Од денеска почнува аплицирање за субвенции за трета фаза произведено и предадено млеко


Скопје, 10 октомври, 2018 - 11:40 (META) 

Агенцијата за финансиска поддршка во земјоделството и руралниот развој, ги известува млекопроизводителите дека е во тек поднесувањето на барањата за директни плаќања за произведено и предадено овчо, козјо и кравјо млеко во периодот  од мај до септември 2018 година, односно за трета фаза млеко.

„Рокот за поднесување на барањата е до 5 ноември, висината на поддршката изнесува четири денари по литар за овчо и козјо млеко, и 3,5 денари по литар за кравјо млеко. Барањата се поднесуваат по електронски пат во подрачните единици на Министерството за земјоделство, шумарство и водостопанство каде што е регистрирано земјоделското стопанство“, се вели во соопштението.

Исто така, на 5 ноември 2018 година завршува и рокот за поднесување на барања за директни плаќања за несилки внесени во капацитет за производство на јајца во период од 1 мај до 30 септември 2018 година. Висината на поддршката изнесува 100 денари за купена и внесена неслика во одгледувалиште на кокошки несилки за производство на јајца.

„Барањата се поднесуваат во писарницата на Агенцијата за финансиска поддршка во земјоделството и руралниот развој, лично или пошта. Образецот за поднесување на барањата како и потребната документација може да поднине во Агенцијата или да се превземе од веб-страната: www.ipardpa.gov.mk, во полето „Директни плаќања 2018“, „Обрасци““, додаваат од таму.


Откупот и продажбата на земјоделски производи намалени во однос на лани


Скопје, 16 август, 2018 - 10:27 (META) 

Според податоците на Државниот завод за статистика, во второто тримесечје од 2018 година, откупот и продажбата на земјоделски производи се намалени за 4,4% во однос на истиот период од претходната година.

Позитивна промена има кај откупот на земјоделски производи од индивидуалните производители, каде е забележано зголемување за 14%, а кај продажбата на земјоделски производи од сопствено производство е забележано намалување за 16,5% во однос на лани.

Зголемувањето на откупот и продажбата на земјоделски производи има кај индустриските растенија, овошјето, добитокот, живината и јајцата и млекото, а намалување е забележано кај житата, градинарските растенија, фуражните растенија, алкохолните пијалаци, млечните производи и рибата.

Вредноста на откупот и продажбата на земјоделски производи покажува намалување во април и мај, во однос на истите два месеци во 2017 година, додека во јуни е забележано зголемување на вредноста на откупот и продажбата на земјоделски производи.


Агенцијата за храна за шест месеци открила 61 тон небезбедна храна


Скопје, 6 јули, 2018 - 13:12 (META) 

Агенцијата за храна и ветеринарство (АХВ) соопшти дека од почетокот на годината до крајот на јуни открила вкупно 60.809 килограми небезбедна храна од животинско потекло, односно месо, производи од месо и од млеко, риби, мед и јајца.

Од тоа, АХВ уништила 17.141 килограми небезбедна храна, а поголемиот дел, или 43.668 килограми, биле уништени од фирмите, врз основа на налози од Агенцијата.

Од вкупното количество од речиси 61 тон храна, 59,3 тони се од домашно производство, а остатокот од увоз.

Агенцијата ги повикува граѓаните случаи на небезбедна храна да пријавуваат на бесплатната телефонска линија за потрошувачите 0800 3 22 22 или електронски на info@fva.gov.mk.


Забранет увоз на месо, млеко од овци и кози, како и на животни од Бугарија


Скопје, 2 јули, 2018 - 14:38 (META) 

Агенцијата за храна и ветеринарство (АХВ) донела Решение со кое се забранува увоз од Бугарија и транзит преку македонска територија на живи домашни и диви мали преживари (овци и кози), како и сперма, јајце клетки и ембриони од домашни и диви мали преживари со потекло од оваа земја. АХБ забранува и увоз на месо, производи и преработки од месо од овци, кози, односно домашни и диви мали преживари, како и млеко и производи од млеко, но и сите можни производи и препарати од оваа категорија животни.

Забраната е поради појавата на чума кај мали преживари, која во Бугарија е потврдена од 22 јуни годинава е потврдена. Болеста ја има и во Турција.

Симптоми по кои може да се препознае ова заболување во стадото се: треска, рани во устата, дијареа, пневмонија (проблеми со дишењето), абортуси кај бремените животни и смрт кај животните. Болеста најтешко се манифестира кај младите животни, а кај козите повеќе од овците. Вирусот се излачува преку солзите, исцедокот од ноздрите, со кашлање и преку изметот од заразените животни, а болеста се шири преку директен и близок контакт меѓу животните. Водата, коритата за исхрана на животните и постелката, исто така, може да бидат загадени со различни исцедоци од животните и да предизвикуваат зараза, објаснија од АХВ.

Агенцијата апелира сточарите да внимаваат дали ќе се појават симптомите кај животните и да пријавуваат случаи, а ги алармирала и македонските ветеринари.


„Лакталис“ повлекува храна за бебиња поради салмонела


Париз, 12 јануари, 2018 - 19:26 (META) 

Француската компанија „Лакталис“ ќе го повлече млекото за бебиња произведено во фабриката во градот Краон, откако десетици бебиња заболеа од бактеријата салмонела. Досега се утврдени 35 вакви случаи во Франција, едно во Шпанија, а има еден сомнителен случај и во Грција, но допрва треба да се утврди дали бебето се разболело од млекото на „Лакталис“ произведено во Краон.

Министерот за финансии на Франција, Бруно ле Мер денеска информираше дека целото количество бебешка храна произведена во оваа фабрика во западна Франција кое е пуштено во продажба ќе биде повлечено.


Додека мечката рика во Беловиште, мече шармира во рибен ресторан во Чегране


Чегране, 11 јули, 2017 - 12:16 (META) 

Дали над тетовското село Беловиште рика мечка што си го бара одземеното мече или, пак, се вртка околу локалитетот Петачко Водиче привлечена од кантите и од вреќите за ѓубре кои се полнат од бројните посетители на овој извор над селото и денеска останува енигма.

Meche 2 restoran Delfin Chegrane jul17 - chitatelkaИстовремено, „Мета“ пронајде едно мече, 40-тина километри подолу, во гостиварско Чегране, кое се чува како „атракција“ во рибен ресторан во селото и се „рекламира“ на нивниот фејсбук-профил.

Во разговор со надлежните од Министерството за земјоделство, шумарство и водостопанство за реонот околу Беловиште, дознавме дека до претпладнево нема информации за „мечешката мистерија“, но уверија дека „се работи на утвдување на деталите“. Според верзија што ја кажуваат жителите во Беловиште, пред неколку денови мечката се симнала до селото со двете мечиња, при што едното влегло во плевна на еден селанец. По ден-два мечето, наводно, било однесено од селото.

Meche 3 restoran Delfin Chegrane jul17 - chitatelkaЧитателка која ја прочитала вчерашната статија на „Мета“ за мечките над шарпланинското село, ни го посочи мечето што е главна атракција во селото Чегране.

Како што може да се види од фотографиите на фејсбук-страницата на рибниот ресторан „Делфин“, таму сосема комотно, покрај пауните и пони-коњите, си живее мало мече.

– Си дојде самото и никако не можевме да го избркаме. Што да му правиме, пријавивме кај ветеринарот Горан во Тетово, па чекаме сега тој да ни каже што понатаму. Тешко ни е да го чуваме, по четири литри млеко на ден пие. Плус му пасираме во блендер јаболки и друго овошје. Има голем апетит. Не ќе може да го држиме многу, ама пак ќе видиме со тие што се надлежни – објаснува вработен во ресторанот.


Министерството за финансии исплатило 13 милиони евра субвенции на земјоделците


Скопје, 18 мај, 2017 - 12:49 (META) 

Министерството за финансии исплатило 463 милиони денари (7.528.455 евра) субвенции за земјоделците за 2015 година и 364 милиони денари (5.918.699 евра), за дел од 2016 година, соопштуваат оттаму.

„Целосно се намирени обврските за субвенции заклучно со 2015 година, односно за фуражни култури, житарици, ориз, градинарство, овошни насади, лозови насади, говеда, несилки, млеко, органзко производство и за рурален развој. Во рамки на исплатената сума се и 364 милиони денари (5.918.699 евра) субвенции за 2016 година за млеко и за оризова арпа“, велат од Министерството.

Оттаму додаваат дека Министерството почнало со исплатата веднаш по објавување на одлуката на Уставен суд во „Службен весник“ со која ги отстранува законските пречки за исплата.

Претседателот на Сојузот на синдикатот на земјоделците во Струмичкиот Регион, Ристо Велков, вели дека утре ќе знаат дали Министерството ги префрлило парите.

Субвенции на земјоделците не им беа исплатени за цела 2016 година и дел за 2014 и за 2015 година, а станува збор за сума од 100 милиони евра.


Се зголемува откупот и продажбата на земјоделски производи


Скопје, 16 февруари, 2017 - 14:05 (META) 

Откупот и продажбата на земјоделски производи во четвртото тримесечје од 2016 година се зголемени за 39,3 проценти во споредба со истиот период од претходната година, објави Државниот завод за статистика.

Кај откупот на земјоделски производи од индивидуалните производители има зголемување за 65,4 проценти, а кај продажбата на земјоделски производи од сопствено производство намалување за 2,9 проценти.

Зголемување на откупот и продажбата на земјоделски производи има кај индустриските, градинарските и фуражните растенија, овошјето, добитокот, живината и јајцата и млечните производи, а намалување кај житата, грозјето, алкохолните пијалаци, млекото и рибата.


Прентовиќ: Земјоделците се незадоволни од договорените 8 денари по килограм пченица


Прилеп, 20 јули, 2016 - 13:13 (META) 

„Земјоделците се соочуваат со ниската откупна цена на пченицата и на млекото, а дополнително во изминатиот период им се случија и големи штети предизвикани од град и од поплава. Иако оваа година има добри услови за производство на пченица, земјоделците се незадоволни од договорените осум денари по килограм, кои не ги покриваат ни производствените трошоци, а не тие да заработат“, изјави претседателката на комисијата за земјоделство на СДСМ, Татјана Прентовиќ, по средбите со земјоделците од Крушево, Кривогаштани и во Прилеп.

Како друг проблем, Прентовиќ истакна дека се јавуваат и лиценцирани и диви откупувачи кои ја откупуваат пченицата од земјоделците за шест-седум денари.

– Во најава е следните денови откупната цена на пченицата да биде и пет денари. Се поставува прашањето дали Владата ќе се погрижи, а тоа очекуваме да го направи, да го сочува лебното жито во Македонија и дали воопшто за лебот во Македонија ќе се загрижи? Во исто време, земјоделците се соочуваат со ниската откупна цена на млекото, која изнесува од 12 до 14 денари кај помалите, па до 16 денари кај покрупните млекопроизводители. Но, и овие земјоделци или сточари имаат проблем со ниската откупна цена бидејќи таа не ги покрива нивните производствени трошоци, кои изнесуваат од 20 до 22 денари за еден литар произведено млеко – изјави Прентовиќ.

Таа го повика Министерство за земјоделство да им излезе во пресрет на земјоделците и да најде начин да помогне во откупот на пченицата, на млекото, па и на другите земјоделски производи.


СДСМ: 600 домаќинства преживуваат со пари колку што чинат едни очила на Груевски


Скопје, 22 јуни, 2016 - 15:12 (META) 

„Дури и Државниот завод за статистика, којшто множи и дели како што ѝ одговара на власта на Никола Груевски, не успеа да го скрие податокот дека една третина од домаќинствата во Македонија го живеат месецот со само 106 евра месечен приход. Тоа значи дека 600 домаќинства во земјава преживуваат цел месец со парите што ги дал Груевски само за неговите очила „мајбах“, со кој беше фотографиран на лежалка во Израел лани“, се вели во соопштението на СДСМ.

Во него се додава дека со 200 денари дневно родителите од околу 60.000 семејства треба да купат млеко за децата, да ги облечат за градинка и за училиште, да ги однесат, да ги пратат на факултет, тие да отидат на работа, да обезбедат појадок, ручек и вечера и да тргнат настрана за струја, вода и за телефон.

– Според Светска банка, 180.000 граѓани во Македонија живеат уште помизерно, со 40 денари на ден. Дури третина од граѓаните во земјава, повеќе од 500.000 луѓе, живеат под прагот на незапаметена сиромаштија. И сето ова за „фамилијата на власт“ 10 години да се богати и да се луксузира на нивни грб, со нивните пари, на милионски парцели, во милионски палати и во „мерцедеси“ од 600.000 евра – се вели во соопштението на опозициската партија.