Неприфатливо е ретроактивното пополнување на е-дневникот, велат од СОНК


Скопје, 28 февруари, 2019 - 14:30 (META) 

Укажувањето на надлежните во Министерството за образование и наука (МОН), упатено до наставниците, а кое се однесува на електронскиот дневник, е неприфатливо, реагираат во Синдикатот за образование, наука и култура (СОНК).

Реакцијата следува откако вчера училиштата добиле укажување од МОН да пополнат сите изостаноци и полугодишни оценки на сите ученици, почнувајќи од ланскиот 1 септември, па се’ досега.

„Ова е сосема неприфатливо, затоа што ниту еден наставник не сноси вина за досегашното нефункционирање на е-дневникот. Затоа бараме да го повлечете овој допис до училиштата и да преземете соодветни мерки и решенија кое нема да биде на терет на наставниците“, стои во реакцијата на СОНК.

Во Македонија има 17. 887 вработени наставници во основно образование и  7.400 во средно образование. Според актуелните укажувања на МОН, сите ќе мораат да пополнат податоци освен во пишаниот, и во електронскиот дневник.

Електронскиот систем не функционираше затоа што МОН од април лани, кога истече договорот со старата фирма, не распиша тендер за избор на нова компанија која ќе го ажурира системот. Неодамна, ја избраа фирмата ,,Сорсикс”.


Инспекторатот констатирал неправилности во „Пенко“, МОН и Општина Бутел не преземаат ништо


Скопје, 30 јануари, 2019 - 12:05 (META) 

Ниту Министерството за образование и наука (МОН) ниту Општина Бутел не ја почитуваат одлуката на Просветниот инспекторат, кој констатирал прекршување на законот во основното училиште „Петар Здравковски – Пенко“ во општина Бутел. Двете институции ќе ги остават учениците во пренатрупани училници, а никој не поднесува одговорност за оваа состојба, пишува „Порталб“.

По алармирањето од страна на овој новински сајт за состојбата во основното училиште кое се соочува со недостиг на простор и голем број на ученици, што е констатирано од страна на Просветниот инспекторат, освен наведената Општина, ниту Министерството за образование и наука нема да преземе ништо за решавање на овој проблем.

Од МОН на неколку наврати рекоа дека општината нема поднесено барање и затоа не интервенирале во врска со ова прашање, но согласно Законот за основно образование – член 171, доколку општината поради разни причини не го почитува законот, МОН може да и ги одземе надлежностите до решавање на проблемот.

Но тоа во овој случај нема да се случи, бидејќи според министерот за образование и наука Арбер Адеми, недостига физички простор за решавање на проблемот.

-Ние сме за почитување на законот на целата територија на Република Македонија, вклучувајќи ја и општина Бутел, во чии рамки е основното училиште „Петар Здравковски-Пенко“. Исто така, целосно сме свесни дека постојат одредени училишта, особено во Скопје, кои се преоптоварени и нема можности за создавање дополнителен простор. Не станува збор за финансиски средства, туку за просторни аспекти, бидејќи нема каде да градиме или надградуваме дополнителни училници – изјави рече Адеми за Порталб.мк.

Тој ги повика директорите и општините да бидат внимателни и да ги почитуваат законските одредби и да не ги преоптоваруваат училниците.

„Порталб“ повторно ја контактирал Општина Бутел, но од таму немале коментар. Сепак, истакнале дека остануваат на стариот став дека овој проблем нема да постои повеќе, бидејќи ветуваат дека следната година ќе се применува законот за упис, што значи дека, нема решение за моменталната состојба со паралелките од прво одделение кои учат во соседната градинка, како и со паралелката со над 34 ученици.

Според извештајот од Просветниот инспекторат, кој новинскиот сајт го имал на увид, се вели дека во септември ова училиште има поднесено барање до Општина Бутел за вработување на еден наставник и поделба на паралелката која го надминува бројот на ученици пропишани со закон, но дека од општината нема одговор.

„При контрола во основното училиште ,Петар Здравковски-Пенко’ во општина Бутел е констатирано дека двете паралелки на македонски јазик имаат 17 ученици, од кои Прво 1 има 9 ученици, а Прво 2 има 8 ученици, додека во паралелките на албански наставен јазик Прво 3 има 38 ученици, Прво 4 има 34 ученици, Прво 5 има 34 ученици, а Прво 6 има 34 ученици, а паралелката на турски јазик, Прво7 има 27 ученици”, се вели во извештајот на инспекторатот.

Од оваа институција известуваат дека извештајот е испратен до општината под чија надлежност паѓа ова училиште, на која и укажуваат да ја подели паралелката со 38 ученици.


Училиштето во село Лажец руинирано, се бараат донации


Битола, 24 јануари, 2019 - 16:05 (META) 

Почетокот на второто полугодие во основните и средните училишта, подрачното основно училиште „Крсте Петков Мисирков“ во битолското село Лажец го дочека со истата ужасна слика – објектот е руиниран, а покривот само што не паднал, известува „Порталб“.

Во училиштето во селото на околу километар и пол од грчката граница, во кое живеат и Македонци и Албанци,  учат 20 ученици. Граѓанското здружение „22 Ноември“ од Битола алармираше за условите во училиштето, барајќи донации, бидејќи, како што вели, надлежните институции не покажале интерес за реновирање на објектот.

– Училиштето во битолското село Лажица е во средновековни услови. Во селото живеат околу 200 жители, а училиштето има 20 ученици, тоа е мултиетничко училиште, бидејќи жителите се етнички Албанци и Македонци, но бројот на Албанците е доминантен. Училиштето е во мизерна состојба, и неопходно е да се реновира покривот на објектот бидејќи постои опасност да пропадне и да се случи некоја трагедија. Сега наскоро завршува одморот за учениците, а тие ќе се вратат во истите услови во ова училиште – изјави за „Порталб“, Сибел Алимовска, директорка на здружението.

Не е само покривот проблем, бидејќи во многу лоша состојба е речиси сè во објектот, а недостигаат и клупи и столчиња.

– И внатрешноста на ова училиште е исто така во лоша состојба. Тоалетите се скандалозни, фасадата е речиси целосно оштетена, дури и во Авганистан условите се подобри отколку во ова училиште. Недостигаат клупи и столчиња, нема интерактивни табли, што значи дека сè уште функционираат како во прастари времиња. И подот е во многу лоша состојба. Состојбата е слична во речиси сите училишта во битолските села. Јас уште од 2017 година го кренав гласот за ваквата состојба, но никој не е заинтересиран за овој проблем. Апелирав многу пати, но до ден-денес немам видено дека е реализирана некоја посета од страна на Министерството за образование, или пак некој друг да ја погледне оваа состојба – истакна Алимовска.

Таа вели дека разговарала со градоначалничката на Општина Битола, која ѝ кажала дека општината нема средства за санирање на училиштето.

– Градоначалничката ме информираше дека нема доволно средства во моментов бидејќи имале ребаланс на буџетот, а сите училишта во општината, особено албанските, биле запоставени од претходната гарнитура што ја водела оваа општина, па има минимален буџет, што не може да го вложи во сите училишта. Приоритет за општината, моментално, е основното училиште „Гоце Делчев“ во Битола, бидејќи тоа е еминентно училиште со вековна традиција – објаснува Алимовска.

Од Министерството за образование и наука (МОН) за „Порталб“ велат дека немаат сознанија за условите во ова училиште, бидејќи ниту општината, ниту раководството на училиштето, не го информирале министерството за оваа состојба.

Од друга страна пак, Алимовска вели дека државните институции му го свртеле грбот на албанското образование во Битола и дека се бараат хумани луѓе за да помогнат за подобрување на условите за децата кои посетуваат настава во ова училиште.

– Упативме апели за донации за да се соберат средства за реновирање на училиштето, бидејќи е опасно да се изведува настава во такви услови. Се надевам дека има хумани луѓе, бидејќи политичарите ни го имаат свртено грбот, па верувам дека народот, како и досега, нема да ни го сврти грбот – вели Алимовска.

Секој родител кој има поплаки за нерегуларности во основните училишта на Македонија може да го пријави случајот во МОН, на раководителот на секторот за основно образование Елена Ивановска, на телефонскиот број 02/3117-896 и на мејлот elena.ivanovska@mon.gov.mk.

Ваков случај како со училиштето во битолското село Лажец може да се пријави и Секторот за стандарди на учениците и студентите, каде одговорни лица се Ќенан Сали и Џемиле Идризи, кои може да се добијат на  телефонскиот број 02/3117-896, а Сали или да им се пише на   qenan.sali@mon.gov.mk.


Сипаниците може да го одложат почетокот на второто полугодие


Скопје, 11 јануари, 2019 - 14:34 (META) 

Министерството за образование и наука ја следи ситуацијата со епидемијата од сипаници, во координација е со министерствата за здравство и за труд и социјална политика и врз основа на состојбата на терен, ќе одлучи за евентуално одложување на второто полугодие, кое по правило треба да започне на 21 јануари, изјави денеска министерот за образование Арбер Адеми.

Во МОН потсетуваат дека согласно Законот за основно образование, при запишувањето на детето во прво одделение родителот е должен да достави потврда за примените задолжителни вакцини за детето, издадена од надлежна здравствена установа.

– Според тоа што ќе го имаме на терен, ќе преземеме мерки во пресрет на второто полугодие. Ќе биде преземено тоа што е неопходно од наша страна како надлежна институција. Треба да водиме грижа и за следење на воспитно-образовниот процес во основно и за вакцинацијата на нашите деца. И во постојниот закон е предвидено дека при упис на децата во основно, нивните родителите треба да докажат дека биле вакцинирани – рече Адеми.

Членот во законот со кој се предвидува задолжително приложување потврда за примени вакцини, го има и во новиот Закон за основно образование кој е во фаза на изработка, а ќе биде ставен и на јавна консултација.


Се менува Законот за учебници – авторските права ќе им се вратат на издавачките куќи


Скопје, 25 декември, 2018 - 12:53 (META) 

Авторските права за учебниците, нема повеќе да му припаѓаат на Министерството за образование и наука (МОН), туку тие ќе се вратат на издавачките куќи, како што беше во минатото. Тоа ќе придонесе да се избегнат многу сложени процедури кои досега одеа преку Министерството во процесот на подготовка и испорака на учебници, сметаат во Педагошката служба при МОН.

– Министерството нема да ја игра повеќе улогата на издавач. На тој начин ќе се разрешат повеќе проблеми. Обврска на издавачките куќи ќе биде изборот на автори кои ќе пишуваат учебници, тие ќе ја одредат висината на авторскиот хонорар, тие ќе се грижат за ангажирање лектори, рецензенти, илустратори. Секако, правилата ќе си важат, учебници ќе се прават согласно планот изготвен од надлежна институција. Ние ќе бидеме одобрувачи – вели Вања Велева, директорка на Педагошката служба при Министерството за образование и наука.

Ако се вратат авторските права на издавачите, постапката за избор на учебник ќе се упрости, односно ќе се избегнат процедури со јавни набавки кои сега го кочат процесот со подготовка и дистрибуција.


Министерството за образование ги забрани екскурзиите кај депонијата со линдан


Скопје, 20 декември, 2018 - 15:04 (META) 

Министерството за животна средина и просторно планирање испратило допис до Министерството за образование и наука да не се организираат екскурзии во Пеленица, Драчево, местото за кое „Мета“ пишуваше дека има сомневање дека се наоѓа необележана депонија со канцерогениот линдан кој потекнува од фабриката ОХИС.

„Во Министерството за образование и наука, стигна допис од МЖСПП по кое ќе постапиме, односно ќе им наложиме на општините како основачи на училиштата, таму да не се одржуваат екскурзии“, велат од МОН за „Мета“.

Министерството за животна средина, вети дека до крајот на годината ќе го огради просторот во Драчево за кој постојат сомневања дека се наоѓа дивата депонија со 8.000 тони токсичен линдан.

Државната секретарка во МЖСПП, Ана Петровска, во разговор за „Мета“ рече дека ќе биде испратено укажување до Министерството за образование и наука во Пеленица да не се организираат ученички екскурзии додека не се утврди опасноста.

-Алармирано е и до владата и до нас како Министерство и во овој момент ќе се преземе акција согласно член 42 од законот за отпад кој што не овластува нас како надлежен орган, пред да се докаже опасноста, бидејќи уште не е докажана, а за да ја докажеме ќе ни треба и време и ресурси, барем да го оградиме просторот за кој што се претпоставува дека е локација. Таа е во ненаселен простор, но е близу некој манастир, каде што деца одат на екскурзија. Со други зборови, ние како орган, до крајот на годината, имаме обврска да го оградиме тој простор и да поставиме одредена табла – рече Петровска.

Линданот на оваа локација потекнува од фабриката ОХИС и таму го фрлале работници пред да се направат големата и малата депонија на територијата на фабриката каде што се проценува дека има помеѓу 40-50.000 тони контаминирана почва со линдан.


Државата бара институција што по четврти пат ќе ги рангира македонските универзитети


Скопје, 12 декември, 2018 - 16:54 (META) 

Министерството за образование и наука започнало постапка за избор на институција која по четврти пат ќе ги рангира македонските државни и приватни универзитети, информираат оттаму за „Мета“.

Новина е тоа што, согласно новиот Закон за високо образование, наместо на секои две, високообразовните институции ќе се рангираат на секоја трета година. Националната ранг-листа на универзитети, се прави за да придонесе за транспарентноста, квалитетот и ефикасноста на македонските образовни институции.

Одговорните во МОН велат дека преку јавна набавка, ќе се избере институција што ќе го врши рангирањето. Изминативе години, беа направени вкупно три ранг-листи, кои ги изготви Центарот за светска класа универзитети при шангајскиот универзитет „Џио Тонг“, кој исто така, рангира универзитети и на светско ниво.

– Со донесувањето на новиот Закон за високо образование, за развивање и одржување на квалитетот на високото образование, на секои три години задолжително се спроведува рангирање на сите универзитети, запишани во регистарот на високообразовни установи. Исто така, за развивање и одржување на квалитетот на високото образование, покрај рангирањето на универзитетите, на секои три години задолжително се спроведува и посебно рангирање на сите самостојни научни установи кои вршат високообразовна дејност, согласност со Закон за високо образование – велат во министерството.

Новото рангирање ќе се спроведе според критериуми кои ќе се определат со Правилникот за критериумите на рангирање на универзитетите, кој е во фаза на донесување (односно е во процес на усогласување со Секретаријат на законодавство) согласно условите кои ќе се допрецизираат во јавната набавка. Во МОН информираат дека институцијата која ќе го врши рангирањето ќе се определува со објавување на јавна набавка.

Првата ранг-листа со македонски универзитети беше објавена во 2012 година, кога министер беше Панче Кралев и таа не` чинеше 100.000 евра. Беа земени предвид 19 индикатори за академски перформанси и конкурентност, покривајќи ги главните аспекти на мисијата на високообразовните институции како што се наставата, истражувањето и социјалните услуги.

На таа листа, на прво место беше Универзитетот „Св. Кирил и Методиј”, на второ – Универзитетот на Југоисточна Европа, па Универзитетот „Гоце Делчев” од Штип, Универзитетот Св. „Климент Охридски” од Битола и Универзитетот за информатички науки и технологии, „Св. Апостол Павле” од Охрид. На последното рангирање, кое беше направено за академската 2015/2016 година, на прво место повторно е „Св. Кирил и Методиј“, а на последно – Меѓународниот славјански институт во Свети Николе.

Инаку, на светско ниво, на светските рангирања нема ниту еден македонски универзитет меѓу првите 1.000 најдобри во светот. Меѓу нив не е ниту нашиот најдобар универзитет, „Св. Кирил и Методиј”.


Изградбата и реновирањето на училиштата е во надлежност на МОН, вели Елези


Скопје, 3 декември, 2018 - 10:12 (META) 

Во врска со училиштата во кои недостасува простор, и некои други каде што е потребно вработување нови наставници, од Министерството за финансии прстот го насочуваат кон Министерството за образование и наука и велат дека ова министерство во својот буџет мора да испланира средства за инвестиции во училиштата, известува Порталб.мк.

Заменик-министерката за финансии Ширете Елези вели дека училиштата и општините со комплетирана документација треба да конкурираат со своите проекти во МОН и тој сектор треба да распредели пари од буџетот врз основа на потребата за реновирање и изградба на основни и средни училишта во земјата.

– Се одобрува буџет за реконструкции и инвестиции во училиштата и Министерството за образование и наука треба да ги распредели потребните средства за работи како што е реконструкцијата на основните, средните училишта, изградбата на нови училишта и т.н. Ние го распределуваме буџетот што е определен за МОН, а тие се одговорни за планот и програмата. Потоа, општините конкурираат во МОН со различни проекти, се разбира со комплетирана документација, со детална и проектна дозвола итн. А потоа започнува реализацијата. Ова е целосно децентрализирано на ниво на МОН, кое треба да ги обезбеди средствата – изјави Елези.

Што се однесува до процедурата за вработување, Елези додаде дека одобрението се издава од Министерството за финансии.

– Бидејќи се работи за нови вработувања, тоа има фискална импликација и сите се обраќаат до Министерството за финансии, при што ние вршиме проверка на рамките на дотациите и ги одобруваме истите – објаснува Елези.

Инаку, основните училишта „Петар Здравковски – Пенко“ и „Исмаил Ќемали“ се соочуваат со недостиг на простор, така што во едното училиште речиси сите паралели го надминуваат максималниот број дозволен со закон, додека во другото, учениците од прво одделение учат во просториите на една градина.

Од МОН за училиштето „Исмаил Ќемали“, рекоа дека се информирани, но не прецизираа кога тоа ќе се реши проблемот, а што се однесува до училиштето „Петар Здравковски – Пенко“, рекоа дека барањето за проширување на сегашниот објект сè уште не е поднесено во овој оддел од општината Бутел, под чија надлежност спаѓа ова училиште.

Инаку, согласно законот на Министерството за образование и наука, минималниот број ученици во еден клас е 24, а максималниот 34, но паралелки може да се формираат и со помал број ученици доколку се исполнат условите.


Министерството за финансии даде согласност за нова паралелка во ОУ „Имри Елези“”


Скопје, 26 ноември, 2018 - 9:59 (META) 

По веста објавена за преоптовареноста со ученици во основното училиште „Имри Елези“ во скопската населба Дижонска, каде во три паралелки од прво одделение учат 108 ученици, со што се прекршува законот за образование, Министерството за финансии извести дека е дадена согласност за отворање нова паралелка и решавање на овој проблем.

Заменик-министерката за финансии, Ширете Елези, за „Порталб.мк изјави дека барањето на Министерството за образование и наука е прифатено и е дадена согласност за вработување на еден наставник во ова училиште.

– Според редовната процедура, општината бара од Министерството за образование и наука (МОН) вработување на наставник, а овој сектор прави анализа дали барањето е издржано и дали ги исполнува условите за да се реализира, како што беше случајот со основното училиште „Имри Елези“, бидејќи имам слушнато дека таму има многу ученици, и барањето беше проследено до Министерството за финансии, а ние го одобривме и издадовме согласност да се изврши вработување и отворање нова паралелка – изјави Елези.

Таа додаде дека сега процедурите продолжуваат во МОН, општината и самото училиште.

– Сега процедурите ги продолжува МОН, што значи дека ќе прати одговор до Град Скопје, а од таму во општина Чаир, бидејќи таму се наоѓа на училиштето, а потоа во училиштето, за да се направи избор на наставникот – додаде Елези.

Инаку, во Имри Елези“ оваа година се запишани 108 првооделенци поделени во три паралелки, и во сите три беше надминат максималниот број од 34 ученици во една паралелка, со што беше прекршен законот за образование, и за ситуација беа запознаени и во МОН.


„Три едукации и две наредби за отстранување на неусогласености“ по контролата на АХВ во школите


Скопје, 23 ноември, 2018 - 10:16 (META) 

Иако државата преку Министерството за образование и наука, минатата година најавуваше дека ќе започнат засилени контроли од неколку институции на оброците што ги добиваат учениците во училишните мензи, засега нема ништо од тоа. По низата реакции на родители преку социјалните мрежи, дека во храната децата наоѓале парчиња пластика, остатоци од зеленчуков отпад, како и тоа дека немало крем во кифлите со крем, или пак, пецивата имале помала грамажа од пропишаната, поранешната министерка за образование и наука Рената Дескоска, најавуваше дека целиот процес ќе се надгледува интерресорски, преку неколку државни институции – Министерството за образование и наука (МОН), Министерството за здравство, односно Институтот за јавно здравје, Агенцијата за храна и ветеринарство (АХВ), како и Државниот пазарен инспекторат.

Од почетокот на учебната година, контроли во училишните мензи спровеле само инспекторите од АХВ, кои констатирале ситни неправилности.

– Агенцијата за храна и ветеринарство не е надлежна за вршење на контрола на нормативите кои се пропишани за исхрана во училиштата за кои се надлежни локалните самоуправи, Министерството за образование и Пазарната инспекција. Инспекциските служби на Агенцијата ја контролираат безбедноста на производите, хигиенските услови при подготвувањето и послужувањето на храната во градинките и училиштата, како и здравствената состојба на лицата кои манипулираат со храната. Контроли се вршат и на објектите од каде се добавува храната, исклучиво од аспект на безбедност – информира Велика Атанасова од АХВ.

Таа додава дека во септември и октомври, инспекторите од Агенцијата спровеле 54 контроли во училиштата каде има организирана исхрана на деца, а со контролите констатирани биле „мали неусогласености“ со прописите кои се однесуваат на безбедноста на храната за што се изречени мерки „три едукации и две наредби за отстранување на неусогласености“ (неофарбани ѕидови во мензите, незаверени санитарни книшки).

Министерството за образование и наука годинава во мај усвои нов правилник за исхрана, во кој се пропишани стандардите за исхрана и за оброците во основните училишта. Засега од МОН нема најави дека ќе има интерресорски контроли на храната. Министерот Арбер Адеми не е достапен да информира дали се планира да се направи нешто во однос на овој дел.

Додека беше прв човек во МОН, Дескоска изјавуваше дека биснис-интересите на градоначалниците и добавувачите на храна, не смеат да бидат пред здравјето на децата.