Нимиц, Димитров и Коѕиас денеска се среќаваат во Виена


Скопје, 25 април, 2018 - 9:36 (META) 

Министрите за надворешни работи на Македонија и на Грција, Никола Димитров и Никос Коѕиас денеска во Виена ќе се сретнат со Метју Нимиц, посредникот во преговорите за името под покровителство на ОН.

Како што соопштија од седиштето на ОН во Њујорк, Нимиц ќе им „асистира на двете страни во изнаоѓање заедничко прифатливо решение за прашањето со името“.

Иако вчера еврокомесарот Јоханес Хан изрази оптимизам дека во следните две седмици може да се реши проблемот со името, премиерот Зоран Заев рече дека посакува, но не верува дека спорот со Грција ќе биде решен за две недели.

По изјавата на Хан реагираше и официјална Атина. Грчкото министерство за надворешни работи преку соопштение го повика еврокомесарот да престане да дава погрешна слика за преговорите, оти не ги разбира, а со такви изјави и ги поткопува.


Иванов не бил информиран, смета дека протерувањето на рускиот дипломат е избрзана одлука


Скопје, 27 март, 2018 - 15:04 (META) 

Претседателот на државата Ѓорге Иванов смета дека одлуката на македонското МНР да протера еден руски дипломат е избрзана, информираат од претседателскиот кабинет.

„Македонија како земја кандидат за членство во Европската унија, ја следи политиката на ЕУ и нивните одлуки донесени по пат на консензус и на ниво на ЕУ. Со оглед на тоа дека одлуките за протерување на руски дипломати не претставуваат израз на усогласени ставови на сите земји-членки на ЕУ, туку се работи за индивидуални одлуки на поедини земји-членки, претседателот на РМ смета дека одлуката на македонското МНР е избрзана“, се наведува во соопштението.

Иванов повикува на воздржаност од избрзани чекори во надворешната политика, за како што се посочува, да се спречи можното нанесување на штета во остварување на стратешките цели на Македонија.

Се додава дека претседателот, согласно позитивната законска регулатива, очекува да биде официјално информиран за посочените факти во јавноста, поврзани со овој случај.


Македонија протера руски дипломат, за Москва потегот е непријателски и неоправдан


Скопје, 26 март, 2018 - 22:12 (META) 

Министерството за надворешни работи објави дека одлучило да протера еден дипломат на Руската Федерација во Македонија заради случајот Скрипал.

„МНР во тесна консултација со нашите сојузници и партнери од ЕУ и НАТО и во солидарност со Обединетото Кралство на Велика Британија и Северна Ирска, одлучи да протера еден дипломат на Руската Федерација во Република Македонија заради случајот Скрипал, во согласност со член 9 од Виенската конвенција за дипломатски односи од 1961 година“, се вели во кусото соопштение во кое се додава и дека „користењето на воено хемиско оружје е во спротивност со Меѓународното право и тоа влијае на безбедноста на сите земји“.

На ова реагираше руската амбасада во земјава на твитер велејќи дека “одговорноста за последиците на одлуката за протерување на рускиот дипломат од Македонија целосно ќе биде на македонска страна“.

Руската амбасада смета дека протерувањето е „исклучително непријателски и неоправдан потег, без преседан во руско-македонските односи“.

САД, Канада и 14 земји од ЕУ денеска истовремено одлучија да протераат руски дипломати од нивните земји заради труењето на поранешниот руски шпион Сергеј Скрипал во Велика Британија.


Коѕиас пред МНР го дочека протест и транспаренти „Нашето име е Македонија“


Скопје, 23 март, 2018 - 10:51 (META) 

За време на средбата помеѓу македонскиот шеф на дипломатијата, Никола Димитров и неговиот грчки колега, Никос Коѕиас, пред Министерството за надворешни работи на протест се собрани група граѓани.

Тие носат транспаренти на кои на англиски јазик е напишано „Нашето име е Македонија“, „Коѕиас оди си дома, не си добредојден во Македонија“, „Стоп за холокаустот против Македонците“ и „Стоп за расизмот и дискриминацијата кон Македонците“.

Коѕиас и Димитров по средбата ќе имаат заедничка прес-конфренција, по што грчкиот министер за надворешни работи ќе се сретне со премиерот Зоран Заев, претседателот на Собранието, Талат Џафери, вицепремиерот за европски прашања Бујар Османи, а попладневно во Собранието ќе има средба и со лидерот на ДУИ, Али Ахмети.


Димитров од утре во Бугарија на средби со Борисов, Радев и Захариева


Скопје, 13 февруари, 2018 - 14:07 (META) 

Шефот на македонската дипломатија, Никола Димитров, од утре до 16 февруари ќе престојува во работна посета на Бугарија, соопшти Министерството за надворешни работи.

За време на посетата е предвидено тој да има средби со бугарскиот претседател Румен Радев, премиерот Бојко Борисов и со министерката за надворешни работи на Бугарија, Екатерина Захариева.

„Во рамки на билатералната средба со министерката Захариева, која е закажана за утре, предвидено е министрите да извршат размена на ратификациони документи на Договорот за пријателство, добрососедство и соработка, со што и практично ќе се заврши формалната постапка за стапување на Договорот во сила, по неговата ратификација во Собранието на Република Македонија, на 15 јануари 2018, и во Националното Собрание на Република Бугарија на 18 јануари 2018“, стои во соопштението.

Од МНР информираат и дека на покана на високата претставничка на Европската Унија за надворешни работи и безбедносна политика, Федерика Могерини и министерката за надворешни работи на Бугарија, Екатерина Захариева (во својство на земја претседавач со Советот на ЕУ), Димитров на 15 и 16 февруари ќе учествува и на неформалниот состанок на Министрите за надворешни работи на земјите-членки на Европската унија и земјите-кандидати за членство во ЕУ – Македонија, Албанија, Црна Гора, Србија и Турција – Гимних што ќе се одржи во Бугарија.

Дискусиите на состанокот ќе се фокусираат на соработката и партнерството во областа на безбедноста и одбраната.


Заврши седмиот состанок помеѓу Македонија и Грција за мерките за градење доверба


Скопје, 9 февруари, 2018 - 19:50 (META) 

На денешната седма рунда на консултации во врска со мерките за градење доверба помеѓу Македонија и Грција од МНР информираат дека биле усогласени области на соработка кои вклучуваат проекти за поврзување, полициската соработка, европски програми, култура, образование, цивилната заштита, јавната администрација, здравството, соработката меѓу дипломатските академии, како и реализацијата на бизнис иницијативи.

Соработка била иницирана и во областа на сеизмологијата, а бил парафиран и Меморандум за разбирање за соработка на полето на цивилната заштита. Следниот состанок ќе се одржи во Атина

„Состанокот претставуваше продолжение на пријателскиот и конструктивен дијалог за различни области од заеднички интерес, во поддршка на напорите на Владите во создавањето на позитивна политичка клима во билатералните односи меѓу двете земји. Свој придонес во дискусијата дадоа и експерти од соодветните национални институции“, информираат од МНР.


Делегации на македонското и на грчкото МНР ќе одржат состанок утре во Скопје


Скопје, 8 февруари, 2018 - 20:52 (META) 

Седмата рунда на консултации помеѓу министерствата за надворешни работи на Македонија и на Грција, како дел од мерките за градење на доверба помеѓу двете земји, ќе се одржи утре во зградата на министерството за надворешни работи во Скопје, со почеток во 09.55 часот, информираа од таму.

„Се очекува во двете делегации учество да земат и претставници на повеќе ресорни институции“, се додава во соопштението на МНР.

Од МНР не информираа кој ќе биде во составот на македонската и на грчката делегација.


Димитров – Бјорнстад: Норвешка двојно ќе ја зголеми финансиската помош за Македонија


Скопје, 7 февруари, 2018 - 17:42 (META) 

Министерот за надворешни работи, Никола Димитров денеска имал средба со амбасадорот на Норвешка во земјава, Арне Санес Бјорнстад, во чиј фокус била норвешката поддршка за евроатлантската интеграција на Македонија, вклучително и проектната помош за подобрување на подготвеноста на Македонија за отпочнување на пристапните преговори со Европската Унија.

Амбасадорот Бјорнстад ја повторил поддршката за евроатланската интеграција на Македонија и неопходните реформи и информирал за одлуката на Норвешка за двојно зголемување на финансиската помош за Македонија во наредниот период.

Двете земји во август 2017 година во Осло потпишаа заедничка изјава за партнерство и соработка.

„Последна потврда за истата е започнувањето на проектот за техничка помош наменет за подобрување на капацитетите за процесирање и заштита на документи и унапредување целокупниот систем за комуникации на Министерството за надворешни работи на Република Македонија, како корисник на проектот. Спроведувањето на овој проект со времетраење од 12 месеци е предвидено да заврши до крајот на 2018 година, додека проценетата вредност на средствата за неговото спроведување изнесува 1,5 милиони евра“, стои во соопштението на Министерството за надворешни работи.

Иако не е членка на ЕУ, Норвешка во континуитет го споделува своето големо искуство во преговарањето и одржувањето тесни врски со Унијата преку Европската економска област, Шенгенската зона и други форуми на соработка.


Грчко МНР: Преименувањето на автопатот и аеродромот е важен исчекор од иредентизмот


Атина, 6 февруари, 2018 - 20:32 (META) 

Министерството за надворешни работи на Грција вечерва ја поздрави одлуката на македонската влада да ги преименува автопатот „Александар Македонски“ и скопскиот аеродром „Александар Велики“ во „Пријателство“ и „Меѓународен аеродром Скопје“.

„Ја поздравуваме денешната одлука на владата на Поранешна југословенска република Македонија да го преименува аеродромот кај Скопје во „Меѓународен аеродром Скопје“ и автопатот што ги поврзува Скопје и грчката граница во „Автопат Пријателство“. Денешната одлука е позитивен чекор кон поништување на она што се случи во изминатата деценија и создаде тензии во односите меѓу двете земји. Ова е важен развој во правец на справување со иредентизмот и се надеваме дека ќе одбележи почеток на ново поглавје во односите меѓу двете земји и двата народа“, гласи соопштението од грчкото МНР.


Атина му се налути на Хан оти за „Шпигел“ рекол Македонија, а не ФИРОМ


Атина, 5 февруари, 2018 - 12:08 (META) 

Грчкото министерство за надворешни работи вчера се огласи со остра реакција на еврокомесарот Јоханес Хан поради неговите бројни изјави во кои кажува „Македонија“ наместо ФИРОМ.

Во обемно интервју за германскиот магазин „Шпигел“, Хан постојано го употребува името Македонија кога зборува за преговорите за пристапување на земјава во ЕУ.

Атина го повика Хан да „го почитува меѓународниот правен поредок“.

„Го повикуваме комесарот Хан да го почитува меѓународниот правен поредок и да се воздржи од нарушување, меѓу другото, на одлуките и заложбите на Европската Унија. Посебно среде актуелната критична конјуктура, кога се одвиваат валидни преговори. Неговите постојани грешки не придонесуваат за постигнување напредок во преговорите за спорот за името. Ниту пак се конзистентни со конструктивната улога што членовите на Европската Комисија треба да ја играат“, гласи реакцијата на грчкото МНР.