Васо Ристов нов директор на МОБ


Скопје, 7 август, 2018 - 11:15 (META) 

Професорот и продекан на Факултетот за музичка уметност во Скопје, Васо Ристов е избран за генерален директор на Македонската опера и балет (МОБ) – Скопје.

„Ристов е истакнат уметник  и културен работник, добро познат на домашната и меѓународната музичка јавност, кој зад себе има богата меѓународна професионална кариера. Педагог со 33 години стаж во сценско музичката дејност во Македонија и развивање на кадри за музичката култура во земјата и надвор од неа. Од 1986 до 2010 е редовно вработен во Македонската опера и балет како прв трубач- солист, потоа уметнички директор на операта на МОБ (2005 – 2006), кој развива, организира и координира спроведување на музички програми и репертоарска политика на музички институции и на ФМУ – Факултетот за музички уметности – Скопје“, пишува на интернет-страницата на Македонска опера и балет.

Ристов дипломирал на ФМУ во Скопје, а магистерските студии завршил на музичката академија „Панчо Владигеров“ во Софија по што специјализирал на ФМУ во Прага. Тој има долгогодишно искуство во менаџирање оперска и балетска уметност, музичко сценски изведби, музички настани и натпревари.

Ристов бил професор на пет универзитети во Македонија и надвор: Факултет за музичка уметност, Скопје, Државен Универзитет Тетово, Универзитет Гоце Делчев – Штип, Универзитет во Приштина и Факултетот за уметност во Митровица.


Дурловски поднесе оставка во МОБ и на ФМУ


Скопје, 17 мај, 2017 - 13:21 (META) 

Директорот на Македонската опера и балет и оперски пејач Игор Дурловски денеска на својот фејсбук-профил објави дека поднесува оставка од местото директор на МОБ и од позицијата професор на Факултетот за музичка уметност.

„Жалам што сите овие општествени превирања се случуваат во година кога одбележуваме два значајни јубилеи и со кои требаше да создадеме нова страница со врвни уметнички достигнувања. За жал, а можеби некому за среќа, ниту МОБ не беше поштедена од негативните ефекти од наметнатите општествени услови, кои се одразија врз целокупната работна атмосфера, расположението на нашата публика, безбедносниот скептицизам на дел од нашите гости – уметници и на ред други помалку значајни нешта. Во таа насока, сметам дека лично ќе придонесам со поднесување оставка од позицијата директор за да не се поистоветува МОБ со моите лични дејства надвор од куќата и за да се овозможи надлежните институции бргу да изберат ново раководство кое, се надевам, ќе донесе нова позитивна енергија и нови успеси на оваа куќа. 25 мај ќе биде мој последен работен ден на позицијата директор на МОБ, а воедно ќе поднесам оставка од позицијата професор на Факултетот за музичка уметност по завршувањето на испитната сесија“, напиша Дурловски на својот фејсбук-профил.

Дурловски изминатите два месеци беше еден од организаторите на протестите на иницијативата „За заедничка Македонија“ и беше присутен во Собранието за време на насилниот упад на граѓани на 27 април, при што беа повредени неколку пратеници, новинари и граѓани.


Уставниот суд привремено ја стопира одлуката на Владата за барокна фасада на ГТЦ


Скопје, 5 април, 2017 - 16:30 (META) 

Уставниот суд на денешната седница со мнозинство гласови одлучил да поведе постапка за утврдување на уставноста и на законитоста на членот 50 од Законот за просторно и урбанистичко планирање, особено за ставот 2 од овој член и терминот „посебен интерес“.

„Градба од посебен интерес за која ќе се изработи урбанистичко-планската документација од став 1 на овој член се утврдува со одлука од страна на Владата на Република Македонија“, стои во член 50, став 2 од Законот за просторно и урбанистичко планирање.

Со прифаќањето на иницијативата, Уставниот суд привремено ја стопира одлуката на Владата, Градскиот трговски центар (ГТЦ), Македонската опера и балет (МОБ) и Националната универзитетска библиотека „Св. Климент Охридски“ да добијат барокни фасади.

Владата во јули минатата година овие објекти ги прогласи за објекти од посебен интерес и ѝ ја зеде ингеренцијата на Општина Центар над нив.

Уставните судии, освен што ја прифатиле иницијативата, донеле и привремена мерка за запирање на сите активности на Владата додека Уставниот суд не донесе одлука за оспорениот член 50.

Решението за поведување на постапката, Уставниот суд сега треба да го испрати до Владата и до Собранието, кои во рок од 30 до 40 дена треба да одговорат и да испратат мислење, по што уставните судии ќе одлучуваат дали оспорениот член ќе биде укинат.

Иницијативата до Уставниот суд, како што пренесува порталот „СДК“, ја поднело здружението на архитекти „Проблесок“.


ВМРО-ДПМНЕ одржува панел-дебата „Видливи и реални проекти“ во МОБ


Скопје, 14 октомври, 2016 - 19:51 (META) 

Панел-дебата на темата „Видливи и реални проекти“ организира ВМРО-ДПМНЕ во Македонска опера и балет. Настанот се одржува во рамките на тридневниот отчет на партијата за постигнувањата, проектите и за политиките.

На вечерашната дебата, меѓу другите, учествуваат и министерката за култура, Елизабета Канческа-Милевска, заменик-министерот за труд и социјална политика, Диме Спасов, заменик-министерот за образование и за наука, Спиро Ристовски, и директорот на Македонскиот културен центар, Златко Стевковски.

Спасов на дебатата истакна дека од 2006 година досега пензиите во Македонија се зголемени за повеќе од 70 проценти, а најниската пензија е зголемена за 90 проценти.

Ристовски рече дека во изминатите десет години во образовна инфраструктура се вложени околу 120 милиони евра и 71 процент од студентите што се запишуваат на факултет го  завршуваат високото образование.

Министерката за култура, Елизабета Канческа-Милевска, зборуваше за вложувањата во објектите каде што се негува културата и истакна дека од 2006 година до денес се вработени повеќе од 2.000 лица во областа на уметноста.


Манчевски: По смената на власта средствата за барокни фасади ќе бидат пренаменети


Скопје, 4 јули, 2016 - 15:09 (META) 

Новата лудост на власта на Никола Груевски нема да успее, затоа што граѓаните нема да дозолат Градскиот трговски центар, МОБ и Универзитетската библиотека да ги сменат фасадите во барок, изјави денеска Дамјан Манчевски, потпретседател на СДСМ.

Тој рече дека пред да има можност да се реализира ова безумие, ќе дојде до смена на власта на фер и демократски избори.

– Новата демократска власт веднаш ќе ги стопира овие криминални проекти. Ги повикуваме сите домашни и странски градежни компании да не учествуваат на повикот кој евентуално би го распишала криминалната власт. Веднаш по смената на владата, средствата за овие барокни фасади ќе бидат пренаменети за гасификација на Скопје и за други неопходни проекти на граѓаните – изјави Манчевски.

Тој ги повика функционерите на ВМРО-ДПМНЕ, чесните и одговорни поддржувачи да ја откажат послушноста на Никола Груевски во спроведувањето, како што рече, на лудилото „Скопје 2014“. Манчевски додаде дека скопјани, но и цела Македонија се спротивставуваат на трошењето пари за раскош и за луксуз.


„Кармина Бурана“ во МОБ за денот на вљубените


Скопје, 13 февруари, 2016 - 10:18 (META) 

Во Македонската опера и балет, по повод денот на виното и на вљубените, вечер ќе ја изведе популарната кантата „Кармина Бурана“ од германскиот композитор Карл Орф.

Кантатата е во режија на Дејан Прошев, а ќе биде изведена под диригентската палка на Иван Еминовиќ. Главни солисти се Нада Талевска-Спасовска (сопран), Игор Дурловски (контратенор) и Горан Начевски (баритон).

„Кармина Бурана“ со пораката „Среќата да биде владетелка со светот“ со право ја нарекуваат кантата на 20 век. Овојпат „Кармина Бурана“ ќе има специјално режирана концертна изведба, соопшти МОБ.


МОБ дели бесплатни билети за „Травијата“


Скопје, 1 јули, 2015 - 12:23 (META) 

Македонската опера и балет ќе ја заврши оперската сезона на 4 јули со најизведувана и најпопуларна претстава „Травијата“ која ќе биде бесплатна за посетителите.

Претставата е во режија на Нина Најденова од Бугарија, диригент е Дејан Савиќ од Белград.

Насловната улога (Виолета Валери-Травијата) ќе ја толкува сопранистката Благица Поп Томова, Зоран Сотиров ќе настапи во улогата на Алфред Жермон, а ликот на Жорж Жермон ќе го толкува баритонот Франческо Бајоки – гостин од Италија.

Бесплатните билети може да се подигнат на билетарницата на Македонската опера и балет, секој ден од 10 до 20 часот.


Василичарски концерт на Македонска опера и балет


Скопје, 8 јануари, 2015 - 11:21 (META) 

Македонска опера и балет в понеделник и во вторник, 12 и 13 јануари 2015 година, ќе одржи два концерти насловени „Најдоброто од најдобрите“. Се работи за колаж на најдобрите нумери од трите поранешни концерти „Свинг енд џез“; „Македонски евергрин“ и „Филмски ноти“.

Ќе настапат ѕвездите од естрадата: Каролина Гочева, Тамара Тодевска, Тијана Дапчевиќ, Влатко Лозановски, Нина Јанева, Сара Мејс, Александра Јанева, Ѓоко Танески, Џон Илија Апелгрин, Маја Гроздановска-Панчева, Дејан Бобиќ – Дексо, Горан Наумовски, Горан Папаз, Марија Димитријевиќ, Александар Тарабунов и оперските солисти Владимир Саздовски, Сандра Митровска, Марјан Стојановски, Наде Талевска-Спасовска, Ѓорѓи Цуцковски, Весна Гиновска-Илкова, како и хорот и оркестарот на МОБ.

Диригент е Бисера Чадловска.


Премиера на операта „Ноќен жерав“ во МОБ


Скопје, 12 декември, 2014 - 11:54 (META) 

Јапонската оперска претстава „Ноќен жерав“ од Икума Дан вечерва премиерно ќе биде изведена во Македонската опера и балет.

Претставата, која се изведува под диригентската палка на Мазахико Окочи, обработува јапонска традиционална бајка. Главните улоги ќе ги толкуваат солистите Нобуко Такахаши, Мотохару Аојаги, Јуки Такахаши и Шигеки Мине. Режисер е Кацухиро Котецут.

Во претставата учествуваат оркестарот на МОБ и детскиот хор „Пиколо“ на ДМБУЦ „Илија Николовски-Луј“, под раководство на Весна Димчевска.


Премиера на јапонската оперска претстава „Ноќен жерав“ во МОБ


Скопје, 10 декември, 2014 - 15:43 (META) 

В петок, 12 декември, со почеток во 20 часот, во Македонската опера и балет ќе биде изведена премиерата на јапонската оперска претстава „Ноќен жерав“ од Икума Дан. Ова јапонско национално дело обработува јапонска традиционална бајка, а во претставата ќе настапат солистите Нобуко Такахаши, Мотохару Аојаги, Јуки Такахаши, Шигеки Мине.

Режисер е Кацухиро Котецу, а диригент Мазахико Окочи.

Учествуваат и оркестарот на Македонската опера и балет и детскиот хор „Пиколо“ на ДМБУЦ „Илија Николовски-Луј“, под раководство на Весна Димчевска.