Почина актерката Љупка Џундева


Скопје, 7 декември, 2018 - 12:47 (META) 

Почина познатата театарска, филмска и телевизиска актерка Љупка Арсова – Џундева, на 84-годишна возраст, соопшти Македонскиот народен театар.

„Со голема болка и огромно жалење ја споделуваме веста за смртта на актерката Љупка Арсова Џундева (1934-2018), тивката дама на македонското актерство. Џундева секогаш со гордост истакнуваше дека припаѓа на втората генерација актери на некогашната Висока театарска школа, а со тоа е дел од создавањето на поновата историја на театарската уметност во Македонија.

Нејзиниот ентузијазам и копнеж по театарската сцена, но и нежниот и милозвучен карактер, безвременска убавина, романтична појава и жесток став во негувањето на звучниот мајчин јазик ја направиле миленичка на театарските режисери, но и на широката театарска, филмска и телевизиска публика.

Во Македонскиот народен театар работеше во текот на целиот свој професионален живот од 1951 до 1990 година, кога замина во пензија. Нејзината последна улога на сцената на МНТ се случи во 2015 година, како Марина во претставата „Вујко Вања“ од Чехов во режија на Зоја Бузалковска.

Љупка знаеше да каже дека треба да се најде мирот и љубовта кон луѓето, и колку што е можно човек треба да му се радува на животот. „Ние сме многу малку гости на овој свет“, знаеше нашата Буба. „Човек треба да се научи прво да си ги прости своите грешки самиот на себе, а потоа да ги прости и на другите. Кога ќе простиш, ќе го најдеш својот мир и ќе се ослободиш“, се вели во соопштението од МНТ.

Џундева е добитник на наградата „13 Ноември“, потоа на Наградата за артистичко остварување доделена од Југословенската радио-телевизија, Орден на трудот со златен венец и Орден на трудот со сребрен венец.

Во богатата театарска, филмска и телевизиска актерска кариера, Џундева оствари стотици разни улоги.


МВР врши истрага за директорувањето на Дејан Пројковски во МНТ


Скопје, 30 август, 2018 - 11:50 (META) 

Одделението за борба против организиран криминал од МВР по налог на Јавното обвинителство од минатата седмица вршат истрага во Македонски народен театар (МНТ), поради сомнение за злоупотреби направени во периодот од 2015 до 2017 година, кога директор бил Дејан Пројковски.

Минатата седмица инспекторите одзеле документи од правната служба.

Според информациите, Пројковски се товари за злоупотреба на службената положба со сомнителна набавка и ненаменско трошење во износ од 150.000 евра.

Од Министерството за култура велат дека поднеле пријава во МВР откако сегашната в. д. директорка  на МНТ, Симона Угриновска, која беше назначена во февруари, побарала ревизија на работата на претходниот директор.

МВР во овој момент собира и анализира документи и во интерес на истрагата не даваат повеќе детали.


Симона Угриновска назначена за в.д директор на МНТ


Скопје, 5 февруари, 2018 - 14:48 (META) 

Министерството за култира ја назначи Симона Угриновска за в.д. директор на МНТ, соопшти денеска министерот за култура, Роберт Алаѓозовски.

-По оставката на Драган Спасов-Дац, за да може институцијата да работи непречено, за вршител на должност, според Законот дека лицето мора да доаѓа од редот на вработените, ја назначивме Симона Угриновска. Таа ќе ја извршува оваа функција сѐ додека не биде избран нов директор, за што според Законот треба да биде распишан конкурс – рече Алаѓозовски.

Угриновска досега работеше како организатор и продуцент во МНТ.

Назначувањето на Угриновска доаѓа по оставката на претходниот директор Драган Спасов Дац, кој минатата недела во алкохолизирана состојба удри пешак во скопската населба Кисела Вода. Претходно, Министерството за култура и Владата кажаа дека лице кое сторило таков тежок прекршок не може да раководи со институција и да извршува јавна функција.


МНТ и Археолошкиот музеј се поплавија, Алаѓозовски најави тужби за изведувачите


Скопје, 2 декември, 2017 - 15:35 (META) 

Министерот за култура, Роберт Алаѓозовски, рече дека новите објекти на Македонскиот народен театар и на Археолошкиот музеј ги имаат истите проблеми како и објектите изградени пред 60 години. Тој додаде дека поради врнежливото време, покривот на МНТ протекува.

– Поради силниот ветер, се откина дел од лимениот покрив на Центарот за култура во Штип. Ситуацијата дополнително се комплицира затоа што е на крај на фискална година и дури и тендери за итни работи не може да се спроведат до крајот на годината – изјави Алаѓозовски по денешниот увид во состојбата на објектот на МНТ.

Тој побара одговорност од изведувачите, надзорните органи и од стручните служби и упати апел до компаниите за да помогнат со донации или да интервенираат во институциите.

– Ќе утврдиме кој и зошто не ги извел квалитетно работите и ќе поднесеме тужби – изјави Алаѓозовски.


„Скопски џез-фестивал“ ќе се одржи од 13 до 16 октомври


Скопје, 7 октомври, 2016 - 16:37 (META) 

Пијанистот Бојан Зулфикарпашиќ ќе го отвори 35. „Скопски џез-фестивал“ на 13 октомври во МНТ.

Директорот, Оливер Белопета, денеска на прес-конференција соопшти дека нивна основна заложба е фестивалот програмски да го сочува исклучително високото квалитетно ниво и репутацијата што ја има во светот.

Фестивалот ќе трае до 16 октомври, ќе се одржува сите четири дена во Македонскиот народен театар (МНТ), каде ќе има вечерна програма и два полноќни концерти.


Познатиот режисер Томаж Пандур почина на проба на сцената во МНТ


Скопје, 12 април, 2016 - 14:25 (META) 

Познатиот словенечки режисер Томаж Пандур (52) денеска почина ненадејно за време на проба во Македонскиот народен театар.

Тој на сцената на МНТ од вчера ги почна пробите за претставата „Крал Лир“ од Шекспир.

Пандур, кој од Марибор се пресели во Мадрид, е признат европски режисер, а негови најпознати претстави се „Шехерезада“, „Тесла електрик компани“, „Хазарски речник“, „Хамлет“, „Медеја“.


Тони Михајловски, нов уметнички директор на МНТ


Скопје, 26 ноември, 2015 - 16:18 (META) 

За нов уметнички директор на Македонскиот народен театар, од денеска е поставен актерот Тони Михајловски. Тој доаѓа на оваа функција на местото на Дејан Пројковски, кој само еден месец беше директор на најголемата национална театарска институција во Македонија.

Оваа е прва ваква висока раководна функција на Михајловски од неговото вработување во МНТ, во 1994 година.


Македонски народен театар прославува 70 години


Скопје, 3 април, 2015 - 15:59 (META) 

Македонскиот народен театар прославува 70 години од основањето.

На 3 април 1945 година, МНТ почна да работи со изведба на претставата „Платон Кречет“ од Александар Корнејчук, а во режија на Димитар Ќостаров.

Прославата на јубилејот почна со промовирање на новиот тетарски музеј во кој што се изложени костими, скици од сценографии, лични предмети, фотографии, драмски текстови и на многу други реквизити кои биле дел од театарските претстави на МНТ, а подготвена од театрологот Јелена Лужина.

– Професорката Јелена Лужина и Јасмина Намичева конципираа поставка според највисоките музеолошки стандарди и ни овозможија на едно место да се запознаеме со една богата и значајна театарска историја – изјави Елизабета Канческа-Милевска, министерката за култура на Македонија.

Со изведбата на претставата „Вечната куќа“ од Јордан Плевнеш, во режија на Дејан Пројковски, почнува циклусот гостувања на ансамблите од другите градови на сцената на МНТ.

Галеријата фотографии е од денешното промовирање на содржините со кои ќе биде одбележан јубилејот.


Промовирани 20 дела од едицијата „Врвови на светската филозофија“


Скопје, 28 декември, 2014 - 17:28 (META) 

Во Македонскиот народен театар денеска беа промовирани нови 20 дела од едицијата „Врвови на светската филозофија, историја и психологија со психоанализа“.
– Се работи за научни гранки каде многу малку имаме преведено на македонски јазик и студентите, професорите, научните работници, па и граѓаните што сакаат да прочитаат нешто од таа област, најчесто беа упатувани тоа да го прават на други јазици, најчесто на јазиците на соседните држави – рече Груевски.

Преку проектот, според министерката за култура, Елизабета Канческа-Милевска, македонската стручна јавност и студентите добиваат уникатна можност за користење богатата продукција дела, кои се создадени во рамките на научната дејност на најреномираните британски, американски и германски универзитети.

Меѓу дваесетте книги се дела на британскиот филозоф, математичар и општествен критичар Бертранд Расел, на американски логичар и филозоф Вилар ван Орман Квајн, на Лангшоу Остин, на Мирослав Хрох, Џејмс Еванс, Иво Бањац, Михајло Поповиќ, Норман Нејмарк, Рој Медведев и на Ерик Хобсбаум и други. Проектот опфаќа 366 книги.


Театарски маратон по повод годишнината од новиот објект на МНТ


Скопје, 7 декември, 2014 - 10:51 (META) 

Македонскиот народен театар денеска по повод првата годишнина од отворањето на новиот објект и првата премиера, организира целодневен театарски маратон.

Маратонот почнува во 11 часот, со претставата „Госпоѓа министерка“, по која во 14 часот ќе биде изведена „Сомнително лице“. Во 16 часот ќе се одигра претставата „Свадбата на Фигаро“, додека во 18 часот „Изгубени Германци“.

Во рамките на маратонот се предвидени поетска вечер посветена на Блаже Конески, првиот драматург во МНТ, која ќе почне во 18:30 часот, како и промоција на печатеното издание на драмата „Вечната куќа“ и „Чај за двајца – Гостин Јордан Плевнеш“ во 20:15 часот.

Центарален дел од маратонот ќе биде големиот концерт „МНТ и пријателите“, со почеток во 21:30 часот, на кој ќе учествуваат актерите од ансамблот на МНТ и актери гости од другите театри.