединечните кредитни услови, кај каматната стапка на станбените и потрошувачки кредити и понатаму се забележува нето-олеснување, но значително послабо во однос на претходната анкета,“ соопшти Народна банка.

Кај потрошувачките кредити, очекувањата за вкупната економска активност, и понатаму придонесуваат за нето- заострување на условите.

„Од аспект на влијанието на промените во монетарната политика, слично како и во претходната анкета, најголемиот дел од банките (околу 80 проценти) укажуваат на незначително влијание врз нивната политика на одредување на каматните стапки. Притоа, околу 16 проценти, односно 19 проценти од банките упатуваат на делумно влијание на монетарната политика врз каматната политика за одобрување станбени, односно потрошувачки кредити“, соопшти НБРМ.


Граѓаните во јуни повеќе штеделе во денари


Скопје, 10 август, 2016 - 13:16 (META) 

Забавување на падот на вкупниот депозитен потенцијал и мало зголемување на штедењето на населението е забележано во јуни, информираат од Народна банка. Населението повеќе штедело во денари отколку во странска валута.

– Ваквото однесување покажува значително подобрување на перцепциите на субјектите, а делумно може да е реакција на поместувањата во каматната политика на банките. Имено, во јуни за првпат по подолг временски период, се забележува проширување на распонот помеѓу каматата на депозитите на населението во денари и депозитите во девизи, што е резултат на досега преземените монетарни мерки – велат од Народна банка.


Богов ќе информира за економските проекции, но и за зголемувањето на каматната стапка


Скопје, 5 мај, 2016 - 11:27 (META) 

Гувернерот на Народната банка, Димитар Богов, денеска, во 13 часот, ќе одржи прес-конференција во врска со редовната ревизија на макроекономските проекции.

Меѓу другото, се очекува тој да одговори и за последната одлука на Народна банка за зголемување на каматната стапка на благајничките записи, како основна каматна стапка, од 3,25 на 4 проценти, односно за 0,75 процентни поени.

Во вчерашното соопштение, меѓу другото, беше наведено дека Народна банка и во следниот период внимателно ќе ги следи движењата и доколку е потребно, ќе направи дополнителни промени во монетарната политика за целосно стабилизирање на состојбите и на очекувањата на економските субјекти, за успешно да се остваруваат целите на монетарната политика.