!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ ја снема и од интернет, по дебаклот на изборите


Скопје, 16 октомври, 2017 - 14:42 (META) 

По исходот од вчерашните локални избори, на кои СДСМ извојува убедлива победа во повеќе од 40 општини уште во првиот круг, денеска целосен молк од ВМРО-ДПМНЕ, која доживеа тежок пораз.

На официјалната интернет-страница на ВМРО-ДПМНЕ нема објави денеска.

Го нема ниту синоќешното обраќање на партискиот лидер, Никола Груевски.

Нови објави нема ниту на официјалниот фејсбук-профил на Груевски.

Од ВМРО-ДПМНЕ денеска не одговараа ниту на нашите телефонски повици.

Партијата, која сега веќе е во опозициска улога и на локално ниво, денеска не испрати ниту едно соопштение до медиумите, ниту еден нејзин претставник не излезе со изјава, а засега нема ниту најави за некаква прес-конференција.

Ваквата ситуација е доста невообичаена за прв постизборен ден, а особено кога станува збор за најголемата опозициска партија, која до вчерашното гласање беше многу активна и дневно испраќаше по десетици соопштенија, интегрални текстови од изјави на нејзини членови и покани за настани.

Последните соопштенија, изјави, прес-конференции, говори и колумни се со датум од петокот, минатата недела, пред почетокот на изборниот молк за вчерашните локални избори.


ВМРО-ДПМНЕ бара од Спасовски да го смени началникот на СВР Струмица


Скопје, 13 август, 2017 - 11:43 (META) 

Опозициската ВМРО-ДПМНЕ денеска ги обвини министерот за внатрешни работи, Оливер Спасовски дека два дена молчи за инцидентот во Струмица, во кој полицаец застрела и рани двајца малолетници, „наместо да соопшти детали и да искаже жалење“.

Партијата бара од Спасовски да го смени началникот на Секторот за внатрешни работи Струмица, Танчо Пројковски, кој според нив е одговорен за инцидентот.

– Шеснаесетгодишно момче уште се бори за живот на Клиниката за анестезија, реанимација и интензивно лекување, а Оливер Спасовски се крие и не одговара на барањата за смена на началникот Трајанчо Пројковски одговорен за полицијата која скандалозно пукаше во деца…Граѓаните очекуваат санкции и крај на полициската бруталност – изјави денеска Орце Ѓорѓиевски од ВМРО-ДПМНЕ, на прес-конференција пред Министерството за внатрешни работи.

Ѓорѓиевски обвини дека кога СДСМ е на власт и управува со МВР, криминалото зема замав, а страдаат граѓаните.

– ВМРО-ДПМНЕ предупредуваше дека заради неспособноста, СДС ќе го пренесе хаосот во институциите. Тој хаос во полицијата загрозува животи. Тоа е директна вина на СДС со нивните кадровски политики во МВР, разрешувањето на докажани професионалци и на нивно место назначување на партиски кадри кои со нивното раководење во службите сериозно ги загрозуваат мирот и безбедноста – рече Ѓорѓиевски.


До „Цивил“ има пријави за кршење на изборниот молк и притисоци врз гласачите


Скопје, 10 декември, 2016 - 16:11 (META) 

Граѓанската организација „Цивил“ информира дека од почетокот на изборниот молк до 14 часот, до нив стигнале околу триесет извештаи од изборните набљудувачи, како и десетина пријави од граѓани, за кршење на изборниот молк и за притисоци врз гласачите.

– Вработени во една скопска општина во моментов организирано се јавуваат кај гласачите и вршат агитација и притисок. Истото го нотира и набљудувачот од село Матејче, општина Липково, кој јавува за кршење на изборниот молк од страна на две политички партии во ова село. Во текот на изборниот молк, во населбата Маџари, Скопско, се појавил печатен материјал со црна кампања против опозицискиот лидер Зоран Заев, во кој пишува дека тој ќе ја кантонизира Македонија – се вели во соопштението на „Цивил“.

Оттаму информираат дека во село Подареш, општина Радовиш, во тек е изградба на пат, што претставува кршење на изборниот молк. Иста ситуација е нотирана и во село Миравци, општина Гевгелија. Во Ново Лисиче, пак, осамнале знамиња на ВМРО-ДПМНЕ на бандерите во екот на изборниот молк.

Од „Цивил“ повторно ги повикуваа сите актери во изборниот процес да престанат со притисоци врз гласачите, а граѓаните да пријавуваат нерегуларности, притисоци и поткуп.


Министерот за правда Џафери мртов ладен додека ресорот му го тресат скандали


Скопје, 17 ноември, 2016 - 16:20 (META) 

Иако во најголемиот кривичен суд во земјава, Основниот суд Скопје 1, се случува циркус, а Извештајот на Европската комисија за напредокот на Македонија нотира сериозни недостатоци во правосудниот систем и опструкции врз работата на Специјалното јавно обвинителство, најодговорниот за правосудниот систем во земјава, министерот за правда, е целосно отсутен од случувањата во неговиот ресор – го нема во јавноста и не се изјаснува за ништо.

Дали во земјава има министер за правда и што тој прави деновиве?

Младиот кадар на ДУИ, 26-годишниот министер за правда, Валдет Џафери, досега не излезе со никаков коментар и со став околу извештајот на ЕК, а молчи и за случувањата во Кривичниот суд, каде судии преку писма и претставки се бунтуваат против претседателот на судот, Владимир Панчевски, а вработени меѓусебната нетрпеливост ја решаваат со навреди, закани и со физички пресметки.

Последната активност на министерот Џафери објавена на официјалната интернет-страница на Министерството за правда е неговото учество на традиционалната манифестација „Нотарски денови“ од 31 октомври годинава. На страницата, во категоријата каде треба да биде биографијата на Џафери, кој на функцијата беше назначен во април годинава, не само што нема никакви податоци, туку го нема ниту неговото име. Стои само слика.

Од манифестацијата „Нотарски денови“ досега во Кривичниот суд и во сферата на правосудството се случија следните настани, кои како да не го интересираат младиот министер Џафери:

  • Судијата Иван Џолев поднесе кривична пријава против претседателот на Кривичниот суд, Владимир Панчевски, за примање награда за противзаконско влијание;
  • Европската комисија во годинешниот Извештај за напредокот на земјава во евроинтеграциите, во делот за судството нотира назадување, политичкото влијание, опструкции, недостиг од независност и недостигот од спречување на селективна правда;
  • 13 судии испратија писмо и претставка до Судскиот совет од кого бараат да го санкционира Панчевски, поради злоупотреби и користење на официјалната интернет-страница на судот за лични постапувања и ставови за одреден судија;
  • Панчевски преку страницата на Кривичниот суд информираше дека дал исказ во Обвинителството за организиран криминал и корупција по пријавата до Џолев и дека веднаш потоа му поднел на колегата контрапријава за лажно пријавување на кривично дело;
  • Претседателката на највисокиот суд во земјава, Врховниот суд, Лидија Недлекова, во интервју за емисијата 360 степени“ на „Алсат М“ меѓу другото искоментира дека во судскиот систем во земјава има сериозни проблеми, а нејзиниот колега Владимир Панчевски не заслужува нов мандат како претседател на Кривичниот суд, со оглед на тоа како досега ја извршувал функцијата;
  • Кривичниот суд соопшти дека референтот за човечки ресурси првин ѝ се заканувал по животот, а потоа и физички ја нападнал портпаролката на судот, поради што интервениралa полиција и се правел записник. Референтот вчера тврдеше дека не ја нападнал колешката и го обвини Панчевски дека им се заканува на вработени кои реагирале на воспоставената норма за работа и незаконското распоредување на службениците;
  • Во меѓувреме, Панчевски изјави дека „секој судија во Основниот суд Скопје 1 е дуќанче, секој судија е чешмичка. Чешмичките им се затворија, па затоа се бесни“.

Министерството за правда, иако еден од најважните ресори во Владата, изминативе години го водеа министри кои не се покажаа многу на оваа функција, а некои од се најдоа вплеткани и во скандали.

Валдет Џафери министерската фотелја ја презеде од Аднан Јашари (исто така кадар на ДУИ), кој иако беше поактивен, речиси двегодишното министерување го заврши без позначајни резултати.

Неговиот претходник пак Блерим Беџети, не само што не помогна во унапредувањето на правосудниот систем, во јуни 2013 година се најде на тапет на јавноста, откако пратеникот на ДПА во Собранието, Беким Фазлиу рече дека за време на полициска акција во ноќниот клуб „Шери“ во Градскиот парк, кај Беџети бил најден пиштол и дрога.

Тогашниот министер за правда ги демантираше ваквите тврдења, но случајот остана нерасчистен и без епилог.


Едноминутен молк во Собранието за жртвите во Париз


Скопје, 16 ноември, 2015 - 12:41 (META) 

По предлог на пратеничката на ДОМ, Лилјана Поповска, пратениците во Собранието на Македонија со едноминутно молчење им оддадоа почит на жртвите во синхронизираните терористички напади во Париз, пред да почнат со расправата по двете точки на дневниот ред.

По предлог на претседателот на Собранието, Трајко Велјаноски, прва точка за расправа на дневниот ред е одлуката за објавување јавен оглас за избор на претседател и на членови на Државната изборна комисија, а втора точка е расправа по дополнет предлог-буџет за 2016 година.


Ден на тишината


Скопје, 14 јануари, 2015 - 11:40 (META) 

По повод масакрот кој се случи во редакцијата на францускиот магазин „Шарли ебдо“, земјите од регионот – Хрватска, Македонија, Романија, Босна и Херцеговина, Црна Гора, Србија, кои се дел од платформата „Ферпрес.еу“, иницираа „Ден на тишината“ кој се одбележува денеска  од 11.30 (времето на нападот) до 14 часот.

Тимот на новинската агенција „Мета“ се приклучува кон иницијативата и во тој период нема да објавува нови постови.

Убиени се новинари. По којзнае кој пат, употребена е брутална сила против букви, цртежи, аудио и видеоснимки. Против мисли и зборови. Кога нè убиваат, тепаат, касапат и заплашуваат, тоа секогаш е за повисоки цели. Но, никој нема одговор на нашето прашање кои се тие повисоки цели. Бидејќи тие не ни бараат одговори и информации.

Токму поради тие причини, слободоумниот новинар стана најголемиот плен и трофеј на идеологијата. Поради тоа и нè убиваат, за да испратат јасна порака до сите оние кои размислуваат, што ги чека ако ги изговорат своите мисли. Тажен парадокс. Најчесто нè убиваат за да пишуваме и да зборуваме за тоа. Зашто, ако тие пораки на страв и на терор не се пренесат до секој човек, самиот тој чин, за оние кои го сториле злосторството, нема да има никаква смисла.

Во изминативе девет години убиени се 720 новинари. Според податоците од „Репортери без граници“, од 2005 до 2014 година убиени се вкупно 720 новинари, од кои само во 2014 година, 66 новинари го загубиле својот живот, извршувајќи ја својата должност да ја известат јавноста, а две третини од случаите се во воените зони како Палестина, Украина, Ирак и Либија. Значаен пораст од 30 проценти е забележан во бројот на киднапирани професионални новинари, односно 119 случаи во 2014 или 87 случаи во 2013 година.

На глобално ниво, 40 професионални новинари и три граѓани-новинари  се држат како заложници.  Според последните податоци на „Репортери без граници“, вкупно 178 професионални новинари и исто толкав број граѓани-новинари  се осудени на затворска казна поради извршувањето на својата должност.