МНР: Избегнувајте го центарот на Париз поради најавените протести


Скопје, 6 декември, 2018 - 14:36 (META) 

Министерството за надворешни работи на Македонија ги потсетува македонските граѓани кои планираат да патуваат во Париз дека на 8 декември е закажан протест и притоа предупредува да се избегнуваат одредени места во централното градско подрачје.

„Во тој период МНР препорачува да се избегнуваат местата во централното градско подрачје – плоштадите Конкорд и Бастиља, Триумфалната капија, Елисејската палата, Националното собрание“, пишува Министерството за надворешни работи во објавата на својата „Фејсбук“ страница.

Од МНР посочуваат дека граѓаните во итни случаи можат да ја контактираат амбасадата на РМ во Париз на телефонскиот број 0033680080890.


Од утре и во БиХ само со лична карта


Скопје, 30 ноември, 2018 - 14:06 (META) 

На сила утре ќе стапи Договорот меѓу Советот на министри на БиХ и Владата на Република Македонија за условите за патување на државјаните од двете земји, со кој се овозможува државјаните на БиХ и на Македонија да влегуваат во другата земја само со лична карта.

Со оваа новост, македонските државјани сега само со лична карта можат да патуваат сè до границите на Хрватска, односно само со овој документ може да се влезе на териториите на Албанија, Косово, Црна Гора, Србија и БиХ.

Документот го потпишаа министрите за надворешни работи на БиХ и на Македонија, Игор Црнадак и Никола Димитров на 12 март годинава.


МНР и врачи протестна нота на Унгарија поради бегството на Груевски


Скопје, 20 ноември, 2018 - 9:38 (META) 

Министерството за надворешни работи упати протестна нота до Унгарија откако осудениот експремиер Никола Груевски избега во Будимпешта и побара азил.

Во Министерството за надворешни работи бил повикан амбасадорот на Унгарија Ласло Дукс, на средба со државниот секретар Виктор Димовски.

„Целта на средбата беше предавање на протестна нота од македонска до унгарска страна, а по повод последните информации поврзани со бегството на Никола Груевски и неговото барање за азил во Унгарија“, велат од Министерството за надворешни работи.

Од таму информираат дека на средбата на унгарскиот амбасадор Дукс му било кажано дека Унгарија треба да постапи во духот на добрите билатерални односи, на европските вредности и принципи поврзани со владеење на правото.

„Во тој контекст веднаш и без одлагање се надеваме дека Унгарија ќе го отфрли барањето за добивање на азилантски статус на осуденикот и бегалец од правдата Никола Груевски и истиот ќе го предаде на Република Македонија, заради извршување на изречената казна затвор, како и продолжување и завршување на останатите судски постапки против него“, му рекол државниот секретар Димовски на амбасадорот Дукс.


МВР потврди дека Груевски е во Унгарија, унгарскиот амбасадор повикан во МНР


Скопје, 14 ноември, 2018 - 9:33 (META) 

Министерството за внатрешни работи (МВР) вчеравечер потврди дека поранешниот премиер и поранешен претседател на ВМРО-ДПМНЕ, а актуелен пратеник, Никола Груевски е во Унгарија.

Министерството за надворешни работи (МНР), пак, соопшти дека за да ја провери информацијата што Груевски ја изнесе на својата страница на Фејсбук, вчера го повикалo амбасадорот на Унгарија Ласло Дукс. Тој бил повикан на средба кај државниот секретар Виктор Димовски, со цел проверка на информацијата и по дипломатски канали. Димовски притоа нагласил дека Македонија е цврсто определена да опстои на вредностите на градење на правната држава, фунционирање на независното судство и борбата против организираниот криминал и корупцијата на сите нивоа, вклучувајќи ги и највисоките.

МВР вчеравечер соопшти дека од унгарското МВР добила потврда дека Никола Груевски е во Унгарија и дека побарал азил. Потоа до Основен суд Скопје 1 информацијата е пренесена, и сега судот треба да распише меѓународна потерница.


Бејли: Не бев во Собранието, гласањето го следев на телевизија


Скопје, 25 октомври, 2018 - 9:47 (META) 

По обвинувањата од руското Министерство за надворешни работи дека амбасадорот на САД во Македонија, Џес Бејли, бил во Собранието во текот на гласањето за почнување на уставните измени, тој вчера за телевизијата 21 ги негираше таквите тврдења, велејќи дека гласањето го гледал на телевизија, од неговата дневна соба.

– Јас тој ден работев во мојата канцеларија, учествував на настанот организиран од амбасадата вечерта и како повеќето граѓани на Македонија го следев гласањето на телевизија од мојата дневна соба – вели Бејли за телевизијата 21.

Како што вели тој пред камерата на ТВ21, сè што сториле од амбасадата на САД е изјавата со која го поздравиле гласањето.

– Јасно е дека се апсурдни обвиненијата дека САД нелегално се вмешани и влијаеле на гласањето во Собрание, тоа е апсурдно. Како што изјавивме, ние го поздравивме гласањето во Собранието на Македонија за иницирање на уставни измени и спроведување на Преспанскиот договор – вели Бејли.

Пред два дена Руското МНР обвини дека 8-те гласа од опозицијата се обезбедени со уцена, закани и поткуп.

„Пратениците се затворија во канцелариите, телефоните им беа одземени, се чини во духот на европската демократска пракса. Вреди да се спомне дека американскиот амбасадор бил во Парламентот до крајот на седницата, нешто што остава сомнеж за тоа кој го раководел овој процес“, порача во соопштението руското МНР.


Димитров и Палмер разговарале за новите политички случувања


Скопје, 22 октомври, 2018 - 14:14 (META) 

Министерот за надворешни работи Никола Димитров, денеска во македонското МНР се сретна заменик- помошникот државен секретар на САД за Европа и Евроазија, Метју Палмер, кој престојува во работна посета на Македонија.

На средбата се разговарало за евроатлантските перспективи на земјата, како и за актуелните политички состојби во Македонија и во регионот. Се зборувало за преговорите со НАТО, како и за почетокот на процедурата за уставните измени.

„Министерот Димитров упати благодарност за континуираната американска поддршка на евроатлантските интеграции на Република Македонија. Тој нагласи дека граѓаните иднината на својата земја ја гледаат во евроатлантското семејство и изрази уверување дека успешно ќе го изодиме патот кон заслуженото место во НАТО и во Европската унија“, соопшти МНР.


Грчки медиуми пак пишуваат дека со тајните пари на МНР биле финансирани македонски и албански медиуми


Атина, 19 октомври, 2018 - 11:26 (META) 

Околу еден милион евра од тајните фондови на грчкото МНР биле искористени за финансирање на медиуми во Македонија и Албанија и за поддршка на православни цркви, а обвинителството наредило истрага за објавување доверливи информаци, пишува информативниот грчки портал „Ефимерида тон синдактон“.

Според порталот, информациите се од 10 октомври, последниот пат кога бил известен грчкиот Парламент за тајните фондови, односно една седмица пред кавгата на Панос Каменос и Никос Коѕиас на владината седница.

„Според информациите, во запечатениот документ што во Парламентот го донесе специјален службеник од Министерството за надворешни работи имаше три кодови, додека пак вкупниот износ ставен на располагање изнесуваше околу 1.000.000 евра. Првиот код се однесуваше на парите распределени на медиуми во Албанија. Вториот код се однесуваше на финансирање на медиуми во поранешната југословенска Република Македонија. Третиот код се однесуваше на средства што беа распределени за поддршка на православни цркви и главно на православието“, објави грчкиот портал.

На прашањата на потпретседателите на Парламентот зошто биле финансирани медиуми во Македонија и Албанија, било објаснето дека тоа е „за да постојат позитивни написи за Грција и да се лобира врз тамошните новинари или раководствата на медиумите во корист на грчките интереси“.

„Мета“ веќе пишуваше за овој најнов скандал по оставката на Коѕиас, но и дека не е прв пат да се спонуваат „црни пари“, и тајни фондови во Грција за „финансирање“ странски и домашни медиуми и кампањи.

Во текот на 1989-1993 година, се пишуваше дека од тајните фондови на грчкото Министерство за надворешни работи, предводено од Антонис Самарас, грчки новинари добиле 130 милиони долари за да се промовира “грчкиот карактер на Македонија”!

– Сите средства се во црни пластични ќеси, налик на оние црни вреќи ѓубре. Таму никогаш нема проверка, секогаш исплатата беше во готово. Парите се главно за пропаганда на името на Македонија, но наместо да одат во странство, оваа пропаганда е насочена кон внатре, кон нашата земја – рече Мицотакис и пред комисија повика да се разјаснат на случајот.

Самарас беше сменет во 1992 година како министер за надворешни работи од страна на тогашниот премиер Мицотакис, кој го презеде Министерството за надворешни работи.

Истрагата заврши без заклучоци. Самарас јавно призна дека големи суми на пари биле исплатени на издавачи, новинари, па дури и на локалните власти, додавајќи дека сите пари биле искористени за “национално корисни цели”.

Доцна синоќа, според „Ефимерида тон синдактон“, Обвинителството во Атина наредило итна истрага за објавување доверливи информации, по написот на грчкиот информативен портал.

Претходно, со соопштение реагираше кабинетот на грчкиот премиер, во кое вели дека е „невидената бедност на порталот да објавува наводни информации за распределувањето на тајните фондови на Министерството за надворешни работи директно ги задира националните интереси“ и обвини дека зад тоа стои Нова демократија.

„Ако господинот Мицотакис сака да се информира за тајните фондови, да побара итно средба со премиерот“, соопштуваат од кабинетот на Ципрас.

За објавените информации од грчкиот портал реагираше и Никос Вуцис, претседателот на грчкиот Парламент.

– Предизвикува огорченост протекувањето во медиумите на наводните „доверливи трошоци“ на МНР, но во исто време покренува и сериозни прашања за целта и стремежите на оние политичари и електронските медиуми кои ги даваат и ги објавуваат овие „вести“ – вели Никос Вуцис во пишаната изјава.


Заедничката мултидисциплинарна комисија помеѓу Македонија и Бугарија ќе има втора средба


Скопје, 3 октомври, 2018 - 10:26 (META) 

На 4 и 5 октомври, во Скопје, ќе се одржи втората средба на Заедничката мултидисциплинарна експертска комисија за историски и образовни прашања, формирана согласно Договорот за пријателство, добрососедство и соработка меѓу Република Македонија и Република Бугарија, информираат од Министерството за надворешни работи.

На средбата, како што велат од МНР, се очекува членовите на Комисијата, согласно договорената методологија и принципи на работа, да разменат мислења поврзани со наставните содржини во образовните процеси во двете земји, како и можностите за заедничко одбележување на одредени историски настани и личности.


Софија: Политичарите во Македонија да покажат зрелост, губењето време никому не користи


Софија, 1 октомври, 2018 - 10:41 (META) 

Политичката елита на нашиот сосед мора да покаже зрелост и да најде начин да ги реши тешките проблеми, се вели  во соопштението на бугарското Министерство за надворешни работи за резултатите од референдумот, јавува дописничката на „Мета“ од Софија.

„Заложбата е иднината на државата и иднината на сите нејзини граѓани. Референдумот е највисока демократска практика, со изразена волја на оние кои учествуваа и кои не учествуваа. Граѓаните имаа слободен избор, и повеќе од 90 проценти од гласачите на овој консултативен референдум се изјаснија дека категорично се за евроатлантска интеграција“, се вели во соопштението на МНР на Бугарија.

Во него се додава дека гласот на граѓаните не може да се игнорира.

„Големо мнозинство на граѓани се за членство во ЕУ и во НАТО. Губењето време не е од корист ниту за земјата, ниту за регионот. Република Бугарија ќе продолжи да ги поддржува нашите браќа и сестри од Република Македонија и интеграцијата на државата во ЕУ и во НАТО“, се додава во соопштението.


За грчко МНР референдумот е контрадикторен, но го почитува изборот на граѓаните


Атина, 30 септември, 2018 - 21:48 (META) 

Голем дел од општеството го поддржа Договорот, друг дел го гледа со скептицизам, но Грција го почитува изборот на граѓаните од соседната земја, соопштија од Министерството за надворешни работи на Грција во однос на резултатите од референдумот.

Во соопштението се наведува дека „Грција одблиску, но со соодветна дистанца, ги следи случувањата“, а исто така, „останува обврзана кон Договорот од Преспа“.

„Резултатот од референдумот во Поранешната Југословенска Република Македонија, консултативен, а не дел од обврзувачките услови од Договорот од Преспа, е контрадикторен. Големо преовладување за „за”, но без соодветна  излезност. Голем дел од општеството на соседната земја го поддржаа Договорот. Но, еден важен дел го гледа со скептицизам. Грција го почитува изборот на граѓаните на Поранешната Југословенска Република Македонија“, соопштија од МНР.

Од таму додаваат дека „климата на национализам и сомнеж, секојдневните лажни вести и фанатизмот, не дозволувале да се направи трезвена проценка на големите придобивки од Договорот и го спречуваат взаемното разбирање меѓу народите.“

„Во следните чекори потребна е трезвеност од сите страни, независно, за да се обезбеди позитивна динамика на Договорот од Преспа“, се додава во соопштението.